Nowy plan so ćežko natwarja
Gmejnscy radźićeljo so z klětušim hospodarskim planom zaběrali
Rakecy (JK/SN). Zo móhli klětu runje tak kaž hižo lětsa sčasom po wobkrućenym hospodarskim planje dźěłać, zaběrachu so Rakečanscy gmejnscy radźićeljo wčera prěni raz z klětušim etatom. Prěnje čitanje naćiska z tójšto wažnymi pozicijemi wuwabi kontrowersnu, ale přiwšěm wěcownu diskusiju. Zaměr klětušeho plana je, po zakónčenju konsolidacije docpěć wurunany etat. To njebudźe lochko, wšako su ze stron wokrjesa hižo mjenje klučowych připokazankow signalizowane. Nimo toho skedźbnichu radźićeljo frakcije njestronskich wolerjow na to, zo běchu hižo k zahajenju konsolidacije w lěće 2014 dawki zwyšili, z wotmysłom, je po wuspěšnym zakónčenju konsolidacije zaso znižić. To pak so w naćisku plana njewobkedźbuje. Wysokosć dawkowych dochodow wobwliwuje pak zaso wysokosć inwestiwnych klučowych připokazankow. Na dosć dochodow je Rakečanska gmejna připokazana, wšako steja klětu nimo inwesticijow tež přidatne wudawki za dźěćace přebywanišća we wysokosći 200 000 eurow na planje.
Tójšto temam so wěnowali
Radworscy gmejnscy radźićeljo wěnowachu so w swojim posedźenju zawčerawšim mnohim palacym temam. Mjez druhim zaběrachu so ze sportowym wuwićowym planom a z pućom na Kaponicu, hdźež prócuja so wo dojednanje z wobsedźerjom lěsa.
Na twarnišću powjetšeneho hotela „Swětłownja“ w Lejnom pola ...
Krótkopowěsće (15.11.18)
Bjarnat Rjentš zemrěł
Choćebuz. Wjelelětny župan župy Delnja Łužica a sobuzałožer Delnjoserbskeho dźěćaceho chóra Bjarnat Rjentš je po krótkej ćežkej chorosći wčera w starobje 81 lět w Choćebuzu zemrěł. Za swój žiwjenski skutk bu njedawno hakle z Mytom Domowiny 2018 wuznamjenjeny. Mjez druhim nawjedowaše Rjentš rjad rejwanskich skupin w Delnjej Łužicy. Hač do wysokeje staroby sposrědkowaše delnjoserbšćinu w rěčnych kružkach.
Komisija w rozsudnej fazy
Berlin. Wurjadna komisija zwjazkoweho knježerstwa ke skónčenju zmilinjenja brunicy je dźensa w Berlinje z wuradźowanjemi pokročowała. Při tym ma hač do jutřišeho wo „centralne prašenja“ hić, kaž z kruhow wobdźělnikow rěkaše. Plan ke skónčenju wudobywanja brunicy móhł w běhu přichodneju tydźenjow předležeć. Wobdźělnicy rěča wo wobćežnych jednanjach a wo „rozsudnej fazy“.
Wo hudźbnym žiwjenju NDR
Policija (14.11.18)
Žonu mortwu namakali
Hodźij/Čornecy. Wot póndźele dopołdnja pytaše policija 58lětnu žonu z Hodźija. Wona bě rano z kolesom wotjěła a so hižo domoj njenawróćiła. Wjacore wobsadki policajskich awtow hač do nocy žonu pytachu. Při tym běštej tohorunja policajski psyk a helikopter zasadźenej. Hakle wčera rano wobydler žonu nježiwu w Čornecach namaka. Přiwołany nuzowy lěkar móžeše jenož hišće smjerć 58lětneje zwěsćić. Kriminalna policija nětko přepytuje, kak je Hodźijčanka zemrěła.
Rozsud wuspěšnje přesadźili
W Dobrošicach smědźa so pućej po woli wobydlerjow pomjenować
Njeswačidło (JK/SN). Hižo wjacore razy su Njeswačanscy gmejnscy radźićeljo wo noworjadowanju pućow a domowych čisłow w Dobrošicach wuradźowali. Na wčerawšim posedźenju nětko chcychu so doskónčnje rozsudźić a nowe pomjenowanja dróhow wobzamknyć. Do toho běchu wobydlersku zhromadźiznu w Dobrošicach přewjedli a wjesnjenjo móžachu namjetować, kak so puće we wsy pomjenuja. Při tym je gmejnsku radu zdźěla znjeměrniło, zo rozsudźichu so Dobroščenjo za pomjenowani Janska a Lipa za pućej, kotrejž hižo zdawna pod tutymaj mjenomaj wužiwaja. Namjetaj mjenow pak někotrym gmejnskim radźićelam njesłodźeštej. Njemóžachu dowidźeć, zo hodźi so puć we woběmaj rěčomaj z jednym zapřijećom pomjenować a wobstachu na tym, zo so alternatiwy we woběmaj rěčomaj namakaja. To pak wjesnjenjo nochcychu, přeswědčiwje měnjo, zo stej pomjenowani jasnej a matej ze serbskeho a historiskeho wida woprawnjenje.
Ministerskeho prezidenta wopytali
Kulow. Šulerjo 10. lětnika Kulowskeje wyšeje šule „Korla Awgust Kocor“ běchu spočatk tydźenja trochu njesćerpni. Woni so hižo wjeselachu na zajězd do statneje kenclije w Drježdźanach. Kak je k tomu dóšło? Lětsa 4. meje přewjedźechu na šuli „europski dźeń“. Tón dźeń witachu w šuli sakskeho ministerskeho prezidenta Michaela Kretschmera (CDU) jako rozmołwneho partnera. Na kóncu přeprosy wón jich, tehdom šulerjo 9. lětnika, na wopyt do statneje kenclije.
„To so nam hižo ženje stać njesmě“
22. oktobra wupadnjene posedźenje Trjebinskeje gmejnskeje rady postaja přeco hišće diskusije mjez radźićelemi. Nětko pytaja čłonojo parlamenta takrjec za nowej zhromadnosću.
Trjebin (AK/SN). Zadźerženski a čestny kodeks předčita Norbert Struck na zašłym regularnym posedźenju Trjebinskeje gmejnskeje rady. „Při tym dźe wo zamołwitosć napřećo wobydlerjam. Tež w Žitawje, Zhorjelcu a Budyšinje je tajki kodeks w radnicy wupowěsnjeny“, rozłoži Trjebinski gmejnski radźićel. Mjez druhim wón citowaše: „Podrjaduj swoje starosće gmejnskim.“ Tole, tak Norbert Struck podšmórny, měł sej kóždy w gmejnskej radźe k wutrobje brać. Přičina bě njewšědny podawk. 22. oktobra měješe Trjebinska gmejnska rada zakładnemu zrěčenju wo přesydlenju Miłoraza přihłosować. Dokelž pak bě přemało radźićelow přišło, njebě gmejnska rada wobzamknjenjakmana. 5. nowembra swoje posedźenje wospjetowachu a zrěčenju jednohłósnje a bjez diskusije přihłosowachu.
