Dźěłowy kruh za serbske naležnosće Budyskeje měšćanskeje rady wotpokazuje, přewjesć jutry njedźelu namjetowanu swětłowu show. Za přičinu maja čłonojo cyłka nabožny wobsah jutrow.

Budyšin (CK/SN). Planowany móst z parkowanišća při Schliebenowej na Budyski hród měł so přichodnje k jutram wobswětlić. To pak je dźěłowy kruh na swojim wčerawšim posedźenju raznje wotpokazał. W nocy na jutrownu njedźelu swjeći so zrowastanjenje Jězusa jako najwyši swjedźeń křesćanskeho cyrkwin­skeho lěta. To njeda so ze spektaklom za turistow zjednoćić, gremij wuzběhny. Swětłowa show hodźi so runje tak derje k druhim składnosćam wuhotować.

Ministerka podpisała

Drježdźany. Sakska statna ministerka za wědomosć a wuměłstwo dr. Eva-Maria Stange (SPD) je europsku wobydlersku iniciatiwy Minority SafePack podpisała. „Přisłušnicy narodnych mjeńšin su runočasnje wobydlerjo swojich komunow a krajow a tohorunja Europskeje unije. Polěpšenje mjeńšinowych prawow ma za wšitkich wobydlerjow EU wulku hódnotu“, wona rjekny.

Towaršnosć z nowym předsydu

Choćebuz. Nawoda decernata wokrjesneho zarjadnistwa Dubja-Błóta Heiko Jahn je nowy předsyda dohladowanskeje rady hospodarskeho regiona Łužica. Gremij je jeho jednohłósnje wuzwolił, towaršnosć wčera zdźěli. Zhorjelski krajny rada Bernd Lange (CDU) je nowy rěčnik gremija. Towaršnosć zwjazuje łužiske braniborske a sakske wokrjesy kaž tež měsće Choćebuz a Zhorjelc.

Nowa wěža wobchad polěpši

Za połtřeća tydźenja su jutry. Křižerjam najskerje dawno hižo we hłowje chodźi, što maja hišće wobstarać. Wšojedne, hač su to tež jenož maličkosće, lěpje je, zo wšitko trěbne sčasom wobstaraš a to na poslednje dny njewotstorčiš.

Štóž hižo wjele lět sobu jěcha, tón wě, što ma doma a w konjencu činić. Hinak je to zawěsće tam, hdźež maja nowačka-křižerja. W tajkim padźe su přidatna suknja, dalši cylinder, krawata abo mucha, rukajcy, škórnje atd. trěbne. To a tamne drje móžeš sej w přiwuznistwje a mjez znatymi abo susodami wupožčić. Ale tež nowe sekle, šabraka, cholowy a wjele dalšeho njeje problem, chceš-li sej to hnydom sam kupić. Za tajke pady maš wobchody, hdźež će nazhonići krawcojo, šwalče, konjacy fachowcy a dalši předawarjo poradźuja a ći tak rozsud nastupajo barby a formy wolóžeja. Někotre z tychle předewzaćow so tule čitarjam Serbskich Nowin poručeja. SN

Hamor (AK/SN). Wodosportowa sezona při Bjerwałdskim jězoru so 1. apryla započnje. Za to gmejna Hamor nětko swoje komunalne připrawy kaž přistawnišća, zjawne nuzniki, parkowanišća a informaciski centrum přihotuje. Tež přibrjohi maja so wurjedźić. Hišće do zahajenja sezony nastaja zaměrowy zwjazk łužiskeje jězoriny informaciske tafle. Na nich zapřijaty je tak mjenowany QR-code, z kotrymž dóstawa wopytowar přez handy dalše serbske, jendźelske a čěske informacije wo jězoru a gmejnje, rozłoži Hamorski wjesnjanosta Achim Junker (CDU) zawčerawšim na posedźenju gmejnskich radźićelow. Wobě stanowanišći – hwězdne stanowanišćo w Hamoru a Klětnjanske campingownišćo – zahajitej sezonu hižo 29. měrca. Prěnjej wjerškaj lětušeje wodosportoweje budźetej 28. apryla wiki regionalnych produktow w Hamorskim turistiskim informaciskim centrumje a 29. apryla wot 10 do 16 hodź. dźeń wotewrjenych duri w Klětnjanskim přistawje z wosebitymi wodźenjemi po přistawnej mištrowni. Wobaj terminaj wotmějetej so we wobłuku lětušich jězorinowych dnjow.