Město chce tójšto inwestować
Wojerecy (AK/SN). Najebać napjate hospodarske połoženje chce město Wojerecy lětsa a klětu wšelake inwesticije zwoprawdźić. Na njedawnej wobydlerskej zhromadźiznje je wyši měšćanosta Torsten Ruban-Zeh (SPD) předwidźane projekty předstajił.
W dwójnym hospodarskim planje 2023/2024 chce město za 900 000 eurow zarjadniski archiw dospołnje saněrować. Za 2,6 milionow eurow chcedźa Wojerowsku centralnu wyšu šulu powjetšić. W Ćisku ma wobydlerski centrum z pěstowarnju, młodźinskim klubom kaž tež z rumnosćemi za towarstwa, swjedźenje a seniorow nastać. Dwójny etat předwidźi za to 223 000 eurow. W Čornym Chołmcu chce město za 660 000 eurow wjesnu hrjebju saněrować. Dokelž dyrbja we Wojerecach Hasu Liselotty Herrmann a Šulsku ponowić, je za to po stajnje 100 000 eurach za planowanje tychle dźěłow zapisanych. 50 000 eurow chce město za ponowjenje nastrojow na měšćanskich hrajkanišćach wudać. Za přichodny kwartěrowy park w bydlenskim kompleksu V móže město poł miliona eurow wudać. Za dalše wuwiće Jahnoweho stadiona nałoža 3,25 milionow eurow.
Liča z 1,2 milionomaj wjace
Nowa Ralbičanska pěstowarnja drje budźe dróša hač planowane
Róžant (JK/SN). Hnydom na spočatku wčerawšeho posedźenja gmejnskeje rady Ralbicy-Róžant je radźićel Tomaš Bjeńš próstwu wo změnu dnjoweho porjada stajił. Po jeho měnjenju je trjeba, zo sej radźićeljo stworja přehlad wo tuchwilnych wudawkach za nowu Ralbičansku pěstowarnju, prjedy hač firmam nadawki přepodadźa. Wšitke předležace poskitki firmow kalkulowane wysokosće přesahuja, z čimž hroža gmejnje negatiwne financielne wuskutki. Tohodla měła so rada na to dojednać, hač předležace poskitki přiwza a nadawki přepoda, abo hač nadawki znowa wupisa w nadźiji, zo dóńdu přijomniše poskitki. Přitomnaj inženjeraj planowanskeho běrowa pak so jasnje za to wuprajištaj, nadawki přepodać, dokelž je tučasnje jara ćežko, scyła firmy za předležace twarske a instalaciske dźěła namakać. Inženjerski běrow sam je firmy pozbudźił, so na wupisanju wobdźělić. Ale firmam pobrachuje personal, material a čas. Tohodla je gmejna mjenje abo bóle zasudźena k tomu, poskitki firmow přiwzać a z nich te najlěpše wupytać.
Koncertuja při cyrkwi
Radwor. Chór Meja přeprošuje wšitkich zajimcow na swój nalětni koncert na zahrodźe při Radworskej farskej cyrkwi, a to njedźelu, 25. junija, w 15.30 hodź. Hižo do toho poskića swačinu. Klankodźiwadźelnik Měrćin Krawc program wobohaći.
We wsy zaso swjeća
Nowa Wjeska. Z natočenjom piwa a diskoteku započnje so dźensa 44. wjesny swjedźeń w Nowej Wjesce. Jón pokročuja jutře w 14 hodź. z wolejbulowym turněrom a w 15 hodź. z dźěćacym swjedźenjom. Wječor budźe znowa diskoteka. Po njedźelnym rańšim piwku dožiwja wopytowarjow wot 15.30 hodź. pisany zabawny program. K tomu poskićuja kofej a tykanc.
Na kreatiwne popołdnjo
Wojerecy. Dekoraciju z hliny zhotowić a připódla w serbšćinje wukmanić móža so zajimcy póndźelu, 26. junija, we Wojerowskim domje Domowiny. Wot 13.30 hač do 15 hodź. abo wot 15.30 do 17 hodź. su tam wopytowarjo pod hesłom „Wuměłstwo a rěč w bróžni“ na serbske kreatiwne popołdnjo z Mariju Šołćic přeprošeni. Zajimcy njech přizjewja so pod . Wobdźělenje płaći dźesać eurow na wosobu.
