Zakładny kamjeń połožili
Na Budyskim Třělnišću nastawa nowe dźěćace dnjowe přebywanišćo. Minjeny pjatk su tam zakładny kamjeń połožili, byrnjež dwuposchodowy hruby twar hižo jasnje widźomny był.
Budyšin (UM/SN). „Tónle termin ma swoju přičinu w architekturje nowotwara“, rozjasni Budyska twarska měšćanostka Juliane Naumann, „tón wobsteji z dweju, sebi napřećo stejaceju twarskeju dźělow, kotrejž stej z jednoposchodowym portalnym twarom zwjazanej.“ Tuž budźe hruby twar dźěla, w kotrymž chcedźa zaměstnić žłobik a pěstowarnju, hižo w juniju hotowy. Za hortowe twarjenje pak su dotal jeničce spódnju platu připrawili. „Tuž je nětko prawy čas połožić zakładny kamjeń“, Naumann podšmórny. „W Budyšinje mamy tuchwilu jara wjele dźěći“, wudospołni měšćanosta za hospodarstwo a financy Robert Böhmer, „to měšćanske zarjadnistwo wužaduje.“
Zaso najwšelakoriše zynki słyšeć
Tři dny so Budyšin tež lětsa na pisane město změni, tónkróć pak njepřewjedu 1017. Budyske nalěćo wólbow dla posledni kónc tydźenja w meji, ale tydźeń pozdźišo wot 31. meje do 2. junija.
Budyšin (SN/BŠe). Organizatorojo wokoło kulturneho šefa města Andreasa Henniga lubja znowa pisany program, kotryž na wšelakich jewišćach městach pokazuja. Wot minjeneho lěta wšak zarjaduja jewišćo tež w saněrowanej rozwalinje mnišeje cyrkwje na Wulkej Bratrowskej. Organizatoriski kłobuk na hłowje ma tam Budyski Lions Club. Bjezposrědnje napřećo zaměstnjeny hosćenc „Culinarium“ je sobu zapřijaty a chce hosći z kulinariskimi wosebitostkami zapleńčić.
Zakłady integracije sylnić
Wo móžnym přichodźe socialneje dźěłarnje w Njebjelčicach rěčeli
Njebjelčicy (JK/SN). Na minjenym posedźenju Njebjelčanskeje gmejnskeje rady wobzamknjene podlěšenje wotnajenskeho zrěčenja za socialnu dźěłarnju z Kamjenskej kubłanskej towaršnosću (KaBi) je wuraz wuspěšneho dźěła. Wot lěta 2010 pomhaja z projektom dołhodobnje bjezdźěłnym a socialnje słabym, namakać puć na prěnje dźěłowe wiki, wot lěta 2016 wěnuje so KaBi integraciji a wukubłanju požadarjow azyla. Aktualny projekt w Njebjelčicach pak chce Sakska jenož hišće hač do lětušeho septembra spěchować. To bě gmejnje a KaBi přičina, přeprosyć saksku ministerku za runostajenje a integraciju Petru Köpping (SPD), zo bychu wo móžnym dalšim přichodźe dźěłarnje wuradźowali. Wčera popołdnju su zastupjerjo gmejnskeje rady, KaBi, Budyskeho krajnoradneho zarjada kaž tež nětčiši a něhdyši wobdźělnicy integraciskich projektow ministerku witali. Jednaćelka KaBi Anja Geißler rozprawješe wo dźěławosći w Njebjelčicach a wo projektach minjenych lět.
Pozitiwne zjawy w měsće bóle do zjawnosće njesć
Budyšin (CS/SN). „Puć, po kotrymž smy kročić započeli, je prawy.“ Tak rěkaše posudk Budyskeho wyšeho měšćanosty Alexandera Ahrensa (SPD) po něhdźe dwěmaj hodźinomaj diskusijneho wječora „Budyšin – dyrbimy rěčeć“ wčera wječor w měšćanskim muzeju při Žitnych wikach. Debaty wotměchu so za dźesać blidami ze stajnje něhdźe dźesać wobdźělnikami. Přesahowaca tema bě identita Budyšanow: Štó słuša k tomu? Štó smě sobu rěčeć? Kak ma dale hić?
