Hórnikecy (KD/SN). Dźěłowy swět za­šłych časow dźensnišim generacijam zna­zornić je jedyn ze zaměrow Hórni­kečanskeje Energijoweje fabriki. Tomu słuži nětko tež wosebita wustajeńca „Wuměłstwo a brunica – Dźěło a hórnistwo we wuměłstwje NDR“, kotruž su tam njedawno wotewrěli. „Fota a mólby poka­zuja dźěłaćerjow, brigady a produkciske wuměnjenja w zawodach Němskeje demokratiskeje republiki. Wone hódnoća wukony ludźi tehdyšeho časa a jich dźě­ło­we biografije“, rjekny zapósłanc Sakske­ho krajneho sejma Thomas Baum (SPD) na wotewrjenju. Přehladka ma nastorčić dawno trěbnu diskusiju wo njezamoł­witym wotwiwanju mnohich zawodow we wuchodnej Němskej po kóncu NDR.

Wosebita wustajeńca wopřijima mjez druhim mólby Dietera Dresslera, fotografije Jürgena Maćija a rysowanki Maje Nageloweje. Poslednje mjenowane po­ka­zuja změnu łužiskeje krajiny a dalše wob­staće jeje serbskeje identity, praji nawod­nica Hórnikečanskeho muzeja Kirstin Zinke. Zajimawa přehladka w energijowej fabrice wostanje nětko hač do 16. septembra přistupna.

Hołk a tołk knježeštej zawčerawšim na jubilejnych burskich wikach w Koćinskim zawodźe Krabatowy mlokowy swět. Přijomne nalětnje wjedro je naladu hišće přisporjało.

Koćina (SN/BŠe). Je stajnje derje znać městno, hdźež wudźěłk nastawa. To wědźa tež zamołwići Krabatoweho mlokoweho swěta w Koćinje, hdźež su njedźelu mjeztym dźesate wulke burske wiki přewjedli. Wšitke kročele – wot produkcije mloka hač k zhotowjenju twarožka – móžachu sej ludźo dosć wobrazliwje wobhladać. Dwaceći družin twarožka tam mjeztym poskićeja. A wobstajnje dźěłaja na dalšich idejach.

Na wurjadnym posedźenju chcedźa so radźićeljo z „Krónu“ zaběrać

Budyšin (CK/SN). Tydźeń po tym, zo bě Bu­dyska měšćanska rada rozsudźiła, wo kupje „Króny“ dale jednać, je wyši měšćanosta Alexander Ahrens (SPD) přećiwo tomu weto zapodał. Dwaceći ra­dźi­ćelow chce wo kupje dale jednać, jědnaćo su přećiwo tomu. Swoje znapřećiwjenje wobkrući wyši měšćanosta z přeńdźenjom přećiwo sakskemu komunalnemu porjadej. Njeje spóznajomne, za kotry za­měr­ ma so twarjenje kupić. Nimo toho pjenjezy za to ani lětsa ani klětu zapla­nowane njejsu. „Měnju, zo je wobzamknjenje njeprawniske a na škodu města Budyšina“, Ahrens zwurazni.

Za dalše jednanja wo „Krónu“ zasa­dźeja so frakcije CDU, FDP, Wobydlerski zwjazk BBB a bjezfrakciski zapósłanc Zele­nych. Měnjenja wo tym, kak ma so teren měšćanskeje hale a parkowanišća wužiwać, pak su rozdźělne. Po wuprajenju Utty Winzer, rěčnicy wobydlerskeje iniciatiwy za zachowanje „Króny“, by po po­sudku wužiwanje na dalše 20 lět móžne było. Financować hodźała so kup z dochodow z parkowanišća a ze spěchowanskimi srědkami Europskeje unije.

Budyska „Króna“ wuwabja tuchwilu kontrowersne diskusije, kaž mjez měšćanskimi radźićelemi a wyšim měšćanostu tak tež mjez wobydlerjemi. Prašenje je, hač ma město twarjenje a parkowanišćo na eksponowanym městnje kupić abo nic a – jeli haj – što ma so tam potom stać. Najlěpje lubi so mi namjet radźićela CDU, zo měła sej komuna tónle filet wosrjedź města zawěsćić a woměrje rozmyslować, što ma so z nim dale stać. Na te wašnje drje móhła wona najlěpje tomu zadźěwać, zo stanje so „Króna“ z objektom spekulacijow. Ja měnju, zo Budyšin tajku měšćansku halu trjeba. Zawěsće to tež mnozy Serbja tak widźa, kotřiž su tam w minjenych lětdźesatkach na schadźowance, na ptačich kwasach abo na dalšich wulkich serbskich zarjadowanjach byli. By škoda było, jeli so tajka městnosć zhubi, dokelž so zamołwići dojednać njemóža. Marian Wjeńka