Na haće mjez Sernjanami a Nowoslicami su minjenu sobotu a njedźelu ...
Krótkopowěsće (14.02.17)
Přezmjeznu wzajomosć sylnić
Liberec/Žitawa. Radnicy w sewjeročěskim Liberecu a łužiskej Žitawje chcetej wjace němskich turistow do Libereca a nawopak čěskich do Němskeje wabić a zdobom we woběmaj městomaj zajim za rěč susodow šěrić. W zwisku z konceptom měli so tež někotři přistajeni radnicow na dwaj měsacaj wuměnjeć. Projekt je z europskich fondsow spěchowany.
Zhubjeneho mortweho našli
Zhorjelc. Zhubjeneho 24lětneho muža z Nišćanskeje kónčiny su w jednym Zhorjelskim bydlenju mortweho namakali. Policija z toho wuchadźa, zo bu wón morjeny. Mjeztym je podhladny porik zajała, kaž zdźěla. Muž bě wot 9. februara zhubjeny. Swědk bě zastojnikam rozsudny pokiw na podhladny porik dał.
Prócuja so wo EM 2024
Lipsk. Město Lipsk so oficialnje wo to prócuje, europske koparske mišterstwa (EM) w lěće 2024 sobu wuhotować směć. Wotpowědne podłožki je dźensa Němskemu koparskemu zwjazkej zapodało. Jako hrajnišćo poskića stadion zwjazkoweho ligista RB Lipsk, kotryž ma potom na 57 000 městnow wutwarjeny być.
Sokoljo bjez trenarja
Z Walentinom kiwaja kwětki
Krótkopowěsće (13.02.17)
Cyrkej dóstanje zaso fararja
Horni Wujězd. Wakantne farske městno w Hornjowujězdźanskej awtodróhowej cyrkwi budźe prawdźepodobnje wot meje zaso wobsadźene. Po informacijach superintendenta Wernera Waltsgotta ma farar z Freibergskeje kónčiny přińć. Městno běchu nazymu wupisali, po tym zo bě so wjelelětny farar Michael Müller na wuměnk podał.
Erika Krause njeboh
Drježdźany. Wjelelětna moderatorka wusyłanja „Ty a twoja zahroda“ Erika Krause je njeboh. Wona zemrě hižo 2. februara w starobje 92 lět, kaž bu hakle minjeny kónc tydźenja znate. Erika Krause bě lěta 1968 prěni króć před kameru stała. Ze swojim wusyłanjom zdoby sej wona wulki publikum. Naposledk bydleše na demencu schorjena w hladarni.
Psyče zapřahi so wubědźowali
Zásada. Na skónčnje zasněženych płoninach wokoło městačka Zásada w čěskich Jizerskich horinach wotmě so lětsa wubědźowanje psyčich zapřahow ze sanjemi. Cyłkownje je so 85 „mustwow“ na podawku wobdźěliło. Na atraktiwnej čarje, zmóžnjacej daloke wuhlady, móža zapřahi přerěznu spěšnosć hač 35 km/h na hodźinu docpěć.
Hobbyjowi zahrodkarjo sej symjo wuměnjeli
Budyšin (CS/SN). Mjeztym hižo šesty raz wotmě so we wosadnym domje w Budyskej Strowotnej studni symjenjowa bursa. Po słowach organizatora dr. Matthiasa Bergera žněje tele zarjadowanje lěto a wjetši wothłós. Su to přewažnje hobbyjowi zahrodkarjo, kotřiž chcedźa so z wotwisnosće wot wulkich producentow symjenja wuswobodźić. Dokelž tele firmy jeno symjo hybridnych rostlin poskićeja, njemóžeš ze žnjatych płodow sam žane symjo zdobyć. Zahrodkarjo tuž symjo z njehybridnych rostlin dobywaja a je mjez sobu měnjeja. Štóž njemóžeše ničo poskićeć, darowaše po swojich móžnosćach za wjacegeneraciski dom w Strowotnej studni.
Wjace hač sto zajimcow je wčera bursu wopytało, a to nic jeno z Budyšina, ale tež z wokrjesow Zhorjelc a Sakska Šwica a samo z Drježdźan. Bursy přizamkny hornjołužiska skupina towarstwa k zachowanju mnohotnosće wužitnych rostlin swoju lětnu hłownu zhromadźiznu, na kotrejž móžeše tež nowych čłonow witać. Aktiwity towarstwa koordinuje Birgit Fleischer z Cympela.
