Budyšin (CK/SN). W awgusće bě w Hornjej Łužicy 18 705 ludźi bjez dźěła. To je 285 mjenje hač měsac do toho a 11 263 mjenje hač w lěće 2013. Kaž wočakowane, industrijne zawody a rjemjeslniske předewzaća po wulkich prózdninach zaso­ sobudźěłaćerjow přistajeja, praji nawo­da Budyskeje agentury za dźěło Thomas Berndt. Kwota bjezdźěłnosće za cy­łu wuchodnu Saksku wučinja 6,6 procentow. W jednotliwych regionach pak je wona rozdźělna a saha wot 3,7 procentow w Kamjencu, hdźež su wulke předewzaća a hdźež je bliskosć k Drježdźanam pytnyć, hač k 11,2 procentomaj w Zhorjelcu. We Wojerecach spadny kwota pod wosom procentow.

Tuchwilu je w Hornjej Łužicy 4 585 swobodnych městnow. Najwjetši dźěl, mjenujcy 1 103, drje přińdźe z wobłuka dźěła na čas, ale z 945 městnami slěduje předźěłace přemysło bórze za nim.

Zhorjelc (AK/SN). Wokrjes Zhorjelc swoje prewentiwne młodźinske dźěło zesylnja. To je Elke Drewke, nawodnica młodźinskeho zarjada, na minjenym posedźenju wokrjesneho sejmika připowědźiła. „Hłow­ny zaměr wostanje, samopostajowane wuwiće dźěći, młodostnych a swójbow zesylnić. Při tym nanojo a maćerje ze swojimi dźěćimi identifikaciju z domiznu ze swojej zamołwitosću za přichod re­gio­na zwjazuja. Nošerjo młodźinskeje po­mocy k tomu dźěło wokrjesa podpěruja“, Elke Drewke rozłoži.

Wokrjes dósta lětsa wot swobodneho stata 750 000 eurow jako młodźinsku pawšalu. To wotpowěduje přerězkej mi­nje­nych lět. Zdobom je wo­krjes swój podźěl­ na naprawach wot 1,9 milionow eurow w lěće 2016 a dweju milionow loni­ na nětko 2,2 milionaj powjetšił. „Mamy pjeć planowanskich regionow“, Elke Drewke zdźěli. Cyłkownje 45 połnje přistajenych tuchwilu pola wšelakich no­še­rjow swobodneho młodźinskeho dźěła skutkuje. W Běłej Wodźe a wo­kolinje maja 7,25 městnow, w Niskej a wokolinje 6,75, w Zhorjelcu 10,75, w Lubijskej kónčinje a Hornim kraju wosom a w Žitawje a wokolinje 9,75 městnow.

Smječkecy (SN/JaW). Dom swj. Jana w Smječkecach, w kotrymž su duchownje zbrašeni zaměstnjeni, změje noweho nawodu. Wot 1. januara 2019 budźe to Marko Kliman. To wobkrući wón Serbskim Nowinam na kromje sobotneje swjatočnosće k 10lětnemu wobstaću Budyskeho wokrjesa w Budyšinje. Kliman, skutko­wacy tuchwilu w Budyskej chorowni we wotdźělu za hladanje nutřkowneje a urologiskeje kliniki, přewozmje zastojnstwo tuchwilneho nawody Smječkečanskeho domu Tadeja Šimana, kiž ma jeho do noweho dźěła zapokazać. Šiman budźe w nadawku nošerja Smječkečanskeje hladarnje zbrašenych Křesćansko-socialneho skutka (CSW) regionalnje a nadregionalnje fachowje dale skutkować.

Kaž Marko Kliman na naprašowanje našeho wječornika wobkrući, ma wón přichodnje wšitke štyri zarjadnišća CSW w Hornjej Łužicy w Smječkecach, Kamjencu, a Budyšinje jako regionalny nawo­da zastupować. „Wjeselu so na nowy nadawk. Tu móžu so hišće regionalnišo na dobro našeje dwurěčneje kón­činy zasadźeć“, rjekny wón SN. Zdobom Prawočan wobkrući, zo wostanje dale čestnohamtski wjesnjanosta Chróšćanskeje gmejny.

Budyšin (SN/JaW). Wokrjes Budyšin ma nowy imageowy film. Krajny rada Michael Harig (CDU) je jón sobotu na swjatočnosći k 10lětnemu wobstaću noweho wokrjesa w Budyskim Němsko-Serbskim ludowym dźiwadle zjawnosći předstajił. „Hakle tón tydźeń su jón dozhotowili“, zwurazni Harig přitomnym regionalneje a nadregionalneje politiki. Nimo mini­sterskeho prezidenta Michaela Kretsch­mera přitomni běchu tež serbskaj zapósłancaj Sakskeho krajneho sejma Marko Šiman (wobaj CDU) a Hajko Kozel (Lěwica), mnozy tuchwilni a bywši hamtscy kolegojo Hariga susodnych wokrjesow, zastupnicy komunow kaž tež zastupnicy kubłanskich zarjadnišćow a serbskich institucijow.