Radwor (BHR/SN). Team Radworskeho hosćenca „Meja“ pod nawodom mějićelki Katleń Wawrikoweje je dźeń do štwórteho adwenta prěnje dohodowne wiki chłóšćenkow zarjadował. Bjezposrědnje po zakónčenju žiweho adwentneho woknješka při gmejnskim křižu na nawsy zetkachu so starši, dźěći a nahladna ličba wjesnjanow před hosćencom. A poskitkow bě tam dosć, za kóždeho něšto.
Hudźby dla so storkali
Budyšin. K rozestajenju mjez šěsć młodymi ćěkancami a runje telko domoródnymi je sobotu wječor na Budyskich Wjacławskich wikach dóšło. Přičina najskerje bě, zo měješe jedyn z migrantow hudźbu z handyja wótře nastajeju. Po werbalnym rozestajenju młodostni do so storkachu. Ćěkancy so na to wotsalichu.
Do rjadu lětušich dohodownych koncertow zarjadowa so tež wčerawši beneficny w Chróšćanskej wosadnej cyrkwi. W derje pjelnjenym Božim domje dožiwichu wosadni a zajimcy wotměnjawy poskitk adwentnych serbskich kěrlušow a młodźinskich spěwow.
Chrósćicy (JK/SN). Spěwy a hudźbne kruchi młodostnych dekanata zarjadowachu so derje do nyšpora, kotryž je z wěriwymi farar Daniel Dziekiewicz swjećił. W běhu nyšpora jimaše so Christina Pólkec słowa a rozłoži přitomnym zaměr beneficneho zarjadowanja. Dokelž bě hižo w lětomaj 2012 a 2013 dlěši čas w Malawiju dźěłała, znaje wona tamniše poměry a konkretnu potrjebu. Po lětsa zakónčenym wukubłanja na babu poda so młodostna z Kulowca w januaru do misionskeje chorownje „St. Gabriel’s Hospital“ w Namitete, něhdźe 60 kilometrow wot stolicy Lilongwe zdaleneje, hdźež budźe wosom tydźenjow na porodowej staciji pomhać.
Budyski wokrjes ma jako prěni Sakskeje směrnicy kulturneho spěchowanja. Wokrjesny sejmik je dźens tydźenja předłohu schwalił, kotraž rjaduje přizwolenje srědkow z hornca etata wokrjesa a płaći wot 1. januara 2017.
Budyšin (SN/at). Potrjebje za kulturne spěchowanje w Budyskim wokrjesu njemóže kulturny konwent Hornja Łužica-Delnja Šleska často wotpowědować. To zaleži na tym, zo zapodate próstwy jeho spěchowanskim narokam njewotpowěduja abo zo prosće pjenjezy njedosahaja. Budyskemu wokrjesnemu zarjadnistwu pak je wažne, aktiwity towarstwow a dalšich cyłkow financielnje podpěrać. Wšako jich skutkowanje k tomu přinošuje młodostnym abo socialnje słabšim zmysłapołnu wólnočasnu zaběru zmóžnić. Hižo w septembrje wobzamknychu wokrjesni radźićeljo, podpěru kulturnych aktiwitow wot 24 000 na 100 000 eurow zwyšić.
Přećiwo hidźe demonstrowali
Drježdźany. Wjace hač tysac ludźi je wčera w Drježdźanskim Zwingeru přećiwo hidźe na wukrajnikow demonstrowało. Při tym zasadźeše so sakska kultusowa ministerka Brunhild Kurth (CDU) za česćowny wobchad z wukrajnymi sobuwobydlerjemi najebać rěčne mjezy. Tež Drježdźanski wyši měšćanosta Dirk Hilbert (FDP) so wobdźěli.
Twarja nowy elektriski Golf
Drježdźany. W škleńčanej manufakturje awtotwarca Volkswagen w Drježdźanach přihotuja tuchwilu twar noweho elektriskeho Golfa. Spočatk januara maja so produkciske wotběhi pruwować, kaž rěčnik VW dźensa zdźěli. W aprylu potom chcedźa prěnje wozy předać. Spočatnje ma tam wšědnje 35 awtow nastać. Za to maja 300 sobudźěłaćerjow.
