Awto murju spotorhnyło
Kamjenc. Wutoru popołdnju wołachu policiju a wohnjowu woboru k njewšědnemu njezbožu na Beethovenowu w Kamjencu. Nakładne awto je při ranžěrowanju dźěl masiwneje murje sportorhnyło. Dźěle murje, kotrež na chódniku a dróze ležachu, dyrbjachu Kamjenscy wobornicy rumować. Pozdźišo pak dyrbješe tež měšćanska komunalna słužba z kolesnym nakładnikom wupomhać. Hač je njekedźbnosć šofera k njezbožu wjedła, to je nětko slědźenska naležnosć policije.
Awće do so zrazyłoj
Hamor. Wčera wječor stej w Hamoru njedaloko zajězda k Bjerwałdskemu jězorej Audijej do so zrazyłoj. Dokelž jedne z awtow na třěše ležeše, su tež Hamorsku a Krynhelečansku wohnjowu woboru zaalarmowali. Jedna wosoba so při nje- zbožu tak ćežko zrani, zo dyrbješe nuzowy lěkar z helikopterom přilećeć.
Budyšin (CK/SN). Za jednu hodźinu treninga budu sej w najwjace sportowych halach města Budyšin přichodnje popłatki we wysokosći 14,04 eurow žadać. Tole předwidźa nowe wustawki sportowych městnosćow. W dwěmaj etapomaj maja so popłatki přiměrić: Klětu hač do 7,50 eurow na hodźinu a wo dźesać eurow wjace na kónčnu sumu w lěće 2018. Tole je jedyn z kompromisow, kotryž nasta na ćišć měšćanskich radźićelow. Dlěje hač lěto su wo detajlach wustawkow zdźěla wótrje diskutowali.
Po tym, zo je sej tójšto ludźi njedawno něhdyšu Njeswačansku šulu na „Dnju twarnišća“ wobhladało, hdźež ma přebywanišćo z wobstajnym hladanjom starych ludźi nastać, tam zaměrnje z twarskimi dźěłami pokročuja.
Towarstwo mytowane
Choćebuz. Towarstwo centrum za čłowjeske prawo Choćebuz bu wčera w Braniborskej radnicy z „Braniborskim mytom swobody“ wuznamjenjene. Zwjazkowy wonkowny minister Frank-Walter Steinmeier (SPD) česćowaše towarstwo a přepoda předsydce Sylvii Wähling myto, dotěrowane z 25 000 eurami.
Za lěpše kórki
Podstupim. Nowy wědomostny projekt ma kwalitu Błótowskich kórkow zawěsćić. K tomu su wědomostnicy Leibnitzoweho instituta a burja z regiona njedawno w braniborskej stolicy koncept předstajili, zdźěla rozhłós RBB. W přichodnych štyrjoch lětach chcedźa wuslědźić, kak móhli zničenjam přez škódnikow zadźěwać a twjerdše kórki plahować.
Znowa wjac studentow
Lipsk. Nawal studentow na Lipsčansku uniwersitu njewoteběra. Wjac hač 7 500 młodostnych tam lětsa w zymskim semestrje swój studij zahaji. Z tym leži ličba šěsty raz nad 7 000. Cyłkownje je so 44 700 ludźi na uniwersiće wo studijne městno požadało. Tuchwilu studuje tam 30 000 młodostnych w 157 studijnych směrach. 3 200 studentow pochadźa z wukraja.
Klětu nowy modus
Huska (SN/mwe). Hušćanske kubło „Kubło lěćne duby“ Eriki Busch słuša k najwoblubowanišim prózdninskim burskim dworam Němskeje. Tole wuchadźa z 21. naprašowanja portala LandReise, kotrež dowole na burskich domicilach registruje. Tak su hosćo na posudkowych kartach kaž tež online wot septembra 2015 do awgusta 2016 zapodali, hdźe so w dowolu najlěpje čujachu. Hódnoćili su w štyrjoch kategorijach. Oficialnje gratulować budu dobyćerjam klětu na „Zelenym tydźenju“ w Berlinje.
Dźěći zela zeznali
Łaz (AK/SN). Wulke wjeselo mějachu dźěći w nazymskich prózdninach we Łazowskim Domje Zejlerja a Smolerja ze zelami. Njedawno zhotowichu tam zelowy dresing. K tomu wužiwachu zela kaž tymian, koprik (Dill), majron, ławrjenc (Lorbeer) a tójšto dalšich. Bleše wostanu tu štyri tydźenje stejo, potom je dresing hotowy. Birgit Kieschnick, sobudźěłaćerka přirodoweje stacije w biosferowym rezerwaće hornjołužiske hola a haty holcy a hólcow nawjedowaše.
Praksa w dobrych rukach
86lětneho namakali
Kamjenc. Póndźelu bě napjatosć w Kamjencu wulka, jako pytachu tam 86lětneho, kiž bě so bjez slědow z domu na Christian-Weißmantelowej zhubił. Nimo policistow městneho policajskeho rewěra bě tež slědźacy psyk zasadźeny. Na zbožo bě patrulja starca na Jěžowskej nadešła.
Seniorka slubjenja „wučušliła“
Budyšin. Wobšudnicy spytachu w Budyskej Strowotnej studni 84lětnu zjebać. Kriminelni so pola njeje přizjewichu a slubichu seniorce něhdźe 30 000 eurow dobyća. Za to pak měła najprjedy za 900 eurow dobropis kupić. Rentnarka hnydom wopačne slubjenja „wučušli“.
Wulka Dubrawa (CK/SN). Wo trěbnosći twarskeho dwora so jenož na poslednju minutu diskutuje, Tobias Hilbert (CDU) na zašłym posedźenju Wulkodubrawskeje gmejnskeje rady kritisce praji. Přičina je wobzamknjenje, hač ma so wobswětowy serwis Veolia dale wo hladanje dróhow a zelenišćow kaž tež wo objektowy management w gmejnje starać. Dalewjedźenje serwisa woznamjenja, zo w přirunanju ze swójskim twarskim dworom 65 000 eurow zalutuja, wjesnjanosta Lutz Mürbe (njestronjan) wujasnjowaše. Hač do kónca septembra dyrbjeli zrěčenje z Veolia wupowědźić. Bjez wotpowědneho wobzamknjenja pak je wone hač do lěta 2022 płaćiwe.
Rybarski dwór w Małym Holešowje přeprošuje wosebje dźěći přez cyłe lěto na amfibijowy camp, zelowe lěćo stareje wjery, na wudźenje a nic naposledk tež na wšelake swjedźenje.
Mały Holešow (SN/mwe). Ines Triebs je wjednica rybarskeho dwora w Małym Holešowje, kotryž je Njeswačanskej přirodoškitnej staciji přirjadowany. Tuž scyła njezadźiwa, zo je mały idyliski dwór z wosebitym skromnym flerom centrum praktiskeho přirodoškitneho skutkowanja w Hornjołožiskej krajinje hole a hatow. Skupiny a jednotliwcy namakaja tam přijomne přenocowanja. Z kamjentnej pjecu, kołčom, zelowej zahrodu kaž tež z wustajeńcu historiskeho ratarskeho gratu je rybarski dwór tohorunja domicil za wobswětowe kubłanje.