Wosrjedź zymskeho počasa je nam wjedro minjeny kónc tydźenja ...
„Pantery“ najzajimawše byli
Jako so Ralbičanscy wohnjowi wobornicy njedawno při gratowni zetkachu, nječakaše na nich zasadźenje, ale wulki bus. A njejědźechu tež na žane zwučowanje, ale na Drježdźanske lětanišćo. Při krasnym wjedrje wuži 18 wobornikow ze swójbnymi móžnosć, sej je raz dokładnišo wobhladać. Bě to prěni wulki zhromadny wulět tajkeho razu. Organizatoriski team wokoło Achima Měrćinka bě so wo wšo trěbne starał.
Prěni wulki wjeršk za dźěći bě busowa jězba sama. Napjeće so wone prašachu, što drje na nje čaka a hač snano z lětadłom poleća. Na lětanišću dósta kóždy z našeje skupiny, wopřijaceje něhdźe połsta ludźi, wopytowarsku kartku, takrjec wupokaz za dźeń. Bórze so nam tež naši přewodźerjo přidružichu.
Prěnja etapa po lětanišću bě wěstotny check, potajkim normalna kontrola, jako by chcył z lětadłom wotlećeć. Pola někotrych zaklinča při přeprěčenju wrotow signal. To rěkaše přidatne přepytowanje přez sobudźěłaćerjow security. Procedura dosć dołho traješe, wšako dyrbjachmy hač na poslednjeho dočakać.
Jónkrótne ideje kónčinu wobohaćeja
Po dotal sydom přeběhach 48hodźinskeje akcije na wokrjesnej runinje zdobychu sej organizatorojo znowa Budysku wokrjesnu lutowarnju a Wuchodosaksku lutowarnju Drježdźany za sponsorow. Ze spěchowanjom přez krajny program „Swětej wotewrjena Sakska“ we wobłuku partnerstwa za demokratiju spožča so projektej znowa solidne financowanje.
Krótkopowěsće (18.02.19)
Zazběh do projektoweho lěta
Donja Stubica. Něhdźe 30 młodostnych přebywaše hač do wčerawšeho na seminarje Młodźiny europskich narodnych mjeńšin „Kick Off“ w chorwatskej Donjej Stubicy, mjez nimi tež zastupnicy Pawka. Srjedźišćo tworješe diskusija wo zachowanju rěče a kultury. Seminarny tydźeń, wuhotowany wot młodostnych serbiskeje mjeńšiny w Chorwatskej, bě zazběh do projektoweho lěta 2019.
Ma kulturne srjedźišćo wostać
Budyšin. Serbski dom ma tež přichodnje kulturne srjedźišćo serbskich towarstwow wostać, informuje direktor Załožby za serbski lud Jan Budar w nowinskej zdźělence. Je to konsens rozmołwy ze zastupnikami Budyskeje župy, kulturneho wuběrka Domowiny a běrowa třěšneho zwjazka pjatk w Budyšinje. Kaž Budar dale zdźěla, su so na prěnje konkretne namjety dojednali, kotrež pak njemjenuje.
Nowe wubědźowanje zahajene
Nominuja kandidatow
Pančicy-Kukow. Serbske wolerske zjednoćenstwo přeproša wšitkich zajimcow na zjawnu zhromadźiznu, na kotrejž wuzwola kandidatow na žanu politisku stronu wjazaneho wolerskeho zjednoćenstwa za nowy sejmik Budyskeho wokrjesa. Za to chcedźa kandidatow za wšitke wólbne wokrjesy nastajić. Tak su na zhromadźiznu tež dalši Serbja prošeni, kiž móžnu kandidaturu njewotpokazuja abo kotřiž chcedźa Serbske wolerske zjednoćenstwo podpěrać. Wólbna zhromadźizna wotměje so wutoru, 19. februara, w 17 hodź. w rumnosći zarjadniskeho zwjazka Při Klóšterskej wodźe w Pančicach-Kukowje.
