35 drastow w 25 wobchodach
„Jutrowne město“ změje tež lětsa wjele poskitkow
Budyšin (CS/SN). Najwjace turistow přichadźa jutry do Łužicy a rady do Budyšina. Zo bychu jich wočakowanja spjelnili, ćahnu organizatorojo za jedyn postronk. Minjene lěta su swoje poskitki dale wothłosowali a polěpšili. Hdyž wočakowanych 40 000 wopytowarjow jutry Budyskich křižerjow widźi, chcedźa woni tež něšto wo pozadkach wědźeć. Tohodla Bjarnat Cyž jako křižer w Serbskej kulturnej informaciji lětsa zaso nadrobnosće rozłoži, a to ćichu sobotu. Zo bychu hosćo prawy puć namakali, w nutřkownym měsće na chódnikach stopy wupołoža. Tohorunja sobotu budu štyri šulerki Serbskeho gymnazija w štyrjoch wariantach narodneje drasty po měsće po puću, zo bychu na prašenja hosći za serbskej kulturu wotmołwjeli a jim flajery z pokazku na program Serbskeho ludoweho ansambla „Moja reja“ wudźěleli.
Knježi dom z nowym žiwjenjom
Młoda swójba je sej w Zarěču w Njeswačanskej gmejnje žiwjenski són spjelniła, a cyła wjes móže na tym podźěl měć. Tónle přikład móhł tež druhim zajimawy być.
Zarěč (UM/SN). Knježe domy a k tomu słušace kubła běchu něhdy hospodarske žro kóždeje wsy. Někotre zwjetša nahladne twarjenja buchu po 1945 wottorhane, tamne mějachu wjace zboža a so na nowe wašnje wužiwachu. Po politiskim přewróće 1990 započa tójšto knježich domow z procha stawać. Eksemplariske za tele wuwiće je knježi dom w Zarěču. Hač do lěta 1990 jón tehdyša Zarěčanska gmejna hišće intensiwnje wužiwaše, mjez druhim jako kulturny centrum, młodźinski klub a předawanišćo. 1992 da Zarěč w swojim poslednim lěće do zagmejnowanja do Njeswačidła třěchu ponowić. To bě wuměnjenje za to, zo je knježi dom dołhi čas, w kotrymž prózdny steješe, derje přetrał.
Krute zmjerzki wuskutkuja w přirodźe njewšědne lodowe formy a ...
Popłatki wostanu stabilne
Wokrjes je rukowar wobydlerjow. Tak móhli nadawk wokrjesneho zarjadnistwa za lěs, přirodu a wotpadki definować. Kónc lěta 2018 wuběža aktualne zrěčenja z předewzaćemi, kotrež wotpadki w našim regionje wotwožuja. Čas tuž za nowe dojednanja, při čimž je wokrjes wobydlerjow w procesu sobu zapřijał.
Kamjenc (SN/BŠe). Budyski wokrjes je hladajo na přestrjeń jara wulki. Zamołwići so tuž rozsudźichu jón na dwaj wotstronjenskej terenaj rozrjadować. Nimo ličby ludnosće při tym tež dołhosć čarow rólu hraje, tak zo su kónčiny runohódne a wotpadkowym předewzaćam atraktiwne. Wuslědk rozmyslowanjow stej nětko region zapad z Kamjencom a region wuchod z městomaj Budyšinom a Wojerecami. Runje tak su kónčiny po jednotliwych wukonach rozrjadowane.
Krótkopowěsće (21.03.18)
Wo tworjenju Lorenca
Budyšin. W nowowuhotowanym Małym rjedźe Serbskeho instituta je wčera wušoł zešiwk „Kito Lorenc – Personalna bibliografija“. Publikaciju je institut k jutřišemu sympozijej k wopominanju spisowaćela wudał. Zešiwk wobsahuje na tysac zapiskow z dźěłami a přełožkami awtora. Nimo registra mjenow skići zdobom zapis něhdźe tysac basnjow Lorenca. Zestajał je jón dr. Franc Šěn.
Prěni raz w sprjewinym měsće
Budyšin. Krabatowy swjedźeń wotměje so lětsa prěni raz w Budyšinje. To zdźěli wčera zamołwity Serbskeho ludoweho ansambla za zjawnostne dźěło Stefan Cuška nowinarjam. Na Hrodźe planuja 15. apryla jewišćowy program pod hesłom „Krabat w Budyšinje“. Jón wuhotuja mjez druhim SLA z chórom a dźěćacej rejwanskej skupinu Łužičanka kaž tež Smjerdźečanscy rejwarjo.
