Hortowe rumnosće nastanu
Dokelž ličba dźěći dźeń a dale přiběra, maja komuny wulke ćeže, dosć hortowych městnow poskićeć. Na to Njebjelčanska gmejna nětko reaguje.
Njebjelčicy (aha/SN). Połtřeća hodźiny trjebachu radźićeljo na swojej njedawnej zhromadźiznje, zo bychu wobšěrny pensum dnjoweho porjada wotdźěłali. Mjez druhim předstaji hospodarski pruwowar Dirk Urban zahajensku bilancu gmejny, radźićeljo schwalichu wustawki „Serbske Pazlicy – Dolina II“ a zaběrachu so z wjacorymi twarskimi naležnosćemi. Najwažniša z nich bě, zo předstaji architekt Thorsten Luka z Lipska, kotryž je tež Njebjelčansku pěstowarnju projektował, planowanje twara hortowych rumnosćow.
Woprawdźitu žiwu serbsku rěč dožiwił
Ralbicy (SN/MWj). W třoch rozdźělnych kónčinach dwurěčneje Łužicy je so minjeny pjatk prezident Sakskeho krajneho sejma Matthias Rößler (CDU) wo tym přeswědčił, kak tam z dwurěčnosću wobchadźeja. Rada za serbske naležnosće Sakskeje bě jeho přeprosyła, dokelž je wón patron za wubědźowanje „Rěčam přichilena komuna – Serbska rěč je žiwa“.
W Budyšinje rozmołwjachu so Rößler a čłonojo serbskeje rady mjez druhim z financnym měšćanostu dr. Robertom Böhmerom wo tym, hač njemóhli załožić wosebity fonds, kotryž pomha komunam při přidatnych nadawkach, zwisowace z dwurěčnosću. W gmejnje Ralbicy-Róžant wjedźechu parlamentneho prezidenta po Róžeńčanskej cyrkwi a Ralbičanskim kěrchowje. W tamnišej šuli dožiwi wón program kulturneje skupiny zakładneje šule. W Rownom poby na Njepilic statoku.
Krótkopowěsće (23.10.17)
Wobzamknjenja ryzy serbsce
Chrósćicy. Wšitke předłohi za wobzamknjenja Chróšćanskeje gmejnskeje rady wotnětka ryzy serbsce přednjesu. Na posedźenju rady minjeny štwórtk nastupaše to wobzamknjenje wo kulturnym a gmejnskim centrumje kaž tež wustawki wo čisłowanju domow. Tole je přinošk gmejny we wobłuku wubědźowanja „Rěčam přichilena komuna“, rozłoži wjesnjanosta Marko Kliman (CDU).
Wo Jurju Brězanu zhonili
Bórkowy. Mnozy zajimcy zhonichu pjatk w Bórkowach wo žiwjenju a skutkowanju Jurja Brězana. Dietrich Šołta předstaji w kniharni Lesezeichen we wobłuku lětušeje čitanskeje turneje LND swoju knihu „Jurij Brězan – Leben und Werk“. Zdobom słyšachu přitomni wujimki z Brězanoweho romana „Krabat oder Die Verwandlung der Welt“.
Zlínski region lětsa partner
Policija (20.10.17)
Woheń w bungalowje
Wulke Ždźary. 15 000 eurow škody je wuslědk wohenja, kiž je wčera rano w bungalowje we Wulkich Ždźarach wudyrił. K hašenju wołachu 30 kameradow wokolnych woborow. Zwjazkowu dróhu B 96 dyrbjachu dwě hodźinje zawrěć.
Předstaja knihu
Budyšin. Nowu knihu Pawoła Roty „Z kameru a pisakom po Delanach“ předstaja štwórtk, 26. oktobra, w 19.30 hodź. w Budyskej Smolerjec kniharni. Zaměrnje a z wulkej přichilnosću je Pawoł Rota ze swojimi njeličomnymi přinoškami, powědkami a basnjemi w běhu lětdźesatkow Delanam w serbskim pismowstwje trajny pomnik stajił. Na knižnym předstajenju čitaja wurězki z jeho knihi. Awtor budźe přitomny.
Durje konjenca wočinjene
Rakojdy. Na dźeń wotewrjenych duri su zajimcy njedźelu, 22. oktobra, na Bartušec šumjelowy dwór do Rakojd přeprošeni. Wot 10.30 hodź. móža woni tam do konjencow pohladnyć, so w jězdźenju z konjacym zapřahom pospytać a při dresurje přihladować.
