Krótkopowěsće (16.08.16)
Němske dny w Uljanowsku
Drježdźany. Wothladajo wot napjateje politiskeje situacije so Drježdźanske towarstwo Kultur aktiv dale za němsko-rusku kulturnu wuměnu zasadźa. Tak pósćelu wot 19. do 25. awgusta wuměłcow na „němske dny“ w Uljanowsku. Nawopak budźe ruska reggae-rockowa skupina Napass 1. septembra na swojej hudźbnej busowej turje w Drježdźanach.
Swjatočne sluby złožiła
Pančicy-Kukow. W klóštrje Marijinej hwězdźe w Pančicach-Kukowje je sotra Cora Küfner wčera swoje swjatočne sluby złožiła. Tak je so na přeco za rjadniske žiwjenje w klóštrje zawjazała. 32lětna rjadnica pochadźa z Glauchauwa a je so před jědnaće lětami wukřćić dała. W lěće 2008 je wona do cistercienskeho klóštra wosrjedź Serbow zastupiła.
Jednaćelstwo maltezow změnjene
Policija (16.08.16)
Awto do motorskeho zrazyło
Nowe Bronjo. Ćežko zranił je so zawčerawšim připołdnju wodźer motorskeho blisko Radworja. 53lětny bě ze swojej Suzuki wot Noweho Bronja do Radworja po puću, jako frontalnje do wosoboweho awta typa Ford zrazy. Jeho 21lětny wodźer bě w prawej křiwicy na lěwy bok jězdnje zajěł a tam do motorskeho prasnył. 53lětneho dowjezechu do chorownje.
Kulturne zetkawanišćo faluje
Hosćencarjo zwólniwi posłužby podłu pućowanskich šćežkow poskićeć
Róžant (JK/SN). W gmejnje Ralbicy-Róžant so dźěłowa skupina dale prócuje pućowanske šćežki wutworić. Zo bychu při naročnym dźěle – planować a naćisnyć móžne šćežki za pućowanje pak pěši pak z kolesom po delanskej gmejnje – dale přišli, su sej na swoje njedawne zetkanje přeprosyli hosćencarjow a poskićowarjow wšelakich posłužbow na teritoriju gmejny. W prěnim rjedźe dźěše wo to, hač su woni zwólniwi, swoje słužby podłu móžnych pućowanskich šćežkow poskićeć a atraktiwitu móžnych šćežkow polěpšić.
Zasadnje su hosćencarjo zwólniwi so wobdźělić, dźe-li wo to, turistow a hosći gmejny derje zastarać a jim přijomny přebytk w Delanach zaručić. Dźěłowa skupina wobroći so wosebje na zastu- pjerjow wjesnych radow, wo tym rozmyslować, što je wosebiteho a wobhladanjahódneho w delanskich wjeskach. Wšitke wosebitostki měli so na gmejnje přizjewić, zo bychu je tam do móžnych pućowanskich šćežkow zapřijeli. To by móžny zakład był, tematiske šćežki wutworić.
20 000 ludźi na lětanskich dnjach
Lětoń (CS/SN). Dźakowano spodobnemu wjedru su na lětušich lětanskich dnjach na Lětońskim lětanišću rekordnu ličbu wopytowarjow zličili. Wot minjeneho pjatka hač do njedźele bě to něhdźe 20 000 ludźi. Móhłrjec bjez přestawki lětadła a helikoptery startowachu, zo móhli sej zajimcy Budyšin wothorjeka wobhladać. Kołolěty poskićał je mjez druhim Hornjołužiski lětarskosportowy klub, kotryž ma w Lětonju swoje sydło. Jara požadany bě za tajke kołolěty dwojotřěšnik E 75 Boeing Stearman z lěta 1941.
Wjele přikleska žněještaj tohorunja nan a syn Ralf a Nico Niebergall, kotrajž staj z originalom a modelom sensacionelnu lětansku show pokazałoj. Kóždy dźeń dźě zawěrno njedožiwiš, zo modelotwarc na křidle wulkeho lětadła sedźi a swój model wodźi.
Wobdźěleni běchu tónraz znowa zwjazkowi policisća, kotřiž mjezu do Čěskeje a Pólskeje kontroluja. Jich eurocopter je předewšěm mjez dźěćimi wulku zahoritosć zbudźił.
