Wojerecy (SN/JaW). We Wojerowskim zwěrjencu su započeli nowy areal za leopardy twarić. Wo tym informuje sobudźěłaćer tamnišeho cowa Felix Pál w medijowej zdźělence. Tydźenja su tam darowansku taflu wotkryli, z pomocu kotrejež móžachu najwjetši dźěl inwesticije noweje připrawy financować.

Při wotkryću darowanskeje tafle běchu mjez druhim přitomni tak mjenowani „złoćani kmótřa“ stražowanskeje firmy WSG z Wojerec, twaršćiznowych wikow Globus und PSW Competence Center. „Woni dwaj metraj šěroku taflu, kotraž ma přichodne pjeć lět wšitkich wopytowarjow našeho zwěrjenca wo darach našich kmótow informować, zhromadnje wotkrychu. Dohromady je kóždy z nich předewzaće noweje leopardoweje připrawy z hač do 3 600 eurami spěchował“, zdźěli Pál. Wojerowski zwěrjenc je zbožowny, zo su hižo při wotkryću kmótřiskeje tafle za 15 z cyłkownje 29 polow na njej darniweho kmóta namakali. Dalše 14 polow čakaja hišće na šćedriwych darićelow a kmótow, kotřiž chcedźa twar noweje leopardoweje připrawy podpěrać. „Hižo z 15 eurami měsačnje móža sej zajimcy kmótřistwo za připrawu kupić“, tak Pál.

Za pěstowarnju „Krabat“ w Čornym Chołmcu planuje město Wojerecy nowy domicil. Dołhodobnje ma za zarjadnišćo w nošerstwje Dźěłaćerskeho dobroćelstwa Łužica (AWO) narunanski nowotwar nastać.

Čorny Chołmc/Wojerecy (AK/SN). Wojerowska měšćanska rada njeje so na njedawnym posedźenju jenož k tomu wu­znała, ale je zdobom wobzamknyła, hišće lětsa planowanske wukony za twarjenje a domjacu techniku do nadawka dać. Tohodla bě trjeba, zawjazowacemu wozjewjenju lětušich přidatnych wudawkow we wysokosći 290 000 eurow přihłosować. Za financowanje ma klětuši měšćanski etat srědki 1,1 miliona eurow předwidźeć. „Za sportownju noweho wyšošulskeho centruma měli podłožki k zapodaću spěchowanskeje próstwy lětsa zdźěłane być“, rěkaše we wobkrućenju namjeta. „Dokelž pak tule próstwu hakle w lěće 2019 stajimy, móžemy zawjazowace społnomócnjenje pěstowarni ,Krabat‘ poskićić.“

Angažement za FUEN skónčiła

Flensburg. Susann Šenkec skónči po dźesaćlětnym profesionelnym angažemenće za FUEN, naposledk jako amtěrowaca generalna sekretarka, swoju dźěławosć za europsku mjeńšinowu organizaciju. To stej Federalistiska unija europskich narodnych mjeńšin a Susann Šenkec dźensa w Flensburgu wozjewiłoj. Tehdyši prezident prof. Hans Heinrich Hansen bě Serbowku w lěće 2008 do centrale organizacije powował.

Serbski Sokoł znowa załoženy

Hórki. Dźensa před 25 lětami, 28. decembra 1993, su w Młynkec hosćencu w Hórkach Serbski Sokoł, třěšny zwjazk serbskich sportowčow a sportowcow, znowa załožili. Do noweho předsydstwa wuzwolichu Michaelu Mošowu jako starostku, za městostarostu Achima Kowarja, Pětra Šołtu za jednaćela, Pawoła Hejdušku za pokładnika a Mikławša Krawca za rěčnika a redaktora Sokołskich Listow.

Wučerjo stanu so zastojnicy

Budyšin (SN/JaW). Němska wuchowanska lětanska słužba (DRF Luftrettung) přewozmje w Budyšinje po nowym lěće staciju wuchowanskeje lětanskeje słužby. Wo tym informuje nowinska rěčnica DRF Sabine Bruder w nowinskej zdźě­lence. Němska DRF, kotraž ma swoje sydło­ w badensko-württembergskim Filder­stadće, je za to trěbny helikopter do Budyšina pósłała.

„Wot 31. decembra hižo čerwjeno-běły moderny helikopter typa H 145 z mjenom Christoph 62 w sprjewinym měsće a wokolinje zasadźimy“, Sabine Bruder připowědźa. Zaručić maja lětacy fachowcy z Budyšina tak wšědnje a w kóždym času transport pacientow mjez klinikami kaž tež wo spěšnu pomoc při njezbožach. „Wosebitosć je specialne wuhotowanje z wuchowanskej wijawu, kotruž trjebamy za zasadźenja předewšěm w ćežko přistupnych kónčinach we wuchodnej Sakskej. Při tym dźěłamy derje z našim partnerom Hórska straža Sakska hro­madźe“, Sabine Bruder wujasnja. Nimo toho wobsedźi H 145 dowolnosć, zasa­dźeć nócne dalokowidy (Nachtsicht­geräte). Dale ma pilotam po nocach wysokowukonity swětłomjetak pomhać.