Policija (13.02.17)
Dźiwje stanowali
Mučow. Swoje zymske prózdniny chcyše sobotu popołdnju pjeć młodostnych w Mučowje na cyle wosebite wašnje zahajić. Hólcy w starobje 14 do 17 lět zetkachu so k zhromadnemu dźiwjemu stanowanju. Za to natwarichu sej tak mjenowany štomowy domčk, podrězachu štomiki, zo móhli sej lěhwowy woheń zapalić, a na to sej hudźbu wótře wotwjertnychu. Dokelž so wobydlerjo w bliskosći myleni čujachu, zawołachu policiju. Nimo toho lěs ani młodostnym abo jich staršim njesłušeše. Zastojnicy Wojerowskeho policajskeho rewěra stanowansku akciju skónčichu. Wot młodych ludźi načinjena wěcna škoda wučinja po informacijach policije 400 eurow.
Dobre wuměnjenja za pomoc
Worklečanscy wobornicy nowe wuhotowanje dóstali
Worklecy (JK/SN). Po tym zo su Worklečanscy wobornicy loni nowe moderne hašenske jězdźidło dóstali, mějachu so woni lětsa z načasnej a wěstej drastu wuhotować. Gmejna bě to hižo loni do swojeho hospodarskeho plana zapisała. Dokelž dotal wužiwana drasta hižo normam a žadanjam njewotpowěduje, bě tajka naprawa trěbna. Nakup noweho wuhotowanja bu z 50 procentami spěchowana. Po wupisanju nadawka dóstachu wot Kamjenskeho předewzaća najpřijomniši poskitk, a za 23 500 eurow kupichu 43 wobornikam nowe kabaty, škitne pasy a nahłowniki. Runje te su jara načasne a woprawdźity highlight. Z integrowanej lampu wohotowane nahłowniki zaručeja wosebje w ćmě abo při hustym kurje dobru orientaciju. Tež kabaty a pasy wotpowěduja žadanjam a standardej časa. Na swojim obligatoriskim zwučowanju mějachu kameradojo sobotu składnosć, nowe wuhotowanje wuspytać.
Krótkopowěsće (10.02.17)
Projekty na dobro demokratije
Budyšin. Wyši měšćanosta Budyšina Alexander Ahrens (njestronjan) zetka so wčera ze zamołwitymi zwjazka ARGE, kotryž zasadźa so za wuwiće demokratije a přećiwo prawicarskemu ekstremizmej. Wobdźělnicy wuradźowachu wo projektach, spřećiwić so prawicarstwu a zapřijeć wobydlerjow sylnišo do towaršnostneje komunikacije.
Intendanća přećiwo hidźe
Drježdźany. Z naležnym apelom su so intendanća Drježdźanskich kulturnych institucijow přećiwo dźeń a agresiwnišej naledźe w měsće wobroćili. Hida a zacpěwanje wohrožatej demokratiski towaršnostny porjad, w zdźělence rěka. Zdobom kulturnicy wyšemu měšćanosće Dirkej Hilbertej (FDP) rjap skrućeja. Jemu běchu minjeny čas samo ze smjerću hrozyli.
Petry: Spěchowanje skrótšić
Policija (10.02.17)
Njeby scyła jěć směł
Połčnica. Na awtodróze A 4 mjez Połčnicu a Ohornom je wčera do Zhorjelca jěduce nakładne awto kompletne koleso zhubiło. Do njeho zrazy wosobowy wóz typa Škoda, kotryž so na to zwróći. Jeho 42lětneho šofera a 66lětneho sobujěduceho dyrbjachu do chorownje dowjezć. Při wobdźěłanju njezboža so wukopa, zo přećiwo 51lětnemu wodźerjej nakładneho awta dwaj přikazaj zajeća předležeštej a wón jězdźidło scyła wodźić njeby směł. Jeho tuž nachwilnje zajachu.
Twarja pozdźišo
Kružny wobchad a nowy móst přesunjenej
Kašecy (SN/MWj). Wulkej dróhotwarskej projektaj w gmejnje Pančicy-Kukow budu pozdźišo twarjenej, hač připowědźene. Nowy móst nad Klóšterskej wodu w Pančicach-Kukowje přesunu prawdźepodobnje wo něšto měsacow, kružny wobchad w Zejicach znajmjeńša wo dwě lěće. Tole zdźěli Pančičansko-Kukowski wjesnjanosta Markus Kreuz (CDU) na wčerawšim posedźenju gmejnskeje rady. Te wotmě so prěni raz w Kašecach, z čimž radźićeljo swoje prócowanja dale wjedu, po móžnosći tež we wjesnych dźělach posedźenja přewjesć.
Za kružny wobchad w Zejicach je tak mjenowana procedura zawěsćenja twarskeho plana (Planfestellungsverfahren) trěbna a móže wjacore lěta trać. Po wšěm zdaću maja tam ležownostne problemy, Markus Kreuz wčera tukaše, bjez toho wšak, zo by nadrobniše informacije měł. „Klětu kaž tež lěto pozdźišo drje w Zejicach hišće twarjene njebudźe“, wón rjekny.