Wobdźělnicy mějachu so zwjetša po prawidłach, tak zo nastachu produktiwne a ciwilizowane rozmołwy. Na kóncu su moderatorojo wuslědki diskusijow předstajili. Te běchu zdźěla rozdźělne, zdźěla pak so tež jenake měnjenja wukristalizowachu. Tak běchu sej wšitcy přezjedni, zo dyrbjeli so dalše diskusije tajkeho razu wotměć, stajnje z kruće postajenym temowym wobłukom. Zdobom su sej wot měšćanskeho zarjadnistwa wjace transparency žadali.
Njedobry muster
Po mustru minjenych lět je Serbska rozprawa zapołožena. To rjekny krajny rada Michael Harig (CDU) wčera na posedźenju Budyskeho wokrjesneho sejmika. Mustrej minjenych lět wotpowěduje tež jeje skoro skandalozne městno nimale na kóncu dnjoweho porjada. Wotpowědnu kritiku serbskeho wokrjesneho radźićela Kozela drje krajny rada přiwza, hač pak so přichodnje něšto změni? Strowe dwěle su woprawnjene. Wšako njebu mjerzacy fakt wčera prěni raz porokowany. Serbja pak njejsu jeničcy, za kotrychž do obligatoriskeje přestawki wosrjedź posedźenja chwile njeje. Hakle w měrcu kritizowachu wokrjesni radźićeljo, zo steješe rozprawa społnomócnjeneje za ludźi ze zbrašenjemi – runje tak – na kóncu dnjoweho porjada.
Krajny rada poda rozprawu k płaćiwym wokrjesnym Serbskim wustawkam. Tohodla by so tajka do wobłuka „wustawki, postajenja, směrnicy“ hodźała. Tón steji na dnjowym porjedźe wo tójšto wyše hač „wšelčizny“ na kóncu. Axel Arlt
Zwěsća w gmejnje „njewuwiće“
Mjez 34 wosobami, kotrež požadaja so wo sydło w nowej gmejnskej radźe Malešec, je dr. Jürgen Wengler. We wjesnym dźělu Plusnikecach bydlacy je tuchwilu gmejnski radźićel w štwórtej wólbnej periodźe. Z nimale 72 lětami wón znowa za Lěwicu nastupi. To zwisuje ze zwěsćenym „njewuwićom“ w komunje, kaž kandidat měni. Jedyn přikład za to je jemu mjezykomunalny jednanski koncept, kotryž su gmejny Malešecy, Radwor a Wulka Dubrawa we wobłuku swojeho zakładnocentralneho zwiska zdźěłać dali. Zestajane su tam hospodarske, socialne, kulturne a turistiske ćežišća. „Koncept je so w dalokej měrje bohužel w pisanskim blidźe zhubił.“
Krótkopowěsće (14.05.19)
Zelena swěca za běrow data
Budyšin. Za serwisowy běrow za komuny w serbskim sydlenskim rumje je Budyski wokrjesny sejmik wčera zelenu swěcu dał. Z jednym hłosawzdaćom su wokrjesni radźićeljo wobzamknyli, zo přewozmje Budyski wokrjes nadawk, zarjadować běrow, kotryž ma so hłownje wo přełožki starać. Srědki přewostaja Sakska we wobłuku serbskeho komunalneho programa.
Saněrowanje wjele dróše
Lubuš. Ponowjenje Lubušanskeho (Laubusch) kulturneho domu budźe dróše hač wobličene. Kaž wjacore regionalne medije informuja, je so suma z nimale 370 000 eurami potrojiła. Předewšěm wohnjoškit w domje maja minimalnym zakonskim žadanjam přiměrić. W Lubušanskim kulturnym domje běchu do a hišće po přewróće mnohe serbske předstajenja wotměli, kaž ptači kwas SLA.
