Šula a wopłóčki lětuše ćežišća
Gmejnska rada Łaz hospodarski plan schwaliła
Łaz (AK/SN). Něhdźe 5,6 milionow eurow chce Łazowska gmejna lětsa inwestować. „Ličimy ze štyrjomi milionami eurow spěchowanja, naš podźěl wučinja 1,6 milionow eurow“, rozłoži komornica Mandy Liepert na wčerawšim posedźenju gmejnskeje rady. Z jednym napřećiwnym hłosom a štyrjomi wzdatymi radźićeljo hospodarski plan 2017 schwalichu. Ćežišći stej ponowjenje Wulkoždźarowskeje zakładneje šule a twar wopłóčkoweje syće we Wulkich Ždźarach a Koblicach.
W zakładnej šuli chce gmejna awlu wutwarić a před woknami škit před słóncom připrawić. Za to ma dohromady 444 000 eurow k dispoziciji. Za energetiske saněrowanje fasady Wulkoždźarowskeje sportownje chcedźa 262 000 eurow wudać. Wopłóčkowa syć we Wulkich Ždźarach ma 1,18 milionow eurow płaćić, ta w Koblicach 268 000 eurow. We wjesnymaj towarstwowymaj domomaj w Šćeńcy a Bjedrichecach matej nowej zachodaj bjez zadźěwkow nastać, štož płaći cyłkownje 3 000 eurow.
Nowa „generacija přěhračkow“
Budyšin (SN/MWj). Za 68 100 bydlenjow a domow w Budyskim wokrjesu njetrjeba so žana podruž płaćić, dokelž je wobsedźerjo sami wužiwaja. Kwota swójskich bydlenjow wučinja 47 procentow, w Budyšinje samym 20 procentow. Tole wuchadźa z aktualneho regionalneho přepytowanja Hannoverskeho instituta Pestel. Byrnjež kwota swójskich bydlenjow w cyłoněmskim přerězku nimale 45 procentow była, leži Němska w europskim přirunowanju na třećim městnje wotzady.
W přepytowanju instituta Pestel rěči so wo nowej „generaciji přěhračkow“. „Wosebje ći w starobje 25 do 40 lět móža sej dźeń a mjenje swójski dom abo swójske bydlenje twarić abo kupić a su tuž nuzowani podruž płaćić. Ale runje tale starobna skupina ludźi, kotřiž steja na spočatku powołanskeho žiwjenja abo sej swójbu załožeja, je poprawom ta, kotraž sej bydlenje kupi abo dom twari“, wuswětla nawoda instituta Matthias Günther. Mjenowanej starobnej skupinje přisłuša w Budyskim wokrjesu 55 500 ludźi. 7 600 z nich bydli w sprjewinym měsće. Jich šansa na swójske bydlenje je sylnje woteběrała.
Wo gmejnskim zwjazku rěčeli
Z kim chce Radworska gmejna na komunalnej runinje přichodnje wušo hromadźe dźěłać a tak mjenowany zakładny centralny gmejnski zwjazk wutworić. Tole bě jedna z temow wčerawšeho posedźenja gmejnskeje rady.
Radwor (SN/MkWj). Na spočatku posedźenja měješe wjesnjanosta Wincenc Baberška (CDU) skerje administratiwny nadawk. Wón powoła dotalneho nawodu gmejnskeje wohnjoweje wobory Rüdigera Schmidta hač do 31. julija za komisariskeho nawodu. Naměstnik wostanje Thomas Scheffel z Minakała. Pozadk njewšědneho rjadowanja su diferency mjez nawodnistwom wobory a gmejnskim zarjadnistwom. Z teje přičiny njebě nawoda wobornikow na minjenej hłownej zhromadźiznje hižo kandidował.
Tež w Smjerdźacej wotmě so minjenu njedźelu mejemjetanje. Šěsć ...
Krótkopowěsće (17.05.17)
Sudnicy wuzwoleni
Drježdźany. Sakski krajny sejm je na swojim dźensnišim posedźenju štyrjoch čłonow sakskeho wustawoweho sudnistwa wuzwolił. Jürgena Rühmanna, prezidenta financneho sudnistwa, su w zastojnstwje wiceprezidenta wobkrućili. Wólby běchu trěbne, dokelž podadźa so někotři na wuměnk abo dźewjećlětna wólbna doba so kónči.
Planuja trasu spěšnoćaha
Praha. Čěscy kaž tež sakscy geologojo su w sewjernej Čěskej z prěnimi přepytowanjemi terena w zwisku z planowanym natwarom spěšnoćahoweje čary Praha–Drježdźany započeli. 123kilometrowsku trasu chcedźa w lěće 2028 twarić započeć. Wobstatk budźetej mjez druhim tež 16 a 26 kilometrow dołhej tunlej. Zasadnje wažne tuž je dno geologisce dokładnje přepytować.