Brošurka rozebrana
Drježdźany. Wot sakskeho krajneho knježerstwa wudata brošurka z artiklemi wustawy w arabšćinje je nimale rozebrana. Wot prěnjeho nakłada 15 000 eksemplarow maja runje hišće tysac, informuje socialne ministerstwo w Drježdźanach. Brošurka za požadarjow azyla wobsahuje prěnje 20 artiklow Zakładneho zakonja w němčinje a arabšćinje.
Chrósćicy. Na předwječoru štwórteho adwenta přeprošuje Chróšćanska putniska hospoda jutře, sobotu, w 19.45 hodź. w přitulnej atmosferje na měrny čitanski wječork z Křesćanom Krawcom z Hrubjelčic. Jedna z nowšich knihow spisowaćela je roman „Paradiz“ wo stawiznach serbskeje swójby přez tři generacije. Z njeje předstaji Krawc wosebje epizodźe „Gretcyne hody“ a „Serbski kwas“. Wšitcy lubowarjo serbskeje literatury su wutrobnje přeprošeni. Hižo w 16 hodź je dźěćace kino, pokaza so trikowy film.
Hrajki w muzeju widźeć
Njeswačidło. Wosebite wodźenje budźe njedźelu, 18. decembra, wot 13 hodź. po hodownej wustajeńcy w Njeswačanskim domizniskim muzeju. Tamnišu přehladku metalowych hrajkow jich zběraćel a wustajer Matthias Stein rozłoži a je tohorunja demonstruje. Tak budźe so hoberske koło runje tak wjerćeć kaž někotre dalše eksponaty. Přehladka je hač dosrjedź januara kóždu njedźelu wot 13 do 17 hodź. wotewrjena. Tež na hodownych a nowolětnych swjatych dnjach su wopytowarjo w muzeju witani, zdźěli Njeswačanske towarstwo přećelow domizny a kultury, kotrež so wo muzej stara.
W bydlenju kradnyła
Łaz. Lochkomyslnosć wobydlerki je njeznata žona zawčerawšim we Łazu k padustwu wužiła. 87lětna wjesnjanka bě dopołdnja swój dom wopušćiła, zo by po šćěpki šła. Po wšěm zdaću pak durje njezamkny, tak zo móžeše cuza žona zastupić. Jako so rentnarka wróći, wona njeprošeny wopyt wuhlada a jemu kazaše, dom a ležownosć wopušćić. Hakle pozdźišo staruška pytny, zo běchu w spanskej stwě wšitke kamory přeborkane a zo je so mały drjewjany kašćik z wopismami a medaljemi w hódnoće něhdźe 50 eurow zhubił.
Rakecy (JK/SN). Energijowe předewzaće ENSO ma Rakečansku gmejnu přichodnje z płunom zastarać. Tole schwali gmejnska rada zawčerawšim na swojim posedźenju. Firma bě so jako jenička na wotpowědne wupisanje gmejny w juniju přizjewiła a ze swojim poskitkom a wuměnjenjemi radźićelow přeswědči. Wjesnjanosta Swen Nowotny (CDU) móže tuž wotpowědne zrěčenje z płunowym zastaraćelom wotzamknyć.
W dalšim dypku sej rasdźićeljo dokładnje dorěčachu, w kotrej formje plan za wohnjoškit w gmejnje dale powjedu. K tomu předstajištaj čłonaj wohnjoweje wobory zhromadnje z gmejnu zdźěłany plan naprawow a trěbnych nadawkow, zo by so wohnjoškit přichodne lěta we wšěch wsach gmejny zaručił.
Pančicy-Kukow (SN/MWj). Poprawom chcychu Wotrowske hortowe dźěći adwentničku w swojich po wulkej wodźe ponowjenych rumnosćach we Wotrowskej pěstowarni swjećić. Hač pak so to zešlachći, je dwělomne. Přetož přeco hišće njesmědźa wone do swojich rumnosćow zaćahnyć. Wina na tym je, zo njejsu rumnosće hišće twarsce wotewzate. Swoju rozhorjenosć dla toho někotři starši na wčerawšim posedźenju Pančičansko-Kukowskeje gmejnskeje rady zwuraznichu.