Wjes něhdy a dźensa
Swjedźenski ćah wjeršk kónca tydźenja k 750. róčnicy Njeswačidła był
Njeswačidło (SN/MWj). Z pozawnowej a hońtwjerskej dujerskej hudźbu wuklinča wčera nawječor wulki swjedźeń k 750. róčnicy prěnjeho naspomnjenja Njeswačidła. Na třoch dnjach dožiwichu sta wopytowarjow wotměnjawy program, wobsahowacy wjacore wurjadne dypki. Tak je na hrodźe nětko přistupna wosebita wustajeńca k stawiznam wsy, kotruž běchu minjeny pjatk k zahajenju swjedźenja wotewrěli. Tohorunja pjatk woswjećichu 130lětne wobstaće dobrowólneje wohnjoweje wobory.
Do jubilejneho swjatka zapřijaty bě sobotu kóždolětny swětłowy swjedźeń, jako z něhdźe 3 000 swěčkami a smólnicami park na cyle wosebite wašnje wobswětlichu a tak wulkotnu atmosferu zaručichu. Popołdnju wustupi Serbski ludowy ansambl z interaktiwnej hudźbnej bajku „Překlepana liška“.
Dwaj ćahaj dožiwił
Razantne jězby a wušikni jěcharjo
Krótkopowěsće (27.08.18)
Film Karla Vouka na festiwalu
Choćebuz. Krótkofilm PŚIRODA awstriskeho wuměłca Karla Vouka wo změnje łužiskeje krajiny je nominowany za lětuši 28. festiwal wuchodoeuropskeho filma wot 6. do 11. nowembra w Choćebuzu. Termin předstajenja dwanaćeminutowskeho paska budźe hakle z wozjewjenjom programa w septembru jasny. Twórba je nominowana tež za 21. festiwal słowjenskeho filma w Portorožu.
Předstaji tři rukopisne słowniki
Halle. Pod hesłom „Začuća a normy“ wotměwa so tele dny mjezynarodny kongres za slědźenja wo pietizmje w Halle. Serbow zastupuje wědomostna sobudźěłaćerka Drježdźanskeje Techniskeje uniwersity dr. Lubina Malinkowa. Wona předstaji tam tři rukopisne serbsko-němske słowniki, na kotrež bě při slědźenjach w archiwje bratrowskeje wosady storčiła. Zetkanje traje hač do srjedy.
Za politiske hudźbne dźiwadło
Chór Budyšin spěwa
Wuježk. Tež tónle kónc tydźenja wotměja so wjacore zarjadowanja we wobłuku dnja Hornjeje Łužicy. Jedne z nich budźe na Čornoboze. Tam koncertuje njedźelu, 26. awgusta, w 14 hodź. chór Budyšin. Rjana to přiležnosć, na horu pućować a w chłódku štomow na serbske a słowjanske pěsnje słuchać.
Dwaj dnjej klankodźiwadło
Budyšin. „Pod hrodom wosomaštyrceći“ rěka klankodźiwadłowy swjedźeń, kiž wotměje so jutře a njedźelu w Budyšinje na ležownosći ze samsnym mjenom něhdźe 200 metrow wot Stareje wodarnje zdaleneje. Starši a młódši wopytowarjo dožiwja najwšelakoriše klankodźiwadłowe hry. Jich paleta saha wot bajkow Grimmec bratrow přez hornjołužiske powědki hač k italskemu kruchej wo kóčkach. Přeprošene su klankodźiwadłowe skupiny z Lipska, Budyšina, Coswiga a Radebeula, kotrež wotměnjejo hraja. Započatk je wobaj dnjej wot 15 hodź. Sobotu wot 22 hodź. změja na samsnym městnje live-hudźbu z nižozemskej spěwarku Iris Romen.
Pokazaja staru techniku
Policija (24.08.18)
Tragisce znjezbožiła
Budyšin. Na Dr. Salvadora Allendowej w Budyšinje je wobydler wčera rano něhdźe w 6 hodź. před wjaceswójbnym domom staršu žonu bjez wědomja a ćežko zranjenu namakał. Za 76lětnu pak přińdźe kóždažkuli pomoc přepozdźe, wona bě hižo zemrěta. Po prěnich přepytowanjach je žona najskerje z balkona swojeho bydlenja padnyła, zdźěli Zhorjelska policajska direkcija. Kriminalisća pad nětko přepytuja.
Sylna klumpa prěni raz zasadźena
Sprjejcy (RLö/SN). Njewšědne wužadanje zmištrować maja wohnjowi wobornicy tele dny blisko Sprjejc w gmejnje Sprjewiny Doł. Tam je spočatk tydźenja we wulkej wužłobinje z wuhlowym prochom woheń wudyrił. Płomjenja na pustym kraju rozpřestrěchu so po něhdźe 10 000 kwadratnych metrach. Dobrowólne wohnjowe wobory gmejny Sprjewiny Doł kaž tež Wojerowska powołanska wohnjowa wobora ze wšěmi srědkami spytachu, płomjenja podusyć. Na pomoc wołachu tohorunja Grodkowskich wobornikow. Ale wuspěch bě snadny. Nastajnosći kur ze zemje dowysoka stupaše, dokelž so płomjenja pod zemju dale rozpřestrěwachu.
Wutoru so tuž rozsudźichu wužłobinu z wodu napjelnić. Spočatnje přijědźechu sobudźěłaćerjo Budyskeho techniskeho pomocneho skutka (THW) z klumpu typa Hannibal. Srjedu přidružichu so jim kolegojo z Kamjenca, Riesy a Radebeula. Nimo mnohich nurjenskich klumpow měješe THW z Riesy nowu wulkoklumpu sobu. Z njej hodźi so pod idealnymi wuměnjenjemi 25 000 litrow wody na minutu klumpać.
Nowy přichod za deponiju
Worklečanska gmejna ma skónčnje schwaleny hospodarski plan
Worklecy (JK/SN). Na prěnim posedźenju po lětnjej přestawce zaběrachu so Worklečanscy gmejnscy radźićeljo wčera nimale bjezwuwzaćnje z ličbami najwšelakorišich wulkosćow. To bě nuznje trěbne, zo bychu nětko skónčnje schwaleny hospodarski plan měli a zo móhli zbytk lěta po rjadowanych kolijach dźěłać. Tež dotal běchu so po naćisku plana měli, a wjesnjanosta Franc Brusk (CDU) rozłoži hižo wotzamknjene abo tučasnje běžace naprawy gmejny.
Najwažniši nadawk budu přihoty za twar noweho horta, za kotryž dóstachu 1,4 miliony eurow spěchowanskich srědkow. Twar, kotryž lětsa přihotuja a klětu zwoprawdźa, płaći cyłkownje 1,8 milionow eurow. Gmejna sama wobdźěli so z dobrymi 400 000 eurami, wot toho budu 300 000 eurow kredita a zbytk swójske srědki. W awgusće 2020 maja šulerjo potom do noweho Worklečankseho horta zaćahnyć.