Dźěłać kaž na zapadźe
Berlin. Wuchodoněmscy metalownicy nochcedźa dlěje hač 38 hodźin wob tydźeń dźěłać. Tole je 86 procentow přistajenych w Berlinje, Braniborskej a Sakskej při woprašowanju dźěłarnistwa IG metal zwurazniło. 38hodźinske rjadowanje płaći jenož we wuchodoněmskich krajach. Na zapadźe dźěłaja po tarifje 35 hodźin.
LEAG łužiski šmrěk jako štom lěta sadźiła
Wochozy (JoS/SN). Towaršnosć Łužiska energija a milinarnje (LEAG) pěstuje tradiciju a je wčera zaso štom lěta sadźiła. Wuzwoliła je sej kromu Wochožanskeje brunicoweje jamy při wuhladnišću Ćežka hora, hdźež běchu nowe terasy wutworili. Poprawom bu šmrěk za štom lěta 2017 wuzwoleny, LEAG pak rozsudźi so za łužiski nižinowy šmrěk. Tale družina so za Mužakowsku holu a lěsnu kónčinu derje hodźi, ale njebu we wobłuku rekultiwowanja často wužiwana. Jeno štyri procenty su tuchwilny podźěl, wopřijacy 20 hektarow, połsta hektarow pak ma jich raz być. Poćahujo so na rekultiwowanje płonin Wochožanskeje jamy je Zhorjelski krajnoradny zarjad postajił, wotpowědne za Łužicu typiske družiny štomow wužiwać, a k nim tónle wosebity nižinowy šmrěk słuša. Mjeztym je so partneram poradźiło něhdźe 80 000 štomikow plahować, z kotrychž nažnjachu 167 kilogramow hablow. Z płodow ćahnu dalše štomiki.
Hnydom tři łužiske nižinowe šmrěki su zastupjerjej regiona a čłon koncerna LEAG wčera sadźili. Tajki šmrěk prěnje tři lěta hišće tak prawje njerosće a so hakle po tym porjadnje do wysokosće wuwiwa.
Krótkopowěsće (16.05.17)
Najrjeńšu meju zwěsćili
Wotrow. Wubědźowanje Kamjenskeje župy „Michał Hórnik“ wo najrjeńšu meju su Wotrowscy młodostni dobyli. Jich wobraz je so na Facebookowej stronje ze 641 hłosami před fotom Radworskeje meje přesadźił. Třeće městno doby Smječkečanska meja před tej Chróšćanskeje starownje. 15 młodźinskich cyłkow a wjesnych towarstwow bě wobraz zapodało. 2 000 ludźi je sobu wothłosowało.
Wurjadne posedźenje
Choćebuz. Brunicowy wuběrk Braniborskeje je so dźensa w Choćebuzu wurjadnje schadźował. Hłowna přičina běchu njedawno předstajene plany energijoweho koncerna LEAG. Předewzaće bě dotalne plany Vattenfalla za wutwar brunicowych jamow raznje redukowało. W tym zwisku wočakowachu dźensa stejišćo braniborskeho knježerstwa.
Sćelu pjenjezy do domizny
Berlin. Migranća z afriskimi korjenjemi sćelu po trochowanjach kóždolětnje něhdźe 1,2 miliardźe eurow swojim swójbnym do Afriki. Po nowym woprašowanju 90 procentow migrantow prawidłownje pjenjezy do stareje domizny sćele, hač do 10 000 eurow. Z pjenjezami financuja přiwuznym wšědnu potrjebu.
Znataj dźiwadźelnikaj čitałoj
Wowčerjo na swoje starosće skedźbnili
Radwor (UM/SN). Plahowarjo wowcow a kozow w Němskej starosća so přiběrajcy wo přichod swojeje powołanskeje skupiny. Tohodla namołwjachu spěchowanske towarstwo plahowarjow wowcow a plahowarjo w Delnjej Sakskej minjeny pjatk, přewjesć tak mjenowane pominanske a solidarne wohenje přećiwo njewobmjezowanemu rozšěrjenju wjelkow.
Policija (16.05.17)
Padustwo wujasnjene
Budyšin. Po tym zo su so njeznaći minjeny pjatk do banki na Budyskej Bohatej zadobyli a kompjuterowej wobrazowce pokradnyli, je policija tónle pad hišće samsny dźeń wujasniła. Podhladnaj staj Budyšanaj w starobje 20 a 21 lět. Wobaj běštaj dźeń do toho młodostneho wurubiłoj a staj policiji derje znataj.
