Šoferojo dwurěčnje namołwjeni
Město „Krónu“ kupi
Budyska „Króna“ bě minjene tydźenje a měsacy jedna z wulkich temow w sprjewinym měsće. Byrnjež wčera k tomu wažny rozsud tworili, je přichod ležownosće a měšćanskeje hale dale wotewrjeny.
Budyšin (CK/SN). Z jednym wzdatym hłosom je Budyska měšćanska rada wčera rozsudźiła, měšćansku halu „Krónu“ kupić. Za 2,1 milion eurow Budyska bydlenjotwarska towaršnosć (BWB) ležownosć přewozmje. Z ćežko wujednanym kompromisom so radźićeljo dojednachu, 9 000 kwadratnych metrow wulki teren „na rezerwu“ kupić, zo móhli wuwiće na tym městnje sami postajeć a tomu zadźěwać, zo wosrjedź města dalša starownja, parkowanski dom abo wulkokupnica nastanu. Što ma so z „Krónu“ stać, wo tym chcedźa rěčeć, hdyž budźe kupne zrěčenje podpisane, rjekny wyši měšćanosta Alexander Ahrens (SPD). Za to je dosć chwile, wšako maja z dochodami z parkowanišća pjenjezy za financowanje kredita.
Krótkopowěsće (30.08.18)
Spomóžne wuwiće
Budyšin. We wuchodnej Sakskej je kónc awgusta 18 705 bjezdźěłnych, 285 mjenje hač w předměsacu. Po lětnich prózdninach je bjezdźěłnosć w regionje zaso woteběrała. 782 ludźi je nowy job nastupiło, 529 wukubłanje zahajiło. Naprašowanje za personalom je kaž loni dale na wobstajnje wysokim niwowje, zdźěli dźensa Thomas Berndt, předsyda jednaćelstwa Budyskeje agentury za dźěło.
Pokazka na namócnu smjerć
Zhorjelc. 90lětna žona je so po wšěm zdaću w Zhorjelcu z woporom złóstnistwa stała. Běchu ju 15. awgusta mortwu w jeje bydlenju našli, a lěkar wuchadźeše najprjedy z přirodneje smjerće. Mjeztym ma policija pokiwy na to, zo bu rentnarka snano morjena. Policija a statne rěčnistwo stej dźensa pytansku namołwu za dotal njeidentifikowanym mužom wozjewiłoj.
Nowy serwis kolesowarjam
Policija (29.08.18)
Susoda přebił
Klóšterska Nowa Wjes. Po wšěm zdaću žarliwosć bě přičina rozestajenja póndźelu wječor mjez mužomaj w Klóšterskej Nowej Wsy pola Kulowa. Alkoholizowany muž je tam swojeho susoda bił, kiž w awće sedźeše. Tež zadnje wokno jeho jězdźidła wón rozbi.
Oldtimer nuzowje přizemił
Šěsć wobrazow zachowaja
Za přetwar Budyskeho dwórnišća zakładny kamjeń połožili
Budyšin (SN/MWj). Hač do kónca lěta 2019 ma z Budyskeho dwórnišća nastać běrowowe twarjenje. Za to inwestuje imobilijowe předewzaće Drews & Lucas wosom milionow eurow, rjekny Jörg Drews. Wčera su na twarnišću zakładny kamjeń połožili. Jón kaž tež cyły twarski projekt je superintendent Jan Malink žohnował. Dwórnišćo je tuchwilu jedne z najwjetšich twarnišćow sprjewineho města. Hłowne twarjenje je hižo dlěši čas bjez třěchi, na pódlanskich domach porno tomu hižo nowu třěchu twarja.
Na štyrjoch poschodach nastanje cyłkownje něhdźe 6 000 kwadratnych metrow běrowoweje płoniny. Do hłowneje hale zatwarja liftaj, nimo toho nastanu tam wjacore schodźišća. Najwjetši wotnajer budźe Budyski krajnoradny zarjad, kotryž z 235 sobudźěłaćerjemi zaćehnje, rozłoži přirjadnik krajneho rady Udo Wićaz. Mjez druhim zaměstnja na dwórnišću přizjewjernju awtow a jězbnych dowolnosćow. Tež wobchadny zwjazk ZVON změje tu swoje nowe sydło.
Socialny angažement sylnić
Kubłanski projekt Europskeje unije zwjazuje łužiskich a pólskich seniorow. Woni wuměnjeja sej nazhonjenja na wšelakich polach towaršnostneho žiwjenja. Serbscy zajimcy su witani.
