Skedźbnjeja na digitalnu nowinu
Pančicy-Kukow (SN/MWj). Za dźěło zarjadniskeho zwjazka Při Klóšterskej wodźe dyrbja sobustawske gmejny lětsa znowa hłubšo do swojeje kasy sahnyć. Tole praji hospodarski plan zarjadniskeho zwjazka, z kotrymž su so zastupjerjo Chrósćic, Njebjelčic, Worklec, Pančic-Kukowa a Ralbic-Róžanta wčera zaběrali. Kaž předsyda zarjadniskeho zwjazka Stefan Anders zdźěli, zwyša přinošk gmejnow na 242 eurow na wobydlerja a lěto. To je 27 eurow wjace hač dotal.
Přičina su předewšěm tarifowe stopnjowanja mzdow sobudźěłaćerjow. „Něhdźe 90 procentow swojich wudawkow nałožujemy za personalne kóšty. Hladajo na aktualne tarifowe jednanja smy tři procenty wjace wudawkow w tymle wobłuku zaplanowali. To je hłowna přičina přiběracych kóštow“, Stefan Anders rozłoži. Tež IT-technika so podróši. A nimo toho maja přidatne wudawki wotličenjow jednotliwych hospodarskich lět dla. Inwesticije w zaměrowym zwjazku lětsa předwidźane njejsu.
Dróhotwar dale wulka tema
Bóšičanska gmejna nadźija so dale podpěry zasydlenych předewzaćow
Bóšicy (SN/MiR). Wjesnjanosta Bóšičanskeje gmejny Stanij Ryćer (rjemjesło Bóšicy) je połny nadźije, zo so dróhotwarske dźěła w gmejnje bórze zakónča. Loni běchu započeli něhdźe kilometer dołhi dźěl puća mjez Nowymi Bóšicami a křižowanišćom do Wětrowa ponowić. Jězdnja so wot dotal 3,20 na 5,50 metrow rozšěri. Při planowanju njeběchu fachowcy wobkedźbowali, zo je póda z pěska a hliny w mokrym počasu hinaša hač w lěćnych měsacach. Twarska firma bě w nowembrje zwěsćiła, zo je hlinjany pěsk kaž mazne mydło a z tym přemjechki. Za to dyrbjachu dźěłaćerjo nowy asfalt wufrezować a ze šćerkom napjelnić. Gmejna je za loni zahajeny projekt, kiž płaći něhdźe 400 000 eurow, trěbne přidatne kóšty we wobjimje 60 000 eurow zapłaćiła.
Policija (15.01.25)
Paducha na kěrchowje wuslědźili
Běła Woda. Dokelž awtowe čisło BMWja njeeksistowaše, chcychu policisća jón wčera w Běłej Wodźe kontrolować. Šofer pak stupi na płun a wotjědźe. Jako z awtom pozdźišo do hrjebje zajědźe, muž dale pěši ćěkaše. Policajski pos jeho bórze na to na bliskim kěrchowje wuslědźi, hdźež bě so podhladny schował. Kaž so wukopa, je wón nimale 60 000 eurow drohi BMW we Wolfenbüttelu pokradnył. Na awće nasta 40 000 eurow škody.
Krótkopowěsće (15.01.25)
Wuzwola nowe wuběrki
Drježdźany. Sakski krajny sejm chce dźensa na prěnim posedźenju w nowym lěće swoje gremije a fachowe wuběrki rjadować. Dotal bě ke konstituowacemu posedźenju parlamenta zasadźeny hłowny wuběrk nadawki přewzał. Planowanych je jědnaće wuběrkow. Zapósłanča krajneho sejma Elaine Jenčec (CDU) ma wuběrk kubłanje, financy a peticije přewzać.
Pokročujetej kooperaciju
Smochćicy. Předsyda Domowiny Dawid Statnik je so wčera z nowej jednaćelku Smochčanskeho kubłanišća swjateho Bena Sybille Richards, zetkał. Najebać planowaneho noweho wusměrjenja dźěławosće kubłanišća jako centrum za dalekubłanja a přenocowanja, wostanje wone nadal spěchowanski partner Domowiny a chce kooperaciju z třěšnym zwjazkom dale wjesć.
Institut wopušći platformu X
Joachim Mič přednošuje
Łaz. Spěchowanske towarstwo Zetkanišćo Dom Zejlerja a Smolerja we Łazu přeprošuje hromadźe z rěčnym motiwatorom Frankom Knoblochom na swětłowobrazowy přednošk Joachim Miča. Zarjadowanje wotměje so pjatk, 17. januara, we 18 hodź. w sydarni Łazowskeho gmejnskeho zarjadnistwa. Sulšečan porěči wo swojim putnikowanju po Jakubowym puću přez sewjernu Španisku a prezentuje k tomu swoju nowu knihu. Wšitcy zajimcy su wutrobnje přeprošeni.
Radźićeljo wuradźuja
Worklecy. Projekt saněrowanja Serbskeje wyšeje šule „Michał Hórnik“ Worklecy předstaja na přichodnym zjawnym posedźenju Worklečanskeje gmejnskeje rady, kotrež wotměje so jutře, srjedu, we 18.30 hodź. w tamnišej šuli. Na dnjowym porjedźe radźićelow steji dale diskusija wo psyčich dawkach.
