Cenit – ale za koho?
Krótkopowěsće (14.01.19)
Žłobik rozšěrjeny
Smjerdźaca. Žłobik Serbskeho šulskeho towarstwa w Smjerdźacej smě wjac dźěći přijimać. Kaž sobudźěłaćerka SŠT Marlis Młynkowa wobkrući, wšitke dowolnosće předleža. Tuchwilu staraja so tam wo 31 dźěći. Dalše pjeć so w běhu lěta přidruži. Gmejna Ralbicy-Róžant bě žłobik loni za 35 000 eurow přetwariła, tak smědźachu kapacitu wot 26 na 36 městnow rozšěrić.
Prezidij sejma woleny
Wětošow. Radu załožby za serbski lud měli wo štyrjoch serbskich čłonow rozšěrić, zo bychu Serbja wjetšinu měli. To namjetuje Serbski sejm, kaž Serbski rozhłós rozprawja. Dojednali su so čłonojo cyłka na to sobotu we Wětošowje. Wolili su tam prezidij, kotremuž přisłušeja Sandra Wylemowa, Jan Kosyk a Alexander Pólk. Přitomni tež zhonichu, zo su z darom 25 000 eurow kóšty wólbow zarunane.
Přijimaja hišće namjety
„Čłowjek z čłowjekom zwjazany“
Trabi je kult
Krótkopowěsće (11.01.19)
Jězor bórze zaso přistupny
Rań. Złokomorowski jězor ma wot 1. apryla ludźom zaso přistupny być. To zdźěli Łužiska a srjedźoněmska towaršnosć hórnistwoweho zarjadnistwa wčera nowinarjam w Ranju. Po zesunjenju zemje na mjeńšej kupje loni w septembru běchu zamołwići jězor nachwilnje zawrěli. Kupa njeje přirodoškitnych přičin dla za zjawnosć přistupna.
Železnica zaso po planje jězdźi
Mnichow. Wobchad na železniskimaj čaromaj Drježdźany–Zhorjelc a Biskopicy–Žitawa zaso po planje běži. Wo tym informuje towaršnosć Krajne ćahi – Regentalbahn, wobhospodarjer transportneho předewzaća Trilex, na swojej internetnej stronje. Wjedrowych přičin dla su wčera wjacore jězby dospołnje wupadnyli, nimo toho dóńdźe k mnohim zapozdźenjam.
Ze zawdawkom přezjedni
Policija (11.01.19)
Trabant pokradnyli a tčacy wostali
Spale. Na pólnym puću pola Spal su předwčerawšim dopołdnja wopušćeny Trabant wuhladali. Awto bě wočinjene a jedne z kolesow bě skóncowane. Kaž policija pozdźišo wuslědźi, běchu njeznaći kultowe jězdźidło ze zahrody blisko Wojerowskeje Liebknechtoweje pokradnyli. Škoda wučinja něhdźe 150 eurow. Kriminalna policija je pad přewzała a spyta nětko zwěsćić, komu je so oldtimer z časa NDR tak lubił, zo chcyše jón měć.
Serbski sejm so schadźuje
Wětošow. Třeće schadźowanje Serbskeho sejma wotměje so jutře, sobotu, na Awgusta Bebelowej 9 we Wětošowje. W 10 hodź. započnje so dźěłarnička wo internej a eksternej komunikacij. Posedźenje zahaji so w 13 hodź. z poskitkom rozmołwy přitomnym hosćom. Dale diskutuja wo naćisku jednanskeho porjada, wo wobsahowych zaměrach sejma a wo lětušich dźěłowych ćežišćach. Hosćo su witani.
Wustajeńca so skónči
Budyšin. Aktualna kabinetna wustajeńca w Muzeju Budyšin z wobrazami Ulriki Mětškoweje budźe njedźelu posledni raz widźeć. Při tej składnosći wěnuje so Erika von Borries zajutřišim w 15 hodź. žiwjenju Wilhelma Müllera (1794–1827), na kotrehož teksty so twórby Ulriki Mětškoweje złožuja.
Wo wukubłanju we wójsku
Budyšin. Informaciske zarjadowanje wo wukubłanskich a studijnych móžnosćach w Zwjazkowej woborje wotměje so póndźelu, 14. januara, wot 14 hodź. w Budyskim powołanskim informaciskim centrumje na Nowosólskej.
Swětło do ćmy stawiznow
Wuhódanje hodowneje křižowki
Štyrjoch nowych čłonow witali
Po dobrej tradiciji wotmě naša wjesna Domowinska skupina Šunow-Konjecy njedawno zaso swoju hodowničku, zwjazanu z hłownej zhromadźiznu w Konječanskej Burskej stwě. Pilne žony běchu z wjesnymi dźěćimi tónraz bajku „Připołdnica“ nazwučowali. Wšitko běchu dźěći ze swojimi pomocnicami zhromadnje zmištrowali a sej mjez druhim wosoby wumyslili, teksty zestajeli, kulisy wobstarali a so staru dźěłansku drastu woblekli. Za swoju spodobnu inscenaciju žnějachu młodźi dźiwadźelnicy wulki dźak a připóznaće.
Předsydka Kerstin Mauwowa poda rozprawu wo dźěle skupiny, Andreja Lanzyna rozprawješe wo tuchwilnym stawje našeje skupinskeje pokładnje. Wobě rozprawje čłonojo schwalichu. Zwjeselace je, zo móžachmy kónc minjeneho lěta štyrjoch dalšich wjesnjanow do našeje Domowinskeje skupiny witać.
Při bjesadźe a spěwje rjana hodownička wuklinča. Alojs Langa
Nowe wobliča mjez wobornikami
Mjeztym zo we wjesnych kónčinach dobrowólnych wohnjowych wobornikow w nuzowym padźe wołaja, přijědu w Budyšinje jako prěni powołanscy wobornicy k hašenju abo njezbožam.
Budyšin (SN). Nowych sobudźěłaćerjow dóstanje přichodnje Budyska powołanska wohnjowa wobora. Jedna žona a pjećo mužojo su swoje wukubłanje zahajili resp. to w aprylu činja. Jich žiwjenske srjedźišćo budźe w přichodnymaj lětomaj krajna wohnjowoborna šula w Narću pola Wojerec. Prjedy hač potom statne pruwowanje złoža, zmištruja woni wšelake praktikumy w Budyšinje a druhich powołanskich wohnjowych woborach. Wukmanić so na wuchowanskeho sanitetarja je tohorunja dźěl jich wukubłanja.