Widejowa hra z husitskeho časa
Při bywšim dwórnišću bórze twarja
Generacisku změnu zhromadnje zmištrować
Wulke Ždźary (AK/SN). Łazowska gmejnska wohnjowa wobora chce wužadanjam přichoda wotpowědować. To podšmórny nawoda Torsten Hansen minjeny pjatk na jeje lětnej hłownej zhromadźiznje we Wulkich Ždźarach. „Mamy wukonliwu woboru. Měli ju tež dale zachować“, praji Hansen w swojej rozprawje. Starosćiwje zhladowaše wón na woteběracu ličbu kameradow. Wot 265 w lěće 2014 bě jich loni jenož hišće 214. Runočasnje je ličba w starobnym a čestnym wotrjedźe wot 153 na 174 rozrostła. Poměrnje stabilne je wuwiće pola młodźiny. Nimo jědnaće woborow dorosćenych ma gmejna Łaz pjeć młodźinskich woborow w Bjedrichecach, Hermanecach, Koblicach, Šćeńcy a Běłym Chołmcu. Za po płoninje druhu najwjetšu gmejnu Sakskeje je to nahladne. „Demografiska změna zawostaja swoje slědy“, Hansen podšmórny. Mjenje wobornikow dyrbješe loni nimale dwójce telko zasadźenjow zmištrować kaž lěto do toho. Předewšěm w juniju (28 zasadźenjow) a w oktobru (29 zasadźenjow) su wobornikow často wołali, zo bychu po wichorach škody rumowali.
Wo wuchadźišću knihi
Budyšin. Kelko drjewa je w jednej knize? Z tymle prašenjom a dalšimi móža so młodźi zajimcy jutře, srjedu, wot 14 hodź. składnostnje Mjezynarodneho dnja lěsa w Budyskej dźěćacej a młodźinskej bibliotece zaběrać a so tam na ekspediciju k wuchadźišću knihi podać. Je to zhromadne zarjadowanje biblioteki a biosferoweho rezerwata.
Porěča wo „Krónje“
Budyšin. Hižo dlěši čas dźe w Budyšinje wo prašenje, hač měło město „Krónu“ kupić abo nic. Měšćanski zwjazk SPD organizuje tohodla zjawny diskusijny wječor, na kotrymž chcedźa pro a kontra wotwažować. Zarjadowanje budźe štwórtk, 22. měrca, we 18.30 hodź. na žurli Budyskeho Serbskeho domu. Zawodny přednošk změje měšćanosta za financy dr. Robert Böhmer. Zajimcy su wutrobnje přeprošeni.
Serbske wobsahi sobu zapřijeć
Nowe towarstwo za Bjerwałdski jězor a za cyłu Hamorsku gmejnu
Rudej (AK/SN). Po móžnosći prawje bórze ma w Hamorskej gmejnje přemysłowe a turistiske towarstwo nastać. Wone ma być syć, informaciske žórło a zastupjer zajimow napřećo politikarjam a zarjadam. Přistupić móhli jemu zjednoćenstwa, rjemjeslnicy, přemysłownicy a dalši, kotřiž so wo turizm staraja. To bě wuslědk njedawneho zetkanja turistiskeho stajneho blida w Rudeji. „Njeńdźe jenož wo Bjerwałdski jězor, ale wo cyłu gmejnu“, podšmórny referentka za komunikaciju a management Hamorskeje gmejny Romy Ganer. Towarstwo móhło marketingowe dźěło wukonjeć a turistiske poskitki zwjazować.
Policija (20.03.18)
Na awtodróze pomhali
Słona Boršć. Jako minjenu sobotu zymny wětřik po Łužicy duješe, je někotryžkuli šofer na zawětych pućach tčacy wostał. To staraše so 15 młodostnych swobodnocyrkwinskeje wosady na awtodróhowym wotpočnišću Hornja Łužica-sewjer a -juh pola Słoneje Boršće wo wodźerjow nakładnych awtow, kotřiž kónc tydźenja hižo domoj jěć njemóžachu. Pomocnicy běchu so do toho pola policije naprašowali, hdźe móhli pomhać. Woni rozdźělichu horce napoje a přepodachu šoferam wosebite wudaća biblije. W rozmołwje z nimi młodostni zhonichu, zo zwjetša wuchodoeuropscy šoferojo druhdy tydźenje dołho domoj njemóža, dokelž dyrbja prěki a podłu po Europje jězdźić.
