Z prócowarjom Michałom Nawku so zeznajomili
Na Radworskej wyšej šuli „Dr. Marja Grólmusec“ přewjedźechu krótko do prózdnin projekt wo serbskim prócowarju Michale Nawce, a to składnostnje jeho 50. posmjertnin. Projekt běchu na namjet Maćicy Serbskeje Budyska župa „Jan Arnošt Smoler“, regionalna rěčnica Katja Liznarjec, kubłanska referentka Domowiny Rejzka Krügerowa a šulska socialna dźěłaćerka Edith Šurowa zhromadnje přihotowali.
Wjace městna za zwěrjata
Policija (02.07.18)
Grat a mašiny kradnyli
Rachlow. W nocy na sobotu běchu paduši w Rachlowje pod Čornobohom aktiwni. Tam zadobychu so do dweju transporterow a pokradnychu z njeju grat a mašiny w hódnoće něhdźe 7 500 eurow. Nimo toho načinichu na awtomaj 200 eurow wěcneje škody.
Swědk wšitko wobkedźbował
Chrósćicy. 39lětny wodźer Audija je sobotu wječor na Chróšćanskej Cyrkwinskej horje do płota zajěł a prosće dale jěł. Swědk pak to wobkedźbowaše, napisa sej čisło awta a zazwoni policiju. Zastojnicy skućićela doma wopytachu a naměrichu pola njeho 1,52 promilow alkohola w kreji. Škoda wučinja 500 eurow.
Cirkus Bambini na jewišću
Nowa Wjeska (SN/MWj). Z dobytej wjesnej wjetu je so wčera nawječor lětuši wjesny swjedźeń w Nowej Wjesce zakónčił. To pak njebě 42., kaž na wulkim transparenće steješe, ale hižo 43., přeradźi Křesćan Korjeńk, kiž měješe organizatoriske nitki sobu w rukomaj. Swjedźeń zhromadnje přihotowali běchu wobydlerjo Noweje Wjeski, Hatow a Hrańcy.
Po pjatkownym natočenju piwa je Radworske mustwo sobotu volleyballowy turněr dobyło. Na wječornej diskotece drje bychu sej trochu wjace wopytowarjow přeli, přiwšěm bě nalada dobra. „Spočatk prózdninskeho časa bě snano jedna přičina, dalša pak zawěsće ta, zo je nětko njesměrnje wjele poskitkow, a najskerje su ludźo tež do wěsteje měry nasyćeni“, praji Korjeńk. Derje přiwzali pak su předewšěm swójby z dźěćimi sobotny dźěćacy swjedźeń z paslenjom, molowanjom, hrami a tójšto dalšimi poskitkami.
Klětu twarja kružny wobchad a puć
Słona Boršć (CK/SN). W Budyskim měšćanskim dźělu Słonej Boršći chcedźa Słonoboršćansku dróhu mjez Handrija Zejlerjowej a statnej dróhu S 106 klětu wobšěrnje wutwarić. To su měšćanscy radźićeljo na swojim zašłym posedźenju wobzamknyli. Wotrězk je w chětro špatnym stawje, jězdnja njeje šěroka dosć a podtwar za mnóstwo nadróžneho wobchada přesłaby. Nimo toho je w zašłosći wulkeje wody dla časćišo škodu poćerpjeła. „Poprawom chcychmy puć hakle w lěće 2023 wutwarić. Mamy-li pak šansu, to hižo prjedy činić, dyrbimy ju wužić“, praji nawoda měšćanskeho twarskeho wotrjada Falko Wendler.
Krótkopowěsće (02.07.18)
Posledni zwjazk předstajeny
Choćebuz. Z prezentaciju dźewjateho zwjazka je minjeny pjatk wudawaćel Roland Marti w Choćebuskim Serbskim domje cyłkowne wudaće Spisow Mata Kosyka wotzamknył. Jill-Francis Ketlicojc, Madlena Norbergowa a Katrin Urbańscyna čitachu z knihi, kotraž bě w Ludowym nakładnistwje Domowina wušła.
