400 litrow za sydom kilometrow
Hońtwjerske drustwo dźesać lět
Nowoslicy (JK/SN). Jako wjeršk dotalneho dźěła Nowosličanskeho hońtwjerskeho drustwa hódnoćeše předsyda Pětr Wawry zawčerawšim w swojej rozprawje na hłownej a wólbnej zhromadźiznje we wjesnym kulturnym domje lońše wupłaćenje wotnajenskich dochodow čłonam drustwa. Z tym mějachu woni prěni wjetši wužitk z toho, zo swoje pola a lěsy hajnikam přenajimaja.
Škodow w minjenych dźesać lětach wobstaća drustwa njebě, a z hajnikami su jara derje wušli. Poměr k třom aktiwnym hońtwjerjam hódnoćeše Wawry jako jara dobry, tež hdyž so hońtwa na teritoriju drustwa hižo tak njewudani kaž hišće před lětami. Hońtwjerska bilanca bě tuž jara skromna. Günther Winter, kiž pola Nowoslic na hońtwu chodźi, rjekny, zo hłowne dźěło hajnikow w minjenym lěće bě, po wobchadnych njezbožach zahinjenu dźiwinu z dróhow rumować. To hajnikow jara boli, wosebje hdyž jedna so wo młodu sornu, kotraž bě sućelna, abo wo rjaneho dańka w najlěpšich lětach žiwjenja.
Policija (21.03.19)
Mortweho wjelka na A 4 našli
Słona Boršć. Patrulja awtodróhoweje policije je dźensa krótko po połnocy na awtodróze A 4 do směra na Drježdźany pola Słoneje Boršće přejědźeneho wjelka našła. Zastojnicy wzachu mortwe zwěrjo sobu na Budyski rewěr a přepodachu je zawołanemu zastupjerjej Rěčičanskeho wjelčeho běrowa. Tam chcedźa nětko zaměrnje za tym slědźić, čehodla dyrbješe wjelk nócny wulět na awtodróhu ze swojim žiwjenjom zapłaćić.
Módre folije njejsu dowolene
Wuchowanske jězdźidła w Budyskim wokrjesu trjebaja nowy design
Budyšin (CE/SN). Dźakowano njewšědnemu wonkownemu wuhotowanju su wuchowanske jězdźidła w Budyskim wokrjesu dotal dosć napadne. Šoferam je často hnydom jasne, zo so wuchowanske jězdźidło bliži, hdyž na žołtym transporteru markantne čerwjeno-módre smuhi wuhladaja. Před něhdźe dźesać lětami je Budyski wokrjes tónle design zawjedł, mějo so po wuhotowanju wuchowanskich jězdźidłow w Belgiskej a Nižozemskej.
Pytaja ideje za kulturny dom
Kotry přichod móhł Biskopičanski kulturny dom měć? Móžne wotmołwy na tele prašenje pyta dźěłowe zjednoćenstwo, kotrež ma wosebitu studiju za znate twarjenje zdźěłać.
Biskopicy (UM/SN). Ma Biskopičanski kulturny dom přichod a jeli haj, kotry? Z tym prašenjom zaběraja so nětko firmy dWif Consulting tzwr, Heuschmid & Partner Consult a Bauplanconcept. Posledni mjenowany Wjazońčanski architekturny a inženjerski běrow skutkuje hromadźe z Berlinskimaj poradźowanskimaj předewzaćomaj w dźěłowym zjednoćenstwje, kotrež ma studiju za kulturny dom zdźěłać. „Kónc februara smy wot města nadawk dóstali“, rozłožuje Wolfgang Heuschmid, kiž so ze swojim běrowom wo koncepcionelne a organizatoriske aspekty stara. dWif wěnuje so hospodarskosći a financam, Bauplanconcept twarskim prašenjam.
Nowe zhromadźenstwa w cyrkwi
Lětuše póstne seminary w Smochčanskim Domje biskopa Bena wěnuja so přichodej cyrkwje. „Lóšt, nic hněw“ je hesło třoch wječorow. Minjenu póndźelu rěčeše Tobias Müller z Berlina wo nadwosadnym duchownym zhromadźenstwje (NGG) Sant’Egidio.