Policija (23.06.23)
Z 3,76 promilemi Lkw wodźił
Słona Boršć. Dospołnje wopiteho wodźerja nakładneho awta je policija předwčerawšim na awtodróze A 4 lepiła. Zastojnicy kontrolowachu 39lětneho na wotpočnišću Hornja Łužica-juh pola Słoneje Boršće do směra na Zhorjelc. Pola njeho naměrichu 3,76 promilow alkohola w kreji. Jako sej policisća nakładne awto bliže wobhladachu, namakachu w kabinje šofera tójšto prózdnych piwowych tyzow we wačoku.
Za swójby na hrodźišću
Serbska baja na ławce zwobraznjena
Radwor (LM/SN). Na Kaponicy za Łupoju steji nětko ławka, kotraž z wuměłskim motiwom na baju wo sydom serbskich kralach pokaza. Šulerjo dźěłoweje skupiny za drjewo Radworskeje wyšeje šule „Dr. Marja Grólmusec“ su ju pod nawodom Ludwiga Sachsy twarili. Přidatnje młodostni we wuměłskim kubłanju bajowe postawy, kotrež bě Andrea Pawlikowa naćisnyła, wumolowachu. Technisce podpěrał je šulu Alojs Budar, kiž je motiwy z frezu zadźěłał. Projekt je socialny a šulu přesahowacy, dokelž tež gmejnscy dźěłaćerjo při natwarje pomhachu.
Radworska wjesnjanostka Madeleine Rentsch a bywši Budyski krajny rada Michael Harig staj nowu ławku při pućowanskej šćežce na Kaponicu wčera poswjećiłoj. Wobaj chwaleštaj šulerjow, zo sej rjemjesło waža a njech sej to tež za powołanski přichod zdźerža.
Lipy su nas minjene dny kaž tule w Njebjelčicach z njewšědnej ...
Krótkopowěsće (23.06.23)
Podpěra kulturje a hospodarstwu
Choćebuz. Łužica móže za wuwiće trajnje spomóžneho kulturneho a kreatiwneho hospodarstwa w přichodźe ze spěchowanskich srědkow Europskeje unije profitować. Z nimi móža wysokošulske programy, projekty, produkty a załoženja předewzaćow w kulturnym a kreatiwnym wobłuku podpěrać. Wotpowědny program syće „EIT Culture & Creativity“ su dźensa w Choćebuzu předstajili.
Přihot na dalšu štaflu podcasta
Wojerecy. Prěnja stafla podcasta „That’s #WHY!“ je mjeztym zakónčena, dalša planowana. Poskitk Wojerowskeho hospodarskeho spěchowanja ma mjeztym wjace hač 7 000 připosłucharjow a připosłucharkow. Tematisce zaběra so online-poskitk ze změnu we Wojerecach. Protagonistka Lisa wopytowarjow formata po měsće přewodźuje a zbliža jim na turje wotkryćow zajimawosće.
Haka na Praskim hrodźe
Chorownju chcedźa zachować
Běła Woda (AK/SN). Běłowodźanska wokrjesna chorownja ma so wot lěta 2024 z přesahowacym strowotniskim centrumom stać. Tole wuzběhny minjeny štwórtk krajny rada Zhorjelskeho wokrjesa dr. Stephan Meyer (CDU). Ćežišća měli w přichodźe nutřkowna medicina, chirurgija, gynekologija a nuzowa medicina w zwisku z njezbožemi być. Dale wobchowaja w chorowni pediatriju (dźěćacy hojenski wobłuk). Hojenje na stacijach chorownje a ambulantne lěkowanje maja so sylnišo mjez sobu zwjazać. Za zastaranje na sewjeru Zhorjelskeho wokrjesa je stejnišćo Běła Woda nuznje trěbne, krajny rada podšmórny. Z jednaćelom domu Steffenom Thiele, sakskej socialnej ministerku Petru Köpping (SPD), socialnej decernentku Zhorjelskeho wokrjesa Martinu Weber a sobudźěłaćerjemi chorownje je dr. Stephan Meyer wo přichodźe domu wuradźował.
Quo vadis strowotnistwo?
Budyšin (WeL/SN). Wo tym, zo trjeba němski strowotniski system nuznje reformy, nichtó njedwěluje. Mjeztym zo so ludnosć wo wěstotu swojeje strowoty dla starosća, boja so dźeń a bóle lěkarjo a apotekarjo kaž tež přistajeni w chorownjach wo swoje dźěłowe městna. Chorobne kasy a mediciniske zwjazki bědźa so dale a wjac z formularami, statistikami a běrokratiju. Pacienća pak po tym ćerpja.
