Policija (15.03.19)
Ćeknjenje zwrěšćiło
Běła Woda. Jako zastojnicy zawčerawšim připołdnju młodeho muža w Běłej Wodźe kontrolowachu, namakachu pola njeho titku, w kotrejž bě najskerje konop. 14lětny dyrbješe ju policistam přepodać, ale so wobaraše a so jim wutorhny, byrnjež woni popjerjowy spray zasadźili. Bórze na to pak zastojnicy młodostneho tola dosahnychu.
NSLDź zahraje
Budyšin. Lubowarjo dźiwadła maja přichodne dny wjacore składnosće sej předstajenja Němsko-Serbskeho ludoweho dźiwadła wobhladać. Tak zahraja jutře, sobotu, w 19.30 hodź. swoju najnowšu inscenaciju „Wopušćeny dom“ na hłownym jewišću NSLDź. Zajutřišim, njedźelu, pokazaja w 16 hodź. klankodźiwadło „Kito husličkar“ w Ćišćanskim socialnym domje při sportnišću. A srjedu, 20. měrca, w 15 hodź. změje inscenacija serbskeho dźěćaceho dźiwadła NSLDź „Mały Muk“ premjeru w Dźiwadle na hrodźe.
Do powołanskeje šule
Kamjenc. Dźeń woterwrjenych duri změja jutře, sobotu, wot 9 do 13 hodź. w Kamjenskim powołansko-šulskim centrumje. Na Wysokej hasy 4 a na Jahnowej 11 móža so zajimcy wo wukubłanskich móžnosćach we wšitkich pjeć šulskich družinach wobhonić. We wobłukach běrow, drjewo a barba móža woni šulerjam při praktiskim dźěle přihladować a so tež sami pospytać.
Što sej Kamjenska młodźina přeje?
Kak atraktiwne je město Kamjenc młodostnym, što woni w měsće maja a što jim pobrachuje? To chcyše syć za dźěćace a młodźinske dźěło wědźeć. Wuslědki zdźěla překwapjeja.
Kamjenc (UM/SN). Dohromady 729 dźěći a młodostnych w starobje dźesać do 20 lět wobdźěli so na wulkim naprašowanju syće za dźěćace a młodźinske dźěło na Kamjenskich šulach sekundarneho schodźenka. „Z tym drje je naše naprašowanje najwjetše swojeho razu w Sakskej“, wjeseli so Torsten Kluge z mjenowaneje syće a jedyn z hłownych akterow naprašowanja. Naspomnić so w tym zwisku ma, zo něhdźe 40 procentow woprašanych w Kamjencu njebydli, ale we wokolnych městach a gmejnach, mnozy z nich w serbskim sydlenskim rumje. Jich su do naprašowanja zapřijeli, dokelž w Lessingowym měsće do šule chodźa.
Mjeztym 17 lět wobsteji Reinertec ranch w Trjebinje. W dožiwjenskej ...
Krótkopowěsće (15.03.19)
Předsydku wobkrućili
Radwor. Čłonojo Radworskeho chóra Meja wuzwolichu na wčerawšej hłownej a wólbnej zhromadźiznje Angeliku Häneltowu znowa za předsydku. Městopředsydka wostanje Diana Wowčerjowa, wo financy stara so Mónika Wenclowa. Ćěleso hotuje so tuchwilu na předstajenje oratorija „Israelowa zrudoba a tróšt“ a přewjedźe w oktobrje prěni króć nazymski koncert we Wojerecach.
Poradźene womłodźenje
Pančicy-Kukow. Z jědnaće kandidatami nastupi Serbske wolerske zjednoćenstwo (SWZ) Pančicy-Kukow ke komunalnym wólbam 26. meje. To je porno wólbam w lětomaj 2009 a 2014 najwjetša ličba. Zwjeselace je, zo kandiduje z Grit Hawšowej zaso žónska na lisćinje SWZ. Nowi a młodźi kandidaća su Beno Šołta, Stefan Cyž, Clemens Škoda a Krystof Rjeda. Jim poboku su Jens Pakoßnick, Joachim Kokla, Konrad Lipič, Tobias Cyž, Pětr Šołta a Stefan Rjeda.
