38 milionow eurow za wokrjes
Budyšin. Wokrjes Budyšin dóstanje we wobłuku programa „Mosty do přichoda“ 38 milionow eurow. Wulki dźěl toho, cyłkownje 25 milionow eurow, je za města a gmejny. Zbytk dóstanje wokrjes, kotryž planuje mjez druhim twar noweje pěstowarnje na Budyskim Třělnišću. Za jednotliwe projekty maja komuny 10 procentow kóštow same přewzać.
Ličba turistow přiběra
Drježdźany/Choćebuz. Turizm na wuchodźe Němskeje zwjesela so nad dale a wjace wopytowarjemi. Tak je so ličba přenocowanjow w Błótach porno lońšemu wo 11,3 procenty stopnjowała. Tole wuchadźa z ličbow Zwjazkoweho statistiskeho zarjada. Mnozy turisća předewšěm z Berlina wužiwaja składnosć a so w Błótach wočerstwjeja.
Přewjeduja naprašowanje
Budyšin. Tele dny je Budyski wokrjes zahajił online-naprašowanje k temje: „Kak derje sće na wulku wodu přihotowani?“ Ze statistiku chce krajnoradny zarjad zwěsćić, hdźe su słabosće nastupajo swójske zawěsćenje. Tak chcedźa zjawnostne dźěło zaměrnje na rozswětlowanje, na lěpše komunikaciske puće a móžne strategije wusměrić.
Přistup znowa rjadować
Drježdźany. Přistup k dalewjeducym šulam po 4. lětniku dyrbja w Sakskej po wšěm zdaću znowa rjadować. Tole wuchadźa z wobzamknjenja Drježdźanskeho zarjadniskeho sudnistwa. Sudnicy maja kubłanske poručenje za njedosahacy zakonski zakład. Skoržiłoj staj staršej holcy, kotraž njebě žadany přerězk 2,0 w předmjetach matematika, němčina a wěcna wučba docpěła.
Wo zmysle dawkow zhonili
Drježdźany. Sobudźěłaćerjo financneho zarjada su w běhu jednoho lěta na wjac hač 200 zarjadowanjach we wyšich šulach a gymnazijach šulerjow wo zmysle dawkow informowali. Tak dóstachu wuknjacy zrozumjenje za to, zo su dawki za žiwjenski zakład bytostne, hódnoćeše dźensa sakski financny minister Georg Unland (CDU) zaměr projekta.
Mjenje jězbow po Łobju
Bad Schandau. Trajneje suchoty dla móža łódźe jenož hišće we wobmjezowanej měrje po Łobju jězdźić. Tak sakske parne łódźnistwo zdźěla, zo su jězby mjez Drježdźanami a Bad Schandauwom redukowali. W Drježdźanach je pegel Łobja jenož hišće 70 centimetrow, normalnej stej dwaj metraj.
W skale so zatepił
Häslich. 64lětny muž je so sobotu popołdnju w skale pola Häslicha w gmejnje Haselbachtal zatepił. Ze swojim dźesaćlětnym wnučkom so tam muž kupaše, nadobo pak so hižo na powjerch wody njewróći. Wnučk a dalši kupacy za podnurjenym pytachu, bohužel bjez wuspěcha. Mjeztym alarmowachu wohnjowych wobornikow, kotřiž sobu pytachu. Hakle hobbyjowaj nurjakaj, kotrajž běštaj připadnje na městnje, muža z něhdźe jědnaće metrow hłubokosće wućahnyštaj. Jeho reaniměrować so njeporadźi, tak zo móžeše přiwołany nuzowy lěkar jenož hišće smjerć 64lětneho zwěsćić. Dokładne přičiny njezboža policija nětko přepytuje.
Budyšin. Twarske dźěła na Budyskej Bebelowej so nachileja. Wot dźensnišeho jězdnju z asfaltom pokrywaja. Wona wostanje tuž na wotrězku wot Walskeje hač k Tuchorskej hač do 5. septembra dospołnje zawrjena. Tež wobydlerjo njemóža w tym času z awtom na swoje ležownosće. Po tym zatwarja hišće indukciske sekle za amplu k Walskej. 12. septembra ma puć hotowy być.
Wo stawiznach rěče
Budyšin. Klub wuchowarjow rěče wotwjedźe wopytowarjow swojeho přichodneho zarjadowanja jutře, wutoru, do stawiznow rěče. Ines Adler ze Załomja porěči na temu „Stara a nowa Budyska łaćonšćina – teksty Kaspara Peukera“. Zarjadowanje w Budyskim hosćencu „Sprjewina pensija“ započnje so w 19 hodź. Zastup je darmotny.