Sulšečenjo sej dobyće zapisali
Zelena swěca za přesydlerjow
Zo so najwjetši dźěl wobydlerjow za wotbagrowanje předwidźaneho Miłoraza do Slepoho přesydli, je hižo dlěši čas jasne. Za to su nětko tež trěbne twarske wustawki schwalili.
Slepo (AK/SN). Za přesydlerjow z Miłoraza do Slepoho twori tamniša gmejna krok po kroku wuměnjenja, zo móhli woni tam nowu domiznu nańć. Na swojim zašłym posedźenju je Slepjanska gmejnska rada za přesydlensku městnosć při Dźěwinskim puću wustawki wo twarskim planje wobzamknyła. Naćisk bě wot spočatka februara hač do spočatka měrca zjawnje wupołoženy. Zarjadnistwa a nošerjo zjawnych zajimow zwuraznichu w tym času swoje stejišća. Tež wobydlerjo móžachu swoje wobmyslenja a pokiwy přednjesć. Stejišćo zapodała je na přikład ewangelska swobodnocyrkwinska wosada Slepo-Brězowka. „Wona poskići cyrkwi ležownosć napřećo pohrjebnišću na zelenej płoninje“, rozłoži planowar Ansgar Kaup. „Tele stejišćo pak bě překrótkodobne. Smy je najprjedy raz wróćo stajili.“
Policija (13.05.19)
Wopity z traktorom jěł
Kašecy. Na polu mjez Kašecami a Žuricami je sobotu 32lětny traktorist do dalšeho traktora zrazył. Při tym nasta wěcna škoda něhdźe 30 000 eurow. Po dróze so zawinowar njezboža ze swojim traktorom do Kašec wróći. Policisća zwěsćichu, zo měješe něhdźe 1,48 promilow alkohola w kreji, a tak dyrbješe w chorowni krej wotedać. Přećiwo traktoristej přepytuja nětko alkohola we wobchadźe dla.
Z „chorhojčku“ po puću był
Malešecy. Kedźbliwi wobydlerjo informowachu sobotu policistow wo wopitym šoferu awta w Malešanskej gmejnje. Zastojnicy z Budyskeho policajskeho rewěra prošachu 55lětneho w Hućinje wo dobrowólny test alkohola, tón wujewi 1,66 promilow. Wodźer awta dyrbješe w chorowni krej wotedać. Nimo jězdźenja pod alkoholom přepytuja přećiwo njemu jězdźenja bjez dowolnosće dla, dokelž muž tajku scyła nima.
Motorski so ćežko zranił
Tež w stanje derje klinčało
Najebać dešćikojte wjedro mejemjetanje derje wopytane było
Pančicy-Kukow (SN/MWj). Trochu improwizować dyrbjachu młodostni při mejemjetanju w Pančicach-Kukowje. Tam je sobotu popołdnju jědnaće porow małych dźěći, wosom porow trochu wjetšich dźěći a 16 porow młodostnych na swjedźenišću swoje reje předstajiło. Wšitke holcy běchu katolsku narodnu drastu woblečene. Najebać mokre wjedro je wjele ludźi přihladowało. Wšón čas wjedro někak wudźerža, hakle jako běchu młodostni nimale dorejwali, poča so zaso dešćować, tak zo sej k „Šewcej“ wšitcy do stana wućeknychu. Tón bě na to z ludźimi kopaty połny a tak zhromadne spěwy hišće rjeńšo klinčachu. Reje přewodźachu Marija Šołćina, Měrćin Weclich, Eckhard Czapek a Tomaš Hejduška. Při napřemoběhu hólcow wopokaza so mjez małymi dźěćimi Nevio Gattner jako najspěšniši, wón wuzwoli sej Miju Kralec za kralownu. Mejski por trochu wjetšich dźěći rěkaštaj Florian Zelnak a Amelie Hanušec, a mjez młodostnymi wuzwoli sej Jonas Pjetaš Jadwigu Šnajdrec za kralownu.
