Krótkopowěsće (06.04.18)
Wabja za wopyt jězoriny
Zły Komorow/Praha. Turistiski zwjazk Łužiska jězorina wabi wot dźensnišeho na Praskich wikach „For Bikes“ za swoje poskitki. Turisća ze susodneho kraja su zwjazkej wažny hospodarski faktor, wšako ličba wopytowarjow wottam dale přiběra. Z předewšěm čěskorěčnym materialom wabja w Praze hač do njedźele za wopyt łužiskeje jězoriny z ćežišćom kolesowanje a skating.
Domiznowědne wubědźowanje
Drježdźany. 9 000 eurow nałoži sakske ministerstwo za kultus za domiznowědne wubědźowanje. Hač do 7. meje su domiznowědnicy namołwjeni, swoje dopóznaća jako ćišćanu knihu, nastawk abo w multimedialnej formje předpołožić. Zajimcy móža so mjez druhim zaběrać ze stawiznami kraja, industrije, ze škitom přirody, z Němcami a Serbami kaž tež z integraciju.
Najwjetša „pjeluškarnja“ swěta?
Železniski wagon ze stolicy na łužiskej zahrodźe
Čorna Pumpa (JoS/SN). Hižo wot lońšeho septembra je Čorna Pumpa wo zajimawostku bohatša. Tam wuhladaš historiski wagon Berlinskeje měšćanskeje železnicy. Ze železniskeje zamkarnje Schöneweide do Łužicy přiwjezło bě je Rakečanske transportne předewzaće, kotrež zamóže tajke transporty přewjesć, powěda wobsedźer wagona Holger Schwarz. 51lětny pak njeje po powołanju železnicar, ale policist. Wón dźěła w Berlinje a z pomocu swojeho wukubłaneho psa mjez druhim za rozbuchadłami pyta, mjez druhim na lětanišćach, ale tež pola železnicy. 2015 bě Holger Schwarz słužbnje w Schöneweidźe zasadźeny, hdźež napadny jemu 1921 twarjeny wagon. Hač do lěta 1983 w stolicy wužiwany tón ze swojimi drjewjanymi ławkami hišće dźensa wosebity flair wuprudźa.
Policija (05.04.18)
Rozestajenje po diskotece
Šunow. Njelubje skónčił je so za 19lětneho wopyt diskoteki jutrownu póndźelu w Šunowje. Młody muž bě po swójskim wuprajenju po puću na parkowanišćo, jako z jednoho awta njejapcy njeznaty wulěze a jeho bić započa. 19lětny so při tym mjezwoči zrani a dyrbješe so lěkarsce zastarać dać. Nadpadnik, kiž bě do toho tež druhim wopytowarjam diskoteki swojich skřiwdźacych wuprajenjow dla napadnył, je něhdźe 1,85 metrow wulki, sylneje sportowskeje postawy a ma ćmowe, krótke włosy. K podawkej w Šunowje pyta policija swědkow. Štóž je něšto wobkedźbował, njech přizjewi so pod telefonowym čisłom 03571/ 46 50.
Lětak znowa nakładowany
Stróža. Zarjadnistwo biosferoweho rezerwata Hornjołužiska hola a haty je woblubowany a často požadany lětak wo Kołopuću mórskeho worjoła předźěłało a znowa nakładowało. Na karće su 88 kilometrow dołhi kołopuć kaž tež dalše kolesowanske a pućowanske šćežki biosferoweho rezerwata zarysowane. Podłu kołopuća steja na 13 stacijach informaciske tafle, na kotrychž wo žiwjenju mórskeho worjoła informuja.
Do lětaka zapřijate su dale pokiwy wo turistiskich informacijach, busowych čarach, hosćencach a kolesowych zamkarnjach. Zajimcy móža sej lětak skazać pod telefonowym čisłom 035392/ 36 36 abo dóstanu jón w Stróžanskim Domje tysac hatow.
Wustawki njewobzamkli
Twarja nowy wjesny centrum
Dalšich ludźi w měsće zdobyć
Přirada za serbske naležnosće města Wojerec je na swojim njedawnym posedźenju mjez druhim wubědźowanje „Rěčam přichilena komuna – serbska rěč je žiwa“ wuhódnoćiła.
Wojerecy (AK/SN). Žiwej serbska rěč a kultura měłoj we Wojerowskim wobydlerskim centrumje Piwarska hasa 1 lěpje spóznajomnej być. To je kruty narok towarstwa Kulturna fabrika, kotrež dom wobhospodarja. „Lětsa ma so tam zaso nazymski koncert wotměć“, podšmórny jednaćel Uwe Proksch na zašłym posedźenju přirady za serbske naležnosće města nad Čornym Halštrowom.
