Z hosćimi kermušu swjećili
Policija (29.10.18)
Wodu kradnyli
Běła Woda. Nic alkohol abo druhe hódnotne wěcy, ale zawěrno njewšědnu rubiznu běchu njeznaći minjene dny w Běłej Wodźe pokradnyli. Po wšěm zdaću běchu woni přelěni sami nakupować hić. Tak spakosćichu woni 87lětnej žonje z jeje pincy we wjaceswójbnym domje na Humboldtowej nimale 40 blešow mineralneje wody. Byrnjež hódnota rubizny poměrnje snadna była, kaž Zhorjelska policajska direkcija zdźěli, dyrbi so staruška nětko znowa dračować, zo by sej z kupnicy ćežke bleše wody zaso domoj znosyła.
Wo alternatiwnych faktach
Budyšin. Z rěču w politice a z jeje wuskutkami zaběra so Budyski klub wuchowarjow rěče jutře, wutoru, w 19 hodź. w Budyskim hosćencu „Sprjewina pen- sija“. Tam porěči Sieghard Kozel na temu „Rěčny płašć alternatiwnych faktow“. Hosćo su wutrobnje přeprošeni, zastup je darmotny.
Ponowjeja dróhu
Němcy. Wot dźensnišeho hač do soboty ponowjeja statnu dróhu S 95 mjez Němcami a Kulowcom. Po wotrězkach wotškrabaja tam staru asfaltowu worštu a pokryja potom puć z nowej. Za čas twarskich dźěłow je dróha dospołnje zawrjena, kaž Budyski krajnoradny zarjad zdźěla. Wobjězdka je hižo wutwara hłowneho puća w Němcach dla wupisana a wjedźe we woběmaj směromaj přez Mučow.
Na čaporowe wiki
Chrósćicy. Štóž so za stare knihi, wučbny material a šulsku techniku zajimuje, njech dóńdźe sej srjedu, 31. oktobra, wot 9 do 11 hodź. na čaporowe wiki do Chróšćanskeje šule. Tam změja wjele zajimaweho ze šulskeje łubje w poskitku.
Plan bjez naprawow wobzamknjeny
Kubšicy (CS/SN). Akciski plan přećiwo harje je Kubšiska gmejnska rada na swojim zašłym posedźenju wobzamknyła. Kóžde pjeć lět dyrbja so radźićeljo z planom zaběrać a jón aktualizować. Za čas zjawneho wupołoženja móžachu sej wobydlerjo podłožki wobhladać, jedyn je so k tomu wuprajił. Jeho pokiw su do plana přiwzali.
Kaž na posedźenju rěkaše, njetrjebaja žane wosebite naprawy přewjesć, dokelž su škitne sćěny abo izolowace wokna wšudźe tam zwoprawdźene, hdźež su ludźo wot hary z awtodróhi A 4 a zwjazkoweje dróhi B 6 poćeženi. Kaž z dokumenta wuchadźa, je dźesać wosobow wodnjo a 19 w nocy wot poćeženja z haru wjace hač 65 decibelow potrjechenych.
Žane předłohi w interneće
Rada Hodźijskeje gmejny wjace transparency wobydlerjam wotpokazała
Hodźij (CK/SN). Předłohi za wobzamknjenja gmejnskeje rady tež přichodnje do posedźenjow na internetnych stronach gmejny Hodźij widźeć njebudu. To su tamniši gmejnscy radźićeljo na swojim zašłym posedźenju wobzamknyli. Po słowach nawodnicy hłowneho zarjada gmejny Ines Henichoweje běchu wo tym w zašłosći hižo časćišo diskutowali. We wuběrkach pak njemóžachu so dojednać, čehoždla měješe nětko gmejnska rada wo tym wothłosować. Ale tež w parlamenće běchu jeho čłonojo rozdźělneho měnjenja.
W Krabatowym młynje kwasowali
Čornochołmčanski Krabatowy młyn je hižo někotryžkuli swjedźeń dožiwił. Serbski kwas w narodnej drasće pak tam hišće widźeć njebě. Premjera je so nětko sobotu poradźiła.
Čorny Chołmc (KD/SN). Nimale sto hosći je předwčerawšim w Čornochołmčanskim Krabatowym młynje serbski kwas w drasće ewangelskich Serbow Wojerowskeho regiona dožiwiło. Wjacore hotowarniče běchu njewjestu kaž tež wšitkich dalšich wobdźělenych zdrasćili. Wšitcy zhromadnje ćehnjechu pod přewodom Rakečanskich dujerjow k młynskej bróžni. Pod čestnymi wrotami, kotrež běchu pilni pomocnicy do toho z pletwu wobwili a stajili, bě składnosć, kwasny ćah fotografować.
Dokelž so bjez přestawki dešćowaše, je wčera popołdnju mjenje ...
Překwapjaca mysl
Za „dźeń serbskeho witanja“
„Serbsko-němska mjezsobnosć w Budyšinje“ rěkaše titl idejoweje konferency minjeny pjatk w Kamjentnym domje sprjewineho města. Podate nastorki zjimaja do kataloga, kotryž ma skutkowanje dźěłoweho kruha za serbske naležnosće a kaž tež měšćanskeje rady w nowej wólbnej periodźe wopłodźeć.
Budyšin (SN/at). Impulsy za lěpšu mjezsobnosć je sej dr. Susanne Hozyna, měšćanska radźićelka w frakciji CDU a rěčnica dźěłoweho kruha za serbske naležnosće města Budyšina, na spočatku nimale třihodźinskeje wuměny myslow přała. A někotre zajimawe su wobdźělnicy za třomi blidami zrodźili. Woni diskutowachu w kołach „komunalne zarjadnistwo a politika“, „wobydlerki a wobydlerjo“ kaž tež „kultura a kreatiwne hospodarstwo“. Mjez přitomnymi běchu tež wyši měšćanosta Alexander Ahrens (SPD), měšćanostaj dr. Robert Böhmer a Juliane Naumann, předsyda Domowiny Dawid Statnik, załožbowy direktor Jan Budar, měšćanscy radźićeljo, zastupjerjo měšćanskich zawodow towarstwow a serbskich zarjadnišćow.
Krótkopowěsće (29.10.18)
FDP z nowym předsydstwom
Kamjenc. Budyski wokrjesny zwjazk FDP je zašły pjatk na stronskim zjězdźe w Kamjencu nowe předsydstwo wuzwolił. Nowy a bywši předsyda je Budyski měšćanski radźićel Mike Hauschild. Za jeho naměstnika wuzwolichu Thomasa Kunza a za pokładnika Holgera Johnu. Dalši čłonojo su Sirko Rosenberg, Stefan Richter, Katharina Gerber, Reiner Deutschmann, Matthias Schniebel a Martin Nedo.
IG metal konferencu přewjedła
Kamjenc. Něhdźe 60 aktiwnych čłonow dźěłarnistwa IG metal z najwšelakorišich zawodow je so sobotu na konferency w Kamjencu wobdźěliło. Na diskusijach a forumach woni zhonichu, što sobustawow dźěłarnistwa zajimuje. Zdobom wuwiwachu plany, kak móhli so přichodnje zaměrnišo za dobre tarifowe zrěčenja zasadźić a dobrych zawodnych radźićelow zdobyć.
W Pólskej čitałoj