Wostrowc (AK/SN). „Nazhonjenja a kompetency ludźi, staršich hač 55 lět, wobohaćeja našu towaršnosć a móža mjezu přesahujo skutkować,“ podšmórnje Birgit Fleischer. Wona je koordinatorka kubłanskeho projekta Europskeje unije „Natwar kompetencneho teama 55+“ w němsko-pólskim pomjeznym rumje. Hižo wot februara 2017 w mjenowanym teamje seniorow z Němskeje a Pólskeje hromadźe wjedu. Na nim wobdźěleni su towarstwa, skupiny, wjacegeneraciske domy a wšelacy zajimcy. „Smy tež serbskim a wšitkim dalšim wobdźělnikam wotewrjeni. Woni móhli ze swojej rěču a kulturu přichodne seminary wobohaćić“, Birgit Fleischer potwjerdźa.
Wo serbskosći wsy něhdy a dźensa
Połoženje serbstwa we wot lěta 1996 Wojerecam přisłušacym Čornym Chołmcu bě tema wuradźowanja Serbskeho aktiwa měšćanskeho parlamenta w tamnišim Frenclowym domje.
Čorny Chołmc (ML/SN). Wjesny předstejićel Pětr Michala skedźbnja w rozprawje wo zwoprawdźenju prawow Serbow tež na to, zo bě sej Čorny Chołmc we wubědźowanju „Serbska rěč je žiwa“ načolne městno zdobył. Wjes njeje jenož Krabata a swjedźenskich hrow wo dušnym serbskim kuzłarju dla daloko znata.
Wožiwili běchu stary serbski nałožk jutrowneho spěwanja holcow a žonow w cyrkwinskej narodnej drasće ćichu sobotu. Pěstuja dalše serbske tradicije kaž ptači kwas, jěchanje po šćernišću a kermušu. Dwurěčnosć w zjawnosći wsy derje wobkedźbuja, dwaj domaj stej po serbskimaj wótčincomaj – fararju Salomonje Bohuchwale Frenclu a wuznamnym wučerju Dabiće Boguwěrje Głowanu – pomjenowanej. W Krabatowym młynje pěstuja serbsku rěč a kulturu. Chór, Krabatowe towarstwo, rejwanska skupina młodźiny haja serbski spěw a reju.
Krótkopowěsće (29.08.18)
Miliardy eurow na girokontach
Berlin. Najebać nisku dań mějachu wuchodni Němcy jeničce w 45 lutowarnjach Sakskeje, Braniborskeje, Saksko-Anhaltskeje a Mecklenburgsko-Předpomorskeje kónc junija 55 miliardow eurow na girowych a dnjowopjenježnych kontach. To je nimale dźewjeć procentow wjace hač loni, kaž Zwjazk wuchodoněmskich lutowarnjow dźensa w Berlinje wozjewi.
Dźesaćlětne partnerstwo
Drježdźany. Swjedźenske zarjadowanje přihotuje maršalski zarjad wojewódstwa Lubuski kraj składnostnje dźesaćlětneho regionalneho partnerstwa ze Swobodnym statom Sakskej za 3. september we Łęknicy a w geoparku Mužakowski zahork. 9. nowembra 2008 běštaj tehdyši sakski premier Stanisław Tilich (CDU) a bywši maršal wojewódstwa Marcin Jabłoński wotpowědne zrěčenje podpisałoj.
Twory premiera bojkotować
Bywši šulerjo so 60 lět po maturje znowa zetkali
Před 60 lětami napinaše so 45 maturantow dweju rjadownjow Serbskeje wyšeje šule Budyšin, zo bychu wuspěšnje abiturne pruwowanja złožili. Běštej to rjadowni 12 B/1 z rjadowniskim wučerjom Měrćinom Wornarjom a 23 absolwentow rjadownje 12 B/2 z rjadowniskim wučerjom Jurjom Pěčku. Po šěsć lětdźesatkach je so 17 bywšich šulerjow druheje rjadownje minjenu sobotu w Stróži pola Hućiny zetkało. Z česćownosću dopominachu so w rozmołwach na swojeho rjadowniskeho wučerja, ale tež na Pawoła Wowčerka, Rudija Sykoru, Horsta Meltku, dr. Bena Korjeńka, Jana Barta a na Achima a Jakuba Brankačka.
