Běła Woda (AK/SN). Swoju płuwarnju chce město Běła Woda modernizować. Za twarske změny přewostaji wone 63 000 eurow. Tole su měšćanscy radźićeljo na swojim wčerawšim posedźenju z jednym wzdatym hłosom wobzamknyli.

Ponowić maja so roły za chlorowy płun. Tuchwilne su dodźeržane a płun zdźěla přepušćeja. Tele roły w płuwarni dale wužiwać, njeby jenož zakazane było, ale tež njezamołwite. „Tohodla dyrbja so wone wuměnić“, rěka w předłoze za wobzamknjenje. Za pjeć přewětrjenske připrawy dyrbja nowe regulatory zatwarić. Dale ma so za techniku płuwarnje nowe procesorowe wodźenje instalować. Wone je wažne za dodawanje chlora do wody a runje tak za rjedźenje a sćoplenje wody. Wšitke trěbne daty so wot procesoroweho wodźenja wobdźěłaja.

Dołha suchota a wobstajnje horce temperatury drje běchu w lěću chětro poćežowace, runje dla toho pak smědźa zahrodkarjo lětsa z nadpřerěznymi žnjemi ličić. Tak so na mnohich městnach jabłučiny z płodami zhibuja. A tež kirbsy su so lětsa derje ­radźili, kaž je tele dny mała Elisa Młodźinkec w Šunowje zwěsćiła. Foto: SN/Hanka Šěnec

Budyšin (SN/MWj). Wot Swobodneho stata Sakskeje připowědźene pawšalne srědki za zesylnjenje wjesneje kónčiny chce město Budyšin hłownje w třoch wobłu­kach zasadźeć. Tole je měšćanska rada na swojim wčerawšim posedźenju wobzamknyła. Runja druhim komunam dóstanje sprjewine město 70 000 eurow. 15 000 eurow z toho zasadźa za wjace wěsto­ty na měšćanskich ležownosćach. Pozadk je, zo so wulkeje suchoty dla často hałzy wotłamaja a wobchad wohrožeja. Nad přidatnymi 28 000 eurami smě so Kamjentny dom wjeselić. Tam chcedźa tele pjenjezy sobu za zarunanje zawodowych kóštow wužiwać. Poprawom měješe Kamjentny dom lětsa 40 000 eurow we wobłuku swobodneje młodźinskeje pomocy zalutować. Z přidatnymi pjenjezami móža nětko tola wjace wudać. A skónčnje zasadźa 25 000 eurow za to­, zo móhli w měšćanskim lěsu wulke mnóstwo wobškodźeneho drjewja z lěsa wozyć. Z tym ma so zadźěwać, zo so skórnik w lěsu dale rozpřestrěwa. Za zbywace 2 000 eurow chce město sobu přidatnu busowu čaru financować, kotraž z centruma do Hornjeho kraja powjedźe.

Złoži mandat kónc oktobra

Drježdźany. Serbski zapósłanc a bywši sakski ministerski prezident Stanisław Tilich (CDU) 31. oktobra swój mandat w krajnym sejmje złoži. Wón postupuje tak, kaž hižo dlěši čas přizjewjene, a njeje přičiny mjenował, zdźěli wčera rěčnik Sakskeho krajneho sejma. Naslědnik po krajnej lisćinje CDU móhł Jörg Markert być. Krajny wólbny nawoda je so jeho hižo­ prašał, hač mandat přiwozmje.

Naprašowanje nětko online

Budyšin. Wobšěrne naprašowanje Domowiny je nětko tež online pod adresu https://www.soscisurvey.de/DomowinaBefragung/ w hornjoserbskej, delnjoserbskej a němskej rěči přistupne. Wotmołwy, kotrež maja so tež po tymle puću hač do 14. oktobra zapodać, wuhód­noći agentura Methodenberatung Jahn z Lipska. Domowina nima žadyn přistup k jednotliwym wotmołwam.

Syći Via Regia přistupił