Na wažnej róčnicy spominali
Lubanice. Něhdźe 50 Delnich Serbow je wčera na Mikławša Jakubicu a Krystofa Fabriciusa spominało. Zhromadnje z něhdźe sto pólskimi přećelemi dopominachu w Lubanicach z dwurěčnej delnjoserbsko-pólskej namšu na wažnej róčnicy serbskeho pismowstwa. Před 470 lětami běše farar Mikławš Jakubica Nowy zakoń do serbšćiny přełožił, farar Krystof Fabricius běše před 300 lětami Trjebulski katechizm wudał.
Prěni „škitny wječor“
Pytaja přinoški za nowinu
Budyšin. Składnostnje dźesaćlětneho wobstaća Budyskeho wokrjesa w jeho dźensnišej formje planuja wudać wosebite wudaće hamtskeho łopjena. Zajimcy móža nowinu sobu wuhotować a za nje mjeńše přinoški, komentary a fota zapodać. Jednać móže so tu wo wosebite wokomiki zašłych dźesać lět, wo najrjeńše městnosće abo wo wosebitych ludźi. Wuraznje su tež serbske přinoški witane, kaž zamołwity sobudźěłaćer krajnoradneho zarjada Peter Stange wobkrući. Přinoški měli zapodać hač do 6. julija e-mailnje pod adresu .
Po mlokowym swěće dundać
Koćina. Ratarski zawod Krabatowy mlokowy swět w Koćinje přeproša w lětnich prózdninach wosebje swójby kóždy pjatk wot 9.30 do 12.30 hodź. na prózdninske wodźenje. Po snědani z čerstwym mlokom, jogurtom a twarožkom podadźa so wone do hródźow a twarožkarnje. Jako zakónčenje poskića jim sobudźěłaćerjo wobjed ze słódneho bifeja „Łužica słodźi“. Zajimcy měli so na kóždy pad do toho přizjewić, a to telefonisce pod čisłom 03 57 25 / 92 90 12 abo e-mailnje pod .
Na zawodny jubilej
Policija (29.06.18)
Kóń do awta skočił
Kulow. Ze swojeje pastwy wudobyli su so konje wčera w rańšich hodźinach na kromje Kulowa. W tym času přijědźe 26lětny muž z transporterom ze Salowa. 150 metrow před wotbóčku na stare dwórnišćo skoči ćmowy kóń na puć a do awta. Zranjeny štyrinohač ćekny, pozdźišo pak jeho popadnychu a wobsedźerjej přepodachu. Šofer so njezrani.
Trjebaja wjace dochodow
Gmejnska rada Njebjelčic njelube, ale trěbne naprawy wobzamknyła
Njebjelčicy (JK/SN). Jara wobšěrny bě wčerawši dnjowy porjad posedźenja Njebjelčanskich gmejnskich radźićelow. Tak wobzamknychu wustawki gmejnskeje wohnjoweje wobory a zaběrachu so z kóštami wobhospodarjenja dźěćaceho přebywanišća. Te su zakład za podźěl, kotryž maja starši płaćić. Za wysokosć popłatka su w Sakskej zakonske postajenja, w kotrehož ramiku móže gmejna podźěl postajić. W Njebjelčicach běchu staršiske přinoški za žłobik, pěstowarnju a hort stajnje na delnjej kromje postajeneho ramika. To rěka, zo ležachu daloko pod sakskim přerězkom.
Nad Sprjewju nastanje nowy móst
Budyšin (CK/SN) Dotal jenož jako přijězd za wohnjowu woboru a jězdźidła hač do dwanaće tonow wukładźeny móst nad Sprjewju na zapadnym boku Budyskeho zawoda Bombardier dyrbja ponowić, runje tak kaž dróhu, kotraž wjedźe k zapadnej tangenće a dotal žane pomjenowanje nima. Tomu je měšćanska rada na swojim zašłym posedźenju přihłosowała.
Prěnjotnje chcychu móst jeno saněrować, rozłoži nawoda měšćanskeho twarskeho zarjada Falko Wendler. Zo pak móhło přichodnje w kóždej změnje 30 nakładnych awtow po mosće jěć, twarja nětko nowy. Tón drje změje samsne měry, ale druhu konstrukciju. Ze 4,50 metrami šěrokosće wostanje to wuske městno.