Ramnow (BW/SN). Cyle w znamjenju lena a najwšelakorišich wudźěłkow z tejele rostliny steješe kónc tydźenja Ramnowski barokny hród. Tam přewjedźechu mjeztym hižo 21. raz mjezynarodne lenowe dny. Štož bě so 1995 z małej horstku wikowarjow a něšto stami wopytowarjow započało, je dźensa hotowy magnet z něhdźe 200 wikowarjemi. Po tysacach přijědźechu ludźo do Ramnowa, a kaž awtowe znački přeradźeja nic jeno z Łužicy, ale tež z Berlina, Drježdźan, Riesy, Durinskeje, Saksko-Anhaltskeje a wot druhdźe. Publikum pak je stajnje móhłrjec trochu wuběrany, přetož hdyž dorosćeny najprjedy dźesać eurow zastupa płaći, žno dyrbi so wón chětro za lenowe wudźěłki zajimować.
Štož pak na wopytowarjow čaka, móžeše so sobotu a njedźelu widźeć dać. Hudźbna zabawa na dwěmaj jewišćomaj z bigband a dalšej kapału za rejwansku hudźbu, dudlowar, dźěćaca zaběra, klankodźiwadło a wjele dalšeho skićachu w parku a před hrodom samym dosć wotměny. K tomu bě dosć móžnosćow sej něšto słódneho popřeć, a to nic jenož kołbasku a piwo.
Najebać horce wjedro je 5. dworowy swjedźeń Dubrjenskeho hosćenca wčera přewšo dobry wothłós žnjał. Prěni raz přewjedźechu tam wubědźowanje konjacych zapřahow.
Dubrjenk (HH/SN). Wopytowarjow z cyłeje blišeje wokoliny je wčera 5. dworowy swjedźeń Dubrjenskeho hosćenca přiwabił. Jeho šef Michał Krječmar měješe tuž ruce połnej dźěła. „Na tajkim dnju sej přeješ, zo maš tři abo štyri ruki“, hosćencar rjekny. Wjace hač 500 ludźi mějachu wón, jeho swójbni a dalši pomocnicy zastarać. Kaž kóžde lěto poskićachu k wobjedu serbsku kwasnu poliwku a chrěn z howjazym mjasom. Hižo dopołdnja móžachu so zajimcy na jězbu z konjacym zapřahom po Dubrjenskim bahnje podać abo słuchachu na zahrodźe hosćenca na dujersku hudźbu.
Při dźěle znjezbožił
Budyšin. Ćežke dźěłowe njezbožo je so zawčerawšim na twarnišću noweje bydlenskeje štwórće při Budyskich Špitałskich łukach stało. Tam nastawa 23 jednoswójbnych domow. W jednym z nich je 51lětny dźěłaćer tak njezbožownje stupił, zo padny wón z wysokosće połdra metra na špundowanje. Při tym zrazy muž na stejacu železnu žerdź, kotraž so jemu do hornjeho sćehna zakłó. Ćežko zranjeneho dowjezechu jeho do Budyskeje chorownje. Dokładnu přičinu njezboža policija přepytuje.
Přirada za serbske naležnosće města Wojerec je na swojim wčerawšim posedźenju namjetowała, kak móhli wopytowarjow města wobšěrnišo wo Serbach wobhonić.
Wojerecy (AK/SN). We wobydlerskim centrumje Piwarska 1 měli so wopytowarjo přichodnje hłubšo a dokładnišo wo Serbach informować móc. Za to zasadźa so přirada za serbske naležnosće města Wojerec. „Chcemy kulturnu fabriku jako wobhospodarjerja a Domowinsku župu „Handrij Zejler“ pohnuć, zo so w tym nastupanju angažujetej. Wonej měłoj za kmanymi wobsahami a za spěchowanskimi móžnosćemi pytać“, podšmórny Dirk Nasdala, předsyda serbskeje přirady, po wčerawšim posedźenju. „Dźensa smy najprjedy raz wo prěnich myslach rěčeli.“
Kral Nižozemskeje přijědźe
Drježdźany. Nižozemski kral Willem-Alexander přijědźe spočatk lěta 2017 do wuchodneje Němskeje. Tole zdźěli prezident Zwjazkoweje rady, sakski premier Stanisław Tilich (CDU), dźensa po zetkanju z monarchom w Den Haagu. Po dotalnym planowanju wopyta Willem-Alexander w februaru Saksku, Saksko-Anhaltsku a Durinsku.
Strach lěsnych wohenjow
Pirna. Horcota a suchota tomu polěkujetej, zo je strach lěsnych wohenjow jara wulki. Na sewjeru Sakskeje a podłu pólskeje mjezy su dźensa najwyši warnowanski schodźenk wukazali, kaž statny lěsniski zawod zdźěla. Tež w Budyskej kónčinje hroža wohenje. Kurić w lěsach je zakazane. Ludźo njesměli awta na suchej trawje wotstajić.
Kolesowarjo a alkohol
Praha. Senat, hornja komora čěskeho parlamenta, je změnu zakonja wo nadróžnym wobchadźe schwaliła. Tak měło kolesowarjam na pućach nišich kategorijow hač do 0,8 promilow alkohola dowolene być. Za wšě tamne jězdźidła płaći dale „nulowa toleranca“. Změnu, za kotruž so tež winicarjo zasadźeja, dyrbi delnja komora hišće schwalić.