Hamor (AK/SN). Wodosportowa sezona při Bjerwałdskim jězoru so 1. apryla započnje. Za to gmejna Hamor nětko swoje komunalne připrawy kaž přistawnišća, zjawne nuzniki, parkowanišća a informaciski centrum přihotuje. Tež přibrjohi maja so wurjedźić. Hišće do zahajenja sezony nastaja zaměrowy zwjazk łužiskeje jězoriny informaciske tafle. Na nich zapřijaty je tak mjenowany QR-code, z kotrymž dóstawa wopytowar přez handy dalše serbske, jendźelske a čěske informacije wo jězoru a gmejnje, rozłoži Hamorski wjesnjanosta Achim Junker (CDU) zawčerawšim na posedźenju gmejnskich radźićelow. Wobě stanowanišći – hwězdne stanowanišćo w Hamoru a Klětnjanske campingownišćo – zahajitej sezonu hižo 29. měrca. Prěnjej wjerškaj lětušeje wodosportoweje budźetej 28. apryla wiki regionalnych produktow w Hamorskim turistiskim informaciskim centrumje a 29. apryla wot 10 do 16 hodź. dźeń wotewrjenych duri w Klětnjanskim přistawje z wosebitymi wodźenjemi po přistawnej mištrowni. Wobaj terminaj wotmějetej so we wobłuku lětušich jězorinowych dnjow.

Njeswačanska gmejnska rada dźěła zaměrnje na hospodarskim planje

Njeswačidło (JK/SN). Po tym zo bě februarske posedźenje Njeswačanskeje gmejnskeje rady chorosće wjacorych radźićelow dla wupadnyło, dachu so woni wčera wječor ćim zaměrnišo do dźěła. Hłowny dypk dnjoweho porjeda bě dalše rozjimanje lětušeho hospodarskeho plana. Komornica Liliana Wetzko rozłoži radźićelam hišće raz aktualne a zdobom nimale wěste róžkowe daty kaž tež móžne statne podpěry kaž klučowe připokazanki, spěchowanske srědki a wězo planowane wudawki a dochody. Mjenje klučowych připokazankow kaž tež dźeń a wjace winowatostnych nadawkow njewostaja přewjele móžnosćow, na dobro gmejny něšto wuskutkować a wurunany plan nastajić. Wosebje wusměrjeja so lětsa na dróhotwar a naprawy za zakładnu šulu a pěstowarnju, kotraž ma so wulkeho naprašowanja dla rozšěrić.

Pančicy-Kukow. Dojutrownu rjedźensku akciju při pomniku Ćišinskeho w Lipju přewjedźe Domowinska skupina Pančicy-Kukow sobotu, 17. měrca. Skupinarjo zetkaja so w 9 hodź. Njech sej trěbny grat sobu přinjesu.

Dźiwadło z pěstowarnju

Budyšin. Přichodne předstajenje inscenacije Němsko-Serbskeho ludoweho dźiwadła „Paradiz w dobrej stwě“ njedźelu, 18. měrca, w 15 hodź. na hłownym jewišću budźe z dźiwadłowej pěstowarnju. Je to poskitk młodym serbskim swójbam. Staršej móžetaj sej woměrje předstajenje wobhladać a swoje dźěći w tym času dźiwadłowej pěstowarni přewostajić. Darmotny serwis je za dźěći wot štyrjoch lět.

Paduši kolesow zaso aktiwni

Budyšin. Bližace so nalěćo někotrehožkuli pohnuwa, nětko swoje koleso z pincy abo garaže wućahnyć. Nic pak jenož wólnočasni sportowcy su zaso aktiwniši, tež paduši kolesow. Tohodla policija wobydlerjow namołwja swoje wobsydstwo škitać. Stabilny zamk měł za kóždy groćany konik samozrozumliwy być. Ale tež koděrowanje kolesa móže pomhać padustwo wujasnić. Z pomocu indiwidualneje kombinacije pismikow a čisłow hodźi so koleso swojemu poprawnemu wobsedźerjej lóšo přirjadować. W Budyskim a Zhorjelskim wokrjesu wšelake towarstwa, na přikład wobchadne straže abo ADFC tajke koděrowanske akcije poskićeja. Prěnja budźe 9. apryla wot 18 do 19 hodź. před hosćencom „Budyska piwarnja“ na Thomasa Mannowej.