Kamjenica/Zhorjelc (SN). Zo bychu w Zhorjelskim wokrjesu nowy wobydlerski serwis wutworili, přewostaji Sakska 4,8 milionow eurow. Nastać ma moderne, do přichoda wusměrjene zarjadnistwo, za kotrehož wužiwanje awtomatizowanych procesow dla mjenje personala trjebaja, kaž sakska krajna direkcija zdźěla. Ličbu wotnožkow wokrjesneho zarjadnistwa chcedźa wot 13 na šěsć pomjeńšić. Tak reaguje Zhorjelski wokrjes tež na přiběracy njedostatk fachowcow.

Spěchowanje změje wokrjes w třoch dźělnych sumach. Wupłaćenje druheho a třećeho dźěla orientuje so na tym, kak projekt „zarjadnistwo 4.0“ postupuje. Předwidźane su wone wotpowědnje spěchowanskej dobje hač do kónca lěta 2022. Nastać maja wobydlerske běrowy, wobydlerske portale a terminale, kotrež su ludźom po cyłym wokrjesu přistupne.

Portret serbskeho duchownstwa

Budyšin. Ludowe nakładnistwo Domowina je nowu knihu rjada Spisy Serbskeho instituta wudało. W njej předstaja dr. Friedrich Pollack na přikładźe ewangelskich Serbow Hornjeje Łužicy socialno- a kulturnostawizniske wuměnjenja za wutworjenje duchowneje elity. Zdobom rysuje kolektiwnobiografiski portret serbskeho duchownstwa w času wot reformacije hač k Wienskemu kongresej.

Serb nawjeduje Praske studijo

Lipsk. Danko Handrik nawjeduje wot 1. januara 2019 telewizijne studijo ARD w Praze. Wo tym informuje sćelak MDR. Hižo wot 2008 do 2014 je serbski žurnalist direktnje z Čěskeje a Słowakskeje rozprawjał. Tež z nazhonjenjemi Handrika, kiž rozumi so jako mostytwarc, chce MDR rólu Praskeho studija jako centruma za rozprawnistwo z wuchodneje Europy dale skrućić, kaž sćelak zdźěla.

Scholze nětko rjadny prezident

Ze swojim do dalšeju awtow zrazyła

Biskopicy. Wodźerka VWja bě wčera popołdnju w Biskopicach na S 111 do Peugeota zajěła a storči jón tak do dalšeho před nim stejaceho VWja. Šoferka so zrani a dyrbjachu ju do chorownje dowjezć. Dźěsćomaj, kotrejž w jeje awće sedźeštej, a dalšemu šoferej so ničo njesta. VW žony a Peugeot dyrbjachu dospołnje wobškodźenej wottransportować. Zawrjeneje dróhi dla dóńdźe k haćenjam.

Dźiwja jězba po polu

Huska. Po polu agrarneho zawoda w Husce su njeznaći z awtami dźiwje wokoło jězdźili. Na něhdźe 150 króć 400 metrow wulkim zahonu nasta tak škoda něhdźe 3 000 eurow. Wobsedźer pola je so na kriminalnu policiju wobroćił, kotraž pad nětko přepytuje.

Srjedź decembra wotzamknychu serbscy seniorojo-škotowarjo w Radworskim hosćencu „Meja“ swoje turněry lěta 2018. Dnjowy dobyćer, Křesćan Weclich z Nuknicy, bě z wukonom 2 659 dypkow spokojom, njemóžeše so pak po wuspěšnych lětach tónraz mjez prěnimi třomi zaměstnić. Nimale přez cyłe lěto bě Franc Nowak z Noweje Wjeski tabulku nawjedował, na poslednim turněrje pak je jeho Wolfgang Kühne z Delnjeho Wujězda hišće přesćahnył. Ze solidnym wukonom bu Jurij Hanto z Budyšina dobry třeći. Dalši zaměstnjeni su Křesćan Weclich, Herman Woko, Siegfried Rawa a Pawoł Šołta-Šunowski.

Cyłkownje je so lětsa 32 škotowarjow na dwanaće turněrach wobdźěliło, štož je snadnje mjenje porno minjenym lětam. Najebać to zahaja woni w januaru 2019 w Lejnjanskim Kubicec hosćencu swoju jubilejnu „slěbornu“ sezonu.