Łaz (AK/SN). Wutwarjena a elektrifikowana železniska čara z Hórnikec hač na pólsku hranicu je mjeztym čile wužiwana. To zdźěli Łazowski wjesnjanosta Thomas Leberecht (CDU) na zašłym posedźenju gmejnskeje rady. Kaž gmejna z lista Němskeje železnicy AG zhoni, liča lětsa wšědnje z něhdźe 80 nakładnymi ćahami. Dale je tam wot póndźele do pjatka 18 wosobowych ćahow předewzaća ODEG po puću, sobotu a njedźelu 16. Kaž železnica dale informuje, zasadźeja dalše składnostne ćahi, wjesnjanosta rozłoži. Při tym jedna so wo krótkodobnje přizjewjene jězby nakładnych ćahow, kotrež kolije potom zwonka plana wužiwaja.

Kursaj pilates w chorowni

Kamjenc. Wot zajutřišeho poskića w Kamjenskej chorowni maltezow swj. Jana nowej kursaj pilates. Wonej wotmějetej so stajnje pjatk wot 12.30 do 13.30 hodź. za samodruhe žony a tohorunja pjatk wot 13.30 do 14.30 hodź. za maćerje po porodźe dźěsća. Kursaj nawjeduje fitnesowy ekonomka a wukubłana pilatesowa trenarka Nancy Römer. Přizjewjenja při­jimuja pod telefonowym čisłom 01520/ 899 25 64.

Sanki pokradnjene

Běła Woda. We wjaceswójbnym domje w Běłej Wodźe su njeznaći minjene dny sanki pokradnyli a tak jeho wobsedźerjam wjeselo nad tuchwilnej zymu trochu skazyli. Swójba bě 80 eurow drohe sanki 13. januara na chódbu domu stajiła, zo bychu schnyli. Dwaj dnjej pozdźišo běchu wone fuk. Nadźija, zo bě je něchtó ze sobuwobydlerjow zrumował, so bo­hužel njespjelni. Swójba tuž padustwo na policajskim rewěrje přizjewi.

Nalutowanki zhubiła

Wojerecy. 85lětna žona sta so zawčerawšim we Wojerecach z woporom jebakow. Rentnarku bě njeznata žona za­zwoniła, so jako přiwuzna wudawała a jej powědała, zo ma pjenježne starosće. Na te wašnje prošeše wo wjacore tysacy eurow – a dósta je tež. Něhdźe poł hodźiny po telefonaće cuzy muž pjenjezy pola staruški wotewza. Hakle po tym rentnarka na cyłej wěcy dwělować započa a zazwoni policiju. Kriminalisća pad nětko přepy­tuja. Nalutowanki Wojerowčanki pak su po wšěm zdaću fuk.

Njeswačidło (JK/SN). Kak rozdźělić pawšalu 70 000 eurow sakskeho knježerstwa gmejnam za lěto 2018 bě jedna z temow na wčerawšim posedźenju Njeswačanskeje gmejnskeje rady. Jeje čłonojo dojednachu so na to, z dźělom mjenowaneje sumy towarstwa na teritoriju gmejny podpěrać. Tak móže kóžde z dohromady 24 towarstwow hač do kónca februara próstwu wo podpěru hač do 1 000 eurow za projekty abo akcije we wobłuku swojeho skutkowanja stajić. Při tym je wšojedne, hač su projekty hižo loni přewjedli, abo hač je za lětsa planuja. Z tutym rozsudom hódnoća po słowach Njeswačanskeho wjesnjanosty Gerda Schustera (CDU) aktiwne a na dobro gmejny wu­směrjene dźěło mnohich towarstwow. Wone wěnuja so na najwšelakoriše wašnje kulturnemu a hospodarskemu wu­wiću komuny a zaručeja tak jeje dobry image daloko za jeje mjezami.

Dale su radźićeljo wčera zahajenskej bilancy k 1. januarej 2013 přihłosowali. Z tym je Njeswačanska gmejna jedna z prěnich Budyskeho wokrjesa, kotraž tajku zahajensku bilancu ma. Wšako je wuměnjenje za to, zo móže komuna po dwójnym (doppikowym) zličbowanskim systemje dźěłać.