Domowinska skupina Šunow-Konjecy přeprosy zawčerawšim, njedźelu, mjeztym 28. raz zajimowanych wjesnjanow na kóždolětne swójbne kolesowanje po našej domiznje. Tak je so při najrjeńšim wjedrje 42 lubowarjow přirody na puć nastajiło. Wopyt Dubrjenka a jeho bahna bě lětsa naš hłowny cil.

Znowa přewodźeše kolesowarjow knjeni Młynkowa ze swojim taksijom, zo by so wo transport našeje swačiny starała. Dalše městna w awće wužiwamy za přiwisnikow, kotřiž so z kolesom hižo na dlěši puć njezwaža. Dojěwši do delnich Sulšec přez „zeleny lěs“ posylnichmy so na wjesnym hrajkanišću ze samopječenymi přikuskami, ze šmałcowymi pomazkami a z dobrym kofejom.

Přez Lubhozdź jědźechmy dale do Dubrjenka. Tam wočakowaše nas při wjesnej kapałce knjez Krječmar, wot kotrehož zhonichmy, kak je wjes ke kapałce přišła, kak ju dźensa hladaja a za nabožne žiwjenje wužiwaja. Sami sej w kapałce kěrlušej zaspěwachmy.

Z dwěmaj promilomaj na e-biku

Budyšin. W nocy na póndźelu je policajska patrulja w Budyšinje na Serbskich hrjebjach 17lětneho na e-biku lepiła, kiž měješe wjac hač dwaj promilej alkohola w kreji. Zastojnikaj młodostnemu dalejězbu nablaku zakazaštaj.

Wóslik na dróze

Mučow. Za Mučowom wuhladachu wčera rano šoferojo na B 96 wóslika a zdźělichu to policiji. Mjeztym dóšły plahowar je so wo skoćo dale starał.

Awto do kolesowarja zajěło

Hrańca. Njedźelu popołdnju je 22lětny wodźer Škody na S 101 pola Hrańcy do kolesowarja zajěł a jeho ćežko zranił. Šofer bě 63lětneho kolesowarja přesćahnył, jako chcyše tón runje dróhu přeprěčić.

Halštrow (SN). Na typizěrowanskej akciji za 13lětneho na leukemiju schorjeneho Bena z Halštrowa je so minjeny kónc tydźenja wjace hač 2 000 ludźi wobdźěliło. Na akciji, kotruž je jeho ćeta Heike Müller organizowała, wobdźělichu so w Halštrowje tež wobydlerjo ze zdalenišich kónčin. Sobotu móžachu tam nimale tysac darićelow registrować.

Nowy šeflěkar ortopedije

Wojerecy (SN). Dr. Marc K. Schuler je nowy šeflěkar za ortopediju a njezbožowu chirurgiju we Wojerowskej chorowni. Kaž nowinski rěčnik klinikuma Gernot Schweitzer zdźěli, dr. Schuler naslěduje dr. Dietricha Lorenza.

We Łazowskej cyrkwi hač do kónca lěta 2019 pišćele ponowja

Łaz (AK(SN). „Pišćele we Łazowskej ewangelskej cyrkwi, kotrež budu hač do kónca lěta 2019 dospołnje saněrowane, steja pod pomnikoškitom“, wujasnja Günter Wjenk z tamnišeje wosadneje cyrkwinskeje rady. Instrument z lěta 1872 bu twarjeny w dobje romantiki, a to wot Wilhelma Rühlmanna z Zörbiga w zhromadnym dźěle z firmu Friedrich Ladegast we Weißenfelsu. Wot toho časa běchu pišćele trójce přetwarili, přeco wotpowědnje hudźbnemu słodej. Po restawraciji pak ma „kralowna instrumentow“ zaso tak klinčeć, kaž original na spočatku. „Pišćele su naše poslednje wulke twarnišćo nastupajo saněrowanje Łazowskeje cyrkwje wot lěta 2005“, Günter Wjenk dale rozłožuje. „Ponowjenje njeje jeno za našu cyrkej a wosadu wažne. Dźe tež wo nahódnoćenje turizma we łužiskej jězorinje runje tak kaž wo zachowanje swětoweho kulturneho herbstwa.“