Policija (23.05.17)
Telewizor a radijo fuk
Torońca. Njeznaći zadobychu so w nocy na njedźelu do zahrodoweje ležownosće w Torońcy (Daranitz) w Kubšiskej gmejnje. Ze zahrodoweho domčka pokradnychu płony telewizor a radijo w cyłkownej hódnoće 500 eurow. Wěcnu škodu trochuje wobsedźer na 100 eurow.
Z awtom do štoma
Bukecy. Z dotal njeznateje přičiny je njedźelu připołdnju 78lětna wodźerka wosoboweho awta na zwjazkowej dróze B 6 na kromje Bukec na prawy bok jězdnje zajěła. Tam zrazy jeje Opel Corsa do štoma a rentnarka so snadnje zrani. Na městnje zasadźeni běchu lěkar, wohnjowi wobornicy a wotwlečenska słužba. Na awće nasta 8 000 eurow škody.
W lěću hort tydźenjej zawru
Hodźijscy gmejnscy radźićeljo su so na swojim zašłym posedźenju z prašenjom zaběrali, hač měli hort w prózdninach zawrěć. Na wotpowědnym naprašowanju pak njebě so ani třećina staršich wobdźěliła.
Hodźij (CK/SN). W třećim a štwórtym tydźenju lětnich prózdnin wostanje Hodźijski šulski hort zawrjeny. To je gmejnska rada nětko z jednym napřećiwnym hłosom wobzamknyła. Z naprašnikom bě šula potrjebu hladanja w horće zwěsćiła, ale jenož 28 procentow staršich so na tym wobdźěli. Dźewjeć procentow sej přeje, zo so zawrjenski čas w lěću wotstroni. Tón běchu zawjedli, zo móhli wšitke kubłarki dowol činić. Hewak dyrbjeli to někotre w šulskim času, štož by woznamjenjało, zo skupiny zdźěla hromadu połoža. Nimo toho přewjeduja w prózdninach hladanske a wuporjedźenske dźěła, rjekny nawodnica hłowneho zarjada Ines Henichowa.
Serbscy pohončojo sobu jěli
Ramnow (BeW/SN). Při najrjeńšim wjedrje je so zawčerawšim 59 zapřahow wokoło Ramnowskeho barokoweho hrodu zhromadźiło. Mjez pohončemi bě tež tójšto serbskich mjezwočow. Tak měješe na přikład Roman Čórlich z Kanec hnydom štyri konje před wozom, Maćij Šefer z Hory bě jednopřežnje z mandźelskej a synom po puću, Krystof Šołta z Jaseńcy měješe na swojim nowym wozu hnydom črjódku muzikantow.
Po wujězdźe z hrodoweho dwora poda so cyła wulka skupina korejtow pod přikleskom publikuma na 30 kilometrow dołhu čaru. Cil bě město Biskopicy, kotrež swjeći swoje 790lětne wobstaće.
Zabawny mejski swjedźeń su sej minjenu sobotu w Šešowje ...
Třeći pospyt so poradźił
Stróža (aha/SN). Sta dźěći z cyłeje Němskeje su so na wubědźowanskej akciji dźěćaceho telewizijneho kanala ARD a ZDF „KIKA přińdźe k tebi“ wobdźělili, zo bychu swojich rjekow z telewizijnych programow wosobinsce zeznali. Mjez nimi bě dźesaćlětna Ruth Hembitski, šulerka 4. lětnika ze Stróže pola Rakec. Jeje hobbyjej stej karate a hudźba, a wězo sej tež rady dźěćace wusyłanja sćelaka KIKA wobhlada. Pozdźišo chce so stać z policistku abo wučerku. Zhoniwši z telewizije wo cyłkownje třoch rozdźělnych wubědźowanskich akcijach wobdźěli so wona z přewšo žortnym rapom, zo by swojej woblubowanej figurje „chlěbej Berndej“ posměwk wuwabiła. Nahrawany a wot njeje wuhotowany widejo, hdźež spěwaše, rejwaše a žortnje powědaše, je zapodała, a jurorojo mějachu jón za najlěpši ze wšěch. To bě tež přičina, zo stej wčera popołdnju na rjenje hladanu wulku zahrodu pola Hembitskec w Stróži redakciski team KIKA z Erfurta kaž tež kamera-team Mnichowskeho studija Bumm-film k nahrawanju přinoška přijěłoj.
