Krótkopowěsće (09.05.19)
Nowu zběrku předstajił
Drježdźany. Varnsdorfski basnik Milan Hrabal je předwčerawšim w Drježdźanskim měšćanskim muzeju swoju němsku zběrku basnjow „Wenn die Fische davonfliegen“ předstajił. Wona je njedawno w Ludwigsburgskim nakładnistwje Pop wušła. Hrabal čitaše swoju lyriku w čěšćinje. Přełožki Petera Gehrischa přednjese před něhdźe 25 připosłucharjemi Róža Domašcyna.
K zachowanju serbšćiny
Drježdźany. Sakscy Zeleni chcedźa, zo stanje so jich angažement za serbske naležnosće wočiwidniši. Tohodla budu jutře w Budyšinje serbske dźěłowe zjednoćenstwo załožić. Z nim wotpohladuja k zachowanju serbskeje rěče a kultury wšědny dźeń přinošować. Wosebje wažne jim je, zawěsćić serbsku syć pěstowarnjow a šulow kaž tež rozšěrić poskitk serbskorěčneje wučby za wšitke generacije.
Zhromadnje kemše swjećić
Radźićeljo so zetkaja
Njebjelčicy/Wěteńca. Přichodne posedźenje Njebjelčanskeje gmejnskeje rady wotměje so jutře, štwórtk, w 19.30 hodź. pola Zahonec we Wěteńcy. Wobydlerjow chcedźa tón wječor wo wutwarje šěrokopasmoweje syće w jich wsy informować. Dale póńdźe mjez druhim wo to, podlěšić wotnajenske zrěčenje z Pěskečanskim sportowym towarstwom.
Worklecy. W samsnym času jutře změja Worklečanscy gmejnscy radźićeljo swoje posedźenje, a to na zwučenym městnje we Worklečanskej šuli. W jednym z dnjowych dypkow chcedźa dalše nadawki za nowy hort přepodać. Wobě posedźeni stej zjawnej, a wobydlerjo su wutrobnje přeprošeni.
Wustajeja twórby Kulejoweje
Policija (08.05.19)
Na cuzej ležownosći zachadźeli
Budyšin. Wjacori njeznaći přebywachu minjeny kónc tydźenja w Budyšinje bjez dowolnosće na jim cuzej ležownosći při Naměsće přećelstwa ludow w Strowotnej studni a zawostajichu tam najwšelakoriši njerjad. Mjez druhim wuhlada mějićel na swojim wobsydstwje stare awto a zbytki spalenych plastikowych blešow.
Hórka a koniki za pěstowarnju
Budyski měšćanosta za financy dr. Robert Böhmer je tudyšej Serbskej pěstowarni „Jan Radyserb-Wjela“ zawčerawšim přizwolenje wo spěchowanskich srědkach přepodał. Miłočanski Křesćansko-socialny kubłanski skutk (CSB) jako nošer chce w zarjadnišću na Friedricha Engelsowym naměsće dźěl wonkownych připrawow přetwarić.
Budyšin (SN). Cyle po słowjanskej tradiciji witachu chowancy Budyskeje serbskeje pěstowarnje měšćanostu kaž tež zastupjerjow CSB a planowanskeho běrowa z chlěbom a selu. Někotři běchu nimo toho ze swojimi kubłarkami mały serbski a němski program zestajili. Wšako mějachu k tomu tež wšu přičinu. Dr. Robert Böhmer měješe mjenujcy přizwolenje wo spěchowanskich srědkach při sebi. Město Budyšin ze 100 000 eurami plan CSB podpěruje, prěni dźěl wonkownych připrawow kubłanišća přetwarić.
Zakładny kamjeń za nowu šulu
Projekt zhromadnosći polěkował
Zajimawy dwudnjowski projekt dožiwi minjeny štwórtk a pjatk rjadownja 8/1 Worklečanskeje Serbskeje wyšeje šule „Michał Hórnik“ w Drježdźanach.
Hižo wosom lět přewjeduje Drježdźanske koparske towarstwo Dynamo fanowy projekt z mjenom „Denk-Anstoß“. Tajki wotmě wone nětko znowa z Worklečanskimi šulerjemi w Rudolfa Harbigowym stadionje. Hry, diskusije a nic naposledk refleksije swójskeho zadźerženja stejachu na planje a mějachu zhromadnosći rjadownje polěkować. Fairnosć, pomocliwosć, wobchad z konfliktami a krute regularije w sporće móžachu šulerjo na swoje žiwjenje přenjesć.