Radwor. W samsnym času, potajkim jutře wot 18.30 hodź. zeńdźe so Radworska gmejnska rada w sydarni gmejnskeho zarjadnistwa. Mjez druhim póńdźe wo financowanje katolskeho dźěćaceho domu „Alojs Andricki“. Nimo toho chcedźa problem muchow w Drobach wospjet tematizować.
Serbski organist zahudźi
Policija (14.01.25)
Pólski šofer smjertnje znjezbožił
Budyšin. Wčera w zažnych hodźinach je nakładne awto při parkowanišću pola Bórka na kromje Budyšina z dotal njeznateje přičiny do bliskeho lěska zajěło a při tym do wjacorych štomow zrazyło. 50lětny pólski šofer hišće na městnje njezboža zemrě. Po informacijach wobchadneje policije nasta něhdźe 20 000 eurow škody. Nětko pytaja swědkow, kotřiž móhli informacije wo wobchadnym njezbožu abo wo pólskim wodźerju podać. Štóž je něšto wobkedźbował, njech přizjewi so na Budyskim policajskim rewěrje pod 03591 3670.
Na dwórnišću započnu tunl twarić
Pytaja dom za požadarjow azyla
Hamor (AK/SN). Zhorjelski wokrjes chce swój dom za požadarjow azyla w bywšej powołanskej šuli w Hamorskej milinarni hač do meje 2026 dale wjesć. To je lěto dlěje hač spočatnje planowane. Tole zdźěli nawoda zarjada za porjad Zhorjelskeho wokrjesa Falk Werner Orgus wčera na posedźenju Hamorskeje gmejnskeje rady. Pozadk je, zo njeje wokrjes dotal druhi kmany dom w Běłej Wodźe abo wokolinje namakał. Tež za bydlenjemi, w kotrychž móhli požadarjow azyla decentralnje zaměstnić, su dotal podarmo pytali.
W juniju 2023 je Zhorjelski wokrjes w Hamoru prěnich požadarjow azyla zaměstnił. Spočatnje bydleše tam 40 ludźi. W januaru 2024 bě kapacita 150 městnow dospołnje wučerpana. Dohromady bydleše tam wjace hač 230 ludźi ze Syriskeje a Turkowskeje.
Nětko, w prěnim kwartalu 2025, chce wokrjes imobiliju energijowemu koncernej LEAG předać. Hač do meje 2026 pak smědźa tam dale požadarjow azyla zaměstnić. Hakle potom chce energijowy koncern do domu inwestować a jón za swójske zaměry wužiwać.
Swójske srědki pobrachowali
Ze smějacym a płakacym wóčkom gmejna na zašłe lěto zhladuje
Njebjelčicy (JK/SN). Na spočatku noweho lěta zhladuja mnohe komuny na minjene lěto, zo bychu swoju dźěławosć bilancowali a sej zakład za dźěło w nowym lěće stworili. Tak čini to tež Njebjelčanski wjesnjanosta André Bulank (njestronjan). Při wšitkich ćežach, kotrež Njebjelčanska gmejna wosebje na financnym polu ma, móže so dźěło lěta 2024 widźeć dać. Jara wažne za gmejnu bě, nastajić hospodarski plan. To pak bě kaž hižo w předchadźacym lěće jenož z wosebitymi dochodami z přemysłoweho dawka móžno. Zakład za porjadnu dźěławosć gmejnskeje rady a gmejnskeho zarjadnistwa su načasne hłowne wustawki, kotrež su hnydom na spočatku lěta wobzamknyli, runje tak kaž nowy jednanski porjad, płaćacy wot awgusta. Zo su jedyn z pjeć kreditow zapłaćić móhli, bě za gmejnski budget jara spomóžne.
Žadyn přichod za móst pola Zdźěrje
Zdźěr (UM/SN). Dny mosta na kromje Zdźěrje pola Wulkeje Dubrawy su ličene. Kaž wjesnjanosta Hardy Glausch (njestronjan) na naprašowanje zdźěli, na městnje dodźeržaneho žadyn nowy móst njenatwarja. Město toho chcedźa wužłobinu, w kotrejž bě něhdy železniska čara z Wulkeje Dubrawy do směra na Wóspork, nasypać. Wotpowědne wobzamknjenje je gmejnska rada hižo srjedź 2024 schwaliła. Tole je so mjez wšitkimi móžnymi wariantami jako najlěpša wujewiła. Přiwšěm ma tele předewzaće něhdźe 448 000 eurow płaćić. „Próstwy wo spěchowanske srědki su zapodate, smy w fazy planowanja“, tak Wulkodubrawski wjesnjanosta.
Přeprěčenje něhdyšeje železniskeje čary je wažny dypk w regionalnej syći kolesowanskich šćežkow. Mjez druhim wjedźe tule Sprjewiny kolesowanski puć. Na hornjej kromje ma nasyp asfaltowu krónu dóstać. Deleka měli jón tež zwěrjata po małym tunlu přeprěčić móc.