Krótkopowěsće (23.05.17)
Kabinet so w Praze schadźował
Praha. Składnostnje pjećlětneho wobstaća swojeho kontaktneho běrowa w čěskej stolicy je so sakske krajne knježerstwo z ministerskim prezidentom Stanisławom Tilichom (CDU) dźensa w Praze schadźowało. Hósć posedźenja bě čěski hospodarski minister Pavel Bělobrádek. Kontaktny běrow je w twarjenju Serbskeho seminara zaměstnjeny.
Wabja za wopyt wustajeńcy
Drježdźany. Z informaciskim kašćikom wot dźensnišeho na Drježdźanskim lětanišću za to wabja, Žitawski pokład historiskich narownych taflow wopytać. Přehladka wo „cyle hinašej reformaciji w Hornjej Łužicy“ je hač do apryla 2018 přistupna. Wona wopřijima 80 eksponatow ze 16. a 17. lětstotka.
Projekt šulerjow nominowany
Wostrowc. Mjezynarodny zetkawanski centrum Marijiny doł we Wostrowcu je za lětuše myto UNESCO nominowany, kaž rěčnica Němskeje UNESCO-komisije zdźěla. Při tym dźe wo projekt, z kotrymž młodostni přeslědźa, što móhło so w jich wokolinje na dobro škita klimy a při lutowanju energije wšitko polěpšić. Na projekće wobdźěla so wjace hač sto šulerjow.
Wustajeńca skići nowe dohlady do knihi knihow
Oberlichtenau (AK/SN). Nowa trajna wustajeńca bibliskeje zahrody w Oberlichtenauwje pola Połčnicy wěnuje so pochadej, stawiznam, rozšěrjenju a skutkowanju biblije. „Wot Kanaana do Sakskeje – Expo testamente“ rěka jeje tema. Zběrka pochadźa wot Bonnskeho teologi a publicista Francoisa Traudischa. Wona wopřijima nimo chronologiskich informaciskich taflow tójšto napodobnjenjow antikskich namakankow, originalne rukopisy a wšelke modele. „Tale zběrka je jónkrótna. Wona bě zakład za mnohe wustajeńcy biblijow po wšej Němskej. Nětko wostanje original pola nas“, podšmórny iniciator bibliskeje zahrody Maik Förster sobotu na wotewrjenju. „Přehladka naše wobsahi wudospołnja a wobohaća.“
Zajimawostki kołowokoło muzeja
Njeswačidło (LR/SN). Składnostnje Mjezynarodneho dnja muzejow wotmě so wčera w Njeswačidle 13. muzejowy swjedźeń. Wo lěta 2004 załoženy domizniski muzej stara so skupina zajimcow tamnišeho Towarstwa přećelow domizny a kultury. Jich nawoda Arnd Lehmann móžeše wčera hižo 36. wosebitu wustajeńcu wotewrěć. Wona wopřijima něhdyšu medicinsku techniku. Widźeć su na přikład nastroj k měrjenju krejneho ćišća, wšelaki operaciski grat, utensilije za hladanje chorych a nastroj za terapiju z kislikom z lěta 1930. Wustajer Wolfgang Krusch z Drježdźan bě loni hród a park w Njeswačidle wopytał a zwiski k tamnišemu domizniskemu muzejej nawjazał.
Policija (22.05.17)
Kamele wosrjedź města
Połčnica. Lědma swojim wočam wěrić chcychu wobydlerjo sobotu wječor w Połčnicy. W bydlenskej štwórći wuhladachu woni kamelej, a wonej sej tam woměrje łopjena štoma słodźeć daštej. Kaž so pozdźišo wukopa, běštej skoćeći z cirkusa ćeknyłoj, kotryž měješe w bliskosći swój stan natwarjeny. Sobudźěłaćerjo za štyrinohačomaj hižo pytachu a su jej dosahnyli, prjedy hač přiwołani policajscy zastojnicy přijědźechu.
Teksty chcedźa hišće zwučować
Na wjacorych městnach Hornjeje Łužicy su kónc tydźenja mejemjetanje swjećili. We Wotrowje činja to hižo wjacore lěta na swojim nowym sportnišću za wosadnej cyrkwju.
Wotrow (aha/SN). Mejemjetanje při přijomnym wjedrje sobotu nawječor bě wulkej ličbje wjesnjanow kaž tež wjacorym ze susodnych wsow přewšo rjane dožiwjenje. Na swjedźenskej łuce skićeše so jim spodobny wobraz, jako zarejwa dohromady 38 porow dźěći a młodostnych znate serbske rejki.
