Přećiwo pawšalnemu wotwołanju
Frakcije CDU, Swobodnych wolerjow a FDP w Budyskim wokrjesnym sejmiku su za to, zwołać wurjadne posedźenje sejmika nastupajo komunikaciju prěnjeho přirjadnika krajneho rady Uda Wićaza (CDU) z mužom NDP. Wone pak maja za wopačne wo wotwołanju rěčeć, doniž wšitke pozadki Wićazoweho jednanja wuswětlene njejsu.
Při pjecy so zhromadnje zetkali
Njebjelčicy (AKr/SN). Wuměłstwowy bus pod hesłom Lauter Leise Sommertour bě minjeny tydźeń w Budyskim wokrjesu po puću a je sobotu popołdnju tohorunja w Njebjelčicach pozastał. Tu je domizniske a kulturne towarstwo swójbny swjedźeń při pjecy na swjedźenskej łuce organizowało. Mały swjedźeń započa so ze zhromadnym kofejom a tykancom. K tomu móžachu wopytowarjo na modernu lyriku słuchać. Udo Tiffert předstaji někotre ze swojich basnjow. Za dźěći bě spřihotowane blido za ćišćenje. Do winyla móžachu wone naškrabać swójski motiw, na kotryž namazachu barbu, tak zo skónčnje wućišćany wobraz nasta.
Wo hudźbu postara so skupina Serbska reja. Jeje čłonojo přewjeduja rejwanske workshopy w Lipsku, we Łužicy a wšudźe tam, hdźežkuli jich přeprošeja. Tam hudźa a pokazuja serbske kružne reje abo polonezu, za kotruž žanoho partnera njetrjebaš. Tež w Njebjelčicach na te wašnje někotrych zajimowanych za reju zdobychu.
Policija (29.08.17)
Při wotbóčce prasnyło
Słona Boršć. Při wotbóčce awtodróhi A 4 w Słonej Boršći je so wčera rano ćežke wobchadne njezbožo stało. Krótko po 7 hodź. je wodźer Seata napřećo přijěducy Pickup přewidźał a frontalnje do njeho zrazył. Na to zajědźe Pickup hišće do Lkw-ja, kotryž chcyše awtodróhu runje wopušćić. Wodźerjej wosoboweju awtow so ćežko zraništaj, tak zo dyrbjachu jeju do chorownje dowjezć. Nimo wjacorych wuchowanskich jězdźidłow běchu tež wohnjowe wobory zasadźene. Wobornicy starachu so wo wuběžane ćěriwo a su zhromadnje z policiju statnu dróhu S 106 zaraćili. Na wobdźělenych jězdźidłach nasta něhdźe 30 000 eurow škody.
Pod wliwom alkohola jěła
Smjerdźaca. Při kontroli Audija zawčerawšim wječor w Smjerdźacej je policiji „chorhojčka“ 64lětneje wodźerki napadnyła. Při tesće so wukopa, zo měješe žona 0,92 promilow alkohola w kreji. Na to jej dalšu jězbu zakazachu. Wona změje nětko 500 eurow pokuty płaćić, dyrbi měsac nóžkować a dóstanje nimo toho dwaj dypkaj w Flensburgu.
Ludowy dom wozrodźić
W Běłej Wodźe maja dweju kandidatow za wólby wyšeho měšćanosty
Běła Woda (AK/SN). Wobydlerjo Běłeje Wody wola 24. septembra noweho wyšeho měšćanostu. Torsten Pötzsch (Klartext) tele zastojnstwo wot lěta 2010 wukonja. A 46lětny Běłowodźan za nje znowa kandiduje. Dale staji so k wólbam 51lětny dotalny komornik města Rico Jung. Pötzsch je nawuknył powołanje bankoweho překupca, dźěłaše pozdźišo pola lutowarnje, bě kontroler w jednym zawodźe a do swojeho časa jako wyši měšćanosta jednaćel Běłowodźanskeje bydlenjotwarskeje towaršnosće. Jung je po powołanju elektroinstalater. Wot lěta 1988 bě wón technikar w lodosportowym kompleksu města a wot 1993 jón nawjedowaše. Naposledk bě komornik w měšćanskim zarjadnistwje.
Ručne dźěło wobchować
Lenowe dny, stajnje posledni kónc tydźenja w awgusće, wabja kóžde lěto syły ludźi na rjenje wuhotowanu ležownosć kołowokoło Ramnowskeho hrodu. Tomu tež lětsa zaso tak bě.