Koncertaj wotprajenej
Budyšin. Załožba za serbski lud je nazymskej koncertaj 22. oktobra we Worklecach a 4. nowembra w Hórkach wotprajiła. We Worklecach njeje žana móžnosć pohosćenje zaručić, a za Hórki bě skupina JANKAHANKA pobrachowaceho hudźbnika dla wotprajiła. Wšitke dalše nazymske koncerty so wotměja.
Přednošuje wo židach
Z Lipja měł woprawdźity krajinowy park nastać
Pančicy-Kukow (BW/SN). Lipjo w Pančicach-Kukowje je dźensa runje tak idyliske kaž za čas Jakuba Barta-Ćišinskeho. Napadnje pak, zo je wjele městnow z młodymi štomikami zarosćenych. Tež krajinowy architekt Clemens Bejmak bě tole wjacekróć zwěsćił a so tohodla w swojim diplomowym dźěle tutej temje wěnował. Zawčerawšim wón čłonam Domowinskeje skupiny Pančicy-Kukow a dalšim přichwatanym swój koncept za zdźerženje Lipja pod aspektami pomnikoškita předstaji. Něhdźe 40 skupinarjow a zajimcow jemu připosłuchaše.
Z najnowšej diagnostiskej techniku
Bjez zastupowaceho wjesnjanosty
Róžant (JK/SN). Dokelž njeměještaj składnosć, sej podłožki nastupajo naležnosć Ralbičanskeje kormjernje swini dla dokładnje spřistupnić, žadaštaj sej radźićelej Křesćan Gruhn a Tomaš Bjeńš na wčerawšim posedźenju gmejnskeje rady Ralbicy-Róžant, zo so dnjowy dypk k tutej temje na přichodne posedźenje přestorči. To zbudźi protest dalšich radźićelow, kotřiž běchu so z tejle temu hižo zaběrali. Po dlěšej diskusiji pak so na to dojednachu, lěpšeje transparency dla a k wobšěrnišej rozprawje a argumentaciji Ralbičanskim wobydlerjam napřećo, naležnosć w nowembrje wobjednać.
Jednohłósnje radźićeljo wčera nowe towaršnostne zrěčenje z Kulowskim zastaranskim předewzaćom za energiju EVSE, kotrež wjesne dźěle gmejny z płunom zastaruje, wobzamknychu. K tomu podaštaj jednaćelka Sylvia Schenker kaž tež prawiznik zawoda wotpowědne informacije wo změnach. Zasadnje so za gmejnu w nowym zrěčenju ničo njezměni. Wone bu trěbne, dokelž běchu so komunalne zakonje w Sakskej změnili, štož ma so w zrěčenju wobkedźbować.
Bywšu šulu chcedźa přetwarić
Na kromje wsy ma w Chrósćicach gmejnski a kulturny centrum nastać
Chrósćicy (SN/MWj). Hdźež su na kromje Chrósćic do směra na Jaseńcu minjene lěta nowu pěstowarnju natwarili, móhło so z twarskimi dźěłami bórze pokročować. Z přetwarom bywšeje srjedźneje šule ma tam gmejnski a kulturny centrum nastać. Tole su čłonojo Chróšćanskeje gmejnskeje rady na swojim wčerawšim posedźenju jednohłósnje schwalili.
Krótkopowěsće (20.10.17)
Frank Haubitz nowy minister
Drježdźany. Do zastojnstwa sakskeho kultusoweho ministra je ministerski prezident Stanisław Tilich (CDU) wčera Franka Haubitza (njestronjan) powołał. Dotalny nawoda gymnazija Drježdźany-Klotzsche bě hač do wčerawšeho tež předsyda Zwjazka filologow Sakskeje. Póndźelu Haubitz nowe zastojnstwo nastupi.
Konwent etat wobzamknył
Wojerecy. Kulturny konwent Hornja Łužica-Delnja Šleska je na swojim wčerawšim posedźenju we Wojerowskim Kompjuterowym muzeju Konrada Zusy (ZCOM) etat za lěto 2018 z něhdźe 18 milionami eurow wobzamknył. ZCOM su do rjadu spěchowanych institucijow přiwzali. Institucionelnje spěchowanje wučinja klětu 15,876 milionow eurow.
Antologiju „Mlóče“ předstajili
Bukecy. We wobłuku lětušeje čitanskeje turneje Ludoweho nakładnistwa Domowiny su Ingrid Juršikowa, Jěwa-Marja Čornakec a Lydija Maćijowa antologiju „Mlóče“ wčera na Bukečanskej farje předstajili. Dźeń do toho běchu knihu tež w Nowej Wjesce prezentowali. Tam čitachu z njeje mjez druhim Monika Dyrlichowa, Měrka Mětowa a Jurij Koch.