Pjatk slědowaše dalši wjeršk, wodźenje po stadionje. Při tym mějachu šulerjo přiležnosć, sćěhować trening koparjow Dynama Drježdźany do wažneje hry přećiwo St. Paulijej, štož je so wšitkim spodobało. Snano su tak tróšku k tomu přinošowali, zo Drježdźany koparsku partiju z 2:1 dobychu. Franciska Zopic
„Rozsudy dyrbja zrozumliwe być“
Přeswědčenja dla, ze swojimi kmanosćemi zamołwiće na dobro swojeje komuny skutkować chcyć, je so wón rozsudźił, za gmejnsku radu Ralbicy-Róžant kandidować. Rěč je wo Renéju Wjacławku. „Mam to za wuraz zwólniwosće, nadawki a zamołwitosć přiwzać“, Ralbičan praji. Rozmyslował wo tym bě Wjacławk hižo dlěje, wšako na wsy tu a tam wo najwšelakorišich temach rěčiš. Tak su tež jeho narěčeli, a tuž rozsudźi so za Swobodne wolerske zjednoćenstwo (SWZ) Delany nastupić. „Jeho profil a zaměry su mje narěčeli a wobsah mje přeswědči, mjez druhim, zo ma SWZ narok, njewotwisnje wot etablěrowanych politiskich stron, organizacijow a towarstwow skutkować a zo po swojich kmanosćach wšitke wobłuki gmejnskeje politiki zapřija“, wuswětla 42lětny, kiž je zdobom direktor Budyskeho Serbskeho gymnazija. Dale chce wón aktiwnje a předewšěm kedźbliwje z resursami komuny wobchadźeć kaž tež konstruktiwnje jeje wuwiće spěchować. Za jara wažne Wjacławk ma, zo je delanske zjednoćenstwo cyłk angažowanych wobydlerjow, kiž so wo wobstajnu a transparentnu gmejnsku politiku prócuja.
Krótkopowěsće (08.05.19)
Fontane a błótowscy Serbja
Choćebuz. Wustajeńca „Błóta – kabinetny kus krajiny“ w Choćebuskim měšćanskim muzeju wěnuje so spisowaćelej Theodorej Fontanemu a błótowskim Serbam. Braniborska ministerka za kulturu Martina Münch (SPD) ju dźensa nawječor wotewrje. Braniborska spěchuje jubilejne lěto „fontane.200“ z dohromady 1,87 milionami eurow.
Myto za hwězdnu jězbu dóstali
Zhorjelc. Zhromadnje ze zaměrowym zwjazkom Kolesowarska šćežka Muldetal bu Zhorjelski wokrjes ze Sakskim kolesowarskim mytom wuznamjenjeny. Ministerstwo za hospodarstwo, dźěło a wobchad počesći dobyćerjow z mytom w hódnoće 10 000 eurow. Tradicionalne zarjadowanje Zhorjelskeho wokrjesa je hwězdna kolesowarska jězba. Přichodna tajka wotměje so 11. meje.
Durje přehladki zaso wotewrjene
Tři prawidła wobornikam podał
Čitanje wo zasłužbnej žonje
Wojerecy. Na čitanje z knihi wo Gertrudźe Wincarjowej přeproša Wojerowska towaršnosć za domiznowědu jutře, srjedu, w 17 hodź. do kaminoweje stwy tamnišeho hrodu. Do knihi zestajała je awtorka Gabriele Kohlmann najwšelakoriše anekdoty a podawki kołowokoło twara Krabatoweho młyna w Čornym Chołmcu. Zastup płaći pjeć eurow.
Z kandidatami so rozmołwjeć
Budyšin. We wobydlerskim běrowje Budyskeje SPD Před Šulerskimi wrotami móža so zajimcy jutře, srjedu, wot 16 do 18 hodź. z kandidatami strony za komunalne wólby rozmołwjeć. Na prašenja a pokiwy wotmołwjeja Andrea Spee-Keller, Fränzi Straßberger, Erika Bulankowa a Eckart Riechmann.
Za dźěłarničku so přizjewić
Chrósćicy. Župa „Michał Hórnik“ organizuje sobotu, 18. meje, w 14 hodź. na Chróšćanskej farje dźěłarničku drasćenja družki. Serbske hotowarniće wobdźělnikam pokazaja, kak družku woblěkać. Štóž ma móžnosć, njech sej holcu a družču drastu sobu přinjese. Organizatorojo proša wo přizjewjenje hač do 15. meje pod telefonowym čisłom 035796/ 96 254 abo e-mailnje pod katharina.jurkowa @domowina.de.
