Twjerdźizna budźe hospic
Nowy přichod za najstarše twarjenje Biskopic našli
Biskopicy (UM/SN). Towaršnosć Křesćanski hospic wuchodneje Sakskeje je dlěši čas za kmanym městnom za swój druhi stacionarny hospic pytała, po tym zo prěni hižo w Ochranowje wuspěšnje wjedźe. Runočasnje pytaše město Biskopicy za móžnosću, kak wužiwać najstarše twarjenje města, w 13. lětstotku natwarjenu twjerdźiznu, znatu w měsće pod němskim mjenom Fronfeste. Nětko su so rozsudźili, tam nowy hospic zaměstnić.
„Z Biskopicami smy najkmańše městno za hospic namakali“, praji Volker Krolzik, jednaćel Budyskeje diakonije, kotraž je na Křesćanskim hospicu wuchodneje Sakskeje wobdźělena. Bywše wokrjesne město Biskopicy je wot Ochranowa dosć zdalene a wuprudźa hač do Drježdźanskeho regiona a do Sakskeje Šwicy. „Smy dołho wo móžnosći noweho wužiwanja twjerdźizny rozmyslowali. Nětko sym jara zbožowny“, rozłožuje Robert Geburek. Jako čłon spěchowanskeho towarstwa twjerdźizny dźěła wón za Budysku diakoniju a je swojich šefow na historiski twar skedźbnił.
Hotowosć woborow zaručić
Jako jednachu na njedawnym posedźenju Njebjelčanskeje gmejnskeje rady wo tym, kotra z wohnjowych wjesnych woborow bórze nowe zasadźenske jězdźidło dóstanje, je tam k horcej diskusiji dóšło.
Njebjelčicy (JK/SN). Wobornicy z Njebjelčic běchu so na gmejnsku radu wobroćili z próstwu pruwować, hač hodźi so ručež móžno nowe jězdźidło za wjesnu wohnjowu woboru wobstarać. Jeje nawoda Pětr Łušćanski bě na diskusiju a wotpowědnu argumentaciju derje přihotowany. Drastisce předstaji wón njedawne zasadźenje wobornikow, po kotrymž njemóžachu so domoj wróćić, dokelž njebě jich awto zaskočiło. Mjeztym dodźeržane jězdźidło zawinuje dźeń a wjace reparaturow a je tuž ćežko, hotowosć wobornikow zaručić. Wjesnjanosće Tomašej Čornakej (CDU) njeběchu tele fakty znate, słyšeše je prěni raz. Tohodla běše tež chětro zadźiwany, zo sej takle spontanje nowe jězdźidło žadaja.
Budyšinejso šwarnje šlachći
Budyšin (K/SN). Stolica Hornjeje Łužicy, sprjewine město Budyšin, nabywa spochi atraktiwnosće. W tym zwisku smě so na to pokazać, zo je w prěnim połlěće 2017 ze starych zwjazkowych krajow 73 wosobow do Budyšina přićahnyło, tuž po lěće 1990 prěni raz wjac, hač je z města tam ćahnyło. Přiwšěm je tu trochu mjenje wobydlerjow. Byrnjež ličba porodow dale na poměrnje wysokim niwowje była (97 w II. kwartalu), je ju ličba zemrětych přetrjechiła (137 w II. kwartalu).
Zwjeselace je dobre wuwiće na dźěłowych wikach. Hdyž bě so kwota bjezdźěłnosće wjele lět nad 10 procentami hibała, wučinja wona aktualnje 9,4 procenty. Wosebje přihódne při tym bywa, zo je so ličba staršich bjezdźěłnych nahladnje pomjeńšiła, a to na 14,5 procentow. Wotpowědna statistika tež wupokazuje, zo je Budyšin dźěłowe srjedźišćo regiona. Tu je 26 550 socialnje zawěsćenych dźěławych registrowanych. Dźěłowych městnow je pak w měsće hišće wjac. Statistika njezapřijima na přikład samostatnych abo sobu dźěłacych swójbnych a tež nic mało zasłužacych.
Krótkopowěsće (04.09.17)
Prezentuja serbskorěčne logo
Slepo. Składnostnje 20. němsko-serbskich wikow přirody 9. septembra w Stróži prezentuja logo w hornjoserbskej rěči na Domje tysac hatow. Wo tym informuje towarstwo Serbski kulturny turizm. Cyłk podpěruje stejišćo Domowiny a pokazuje zdobom na zwoprawdźenje dwurěčnosće nastupajo wobłukowy koncept biosferoweho rezerwata.
Najčasćišo gripy dla chori
Budyšin. Šnupa, gripa a bronchitis běchu loni w Sakskej najčasćiše přičiny choroby dźěławych. To zdźěla Budyska Překupska chorobna kasa. 31 procentow ludźi bě tohodla přerěznje 8,1 dźeń chorych. Na 2. městnje statistiki w Sakskej steja z podźělom wjac hač 14 procentow schorjenja muskloweho a kosćoweho systema kaž tež problemy z chribjetom.
