Budyska imobilija najdróša

Mittwoch, 15. Februar 2017 geschrieben von:

Drježdźany (SN/MWj). Sakske ležownostne awkcije AG (SGA) přewjedu 24. februara w Lipsku a 28. februara w Drježdźanach swoju lětušu nalětnju awkciju. Nimale 120 imobilijow ze šěsć zwjazkowych krajow je na předań, mjez nimi wjacore objekty z wuchodneje Sakskeje. W Pfaffendorfje, měšćanskim dźělu Königsteina­ w Sakskej Šwicy, poskićeja atraktiwne bydlenske twarjenje. Pod pomnikoškitom stejacy dom su 1767 natwarili­ a w 1990tych lětach wobšěrnje saněrowali. W twarjenju su štyri dowo­lowe bydlenja. Minimalny poskitk leži pola 160 000 eurow.

Najwyši minimalny poskitk wšitkich sakskich imobilijow žadaja sej z 390 000 eurami za pod pomnikoškitom stejacy bydlenski a wobchodny dom w Budyšinje. Wón steji na Lawskich hrjebjach direktnje napřećo Centerej na Žitnych wikach. Bydlenska a wužiwanska płonina wosom bydlenjow a jedneje přemysłoweje jednotki je 580 kwadratnych metrow wulka.

Spěšnosć při šuli wobmjezować

Mittwoch, 15. Februar 2017 geschrieben von:

Wulke Ždźary (MFü/SN). Na naprašowanje gmejnskeho radźićela Reika Stephana (CDU) rozprawješe nawoda gmejnskeho hłowneho zarjada Sven Koppen čłonam Łazowskeje gmejnskeje rady na jich zašłym posedźenju wo tym, zo běchu kónc januara zastupjerjo gmejny hromadźe ze zastupjerjemi wokrjesa při Wulkoždźarowskej zakładnej šuli. Na městnje wobhladachu sej tam wobchadnu situaciju.­ Kaž Koppen wobkrući, su rjadowanja nadróžneho wobchada tak změnjene, zo hodźi so wobmjezowanje spěšnosće na 30 kilometrow na hodźinu jednorišo zwoprawdźić. Po posudźowanju wokrjesnych fachowcow Wulkoždźarowske kubłanišćo wšitke wuměnjenja za to spjelnja. Tak móhli wotpowědnu próstwu wokrjesej zapodać. Fachowcy pak běchu na to skedźbnili, zo ma tuchwilne rjadowanje z warnowanskim znamješkom „Kedźbu, dźěći“ wjetšu hódnotu hač wobmjezowanje na 30 km/h.

W Delanach twarja a dale warja

Mittwoch, 15. Februar 2017 geschrieben von:

Přetwar a ponowjenje Ralbičanskeje šulskeje kuchnje derje postupujetej

Ralbicy (JK/SN). Byrnjež tež w Ralbičanskej wyšej šuli prózdniny byli, tam woprawdźity měr njeknježi. Za kulisami so pilnje dźěła. Hižo minjeny tydźeń su kuchnju z prowizoriskej sćěnu wot předrumow wotdźělili. Tam twarja a instaluja firmy z wokoliny nowe přijomne rumnosće za wobhospodarjenje šulskeje kuchnje. W kuchni samej pak kachle zymne njewostanu. Kuchar Alarcon Cardenas-Hančik wari dale wobjed za pěstowarni w Ralbicach a Chrósćicach. Wottam je słyšeć, zo wobjed jara słodźi, zo je wotměnjawy a stajnje dypkownje a w požadanym mnóstwje dochadźa. Je tuž derje, hdyž maja so rjemjeslnicy do dźěła, zo bychu kucharjej dale dobre wuměnjenja abo snano hišće lěpše zawěsćili.

Serbskej rěči a kulturje dale jara wotewrjeni

Mittwoch, 15. Februar 2017 geschrieben von:

Wojerecy (AK/SN). We Wojerowskim wobydlerskim centrumje na Piwarskej hasy čo. 1 – w domje, hdźež běchu 1912 Domowinu založili, je Wojerowskej kulturnej fabrice serbska rěč dale jara wažna. Tole jednaćel Uwe Proksch na minjenym posedźenju serbskeje přirady města hišće raz potwjerdźi. Dwurěčnosć je tam po jeho słowach pospochi widźomna. Tež turistiska informacija města, kotruž kulturna fabrika njewobhospodarja, ma přichodnje serbskorěčne tafle dóstać. „Mamy prěnje ideje, kak móhli stawizny domu w zwisku z hišće dźensa widźomnymi wuskutkami brunicy zwjazać. Zwoprawdźić móhli to w zachodźe, před­stawy pak njejsu hišće dowuzrawjene“, rjekny Dirk Nasdala, předsyda serbskeje přirady města Wojerec.

Połoženje móhło so přiwótřić

Mittwoch, 15. Februar 2017 geschrieben von:

Ptača gripa so dźeń a dale rozpřestrěwa. Wot zańdźeneho pjatka je nimale cyły Budyski wokrjes zawrjene abo wobkedźbowanske pasmo. Za plahowarjow pjerizny płaća tuž krute předpisy. Přeńdźenja­ móža hač do 30 000 eurow pokuty wuskutkować.

