Njetrjebawši scenarij
Třěleja nětko wjace dźiwich swini
W Němskej dotal pady afriskeje swinjaceje mrětwy znate njejsu. Tuž njejsu tež w Budyskim wokrjesu žane wobmjezowanja přikazane. To rěka, zo njetrjebaja ludźo swoje psy za powjaz wodźić.
Budyšin (SN/mwe). Kaž Budyski krajnoradny zarjad na naprašowanje SN wobkrući, njetrjebaja so tudyši wobydlerjo tuchwilu starosćić, zo jich afriska swinjaca mrětwa (ASP) dosćehnje. Wšako za čłowjeka, psy a kóčki strach natyknjenja njewobsteji. Zo pak móže so chorosć mjez dźiwimi swinjemi jara spěšnje wupřestrěć, njeje žane potajnstwo. Wot toho potrjechene móhli tež domjace swinje być, kotrež bychu hladarjo w padźe ASP po tysacach morić dyrbjeli.
Krótkopowěsće (24.01.18)
Zelena swěca za nowy wotrězk
Drježdźany. Nowotwar zwjazkoweje dróhi B 178 mjez Nosaćicami a awtowej dróhu A 4 móže Sakska dale planować. Zwjazkowe ministerstwo za wobchad je sakskemu wobchadnemu ministerstwu planowany přeběh tak mjenowaneho „wotrězka 1.1“ pisomnje wobkrućiło. Dokelž ma so wotbóčka A 4 Wospórk wobchować, dóńdźe „jeničce k snadnuškej změnje přeběha čary, bjeztoho zo so tohodla zasady planowanja zanjechaja“, rěka we wobkrućenju.
Z dźěćimi delnjoserbsce rěčeć
Bórkowy. Pěstowarnje Bórkowskeho hamta pytaja Delnjoserbow, kotřiž móhli z dźěćimi serbsce powědać, jim bajki bać abo z nimi spěwać. Přizjewić móža so zajimcy pola zamołwiteje za serbske naležnosće Bórkowskeho hamta Anett Zišcyneje, kotraž sama jako kubłarka w Žylowskej Witaj-pěstowarni dźěła, kaž tež w Bórkowskej abo Strjažowskej pěstowarni.
Slěbro a bronzu dobyli
Z drogami wikowałoj
Budyšin (SN). Před wulkej chłostanskej komoru krajneho sudnistwa je so dźensa w Budyšinje zahajiło jednanje přećiwo 28lětnej žonje z Waldhufena pola Niskeje a přećiwo 32lětnemu zhotowjerjej gratow z Wósporka. Statne rěčnistwo jimaj mjez druhim wumjetuje, zo staj w času wot 26. meje do 7. awgusta 2017 w sydom padach crystal z Pólskeje do Němskeje dowožowałoj, zo byštaj drogu tu z dobytkom předałoj. Kaž z informacijow sudnistwa wuchadźa, bě 28lětna terminy a městnosće přepodaća z pólskimi wikowarjemi wothłosowała a dojednała. Po tym je ze swojim wosobowym awtom hromadźe z wobskorženym tworu přez mjezu do Němskeje wozyła. Wobaj staj crystal na to rozdźělnym woteběrarjam we Wósporku a wokolinje předawałoj a při tym něhdźe 25 000 eurow dobytka „nadźěłałoj“.
Žona njeje předchłostana. 32lětny muž ma porno tomu w zwjazkowym centralnym registrje pjeć zapiskow, jedyn z nich tohorunja drogoweho delikta dla. Wobaj staj w přepytowanskej jatbje. Dźensnišemu prěnjemu terminej slědujetej 31. januara a 5. februara dalšej.
Młodostni a wobornicy camprowali
Policija (23.01.18)
Šoferow kontrolowali
Družkecy. Hač wodźerjo awtow při wobchadnym znamjenju „STOP“ tež woprawdźe zastanu, je policija minjeny kónc tydźenja dwójce w Družkecach w gmejnje Dobruša-Huska kontrolowała. Tam stawaja so časćišo wobchadne njezboža, při kotrychž stej loni dwě wosobje žiwjenje přisadźiłoj. Jědnaće šoferow njeje znamješko tónraz wobkedźbowało.
