Krótkopowěsće (03.05.19)
Daruja za jubilej wobory
Pančicy-Kukow. Za 150. róčnicu załoženja dobrowólneje wohnjoweje wobory Pančicy-Kukow dochadźeja do gmejnskeho zarjadnistwa šćedriwe dary. Na wčerawšim posedźenju přiwzachu Pančičansko-Kukowscy gmejnscy radźićeljo daraj po 150 eurach wot inženjerskeho běrowa a metal předźěłaceho zawoda. Tež logopediska praksa je mjez druhim pjenjezy za jubilej wobory přewostajiła.
Zarjad z nowej nawodnicu
Budyšin. Wojerowčanka Katja Schimke je nawodnistwo Budyskeho financneho zarjada přewzała. Šef zarjada sakskeho financneho ministerstwa Dirk Diedrichs je ju zhromadnje z prezidentom krajneho zarjada za dawki a financy Karlom Kröllom oficialnje do zastojnstwa zapokazał. Studowana juristka Budyski zarjad hižo wot 1. decembra nawjeduje.
Wusłužene psy na předań
Twarnišćo wjes jara poćežuje
Lětuše wjerški w Němcach dyrbja dróhotwara dla wotprajić
Němcy (UH/SN). Runja zašłym lětam su zawčerawšim tež w Němcach zaso meju stajili. Ze 37 metrami je wona znowa chětro nahladna. Z meju zwjazane běchu minjene lěta wjacore wjerški, kotrež bychu tónraz 18. a 19. meje slědowali. Bohužel pak dyrbja někotre woblubowane zarjadowanja skromnišo wuhotować abo samo cyle wotprajić. Z tajkej špatnej powěsću je so nawoda wjesneho kluba Bernd Grofa hromadźe z dalšimi čłonami kluba kaž Handrijom Korchom a Matijasom Kochtu na kromje mejestajenja na nowinarjow wobroćił. „Přičina su dale trajace dróhowarske dźěła. Samo wjesnjenjo mjeztym něhdźe lěto lědma z jednoho městna na druhe přińdu. Jeničce z kolesom abo pěši so někak předrěješ“, praji Bernd Grofa.
Policija (02.05.19)
Pjany z awtom po puću był
Wojerecy. Wčerawša 1. meja bě hakle połdra hodźiny stara, jako zastojnikam we Wojerecach Porsche Cayenne napadny. Policisća kazachu 29lětnemu wodźerjej zastać, zo bychu sej jeho a jeho jězdźidło bliže wobhladali. Spěšnje napadny jim chorhojčka šofera, tak zo přewjedźechu alkoholowy test, kotryž wunjese 2,4 promile alkohola w kreji muža. Z tajkim wuslědkom zwjazanej běštej zahajenje chłostanskeho jednanja dla wopiłstwa w nadróžnym wobchadźe a njejapki kónc nócneho wulěta.
Dźakna Boža mša wobornikow
Róžant. Wohnjowe wobory gmejnow zarjadniskeho zwjazka Při Klóšterskej wodźe swjeća jutře, pjatk, dźaknu Božu mšu k swjedźenjej swjateho Floriana. Wona započnje so w 19 hodź. w Róžeńčanskej cyrkwi. Wšitcy dobrowólni wohnjowi wobornicy kaž tež dalši hosćo su k tomu wutrobnje přeprošeni. Božu mšu organizuje lětsa gmejnska wohnjowa wobora Pančicy-Kukow.
Nowe symjo za łuku
Chrjebja. Sadowcowa łuka pola Chrjebje ma so zaso na žiwjenski rum za dźiwje pčołki, ptački a dalše zwěrjata wuwić. W měrcu su tam hižo wjacore sadowcy sadźili. Jutře, pjatk, chcedźa wot 14 do 17 hodź. nowe symjo wusyć, zo by na łuce prawje wjele kćějatych rostlin narostło. Zajimcy su na to wutrobnje přeprošeni a móža so pod telefonowym čisłom 035893/ 508 571 přizjewić.
Lisćiki za diskusiju
Za rozmołwu a wuměnu dźakowni
Hainewalde. SEKT – Serbski ewangelski kónc tydźenja wotmě so wot minjeneho štwórtka hač do njedźele w Hainewaldźe w Žitawskich horinach na temu „Po horach a dołach žiwjenja“. Hižo třeće lěto nastawa tam nachwilne serbskorěčne hněžko za swójby, kotrež bydla we Łužicy a zwonka njeje. Lětsa wobdźěli so 19 dorosćenych a 22 dźěći z Budyšina a wokoliny, z Berlina, Choćebuza, Hannovera, Münstera a Šwikawy. Mjez wobdźělnikami běchu maćernorěčni Serbja runje tak kaž ći, kiž sej serbšćinu w šuli, na kursach abo awtodidaktisce přiswojeja.