W srjedźišću stejachu zarjadowanja k lětušemu jubilejej „750 lět Wojerecy“. Tam maja so tež serbske wobsahi sobu zapřijeć. Po słowach jednaćela su wuhlady dobre, zo móža na projekty medijoweje dźěłarnički nawjazać. Tak mysli wón předewšěm na film Angele Schusteroweje „Zmij“, z kotrymž chce so režiserka zhromadnje ze zajimcami dale zaběrać.
Wjele dožiwić a zhonić móhli
CSB a klóšter Marijina hwězda swójbne popołdnjo wuhotowałoj
Pančicy-Kukow (aha/SN). Wjace hač 400 ludźi wšěch starobnych skupin dožiwi wčera zabawny swójbny dźeń, kotryž stej Křesćansko-socialny kubłanski skutk (CSB) a klóšter Marijina hwězda štwórty raz znowa w jutrownych prózdninach wuhotowałoj. Sonja Hejdušcyna wot CSB dósta wjele připóznaća za přemyslene poskitki na dźesać stacijach, při čimž je wjedro z organizatorami, akterami a hosćimi lětsa wosebje derje měniło.
Planuja dalnotepjenje modernizować
Choćebuz (SN). Na zakładźe spěchowanskich srědkow je zawodohospodarsce najlěpje, přestajić Choćebuske měšćanske zawody wot brunicy na zemski płun. To je facit njedawneho informaciskeho wječorka w Choćebuskim klubje Bebel.
Na přeprošenje Janšojskeje zapósłanče Braniborskeho krajneho sejma Heidy Schinowsky (Zwjazk 90/Zeleni) staj jednaćel měšćanskich zawodow Vlatko Knezevic kaž tež přisydnik a nawoda financneho a zarjadniskeho managementa města Choćebuza dr. Markus Niggemann na prašenja zajimcow wotmołwjałoj.
Choćebuscy měšćanscy radźićeljo běchu w januaru wobzamknyli, inwestować do twara blokoweje tepjenskeje milinarnje na zakładźe zemskeho płuna a dotalnu brunicowu milinarnju wotšaltować. Hač do 31. decembra 2022 ma nowa milinarnja wobswětej nješkodźacu dalnoćopłotu domjacnosćam dodawać.
Maltezojo staraja so wo dorost
Saksko-braniborska powšitkownowužitna towaršnosć maltezow je minjene tydźenje na zarjadowanjach wospjet swoje wukubłanske městna w chorowni a starowni předstajała.
Kamjenc (SN/mwe). „Cyłkownje smy ze zajimom za naše wukubłanske powołanja jara spokojom“, praji Beate Mögel, hladanska direktorka w Kamjenskej chorowni maltezow swj. Jana. „Wjeselimy so, zo móžemy lětsa nazymu zaso dźewjeć młodych ludźi jako strowotniskich a hladarjow chorych kaž tež na baby wukubłać.“ Na wustawach maltezow započnu w druhej połojcy lěta tež hladarjow starych ludźi wukubłać. Nimo toho móža so wuknjacy Worklečanskeje, Kulowskeje a Ralbičanskeje wyšeje šule w chorowni přizjewić, zo bychu na stacijach praktikum přewjedli.
Krótkopowěsće (05.04.18)
Nowy rěčnik w sakskim sejmje
Drježdźany. Zapósłanc Sakskeho krajneho sejma Alojs Mikławšk je wotnětka nowy rěčnik frakcije CDU za serbske naležnosće. Minjene nimale 30 lět bě Marko Šiman zastojnstwo wukonjał. ,,Hladajo na dale přiběrace mnóstwo nadawkow je tak parlamentariske skutkowanje za serbske naležnosće lěpje rozdźělene“, zdźěli Šiman medijam.
Naprašowanje knježerstwu
Drježdźany. Frakcija Zelenych w sakskim sejmje je knježerstwu stajiła wulke naprašowanje nastupajo połoženje šulow w swobodnym nošerstwje. Hač do 13. junija ma kabinet chwile wotmołwić. Po noweli zakonja wo šulach w swobodnym nošerstwje z lěta 2015 a po lońšej noweli šulskeho zakonja stejitej w srjedźišću naprašowanja zakonske rjadowanje a praksa runoprawosće mjez šulemi w zjawnym a swobodnym nošerstwje.
Minister Schmidt w Pólskej
