Zhromadnje wjes rjedźili
Wědźeć, što so stawa
Je dźensa přemało z wašeho regiona w Serbskich Nowinach abo njeje scyła ničo z wašeje wsy? Změńće to a stańće so z korespondentom jeničkeho serbskeho wječornika. Informujće nas wo nowosćach w swojej wsy a wokolinje kaž tež wo podawkach w swojich towarstwach. Zazwońće redakciju wječornika w Budyšinje pod telefonowym čisłom 0 35 91 / 57 72 32, pósćelće nam informacije abo tež wobrazy z e-mailku na .
Chcemy wědźeć, što so stawa, zo móhli čitarjam SN a dalšim zajimcam wo nowosćach na serbskich a dwurěčnych wsach rozprawjeć. Informujće nas, wjeselimy so nad kóždym pokiwom.
redakcija Serbskich Nowin
Z busom direktnje do prazwěrjenca
Hižo před lětami bě raz direktny busowy zwisk z Budyšina do Małowjelkowskeho prazwěrjenca wobstał. Pobrachowaceho zajima dla pak poskitk zaso cofnychu. Nětko su so na nowy pospyt zwažili.
Budyšin (CS/SN). Cyle nowy bus předewzaća Regiobus je zawčerawšim z Budyskeho busoweho dwórnišća k prěnjej jězbje do Małowjelkowskeho prazwěrjenca wotjěł. Sobu jěłoj stej předšulskej skupinje Budestečanskeje pěstowarnje „Hummelburg“ a Hućinjanskeje „Při łučnym lěsu“. Dźěći běchu so z rjanymi idejemi na kreatiwnym wubědźowanju wobdźělili. Wupisała bě je Budyska wobhospodarjenska a wobdźělenska towaršnosć (BBB), kotraž tohorunja prazwěrjenc wobhospodarja. Budestečanske dźěći spaslichu z papjerca bus, kotryž je runje tak kaž wulki bus z wobrazami prazwěrjatow wupyšeny. Hućinjanske dźěći zhotowichu rjanu kolažu z prazwěrjatami a busom. Wobě skupinje njesmědźeštej jeno z busom sobu jěć, ale móžeštej cyły dźeń w prazwěrjencu přežiwić, hdźež běchu póndźelu sezonu zahajili.
Rownjanski Njepilic statok přeměni so minjeny kónc tydźenja na ...
Rowy k jutram zwosadźeli
Z peticiju „Krónu“ zachować
Wobydlerska iniciatiwa wojuje wo zachowanje Budyskeje měšćanskeje hale, mjez druhim tež z online-peticiju. Ze samsnej temu je so wčera wječor tudyša měšćanska rada zaběrała.
Budyšin (CK/SN). Byrnjež na dnjowym porjedźe zjawneho dźěla njestała, postaješe předań měšćanskeje hale „Króna“ wčera diskusiju na posedźenju měšćanskeje hale. „Chcemy žiwu kulturu w formje niwowapołneje měšćanskeje hale“, rjekny Utta Winzer. Kultura njeje luksus, dyrbiš sej ju popřeć chcyć, rozłoži zastupjerka k zachowanju „Króny“ wutworjeneje wobydlerskeje iniciatiwy. Dyrbjało tola móžno być za to spěchowanske srědki dóstać, na přikład z milionow bywšeho zamóženstwa SED. Nimo toho je w Němskej tysac spěchowanskich horncow. Utta Winzer skedźbni na posudk, po kotrymž móhli halu dalše dwaceći lět wužiwać, parkowanišćo samo třiceći. Z dochodami 200 000 eurow wob lěto hodźała so „Króna“ hospodarsce wjesć. „Wobydlerska iniciatiwa zdźěłuje nošny koncept“, praji Utta Winzer.
