Spěšnosć přepruwowali

Konjecy/Njebjelčicy. Zastojnicy wobchadneje policije su zawčerawšim rano w Konjecach na Křižerskim puću dodźerženje předpisaneje spěšnosće přepruwowali. Mjez dohromady 16 měrjenymi jězdźidłami je šěsć dowolene 30 km/h jasnje překročiło. Negatiwny rekord překročenja běchu 22 km/h. Za šofera rěka to: 70 eurow pokutneho pjenjeza. Na samsnym dnju dopołdnja přepruwowachu zastojnicy wjacore hodźiny dołho dodźerženje spěšnosće 70 km/h na dróze S 94 při wotbóčce Kamjenc-Brěznja/Njebjelčicy. Mjez 1 102 přepruwowanymi jězdźidłami běše 71 přespěšnje po puću. „Najspěšniši“ ­šofer z Kamjenca smaleše ze 110 km/h. Po wobchadnym pokutnym katalogu wočakuja jeho za to dypk w Flensburgu a 200 eurow pokuty.

Program 800lětneje róčnicy Kamjenca z tójšto poskitkami

Kamjenc (SN/MiR). Digitalna tafla na Kamjenskej radnicy pokazuje ličbu dnjow, kotrež w swjedźenskim lěće 800. róčnicy města zańdu. Dźensa pokazuje ličbu 37. „Silwester smy z něhdźe 3 000 ludźimi na Hłownym torhošću města zazběh do jubilejneho lěta swjećili“, rjekny Dawid Kliman­, zamołwity za měšćanski marketing, turizm a zarjadowanja w měšćanskim zarjadnistwje. Mjeztym jedyn poskitk po druhim na wosebity wjeršk w stawiznach Lessingoweho města skedźbnja. Tele dny je wušła brošurka za swjedźenski program, w kotrymž so tež serbska rěč jewi.

Stróža (SN). Po kónclětnej přestawce je wopytowarski a informaciski centrum Dom tysac hatow w Stróži wot spočatka februara wšitkim zajimcam swoje durje zaso wotewrěł. Nimo stajneje multimedialneje wustajeńcy, kotraž informuje wo biosferowym rezerwaće, swojej florje a fawnje kaž tež wo tradiciji tudyšeho hatarstwa, maja w domje lětsa tři wosebite wustajeńcy a wjace hač 50 zjawnych zarjadowanjow na poskitk. Wšěm tym, kotřiž chcedźa wustajeńcy abo přednoški prawidłownje wopytować, poručeja zamołwići, sej lětny lisćik kupić. Na předań je tón za 15 eurow na městnje, potuńšeny płaći 10 eurow.

Kóždu prěnju srjedu w měsacu w 19 hodź. steji napjaty a informatiwny přednošk k temam přiroda, kultura kaž tež krajowěda na programje. Přichodny přednošk k temje „mnohotnosć družin“ wotměje so 5. měrca.

Nuknicy. W Nukničanskej barace swjeća sobotu, 8. februara, póstnicy. Pod hesłom „Čornoběłe je pisane dosć“ su wot 15.30 do 17.30 hodź. wosebje dźěći na hejsowanje přeprošene. Po kemšach, w 19.30 hodź. je wjesoły wječork za wšitke dorosćene nory. Za dźěći je zastup darmotny, dorosćeni płaća sydom eurow.

Zahudźa w měšćanskim muzeju

Budyšin. W Budyskim měšćanskim muzeju maja wosebitu rumnosć, w kotrejž wustajeja křesćanske wuměłstwo, mjez druhim wołtarje ze srjedźowěka. Njedźelu, 9. februara, w 15 hodź. zahudźi tu instrumentalny kruh Consonare swj. Pětra. Mjez druhim zaklinča tež serbske pěsnje. Wustajenych eksponatow dla je w rumnosći chłódne. Zamołwići doporuča, so ćopłu drastu zwoblěkać. Dorosćeni płaća 7 eurow zastupa. Za dźěći a młodostnych hač do 16 lět je zastup darmotny.

Žiwe stawizny dožiwić