Krótkopowěsće (11.12.23)
SN dźěło fotografow připóznawaja
Berlin. Serbske Nowiny su nimo dźenikow Mainpost a Landshuter Zeitung znowa přikładne nastupajo prawo fotografowkow a fotografow, zo so jich mjeno wozjewja. Wo tym informowaše Zwjazk žurnalistow Němskeje (DJV) dźensa w Berlinje. Při wuhódnoćenju zwěsćachu, zo steji w Serbskich Nowinach pod sto procentami fotow mjeno awtora. „Njeńdźe jenož wo zakoń, ale wo připóznaće dźěła“, rjekny Mika Beuster, zwjazkowy předsyda DJV.
Z Choćebuza do Żaganja direktnje
Choćebuz. Direktny ćah DB Regio zwjaza jako RB93 pjeć razow wot póndźele do pjatka a dwójce kónc tydźenja nětko Choćebuz z pólskim městom Żaganjom we wojewódstwje Lubuskie. Dotal dyrbjachu pasažěrojo w Baršću do pólskeho ćaha přestupić. Změna płaći z nowym jězbnym planom wot wčerawšeje njedźele. Dotalny poskitk ćahow mjez Choćebuzom a Baršćom so njezměni.
Dźak za čestnohamtstwo
Woda a wopłóčki budu dróše
Wojerowske zastaranske zawody reaguja na aktualne wuwiće
Wojerecy (AK/SN). Płaćizny za pitnu wodu, wopłóčki a wotwodźowanje dešćikoweje wody Wojerowske zastaranske zawody (VBH) wot klětušeho zwyša. Wone maja potom hač do 2027 stabilne wostać. Kaž jednaćel Wolf-Thomas Hendrich srjedu rjekny, reaguja tak na přiběrace wudawki za personal a material.
Za kubikny meter pitneje wody změja wobydlerjo wot januara 1,95 eurow město dotal 1,74 eurow płaćić. Měsačna zakładna płaćizna na přikład za jednoswójbny dom ze štyrjomi wosobami rozrosće wot 10,59 eurow na 16,94 eurow. Dróše budźe tohorunja rjedźenje wopłóčkow, štož wobstaruja we wodočisćerni na Horach za město Wojerecy, Łuty, Lubuš, Halštrowsku Holu a Wulke Ždźary. Płaćizna za kubikny meter wopłóčkow podróši so wot 3,26 eurow na 3,32 eurow. Měsačna zakładna płaćizna rozrosće wot 12,26 na 17,75 eurow. Tež za wotwodźowanje dešćikoweje wody budu ludźo we Wojerecach a wokolinje wjace płaćić dyrbjeć, mjenujcy wšudźe tam, hdźež dešćik do zemje zasaknyć njemóže. To wobliča po płoninje. Na kwadratny meter zwyši so płaćizna wot 30 centow na 49 centow.
Adwentne woknješko
Policija (08.12.23)
Zasudźeneho hnydom zaso lepili
Budyšin. Tak spěšnje drje hišće nichtó sudniski wusud ignorował njeje. 49lětny bu srjedu wopiwstwa w nadróžnym wobchadźe dla k dźewjeć měsacam bjez jězbneje dowolnosće zasudźeny. Jenož krótki čas pozdźišo lepichu jeho policisća, jako wón ze swojim Volvom po Stieberowej jědźeše. Při kontroli zwěsćichu, zo měješe muž 2,38 promilow alkohola w kreji. Kluč awta policisća sćazachu.
W hospodźe wo pčołkach
Chrósćicy. We wobłuku 12. kulturneje zymy w Chróšćanskej putniskej hospodźe steja tam jutře, sobotu, pčołki w srjedźišću. W 19.45 hodź. porěči Günter Sodan z Dobrošec pola Malešec na temu „Pčołka a Boža stwórba – z wida serbskeho pčołarja a fararja Hadama Bohuchwała Šěracha“. Zarjadowanje budźe w němskej rěči. Samsny dźeń hižo w 16 hodź, su dźěći přeprošene na serbske dźěćace kino. Hač do klětušeho februara poskićuje Monika Gerdesowa w swojej hospodźe wšelake zarjadowanja za dźěći a dorosćenych w serbskej a němskej rěči.