Krótkopowěsće (29.03.18)
Zaměr hišće njedocpěty
Flensburg. Šěsć dnjow do zakónčenja europskeje wobydlerskeje iniciatiwy Minority Safepack pobrachowaše dźensa dopołdnja hišće 16 387 podpismow stajenemu zaměrej, nazběrać milion podpěraćelskich signumow w krajach Europskeje unije. W Němskej je dotal jeno 17 669 ludźi podpisało, kaž pod www.minoritysafepack.eu rěka.
Nalětnje wožiwjenje
Budyšin. We wuchodnej Sakskej bě w měrcu 21 512 bjezdźěłnych, 548 (2,5 procentow) mjenje hač w předměsacu a 2 539 (10,6 proc.) mjenje hač před lětom. „Ličba přistajenjow, tež we wot wjedra wotwisnych powołanjach, je w měrcu rozrostła, bjezdźěłnosć je čujomnje woteběrała“, rjekny dźensa Ilona Winge-Paul, operatiwna jednaćelka Budyskeje agentury za dźěło.
Hižo 93 ludźi na gripu zemrěło
Drježdźany. Ličba zemrětych aktualneje gripoweje žołmy dla je w Sakskej 93. Minjeny tydźeń běštej dalšej smjertnej padaj, informuje strowotniske ministerstwo w Drježdźanach. Wosobje stej 46 a 55 lět starej a nješćěpjenej byłoj. Zemrětych 48 žonow a 45 muži w starobje 37 do 96 lět pochadźa ze wšelakich městow a wokrjesow.
SJC ma personalne problemy
Francoscy šulerjo jejka wóskowali
Krabatowemu młynej trajnu požčonku přepodał
Čorny Chołmc (AK/SN). Swoju sylnu zwjazanosć z Čornochołmčanskim Krabatowym młynom je tamniši hornčer Andreas Hegewald zawčerawšim na cyle wosebite wašnje zwuraznił. Wón přepoda towarstwu Krabatowy młyn keramisku figuru Kantorki. „Za mnje je wona poprawny rjek Krabatoweje powěsće. Wona je lubosć do žiwjenja Krabata přinjesła, a tak zamó wón złu móc přewinyć“, hornčer wuswětli.
W lěće 2005 słušeše Andreas Hegewald k sobuzałožerjam towarstwa. Jeho trajna požčonka Kantorki ma stajnu wustajeńcu w Domje Jurja Brězana wobohaćić. Nimale 100 hodźin dźěła je za nju nałožił. Jeho mandźelska Ulrike, tohorunja hornčerka, je figuru wobarbiła a glazěrowała. Něhdźe šěsć kilogramow ćežka Kantorka je 54 centimetrow wulka. „Najwjetše wužadanje bě hłowa“, powěda Hegewald. Wot lěta 1988 wjedźe wón w Čornym Chołmcu hromadźe z mandźelskej hornčernju a čuje so mjeztym we wsy kruće zakorjenjeny.
Za běh so přizjewić
Budyšin. Za lětuši 25. Budyski měšćanski běh móža so zajimcy wotnětka přizjewić, zdźěli Kristin Reck z organizaciskeje skupiny. Wotpowědny formular nadeńdu zajimcy pod adresu www.stadtlaufbautzen.de. Nimo toho proša wšitkich wobdźělnikow zašłych lět, fota a dalše dopomnjenki wo dotalnych 24 běhach za mału wustajeńcu přewostajić. Wopisma, medalje, T-shirty a podobne móža woni hač do 1. junija sportowemu towarstwu MSV na Póstowym naměsće 3 wotedać.
Na slědach zelow
Nowe Město. Na nalětnje pućowanje na slědach zelow móža so zajimcy ćichi pjatk w Nowym Měsće podać. Wot 10 do 12 hodź. wobdźělnicy nazhonja, kotre dźiwje zela nětko rostu, kak je namakaš, kak je najlěpje připrawiš a wužiwaš. Zajimcy zetkaja so na terenje Nowoměšćanskeje předźernje na Sprjejčanskim puću a měli so pod telefonowym čisłom 035727/ 579 341 přizjewić.