W bywšej Baćońskej šuli kadry bojowniskich skupin wukubłali
Zhladujo na šulske stawizny Baćonja je zajimawe, zo drje mějachu tam wot lěta 1836 šulu. Wona pak njesteješe w Baćonju, ale kilometer dale w Čornecach. Z wučerjom bě tam spočatnje pjeć lět z Ralbic pochadźacy Handrij Brojer. Jeho naslědnik Michał Jenč, kiž tam 27 lět hač do 1868 dźěći wučeše, je w Čornecach swój čas njedźelsku šulu załožił, hdźež wučeše dorosćenych w serbskej rěči čitać a pisać. Jeno štyri lěta bě po nim Jan Kubańk z Chelna z wučerjom. Swoju słužbu wukonješe njespušćomnje a njewobdźěleše so na předpisanych konferencach. Njeje tež swoje druhe pruwowanje złožił a je wučerstwo spušćił. Wot 1886 wučerješe z Wotrowa pochadźacy Jan Symank w Čornecach. Michał Hórnik, tehdy kanonik Budyskeje Serbskeje cyrkwje, a Tadej Natuš, administrator Róžeńčanskeje putniskeje cyrkwje, tehdy namjetowaštaj, w Baćonju nowu cyrkej natwarić. A starši sej přejachu, zo by blisko njeje tež šula nastała.
15 holcow a hólcow je minjenu sobotu přeprošenje Smjerdźečanskeje ...
Mjeńšina je rozsudźiła
Wobydlerjo gmejny Halštrowska Hola swojemu wjesnjanosće Dietmarej Koarkej dowěrjeja. Wuslědk wčerawšich wólbow za najwyše zastojnstwo komuny we łužiskej jězorinje to jasnje pokazuje: 97 procentow płaćiwych hłosow za jeničkeho nominowaneho kandidata. To je šwarny wuspěch, samsny kaž při minjenych wólbach w lěće 2009. Jenož 2002 dósta wón 0,7 procentow mjenje. Kandidat je wšak wysoke wuslědki zwučeny. Nowołučenjo běchu jeho 1994 ze sto procentami jednohłósnje za wjesnjanostu wuzwolili.
Mjenje zwjesela spad wólbneho wobdźělenja. Před sydom lětami bě to hišće 63,1 procent. Wot 3 301 wólbokmaneho bě tehdy 2 082 woliło. Wčera je z 2 989 wólbokmanych jenož 1 164 wolić šło, snadne to wólbne wobdźělenje 38,9 procentow. Statistisce widźane je tónkróć mjeńšina noweho wjesnjanostu postajiła. Axel Arlt
Tysacy wopytowarjow zbliska a zdaloka dožiwichu kónc tydźenja ...
W zastojnstwje wobkrućeny
Halštrowska Hola (SN/at). Wobydlerjo gmejny Halštrowska Hola su swojeho wjesnjanostu Dietmara Koarka (CDU) w zastojnstwje wobkrućili. Na wčerawšich wólbach docpě wón 97 procentow wotedatych płaćiwych hłosow. Nazhonity komunalny politikar bě jako jenički kandidat za zastojnstwo nastupił. W tajkim padźe dowola Sakski komunalnowólbny zakoń, zo smědźa wolerjo dalšu wosobu na hłosowanski lisćik napisać. Na te wašnje jewja so mjena Bernharda Bocha (pjeć hłosow), Heika Tesche (tři hłosy), Renéja Hänchena a Franka Kaspera (wobaj dwaj hłosaj) we wólbnym protokolu. Dalšich 22 wjesnjanow dósta jedyn hłós. Wolić šło je 38,9 procentow wólbokmanych. Gmejnski wólbny wuběrk ma wuslědk hišće wobkrućić.
Dietmar Koark wukonja zastójnstwo wjesnjanosty gmejny Halštrowska Hola wot lěta 1995. Na wólbach wjesnjanosty 30. awgusta 2009 docpě wón tohorunja 97,0 procentow wotedatych płaćiwych hłosow. Wólbne wobdźělenje tehdy pak wučinješe 63,1 procent.
Krótkopowěsće (15.08.16)
Šulerjo namołwjeni
Drježdźany. Sakska kultusowa ministerka Brunhild Kurth (CDU) je šulerjow namołwjała, so na wubědźowanju „Młodźina slědźi“ wobdźělić. „Wužiwajće šansu, swoju wćipnosć spokojić a tež zwonka wučby slědźić a za rozrisanjemi pytać“, rjekny wona dźensa w Drježdźanach. Zajimowani šulerjo maja hač do 30. nowembra składnosć so přizjewić.
Hermann Kant zemrěł
Berlin. Spisowaćel Hermann Kant je njeboh. Wón zemrě wčera 90lětny w chorowni w Neustreelitzu. Kant, kiž bě so srjedź 90tych lět ze zjawneho žiwjenja wróćo sćahnył, bě jedyn z najwuspěšnišich spisowaćelow NDR. Wón bě wjele lět prezident spisowaćelskeho zwjazka NDR a čłon centralneho komiteja SED. Socializm w NDR je stajnje zakitował.
Předań alkohola wobmjezować?
Praha. Oldřich Lomecký, měšćanosta srjedźoměšćanskeho wobwoda Praha 1, chcył magistrat wo nowe postajenje prosyć: Po nim měła so předań alkohola po 22 hodź. we wobchodach zakazać. Tak měło so młodym, nócny měr mylacym wukrajnym turistam přistup k alkoholej poćežić, wón medijam zdźěli. Druhe Praske wobwody namjet njepodpěruja.
