Město Běła Woda dotal žadyn schwaleny hospodarski plan za lěto 2018 nima. Za to dyrbja najprjedy hospodarski strukturny koncept wobzamknyć. Wo tym­ pak hižo poł lěta diskutuja.

Běła Woda (AK/SN). Hospodarske połoženje Běłeje Wody wostanje dale přewšo napjate. To podšmórny wyši měšćanosta Torsten Pötzsch (Klartext) na zašłym posedźenju měšćanskeje rady. Wjetšina jeje čłonow je po kontrowersnej diskusiji předpołoženy hospodarski strukturny koncept za čas wot 2018 do 2020 wotpokazała. Mjeztym zo chcyše wyši měšćanosta wo kóždej jednotliwej lutowanskej naprawje wothłosować dać, přesadźi so namjet, wo strukturnym koncepće jako cyłku wothłosować.

Budyšin (SN/bn). Towarstwo Ekumeniski tachantski wobchod Budyšin chce k dźesatemu wobstaću swoje akti­wity rozšěrić. Wotnětka njeje předawa­nišćo wjace regularna knihownja, ale ma so ze zet­kanišćom a zarjadowanišćom stać. „Nowowusměrjenje nima financne přičiny. Chcemy so prosće na naš zakładny nadawk koncentrować a ekumenisku wuměnu mjez křesćanami a tež z njekře­sćanami spěchować. Wobchod ma přichodnje być předewšěm wukładne wo­kno cyrkwinskeho žiwjenja w Budyšinje ­a zdobom móst do města. Knihi změ­jemy dale w poskitku, při čimž pak so na regionalne publikacije, na přikład Ludoweho nakładnistwa Domowina abo křesćanskeho nakładnistwa Benno, wobmjezujemy“, rozłoži předsyda towarstwa dr. Peter-Paul Straube na nowinskej konferency minjeny štwórtk we wobchodźe na dróze Při Mjasowych jětkach.

Informacija we wobrazowym teksće „Kritika a hněw přiběratej“ we wudaću SN z 31. meje, zo „bě Malešanski wjesnjanosta Matthias Seidel (CDU) zańdźeny tydźeń na rozmołwu přeprosył. Wobydlerska iniciatiwa pak njeje přeprošenje sćěhowała“, njetrjechi. Wobydlerska inicia­tiwa Plusnikečanska skała skedźbnja na to, zo je po dorěčenju z wjesnjanostu na posedźenju Malešanskeje gmejnskeje rady 29. meje wo naležnosći informowała ­a z radźićelemi diskutowała. Redakcija SN

Na kongresu Europasion byli

Budaörs. Skupina zastupnikow Chróšćanskeho pasionskeho towarstwa a Towarstwa Cyrila a Metoda je so wčera ze 34. mjezynarodneho kongresa Europasion w madźarskim Budaörsu nawróćiła. Tam zetkachu so cyłki europskeho zjednoćenstwa towarstwow, kotrež pasion předstajeja. Styki nawjazał bě předsyda TCM Jurij Špitank. W lěće 2025 chcedźa kongres w Chrósćicach přewjesć.

36. europske myto přepodali

Mišno. „Mysli – na čo twari Europa?“ bě tema lětušeho wubědźowanja wo 36. europske myto. Sakski krajny zwjazk Europa-unija Němska z.t. je šulerku Budyskeje wyšeje šule Maju-Fabienne Bluhm sobotu w Mišnjanskim gymnaziju Franziskaneum z jězbu do Brüssela wuznamjenił. Mjez dobyćerjemi běchu tež šulerjo Zakładneje šule při Boršći a Lessingoweho gymnazija Kamjenc.

Čěsko-němski fonds 20 lět