AfD kandidatow nominowała
Žane mrěće hosćencow
Budyšin (SN). W sprjewinym měsće je so loni wjace přemysłowych zawodow přizjewiło hač wotzjewiło. Samsny bě zjaw nastupajo hosćency. To wuchadźa ze statistiki za zašłe lěto, kotruž je měšćanske zarjadnistwo nětko předpołožiło. Po tym zličichu 255 přemysłowych přizjewjenjow, ale jenož 237 wotzjewjenjow. Štóž raz w měsće rady derje pojě abo słódnu kapku wupije, smě so tohorunja wjeselić, přetož wot zjawa mrěća hosćencow Budyšin potrjecheny njeje. Loni drje je so 13 hosćencarjow wotzjewiło, za to pak 14 nowych přizjewiło.
W lěće 2018 je so 362 dźěći narodźiło. Po dotalnym wjeršku lěta 2016 drje je ličba porodow dale na wysokim niwowje, wona pak njedosaha deficit mjez nowonarodźenymi a zemrětymi wurunać. Aktualnje bydli w Budyšinje 39 631 ludźi. Ličba drje dale woteběra, ale spad wučinja mjenje hač jedyn procent.
Nowe baćonjace hnězdo twarili
Wjacore lěta so wjesne towarstwo Miłočanska žaba prócuje, baćonjace hnězdo na kromje wsy blisko přemysłoweje přestrjenje ponowić. Drjewjany sćežor bě hižo chětro nachileny a po lětach wužiwanja prosće přetrjebany. Z pomocu spěchowanskeho towarstwa za přirodu Hornjołužiskeje hole a hatow z Mikowa je so lětsa skónčnje poradźiło tutón projekt zwoprawdźić.
Stary sćežor smy dospołnje wotstronili, a na samsne městno stajichmy nowy betonowy. Jako podłohu za hnězdo zasadźichmy lochke potrjebane aluminijowe koleso, z witkami wobwite a ze šmrěkowymi hałzami wukładźene. Na konstrukciju přińdźe hišće dźěl stareho hnězda, tak zo je nětko wšitko za přichodnu hnězdźensku dobu přihotowane. Nowe baćonjace hnězdo a betonowy sćežor płaćitej dohromady něhdźe 2 000 eurow, štož zaruna sakske ministerstwo za wobswět a ratarstwo ze spěchowanskimi srědkami.
Miłočenjo nětko čakaja, zo so „jich“ baćony nawróća. W minjenych lětach bě to stajnje něhdźe poslednje dźesać dnjow měrca. Baćony hnězdźa w Miłoćicach mjeztym wot lěta 1994. Hubert Šwejda
Nowej družinje sylnje wonjatej
Puć a tepjenje ponowja
Po konsolidaciji nětko po dobrym puću k wuwaženemu etatej
Rakecy (JK/SN). Kasy Rakečanskeje gmejny běchu spočatk lěta tak derje pjelnjene kaž hižo dawno nic. Dobry milion eurow likwidnych srědkow móžeše nawodnica financneho wotrjada Franziska Pfeiffer w swojej rozprawje wo spjelnjenju lońšeho hospodarskeho plana gmejnskej radźe wčera wupokazać.
Policija (14.03.19)
Paduchaj w kupnicy
Pančicy-Kukow. Mužej w starobje 36 a 37 lět składźeštaj sej zawčerawšim připołdnju w Pančičansko-Kukowskej kupnicy wšelake twory do toboły a chcyštaj wobchod bjez płaćenja wopušćić. Kedźbliwy swědk to wobkedźbowaše a jeju zadźerža. Georgičanomaj pak so poradźi twochnyć a do Peugeota z pólskim čisłom zalězć. Runje w tym wokomiku přijědźechu mjeztym alarmowani policisća a podhladneju nachwilnje zajachu. W jeju awće namakachu dalšu rubiznu, mjez druhim palenc a słódčizny. Nětko dyrbja zwěsćić, z kotrych padustwow wěcy pochadźeja a hač staj podhladnaj dalše delikty skućiłoj.