Ramnow (SN/BŠe). Kaž swěrni wopytowarjo Ramnowskich lenowych dnjow wědźa, njeposkićeja tam jenož wudźěłki a płaty z lena, ale tež dalše přirodne produkty. Kóžde lěto wobdźěla so Drježdźanske předewzaće Kräuter Seifert na přehladce. Tónle termin ma kruće do swojeje protyki zapisany, wšako sej tam ludźo zaměrnje swoje zela abo čaje wobstaruja.
Na 60lětne wobstaće zhladował je njedźelu z nutrnosću w połnje ...
Krótkopowěsće (28.08.17)
Wjelk znowa wowcy morił
Konjecy. Znowa je wjelk w stadle Konječanskeho wowčerja Měrćina Justa zachadźał. Tři wowcy je rubježne zwěrjo w nocy na njedźelu na škitanej pastwje moriło. Tak je ličba zahinjenych wowcow Justa na 64 rozrostła. Dwě dalšej dyrbješe skótny lěkar ćežkich ranow dla zasparnić. Z wjelčeho běrowa dotal žane informacije k padej njepředleža.
Ponowja dźěle parka
Rogeńc/ Zielona Góra. W přichodnymaj lětomaj wobnowja dźěle Rogeńskeho Pückleroweho a Zielonogórskeho Piastoweho parka. Europski programa Interreg přewostaji za to městu Choćebuzej štyri miliony eurow. Podpěra je w etaće zapisana, zdźěli wyši měšćanosta Holger Kelch (CDU), kiž je zdobom předsyda rady załožby za Rogeński park a hród.
Čłonstwo rozrostuje
Summer-ending-openair z dešćom hižo tradicija
Wotrow (br/SN). Mjeztym hižo pjaty raz wotmě so kónc tydźenja na Wotrowskim sportnišću tak mjenowany Summer-ending-openair, potajkim swjedźeń pod hołym njebjom, z kotrymž lěćo rozžohnuja. Jubilej chcyše Wotrowski młodźinski klub wězo prawje woswjećić a přeprosy sej k tomu wjacorych DJjow. Tak zahajichu swoju party pjatk wječor z hudźbu 2000tych lět. Sobotu sahaše hudźbna paleta skerje wot black a house hač k techno a electro. Tola tež k hitam z 80tych lět móžachu wopytowarjo rejwać, wšako mějachu hnydom tři rozdźělne městnosće, tak mjenowane floory, k dispoziciji. Kóždemu skićeše so prawa hudźba, samo wobydlerjam wokolnych wsow, kotřiž tohorunja wšitko derje słyšachu.
Policija (28.08.17)
Wandalojo zachadźeli
Budyšin. We wčerawšich rańšich hodźinach je skupina młodostnych na Budyskej Liebknechtowej pjeć awtow wobškodźiła. Swědka wobkedźbowaše, kak woni wot jězdźidłow typa Mercedes, Audi, Mitsubishi, Opel a Seat wonkowne špihele wotbichu. Škoda wučinja 2 000 eurow.
Staraja so wo kulturny dom
Dubrjenk (AK/SN). Dale zmysłapołnje a mnohostronsce wužiwać chcedźa Dubrjenčenjo swój kulturny dom. Tole podšmórny Beate Heffter z tamnišeje wjesneje rady na zašłym posedźenju Kulowskich měšćanskich radźićelow, kotřiž so tónraz w Dubrjenku zetkachu.
W bywšim Konsumje ma nětko Kulowski klub bikerow swój domicil. Hdźež bě něhdy gmejnska sotra skutkowała, je dźensa zetkanišćo staršich Dubrjenskich žonow. A stwu wjesnjanosty wužiwaja za billard. Přitwar słužeše něhdy jako pěstowarnja, nětko zetkawaja so tam sportowe skupiny.
W bywšim hosćencu móža wobydlerjo swoje swójbne swjedźenje přewjesć. „Grat, škleńcy, šalki a talerje tam su“, Beate Heffter rozłoži. W swójskej režiji wobydlerjow chcedźa kulturny dom hišće lětsa ponowić. Mjez druhim ma kuchnja nowe meble dóstać, sportownju chcedźa znowa wuhotować a porjeńšić a sanitarne připrawy modernizować.