Nowa wustajeńca so dliji
Wotewrjenje přehladki w Budyskim wopomnišću dyrbja přestorčić
Budyšin (UM/SN). Nowowuhotowana trajna wustajeńca „Budyšin I a II w nacionalsocializmje – 1933 do 1945“ budźe po wšěm zdaću hakle w aprylu abo w meji 2018 wotewrjena. Tole wuchadźa z wotmołwy sakskeje statneje ministerki za wědomosć a wuměłstwo Evy-Marie Stange (SPD) na naprašowanje zapósłanče krajneho sejma Claudije Maicher (Zeleni). Přehladka wo času nacionalsocializma ma hižo wobstejacej dźělej wustajeńcy wo sowjetskim specialnym lěhwje (1945 do 1956) a wo stasijastwje (1956 do 1989) wudospołnić. Spočatnje planowany termin wotewrjenja dyrbjachu hižo wo lěto na 27. januar 2018 přestorčić. Datum by so derje hodźał, wšako tón dźeń po wšej Němskej wopory nacionalsocializma wopominaja. Zo tónle termin dodźeržeć njemóža a zo žadyn nowy konkretny datum postajeny njeje, ma Claudia Maicher za njemóžne. „Byrnjež wšitke wuměnjenja spjelnjene byli, Załožba sakskich wopomnišćow hišće žane předstawy wo wotewrjenju nima. Pedagogiski přewodny material jako wažny element přehladki ma so samo hakle po wotewrjenju zdźěłać.
Chorownja swj. Jana z nowej staciju
Wjacore nowosće maja spočatk lěta w Kamjenskej chorowni maltezow. Nimo přemjenowanja stacijow wotewru w februaru nowu staciju za pacientow, kotřiž jenož krótki čas w hojerni přebywaja. Zdobom poskića dušepastyr domu młodym maćerjam a nanam w kapałce žohnowanski paćer.
Kamjenc (SN/mwe). W Kamjenskej chorowni swj. Jana přeproša dušepastyr Vincenc Böhmer swójby, staršich z dźěćimi, pjatk, 26. januara, w 16 hodź. do kapałki domu na žohnowanski paćer. Tež tym, kotřiž sej dźěćo přeja, je dušepastyr rady poboku a chce so z nimi na samsnym městnje chorownje srjedu, 7. februara, we 18 hodź. modlić. „Dźěći su často króna lubosćinskeho poćaha, ale puć k tomu móže jara wobćežny być“, so Böhmer w nowinskim wozjewjenju chorownje maltezow wupraja. Dale chcedźa staršich, kotrymž je so hakle njedawno dźěćo narodźiło, do paćerja zapřijeć a jich rady do kapałki witaja. Wězo móža so serbscy wěriwi a dalši zajimcy tež w swojej maćeršćinje modlić. Wšako je serbskosć w chorowni zadomjena.
Wšo druhe hač wobstajne je tele dny zymske wjedro. Mjeztym zo wčera ...
Šulerjo druhim rady pomhaja
Minjeny kónc tydźenja je so sto šulerjow srjedźnych a wyšich šulow a gymnazijow Sakskeje, tež z Budyšina, w Schönnewitzu pola Mišna schadźowało. Tam woni rozsudźichu, komu chcedźa lětsa we wobłuku akcije „genialnje socialnje“ z pjenjezami pomhać.
Budyšin (SN/mwe). Štyrnaty króć wotměje so lětsa w Sakskej, tež w Budyskim wokrjesu, akcija „genialnje socialnje“. Mjez wobdźělnikami budu znowa holcy a hólcy wot 7. lětnika z Kulowskeje šule, Wojerowskeho ewangelskeho gymnazija Johanneum, Kamjenskich šulow kaž tež z Budyskeho Serbskeho gymnazija.
Hižo nětko přihotuja so kubłanišća na akciski dźeń, kotryž přewjedu 21. junija w zawodach a mjeńšch fimach, w institucijach a chorownjach runje tak kaž pola ludźi doma. „Je přeco zaso wobdźiwanjahódne, kelko młodych ludźi so na tym wobdźěla, swój čas wopruje a aktiwnje sobu skutkuje, zo bychu druhim pomhali. Wšako dźe wo to, žiwjenske a kubłanske wuměnjenja w globalnym juhu, ale tež njeposrědnje před domjacymi durjemi, pozitiwnje změnić“, wuzběhnje Jana Sehmisch, programowa wjednica akcije „genialnje socialnje“.
