Policija (25.01.18)
Wjelk do awta běžał
Hamor. Turbulentne dožiwjenje měješe wodźer transportera typa VW wčera rano na zwjazkowej dróze B 156. Wón bě krótko po 7.30 hodź. z Delnjeho Wujězda do směra na Hamor po puću, jako nadobo wotprawa wjelk na jězdnju stupi. Wodźer awta njemóžeše hižo borzdźić, tak zo dóńdźe k zražce z dźiwim zwěrjećom. Wone wosta na to zranjene na kromje dróhi ležo. Přiwołany skótny lěkar wjelka přewza, do toho pak jeho pohłuši, zo móhł jeho wotwjezć. Škoda na transporteru wučinja 500 eurow.
Pytaja kandidatki
Wojerecy. Hišće hač do 1. februara móža wobydlerjo Wojerec kaž tež tamniše towarstwa a zwjazki zapodać namjety, kotru Wojerowčanku měli lětsa za swoje wosebity wukony z plastiku „Marta“ počesćić. Kóždej dwě lěće wuzběhuja na te wašnje čestnohamtske skutkowanje žony we wobłuku pomocy susodam, w towarstwje, w zwjazku abo na hinašim polu. Pod hesłom „Marta 2018“ měli ludźo namjety pisomnje w běrowje wyšeho měšćanosty wotedać. Měšćanska rada wo kandidatce rozsudźi. Wuznamjenjenje přepoda wyši měšćanosta na wosebitej swjatočnosći 22. měrca składnostnje Mjezynarodneho dnja žonow.
Porěča wo kubłanju
Kamjenc. Kubłanskopolitiska rěčnica frakcije Lěwicy Sakskeho krajneho sejma Cornelia Falken budźe njedźelu, 28. januara, z hosćom Kamjenskeho politiskeho rańšeho piwka. Pod hesłom „Přichod kubłanja w Sakskej“ porěči wona wo wužadanjach na polu kubłanja w Sakskej a pokaza, kak hodźeli so wone zmištrować. Zarjadowanje w Kamjenskim měšćanskim dźiwadle započnje so w 10 hodź. Zastup je darmotny. Dalše informacije nadeńdu zajimcy pod adresu www.politfruehschoppen.de.
Smjertnej woporaj njezboža
Bilanca a wuhlad skupiny
Swoje lońše dźěło wuhódnoćiła a plan za 2018 nastajiła je sej Domowinska skupina Pančicy-Kukow na wčerawšej hłownej a wólbnej zhromadźiznje. Nimo přednoškow Moniki Gerdesoweje a Clemensa Bejmaka wopytachu skupinarjo inscenaciju NSLDź „Za brězami“, podźěłachu při pomniku Ćišinskeho w Lipju a wulećachu sej do Lipska. Lětsa přewjedu mjez druhim čitanski wječor, wopytaja wustajeńcu wo Krabaće w Budyskim Serbskim muzeju a podadźa so do Konječanskeho ratarskeho muzeja.
Něhdźe 40 čłonow je wčera dotalne skupinske předsydstwo z Pětrom Korjeńkom na čole w funkciji wobkrućiło. Domowinskej skupinje Pančicy-Kukow přisłuša tuchwilu 92 čłonow. Nowych, předewšěm w srjedźnej starobje do skupiny nawabić měł přichodnje jedyn z wažnych nadawkow předsydstwa być, namołwješe Alfons Kuring. Marian Wjeńka
Z kubłanjom k nowemu dźěłu
Dźěłowa agentura wuda dwanaće milionow eurow za kwalifikowanje
Budyšin (CK/SN). W minjenymaj lětomaj je w Hornjej Łužicy wjace hač 5 000 nowych dźěłowych městnow nastało. Tuchwilu sej 196 410 žonow a muži z regularnym dźěłom swój wšědny chlěb zasłuža. Po wěšćenju Instituta za dźěłowe wiki a powołanske slědźenje bjezdźěłnosć we wuchodnej Sakskej dale trajaceje konjunktury dla lětsa wo procent woteběra, a w samsnym času ličba socialnje winowatostnje přistajenych wo runje telko přiběra.
Aktualnje je w regionje 20 050 ludźi bjez dźěła. Runočasnje je 4 486 swobodnych městnow njewobsadźenych. „Najwjetši dźěl ludźi wšak njeje bjezdźěłny, dokelž dźěłać nochce“, praji šef Budyskeje agentury za dźěło Thomas Berndt. Často tomu objektiwne přičiny zadźěwaja, hdyž na přikład něchtó mobilny dosć njeje, zo móhł z Hornjeho kraja do Radeberga abo do Kamjenca jězdźić. Zjawny bliskowobchad na potrjeby dźěłowych wikow wusměrić je tuž jedna z temow, kotruž w Hornjej Łužicy z předewzaćemi a komunami rozjimuja. Plan busow a ćahow rjadować pak njeje nadawk dźěłoweje agentury, Berndt podšmórnje.
Pod pomnikom dobre ideje trěbne
Štóž teren pod Fulkec hórku na kromje Chrósćic jeno z wopytow na folklornym festiwalu znaje, tón budźe so zawěsće dźiwać, hdyž tam přichodny raz přińdźe. Pod hórku je so tójšto změniło.
Do Kamjenskeho nakupowanišća Při wětrniku běchu so dźensa w nocy ...
Nic kwakla, ale šansa
Wubědźowanje chce gmejny za přichod zmužić
Berlin/Njebjelčicy (AK/SN). Z dalokowidnosću a kreatiwitu so gmejnje Njebjelčicy radźi wobydlerjow dźeržeć. Tole potwjerdźi dr. Juliane Rumpf, předsydka agrarsocialneje towaršnosće, wčera na Zelenym tydźenju w lawdaciji. Tohodla su gmejnu w zwjazkowym wubědźowanju „Jadriwa wjes“ 2017 wuznamjenili. Dr. Rumpf přepoda wčera w Berlinje zhromadnje z dr. Hermannom Onko Aeikensom, statnym sekretarom w zwjazkowym ministerstwje za zežiwjenje a ratarstwo, pjeć dobyćerjam – jim tež Njebjelčicy přisłušeja – a dalšim pjećom z wosebitym mytom wopismo a pjenježny šek zwjazkoweho ministerstwa.
Krótkopowěsće (25.01.18)
Wabja za jězorinu
Drježdźany. Turistiski zwjazk Łužiska jězorina chce kónc tydźenja na Drježdźanskich pućowanskich wikach za přebytk w krajinje jězorow wabić. Zdobom předstaja tam nowy „Jězorinowy magacin“. Nimo poskitkow za aktiwny dowol wabja z industrijnej kulturu w najwjetšej wot čłowjeka wutworjenej jězorinje Europy. Tež wo přenocowanskich móžnosćach budu wobšěrnje informować.
Zhorjelsku turbinownju njespušća
Davos. Słowa šefa koncerna Siemens Joewa Kaesera na kromje swětoweho hospodarskeho foruma wčera w šwicarskim Davosu skrućeja nadźiju mjez sobudźěłaćerjemi Zhorjelskeje turbinoweje twornje, kotraž je wot zawrěća wohrožena. „Njespušćimy Zhorjelc. Budźemy ludźom tam pomhać, damy jim přichod.“ Kaeser drje hišće njewě kak, jedyn puć pak namaka.
SGB ze slěbrom a bronzu