Budyšin (SN/BŠe). Wospjet skedźbnja Budyski krajnoradny zarjad na to, zo stej we wokrjesu dwaj padaj ptačeje gripy, a namołwja plahowarjow pjerizny, předpisy wukaza zwěrjećeje mrětwy dodźeržeć. Wotpowědne informacije su na internetnych stronach krajnoradneho zarjada wozjewjene.

Krótkopowěsće (15.02.17)

Mittwoch, 15. Februar 2017 geschrieben von:

Tilich za korektury pola rentow

Drježdźany. Sakski ministerski prezident Stanisław Tilich (CDU) je sej znowa korektury při přiměrjenju rentow na wuchodźe a zapadźe žadał. „Zwyšenje tudyšich tuchwilnych rentow je na škodu rentow přichodnych generacijow“ rjekny Tilich­ nowinarjam. Wón na to pokaza, zo mzdy na wuchodźe hišće dołho pod cyłoněmskim přerězkom wostanu. „Młodźina ma tuž jasne njelěpšiny.“

Gripa sej 16 woporow žadała

Drježdźany. Tydźenje trajaca žołma gripy je sej w Sakskej hižo 16 smjertnych woporow žadała, kaž strowotniske ministerstwo informuje. Starobny přerězk zemrětych pacientow wučinješe 84 lět. Mjez zemrětymi bě jenički muž přećiwo influency šćěpjeny, ze zdźělenki minis­terstwa wuchadźa.

Wjelka tola njezatřělić?

Awtowy dom wopor paduchow

Dienstag, 14. Februar 2017 geschrieben von:
W Biskopičanskim awtowym domje na Carla Marija von Weberowej pobychu dźensa w nocy paduši. Wot dweju wosoboweju awtow wotšrubowachu woni wšitke kolesa. Z pomocu drjewjanych klinow su nowej jězdźidle typa Škoda trochu zběhnyli, zo móžachu kolesa wotćahnyć. Dodawar narunanskich dźělow je padustwo pytnył a hišće w nocy policiju informował. Kriminalisća pad nětko přepytuja. Awtowemu domej nasta něhdźe 1 000 eurow škody. Foto: Rocci Klein

Lěs zamołwiće wobhospodarjeć

Dienstag, 14. Februar 2017 geschrieben von:

Dźěwin (AK/SN). Statny zawod sakski lěs chce komunalny lěs Dźěwinskeje gmejny dale zamołwiće wobhospodarjeć. „Drjewo plahować a wužiwać dyrbi so po móžnosći dokładnje planować“, podšmórny rewěrowa hajnica Annett Hornschuh na zašłym posedźenju gmejnskeje rady.

Dźěwinscy gmejnscy radźićeljo wobzamknychu lěsny plan hač do lěta 2025, w kotrymž su wšelake naprawy zapisane. Na 22 hektarach chcedźa lěs hladać, potajkim štomy woznamjenjeć, so wo jich wjerški starać a na porjad w lěsu dźiwać. Na štyrjoch hektarach chcedźa drjewo žnjeć a na pjeć hektarach maja so wosebje młode štomiki hladać. Dohromady wočakuja rozrost drjewa wo 2 200 kubiknych metrow, z toho chcedźa 1 500 kubiknych metrow wužiwać. „Hdyž po­tajkim 700 kubiknych metrow w lěsu wostanje, je to derje za jeho wuwiće“, Annett­ Hornschuh zwurazni.

W nadawku Dźěwinskeje gmejny stara so statny zawod wo 44 hektarow ­komunalneho lěsa. Ně­hdźe 17 procentow štomow je 41 do 60 lět stary.

Najwyša „wěža“ bórze padnje

Dienstag, 14. Februar 2017 geschrieben von:

Tepjernja w Ćichońcy „zymna rezerwa“ – Klětu započnu ju torhać

Budyšin (UM/SN). Bohata wěža, Lawska wěža, Stara wodarnja – Budyšin so často město wěžow mjenuje. „Wěža“, kotruž wjetšina wopytowarjow jako prěnju wuhlada, je 110 metrow wysoka tepjernja w Ćichońcy a njeje runjewon turistiska atrakcija. Bórze pak so wona zminje.

Jako započa 1981 prěni kotoł dźěłać, drje sej nichtó myslił njeje, zo by za te­hdyši čas přikładna tepjernja w Budyskim měšćanskim dźělu Ćichońca (Teichnitz) jeno starobu 36 lět docpěła. W tychle lětdźesatkach so wobraz wjace hač sto metrow wysokeho wuhenja, kiž tepjernju kaž tež susodnu platownju přesahowaše, Budyšanam kaž tež wopytowarjam města do wědomja zašćěpi.

Policija (14.02.17)

Dienstag, 14. Februar 2017 geschrieben von:

Horcy popjeł wina był

Nowe Město. Popjeł z kachlow dyrbiš najprjedy wochłódnić dać, prjedy hač směš jón do wotpadkoweho sudobja sypnyć. To wě nětko tež wobsedźer ležownosće w Nowym Měsće nad Sprjewju. Pola njeho bě so horceho popjeła dla wotpadkowe sudobjo palić započało. Płomjenja wupřestrěchu so wottam na třěchu garaže. Wohnjowi wobornicy pak je spěšnje po­dusychu. 56lětneho wobydlerja dyrbjachu lěkarsce zastarać.

Serbska debata

Neuheiten LND