Myće za měr a socialny angažement
Koncept prěni raz zjawnje
Čłonojo Budyskeje měšćanskeje rady běchu na swojim wčerawšim posedźenju prěni, kotrymž předstaji direktor Załožby za serbski lud Jan Budar koncept za nowy Serbski zetkawanski centrum na Lawskich hrjebjach.
Budyšin (SN/MWj). Po rozsudźe rady Załožby za serbski lud, zo ma w Budyšinje na arealu mjez Hošic hasu a Lawskimi hrjebjemi nowotwar za Serbski institut nastać a zo ma so tohorunja stara póštownja do njeho sobu zapřijeć, póčnu kontury za to dokładniše być. Koncept z tuchwilnym titulom „Serbski zetkawanski centrum“ je direktor załožby Jan Budar wčera Budyskim měšćanskim radźićelam předstajił. Byrnjež to jako samostatny dypk na dnjowym porjedźe njesteješe, je zjawnosć na te wašnje prěni raz wo wobsahach, zaměrje a financowanju projekta zhoniła.
Šansy ze strukturneje změny
Ministerski prezident w Zhorjelcu wabił z njej ofensiwnje wobchadźeć
Zhorjelc (AK/SN). Ze zawjazowacym zakonjom wo naprawach chce Sakska srědki we wysokosći 1,3 miliardow eurow zaměrnje wužiwać, kotrež chce Zwjazk lětnje hač do 2038 za strukturnu změnu we Łužicy přewostajić. Zdobom wabi kraj w Berlinje za dołhodobnje płaćiwe pospěšene planowanske prawo. „Zhromadnje z wokrjesomaj Budyšin a Zhorjelc chcemy so jako swobodny stat za to zasadźić. Dyrbimy zmištrować, zo docpěwamy za wažne twarske předewzaća po pjeć do dźesać lětach twarske prawo“, podšmórny sakski ministerski prezident Michael Kretschmer (CDU) wčera na posedźenju Zhorjelskeho wokrjesneho sejmika. Strukturna změna wotkryje Łužicy w dobje 20 lět wulke šansy, wón wuzběhny.
Krótkopowěsće (31.01.19)
Za Europeadu so přizjewić
Flensburg. Wotnětka su přizjewjenja za 4. koparske europske mišterstwa awtochtonych narodnych mjeńšin Europeadu móžne, kaž Federacija europskich narodnych mjeńšin (FUEN) zdźěla. Korutanscy Słowjency wubědźowanje wot 20. do 28. junija wuhotuja. Startować smědźa mustwa z njeprofesionalnymi hrajerjemi a hrajerkami.
Komisija za anticyganizm
Berlin. Zwjazkowe knježerstwo je wčera čłonow njewotwisneje komisije ekspertow anticyganizm powołało. Wutworjenje gremija je w koaliciskim zrěčenju unije a SPD zapisane. Centralna rada němskich Sintow a Romow po słowach jeho předsydy Romanija Rose krok wita a zdobom wočakuje, zo so Němski zwjazkowy sejm wobšěrnje z bojom přećiwo anticyganizmej zaběra.
Na rozmołwu přeprosyć
Serbscy susodźa swěrni hosćo
Čłonojo Kamjenskeje cityjoweje iniciatiwy z wopytowarstwom spokojom
Kamjenc (SN/mwe). Kamjenc ma 16 845 wobydlerjow, wyši měšćanosta je wot lěta 2011 Roland Dantz (njestronjan). „Njemóžemy so wopytowarskich frekwencow dla hóršić. Kamjenc je kótwicowa městnosć za wokolinu, čehoždla wjele ludźi do města přijědźe. Tež serbscy susodźa su swěrni hosćo.“ To praji Anne Hasselbach ze cityjoweje iniciatiwy Lessingoweho města. Wona je předewzaćelka a ma swoje „Hasselbachske studijo“ na Hasy Rosy Luxemburg.