Bajowe figury w srjedźišću
Stróža. Na popołdnjo za dźěći a šulerjow přeprošatej towarstwo Radiška a zarjadnistwo biosferoweho rezerwata Hornjołužiska hola a haty dźens za tydźeń, 22. februara, wot 15 do 17 hodź. do Stróžanskeho Domu tysac hatow. Tam chcedźa so z pisanym swětom bajowych figurow, kaž wódneho muža abo připołdnicy, zaběrać. Wšitcy su wutrobnje witani. Zastup je darmotny.
Policija (15.02.19)
Trik na zbožo njefungował
Radwor. We wjacorych městach a gmejnach we wobłuku Zhorjelskeje policajskeje direkcije su njeznaći zawčerawšim dohromady wosom razow spytali, z tak mjenowanym wnučkowym trikom staršim ludźom pjenjezy wulišćić. Njeznaći zazwonichu mjez druhim pola rentnarjow w Radworju, Budyšinje a w Bernstadće pola Zhorjelca. We wšěch padach pak potrjecheni prawje reagowachu, su telefonat skónčili a policiju informowali.
W Salowje móža nětko twarić
Kulow (AK/SN). Po dokładnym wotwažowanju móža nětko tři swójby na Cyhelskim puću w Salowje jednoswójbny dom twarić. Kulowscy měšćanscy radźićeljo su na swojim zašłym posedźenju twarski plan jednohłósnje wobzamknyli. Do toho běchu so woni ze zapodatymi stejišćemi wjacorych zarjadow, zastaraćelskich firmow a susodnych komunow zaběrali.
Wosebje dokładnje rozłoži nawoda twarskeho zarjada města Stephen Rachel zapodaća Salowskeho ratarja Alojsa Michałka. Tón bě wo njepřiměrjenych njelěpšinach a wo rozsydlenju krajiny rěčał. „Wšitke předpisane wotstawki mjez nowymi ležownosćemi a ratarskimi płoninami so dodźerža“, Stephen Rachel wuswětli. Tež wšitke móžnosće nowych twarskich płonin we wsy su pruwowali, ale bjez wuspěcha. Zo so město Kulow nětko na wobtwarjenje we wonkownym wobłuku orientuje, ma Alojs Michałk za zasah do jeho wobsydstwa a widźi w tym samo přeńdźenje přećiwo zakładnemu prawu. Tež tele wumjetowanje město wotpokazuje.
Premier pomoc dale přilubja
Přirjadnik Budyskeho krajneho rady gmejnskich radźićelow změrował
Róžant (SN/MWj). Zo je so na wčerawšim posedźenju gmejnskeje rady Ralbic-Róžanta prěni přirjadnik Budyskeho krajneho rady Udo Wićaz (CDU) wobdźělił, drje měješe na čłonow parlamenta wěsty změrowacy wliw wukonjeć. Wón jim mjenujcy wjacekróć wobkrući, zo so najebać wšitke zadźěwki zešlachći w Ralbicach nowu pěstowarnju natwarić. Tež ministerski prezident Michael Kretschmer (CDU) k swojemu přilubjenju steji, zo so mjenowany projekt poradźi, Wićaz wuzběhny.
Wšo narodne a nabožne wobchowa
Wot 4. oktobra 2017 wjedźe Erika Maywaldowa Róžeńčanski drastowy wobchod, kotryž bě wot Marje Hrjehorjoweje přewzała. Nětko so tam změny připowědźeja.
Róžant (SN/MWj). Trjeba-li žona za serbsku narodnu drastu wěsty płat, čěpc, rubiško abo hinaši dźěl, wona wě, zo to z wěstosću w drastowym wobchodźe Eriki Maywaldoweje dóstanje – a wězo hišće wjele dalšeho, kaž swjate křiže, serbske knihi, drobne wěcy za šiće atd. Tomu tež dale tak wostanje, ale wot nazymy nic hižo na zwučenym městnje w Róžeńće, ale w Šunowje, dokalž drastowy wobchod přećehnje.
„Zašłe połdra lěta móžach wjele dale wjesć, štož bě Marja Hrjehorjowa natwariła. Tež to a tamne nowe je so mi poradźiło. Nětko dyrbju hladać, zo so wobchod tež hospodarsce wudani. Tomu tuchwilu tak njeje“, Erika Maywaldowa rozłožuje. Z přećahom do noweje rumnosće w Šunowje chce swój tuchwilny sortiment saněrować.