Zetkaja so w sakskej stolicy
Drježdźany. Přichodne serbske blido w Drježdźanach wotměje so srjedu, 13. decembra, we 18 hodź. w korčmje Am Thor na Hłownej dróze 35. Je to blisko cyrkwje Třoch kralow a Albertoweho naměsta. Na Hłownej dróze su tež powabliwe dohodowne Awgustusowe wiki. Kaž organizator Benedikt Dyrlich zdźěli, chcedźa wotputane serbske bjesady w sakskej stolicy dale wjesć, byrnjež jenož mała horstka byli. Při tym móhli sej tež hłójčku łamać, kak móhli pomhać tomu zadźěwać, zo towarstwo Stup dale cyle wusnje.
Přewjedu zaso kurs
Krótkopowěsće (08.12.23)
Michał Lorenc njeboh
Budyšin. Dźiwadźelnik, režiser a awtor Michał Lorenc je 84lětny 6. decembra zemrěł, kaž Němsko-Serbske ludowe dźiwadło zdźěla. Jewišću bě wón wot załoženja w lěće 1963 swěrny. Ze starosće wo dorost bě Lorenc 1992 Młodźinske dźiwadło na Serbskim gymnaziju a 1994 Serbske činohrajne studijo załožił. Jako prěni je wot 1998 funkciju zastupjerja intendanta za serbske dźiwadło wukonjał. Jako awtor je 600lětne stawizny Budyskeho dźiwadła wuslědźił a publikował.
Jednaćela rozžohnowali
Miłoćicy. Z wjelelětnym jednaćelom Peterom Neunertom je so Miłoćanski křesćansko-socialny kubłanski skutk wčera rozžohnował. Wón bě zdobom jednaćel Sakskeho krajneho kuratorija za wjesny rum, za čož dźakowaše so jemu předsydka Marja Michałkowa. We woběmaj funkcijomaj naslědowaše jeho lětsa w meji Marko Kliman.
„Krisenmodus“ słowo lěta
Adwentne woknješko
Policija (07.12.23)
Na hładkej dróze znjezbožiła
Njebjelčicy. W nocy na srjedu je so při wobchadnym njezbožu na Protečanskej dróze blisko Njebjelčic 20lětna žona ćežko zraniła. Ze swojim Peugeotom bě wona krótko do 1 hodź. wot Hlinowca do Njebjelčic po puću. Najskerje zalodźeneje dróhi dla kontrolu nad awtom zhubi a do přirowa zajědźe. Wohnjowi wobornicy žonu z jězdźidła wuswobodźichu. Wuchowanske mocy ju do chorownje dowjezechu.
Přednošuje wo J. Leisentriće
Budyšin. Superintendent na wuměnku Jan Malink přednošuje jutře, pjatk, w 19.30 hodź. w Budyskej Röhrscheidtowej bašće Serbskeho ludoweho ansambla wo Janje Leisentriće (1527–1586). Wšitcy zajimcy su wutrobnje přeprošeni.
Pittkunings koncertuje
Zły Komorow. „Nic jenož folklora“ je hesło adwentneho koncerta Bernda Pittkuningsa, kotryž dožiwja zajimcy jutře, pjatk, w 16 hodź. w Złokomorowskej radnicy. W swojim repertoiru změje serbski spěwytwórc nimo swojeje hudźby zabawne informacije ze stawiznow a přitomnosće Serbow. K witanju porěči měšćanosta Andreas Pfeiffer.
Literarno-hudźbny wječor
Budyšin. Na literarno-hudźbny wječor přeprošuje Jürgen Maćij zhromadnje ze Serbskim muzejom pjatk, 8. decembra. We 18 hodź. powjedźe kurator Alexander Pólk po wustajeńcy „Jürgen Matschie. Ducy domoj. Unterwegs nach Hause. Fotografije 1972–2022“ w serbskej rěči. Přizamknje so w 19 hodź. literarno-hudźbny wječor na žurli. Měrana Cušcyna, Měrka Mětowa a Róža Domašcyna čitaja teksty z knihow Jürgena Maćija. Hudźbnje wobrubi program Jakub Čornak alias Jacke Schwarz.
TDDK wopytać
Nowe zepěranišćo wobornikow
Za gratownju kroči Rakečanska gmejna po njewšědnym puću
Rakecy (UM/SN). Dobrowólne wohnjowe wobory su za města a gmejny njeparujomne institucije. Na jednym boku škitaja wone wobydlerjow před wohenjom a druhimi strachami, na tamnym boku su wone wažne za zhromadnosć w towaršnosći. Wobory pak zawinuja tež kóšty, wšako trjebaja kameradojo porjadne wuměnjenja za swoje čestnohamtske dźěło. Jězdźidła, wuhotowanje a předewšěm gratownje dyrbja so financować.