Policija (30.01.19)
Spěšnosć měrili
Njebjelčicy. Na statnej dróze S 94 je policija póndźelu při wotbóčce do Njebjelčic spěšnosć měriła. W běhu třoch hodźin kontrolowachu 1 730 wozydłow. W 51 padach wosta při warnowanju. Wosom šoferow změje pokutu płaćić. Rekord docpě awto z Budyskim čisłom, kotrež při dowolenych 70 km/h ze 118 km/h nimo smaleše. Šofer změje nětko 160 eurow pokuty płaćić, dóstanje dypkaj w Flensburgu a dyrbi měsac nóžkować.
W nowym hotelu so paliło
Stipendije za kurs čěšćiny
Budyšin. Čěske knježerstwo přewostaja tež lětsa zajimowanym Serbam stipendije za wobdźělenje na intensiwnym rěčnym kursu čěšćiny w Praze wot 26. julija do 23. awgusta abo w Českich Budějovicach wot 18. awgusta do 9. septembra. Stipendije posrědkuje Rěčny centrum WITAJ (tel. 03591/ 550 400, e-mail: ). Zajimcy njech tam hač do 15. měrca swoje podłožki wotedadźa. Nadrobniše informacije a přizjewjenske formulary nadeńdu w interneće pod www.witaj-sprachzentrum.de.
Štó přewostaji kachle?
Budyšin. Za swoju přichodnu hornjoserbsku inscenaciju „Wopušćeny dom“ pyta Němsko-Serbske ludowe dźiwadło stare elektriske kuchinske kachle ze štyrjomi platami (tež skóncowane). Sobudźěłaćerjo sej kachle darmotnje wotewzaja. Zajimcy njech přizjewja so pod telefonowym čisłom 0 35 91 / 59 84 51 10.
Stajne blido jěcharjow
Kulow. Přichodne Kulowske stajne blido jěcharjow wotměje so pjatk, 1. februara, w 19 hodź. w kofejowni „Schwupp“. Nadine Schneider porěči wo konjacym treningu, Anke Meyer wěnuje so konjacej terapiji. Wšitcy su wutrobnje witani.
Hród bórze dosaněrowany
Ramnow (UM/SN). Twarske róšty postajachu minjene dwaceći lět mjenje abo bóle wobraz Ramnowskeho barokneho hrodu. A wone su tam dale widźeć. „Haj, tež lětsa hišće raz twarimy“, wobkruća nawodnica hrodoweho zarjadnistwa Ines Eschler. Hinak hač zašłe lěta pak je nětko kónc wotwidźeć. „Hdyž budu tuchwilne dźěła w schodźišću a w foyeru špiheloweje žurle wotzamknjene, potom budźe naš hród dosaněrowany.“
Wjace dźěći, ale mjenje ludźi
Pančicy-Kukow (SN/MWj). W pjeć gmejnach zarjadniskeho zwjazka Při Klóšterskej wodźe bě kónc lěta 2018 dohromady 382 wobsedźerjow psow přizjewjenych. To wuchadźa ze statistiki, kotruž je zwjazk tele dny wozjewił. Tak je ličba mějićelow psow porno lětu 2017 we wšitkich pjeć gmejnach rozrostła, najbóle w Ralbičansko-Róžeńčanskej wo třinaće na 103, najsnadnišo w Chróšćanskej wo jednoho na 47.
Cyłkowna ličba wobydlerjow pjeć gmejnow zarjadniskeho zwjazka je loni wo šěsć wosobow na 7 170 woteběrała. Mjeztym zo bě jich w Pančicach-Kukowje z 2 088 a w Ralbicach-Róžeńće z 1 703 stajnje hač na jednu wosobu mjenje nimale runje telko kaž lěto do toho, zličichu we Worklecach z 1 134 porno předlětu dźewjeć ludźi mjenje a w Njebjelčicach z 1 189 štyri mjenje. Jeničce w Chróšćanskej gmejnje mějachu kónc 2018 dźewjeć wobydlerjow wjace hač lěto do toho, dokładnje 1 056.