Smochćicy (CRM/SN). „Křesćenjo maja bibliju znać a runočasnje cyle w swojim času žiwi być“, praji 29lětny dynamiski a wjele pozitiwneje energije wuprudźacy Tobias Müller, kiž přisłuša mjeztym jědnaće lět Nowemu duchownemu zhromadźenstwu Sant’Egidio. W stolicy Němskeje wukonja wón ciwilne powołanje a skutkuje čestnohamtsce w duchownym zhromadźenstwje, kotrež je za wšěch přistupne a stara so wo chudych na kromje towaršnosće. Nimo toho zasadźa so doraznje za měr.
Najebać wulke ćeže cyrkwičku ponowić móhli
Błobošojce (JoS/SN). Wona njeje jeno swjatnica, ale ma tež historiski wuznam. Katolska cyrkej swj. Józefa w Błobošojcach (Bloischdorf), wjesnym dźělu gmejny Feliksowy jězor, bu w 14. lětstotku, snano samo hižo prjedy natwarjana. Na kóždy pad wobsteji hač do dźensnišeho z cyhelow, błudźenkow a je najstarša wjesna cyrkej bywšeho wokrjesa Grodk. Nimo Błobošojc słušachu tež Bukow (Groß Buckow), Tšadow (Stradow), Jaseń (Jessen), Łojow (Groß Luja), Syjk (Graustein) a Lěšće (Hornow) ke Grodkowskej katolskej wosadźe. Za čas reformacije bu Boži dom ewangelski, po Třicećilětnej wójnje pak zaso katolski. Wjesnjenjo wšak wostachu dale ewangelscy, tak přirjadowachu jich ewangelskej wosadźe w Syjku. A slědowachu hišće dalše změny a struktury. Hakle wot lěta 2000 słuša wjesna cyrkwička do Grodkowskeje katolskeje wosady.
Tola žadyn žort
Krótkopowěsće (21.03.19)
Myto za europske dorozumjenje
Lipsk. Na wotewrjenju Lipšćanskich knižnych wikow spožčichu ameriskoruskej žurnalistce Mashi Gessen za publikaciju „Přichod su stawizny – Kak je sej Ruska swobodu zdobyła a zaso zhubiła“ Knižne myto za europske dorozumjenje. Myto je z 20 000 eurami dotěrowane. We wobkrućenju mjez druhim rěka, zo přisłuša awtorka „najwažnišim hłosam, zasadźacym so za čłowjeske prawa a přećiwo homofobiji“.
Serbowki wobkrućene
Budyšin. Serbske čłonki w předsydstwje wokrjesneho zwjazka Budyšin Žónskeje unije CDU su na wčerawšej wólbnej zhromadźiznje w Budyšinje w zastojnstwach wobkrućili. Marja Michałkowa z Lichanja je dale předsydka, Halena Jancyna z Ralbic městopředsydka a Borbora Hančikowa z Měrkowa pokładnica. Wone wobdźěla so tež na krajnej delegatnej konferency žónskeje unije.
Najwjetša zběrka selawkow
Zahrodkarjo swój jubilej wulce swjećili
Budyšin (WL/SN). Ze swjedźenskim zarjadowanjom woswjećichu zahrodkarjo stareho Budyskeho wokrjesa minjenu njedźelu w Němsko-Serbskim ludowym dźiwadle stote narodniny swojeho teritorialneho zwjazka zahrodowych přećelow Budyskeho wokrjesa (TGLB). Nimo mnohich dalšich oficialnych hosći wuzběhnyštaj tež zapósłancaj Sakskeho krajneho sejma Marko Šiman (CDU) a Hajko Kozel (Lěwica) wuznam zahrodkarjow za towaršnosć. Šiman dopomni so w tym zwisku na rjane dźěćatstwo w zahrodnišću „Wječorne słónco“.
Budyska twarska měšćanostka Juliane Naumann měješe małozahrodkarstwo samo za „jenički konstantny cyłk, kotryž je žołmy minjenych sto lět nimale bjez stratow přetrał“. Dźensa přisłuša Budyskemu teritorialnemu zwjazkej 78 małozahrodkarskich towarstwow z dohromady 3 914 parcelemi.