Ponowja čěske wulkopósłanstwo
Policija (01.09.17)
Wupite piwo njezapłaćił
Wojerecy. Na cyle klewerne wašnje chcyše tele dny muž we Wojerecach blešku piwa darmotnje wupić, njebě pak z kedźbliwosću swědka ličił. W kupnicy na Lipjecskim naměsće je sej muž blešku wočinił a ju hnydom mjez polcami wupił. Tole pak swědk wobkedźbowaše. Jako chcyše lačny nimo kasy hić, bjez toho zo by zapłaćił, informowaše swědk policiju. 57-lětny změje so padustwa dla zamołwić.
Připowěšak so zwróćił
Hruboćicy. Traktor z připowěšakomaj je w Hruboćicach (Grubditz) w Kubšiskej gmejnje znjezbožił. Jako 61lětny traktorist z pólneho puća na hłownu dróhu wotboči, so zadni připowěšak zwróći. Při tym bu telefonowy sćežor wobškodźeny.
We wubědźowanju koło dale
Njebjelčicy móhli so jedna z pjeć jadriwych wsow stać
Njebjelčicy (JK/SN). We wobłuku wubědźowanja zwjazkoweho ministerstwa za zežiwjenje a ratarstwo maja Njebjelčicy woprawnjenu nadźiju, stać so klětu jedna z pjeć jadriwych wsow Němskeje.
Wubědźowanje bě so lětsa w měrcu zahajiło. Jeho zaměr je wuznamjenić wsy, kotrež nałožuja a zwoprawdźeja do přichoda sahace ideje a koncepty nastupajo zapołoženje wjesnych ležownosćow a twarskich naprawow, při čimž so wosebje na demografiske wuwiće wobydlerstwa wusměrjeja. Wažne je, zo ležownosće a twary we wsy dołhodobnje za wjesne žiwjenje wužiwaja.
Třeći Blackbird-run kiwa
Hózk (SN). Běhać, łazyć, krosnować a so poćić – běh přez zadźěwki Blackbird-run njedźelu, 3. septembra, w Hózku woznamjenja napinanje a zdobom wjeselo. Na dwanaće kilometrow dołhej čarje dyrbja wobdźělnicy zadźěwki kaž krosnowanske sćěny a błóćane jamy přewinyć.
Lětuši běh žada sej wot atletow nimo kondicije tež móc a wušiknosć. Šěsć kilometrow dołhi parcours podłu Čorneho Halštrowa z 15 zadźěwkami dyrbja běharjo dwójce zmištrować. W 14 hodź. je start při Hózkowskim młodźinskim klubje, hdźež budźe tohorunja cil. Běharjo móža so hižo wot 11 hodź. registrować dać. Wězo su tež přihladowarjo w prawje wulkej ličbje witani.
Běh přez zadźěwki zmištruja trenowani sportowcy runje tak kaž hobbyjowi běharjo. „Lětuša čara je hišće bóle napinaca hač zašłej razaj. Tróšku sportowje fit žno dyrbjeli wobdźělnicy być“, praji sobuorganizator Roland Salowsky. „Přiwšěm měła při dračinje po čarje zabawa w srjedźišću stać.“
Modla so kadiš
Budyšin. Mjeztym 23. raz přeproša Hans-Eberhard Kaulfürst njedźelu, 3. septembra, w 17 hodź. na Budyske židowske pohrjebnišćo při Mužakowskej dróze na modlenje kadiša. Wominać chcedźa tam zamordowanu Budysku židowsku wosadu. Mužojo njech njezabudu na čapku.
Porěča wo hosćencu
Worklecy. Wšitkich, kotrymž leži přichod Worklečanskeho hosćenca „Ke kupowemu hatej“ na wutrobje, přeproša tamniše kupowe zjednoćenstwo póndźelu, 4. septembra, w 19 hodź. do mjenowaneho hosćenca. Zhromadnje chcedźa tam rozmyslować, kak ma z hosćencom dale hić a štó móhł jón přichodnje wjesć.
Klarineta a pišćele
Šěrachow. Koncert za pišćele a klarinetu zaklinči njedźelu, 3. septembra, w 16 hodź. w Šěrachowskej Michałskej cyrkwi. Tobias Witke (klarineta) a Emma Witke (pišćele) zanjesetaj twórby Marcella, Bartholdyja a Bédarda. Zastup je darmotny, zarjadowar prosy wo mały dar.
Swjedźeń k jubilejej
Žadanja přesahuja móžnosće
Worklecy (JK/SN). Hłowny dypk wčerawšeho posedźenja Worklečanskeje gmejnskeje rady jara jasnje pokazuje, kak wulka je diferenca mjez politiskimi žadanjemi stata a komunalnymi móžnosćemi gmejny. Samo na sebi chcychu radźićeljo plan wohnjoškitneje potrjeby hišće raz rozjimać a jón wobzamknyć. Wčera pak wosta najprjedy jenož při diskusiji.
