Budyšin. „Ducy pó domowni“ rěka kniha Jutty Kaiseroweje, kotruž předstaja jutře, štwórtk, w 19.30 hodź. w Budyskej Smolerjec kniharni. Štóž je 40 lět za serbski rozhłós dźěłał, je wjele zhonił a dožiwił a móže wjele powědać. Jutta Kaiserowa bě na wsach po puću a je z mnohimi ludźimi rěčała. Wo tym pisa w swojej knize a pokazuje při tym tež na njewšědne dźěło serbskich rozhłosownikow.

Dźiwadło jako hrabnjenčko

Budyšin. Lětušu serbsku inscenaciju Němsko-Serbskeho ludoweho dźiwadła na Budyskim hłownym jewišću „Paradiz w dobrej stwě“ pokazaja sobotu, 7. apryla, w 19.30 hodź. posledni raz. Wosebitosć budźe, zo dóstanje prěnich sto zajimcow zastupny lisćik jako hrabnjenčko – kartka płaći za nich jeno sydom eurow.

W prózdninach do muzeja

Budyšin (SN). Do jutrow su na njeličomnych městnach we Łužicy demonstrowali, kak so serbske jutrowne jejka debja. Štóž chce so tutej zaběrje tež po jutrach dale wěnować, ma k tomu składnosć w Budyskej turistiskej informaciji na Hłownym torhošću. Dźěći móža tam w prózdninach wšědnje wot 10 do 12 hodź. pod wěcywustojnym nawodom jejka pisanić. Madlen Pašcyna z Worklec so wo wobdźělnikow stara, jim trěbny grat rozłožuje a jich při debjenju poradźuje. Poskitk je darmotny, jeničce za wužiwany material zběraja 50 centow přinoška na wosobu. Kaž turistiska informacija dale zdźěla, móža skupiny hač do dźesać wobdźělnikow – tež dorosćeni – tajki poskitk přichodnje tež cyłe lěto skazać.

Statna dróha S 100 w Błohašecach je ­za pěškow a kolesowarjow wšo druhe hač wěsta, dokelž tam žadyn chódnik nimaja. To ma so nětko změnić, je ­Budyska měšćanska rada rozsudźiła.

Błohašecy (CK/SN). Podłu statneje dróhi S 100 w Błohašecach matej so chódnik a kolesowanski pućik natwarić. Tole su Budyscy měšćanscy radźićeljo na swojim zašłym posedźenju jednohłósnje wobzamknyli. Trěbne je to přiběraceho wobchada nakładnych awtow na tamniše přemysłownišćo dla. Nimo toho tam awta na runym wotrězku puća zwjetša předpisane tempo 50 km/h njedodźerža a přespěšnje jězdźa. Chódnik a kolesowanski pućik matej so w zhromadnej naprawje města Budyšina a krajneho zarjada za dróhotwar a wobchad LASuV zwoprawdźić. Tón so hižo wot lěta 2010 z kolesowanskim pućom podłu statneje dróhi zaběra a je dźěle toho hižo twarił. Nětko ma tež posledni čwak hač k přemysłownišću nastać. Mjeztym zo je město za wotrězk we wsy přisłušne, leža poslednje metry mjez kolesowanskim pućom wot statneje dróhi S 106 hač k wjesnej kromje Błohašec w zamołwitosći krajneho zarjada.

Biskop Timmerevers za wuraz njepowalneje wěry so dźakował

Róžant (SN/JaW). Drježdźansko-Mišnjanski biskop Heinrich Timmerevers je so na wčerawšej dźaknej Božej mši w Róžeńće křižerjam za wuraz njepowalneje wěry dźakował. „Lětuše chětro zymne wjedro jutrońčku bě wobćežne. To móh­ła někotremužkuli mysl přińć, so křižerjenja wzdać. Wy pak njejsće so podali, ale sće jutrowne poselstwo wozjewjeli. Je wažne kruće we wěrje stać, byrnjež nam hdys a hdys wětřik mjezwoči duł. Pozbudźace a jara sylne to znamjo, kotrež sće sej mjez sobu dawali a zdobom wšitkim křesćanam w našim kraju, njepodać so, ale zmužiće Jězusa Chrystusa w žiwjenju wobswědčeć. Přeju wam wšěm, zo byšće to přez cyłe lěto hač k přichodnym jutram dale činili“, bě Timmerevers přewšo hnuty. Hišće po kemšach chwaleše sej biskop mócne spěwanje křižerjow a kak derje muske hłosy tola klinča, kaž Serbskim Nowinam rjekny.