W jara dobrej, to rěka serbskej, ekumeniskej, křesćanskej zhromadnosći zaběrachu so wobdźělnicy ze žiwjenjoběhom Mójzasa a z wjerškami a wróćicami w jeho žiwjenju, ze žiwjenjoběhami Ochranowskich misionarow a z prašenjom, čehodla je zmysłapołne so ze swojim žiwjenjoběhom zaběrać a jón potomnikam zawostajić. Nimo toho stejachu na programje pućowani po Žitawskich horinach, kopańca, zabawne hry a přeco zaso spěwanje. Dźakowni běchu dorosćeni za rozmołwy a duchownu wuměnu w serbskej rěči a radowachu so, zo dźěći mjez sobu samozrozumliwje serbuja.
Něhdźe tysac wopytowarjow dožiwi wčera w Čornochołmčanskim ...
Krótkopowěsće (02.05.19)
Bjez wjetšich mylenjow
Zhorjelc. Wałporna nóc w Hornjej Łužicy bě dosć měrna. To je facit policije, kaž z medijoweje zdźělenki wuchadźa. Dźesać wšelakich deliktow su zastojnicy registrowali. W Stróži pola Rakec su šesćo młodostni hosći chodojtypalenja nadběhowali a někotrych lochce zranili. W Bjezdowach (Klein Partwitz) spytachu młodostni meju wobškodźić, při čimž dóńdźe k rozestajenjam.
Wólbne pruwowanišća
Berlin. Dohromady 13 stronam, jich zwjazkowym předsydam a načolnym kandidatam je mjeńšinowa rada wólbne pruwowanišća k wólbam Europskeho parlamenta 26. meje připósłała, informuje mjeńšinowy sekretariat w Berlinje. Wotmołwy kaž tež wućahi z wólbnych programow stron k mjeńšinopolitiskim temam chce mjeńšinowy sekretariat w interneće wozjewić.
Z nowym wobhospodarjerjom
Policija (30.04.19)
Z wuhenja so kuriło
Kamjenc. Trochu kuriozne bě zasadźenje wohnjowych wobornikow wčera nawječor w Kamjencu. Tam běchu kameradow alarmowali, dokelž so pječa třěcha domu na Budyskej dróze paleše. Wobydlerjo běchu z hižo lěta prózdneho twarjenja kur stupać widźeli. Wobory z Kamjenca, Brěznje a Lückersdorfa z nimale 50 wobornikami přijědźechu. Tež policija a wuchowanska słužba běštej po puću. Na Budysku dróhu dojěwši pak nichtó žane płomjenja njewuhlada. Město toho so z wuhenja ruiny mócnje kurješe, a nichtó njemóžeše sej rozkłasć, čehodla. To dyrbješe sej hakle přiwołany saznik bliže wobhladać. Što je wón wuslědźił, bohužel znate njeje.
Ze zahrody grat pokradnyli
Ćichońca. Dwě zahrodźe w Ćichońcy (Teichnitz) pola Budyšina běštej w nocy na minjenu njedźelu cil paduchow. Tam zadobychu so do pódlanskeju twarjenjow a pokradnychu z nich wšelake elektriske graty, z kotrymiž wobsedźerjo swoju zahrodu wobdźěłachu. Po informacijach policije ma rubizna cyłkownu hódnotu něhdźe 1 700 eurow. Kriminalisća pad přepytuja.
Pjenjezy z kinowych křesłow za dobry zaměr
Zwjetša wšitko w porjadku
Při kontroli chodojtowych hromadow tež někotre čorne wowcy pódla
Pančicy-Kukow (SN/MWj). Na wsach zarjadniskeho zwjazka Při Klóšterskej wodźe je wulka wjetšina wobydlerjow minjene dny a tydźenje jenož to na hromady za chodojtypalenje dowjezła, štož tam tež słuša, mjenujcy stare hałzy. To je wčera kontrola wunjesła, jako sej předsyda zarjadniskeho zwjazka Měrko Domaška w swojej funkciji jako zamołwity za porjad a wěstotu dohromady něhdźe 20 hromadow wot Žuric hač do Šunowa bliže wobhlada.
