Krótkopowěsće (19.09.23)
Znowa wo elektrifikaciji rěčeli
Berlin. Wospjet zetkachu so zastupjerjo łužiskeje politiki wčera w zwjazkowym ministerstwje za wobchad, zo bychu wo dalšim postupowanju při elektrifikaciji čary Drježdźany–Zhorjelc wuradźowali. Konkretne wuslědki drje přeco hišće njepředleža, ale politikarjo, mjez nimi Budyski krajny rada Udo Wićaz (CDU) , su so na dalši časowy plan dojednali. Z rozsudom liča w nalěću 2024.
Z čahom po cyłej Europje
Drježdźany. Druhi raz wulosuje sakske ministerstwo za Europu lětsa tikety za tak mjenowany „Program Interrail“ pod titulom #saxorail. Z tutymi zmóžnja młodym dorosćenym w starobje 18 do 27 lět sydom dnjow dołho bjezpłatnje na wosebitych čarach po cyłej Europje jězdźić. W horncu maja lětsa 700 tiketow, wo kotrež móža so zajimcy online hišće hač do 15. oktobra požadać.
Syły Čechow na Dnjach NATO
Městna hišće swobodne
Rěčne kupy bliže zeznali
Štwórta kolesowanska jězba po třoch wosadach
Smochćicy (SN/MWj). Wjele noweho nazhonili a zajimawych ludźi zeznali abo znowa zetkali su sobotu wobdźělnicy štwórteje a poslednjeje kolesowanskeje jězby we wobłuku tuchwilneje wosebiteje wustajeńcy Budyskeho Serbskeho muzeja „Čej’ da sy“. Pod wupruwowanym nawodom Tadeja Šimana, organizatora a redaktora k wustajeńcy wušłeje knihi ze samsnym titlom, wjedźeše něhdźe 30 kilometrow dołha čara po nabožnych a rěčnych kupach Baćońskeje, Zdźěrjanskeje a Radworskeje wosady.
Žony raz cyle mjez sobu byli
Młodźinski klub kino organizował
Stara šewcownja zaso přistupna
Wojerecy (KD/SN). W pod pomnikoškitom stejacym twarjenju na Wojerowskej Dołhej hasy 1 je historiska šewcownja wot njedawna zaso časćišo přistupna. To zdźěli Peter Biernath, čłon předsydstwa Wojerowskeho Kulturneho zwjazka, kiž ma w samsnym domje swoje sydło. Bywši jednaćel předewzaća Hans Sachs tzwr Werner Ulbrich chce na wěstych dnjach a k wosebitym składnosćam zajimcow po dźěłarni wodźić.
Chcedźa energiju ze słónca wužiwać
Hamor (AK/SN). Twarscy dźěłaćerjo bórze do Hamorskeho gmejnskeho zarjadnistwa zaćahnu. Komuna da fasadu saněrować a fotowoltaikowu připrawu z bateriju kaž tež nabiwansku staciju instalować. Tomu je gmejnska rada na swojim zašłym posedźenju přihłosowała. Fotowoltaiku za 73 000 eurow natwari elektrozawod z Delnjeho Wujězda, firma z Rychwałda za 103 000 eurow fasadu ponowi.
„Dyrbimy telko pjenjez za fasadu wudać a našu kasu tak jara poćežować?“, so radźićel Thomas Stenzel prašeše. Twarska nawodnica Cortina Kokles skedźbni na to, zo je projekt hižo wjacore lěta planowany. „Dom je nětko 25 lět stary. Saněrowanje je tuž nuznje trěbne“, wona rjekny. Gmejna nadźija so spěchowanja we wobjimje 70 procentow. We wobłuku twarskich dźěłow zatwarja do gmejnskeho zarjadnistwa lift, zo móhli tež starši ludźo zarjadnistwo jednorišo docpěć.
Mongolska kultura w Njebjelčicach
Kamjenc/Njebjelčicy (SN/MiR). Cyłoněmski lětuši interkulturny tydźeń steji pod hesłom „Nowe rumy“. Do toho hodźi so poskitk Drježdźanskeho towarstwa GER (Zhromadne wuwiće realizować). Zhromadnje z Njebjelčanskim towarstwom Sowutu přihotuja jeho čłonojo prěni króć tónle „Mongolski kulturny dźeń“ w Njebjelčicach. Poboku maja woni čłonow towarstwa Witajće do Kamjenca a njedawno hakle załoženeho towarstwa Kultur Club XDörfer z Drježdźan. W kooperaciji z Mongolskim młodźinskim zwjazkom su so wo wobdźělenje prócowali. Ze swojej ideju Mongolsku na wsy předstajić pak su sej mjez organizatorami interkulturnych tydźenjow w Budyskim wokrjesu wjele sympatije zbudźili. Tuž wotměje so „Mongolski kulturny dźeń“ 23. septembra wot 11 hodź. na swjedźenskej łuce při Njebjelčanskim gmejnskim zarjedźe. Tuchwilu wšak přewjedu so zarjadowanja interkulturelneho tydźenja přewažnje w Budyšinje, Kamjencu a Wojerecach.
Reichsbürgerow domoj pósłali
Hamorska gmejna so zarjadowanju prawicarjow wuspěšnje wobarała
Hamor (AK/SN). Z wulkozasadźenjom zastojnikow je policija minjeny kónc tydźenja zakaz swjedźenja reichsbürgerow na Bjerwałdskim hrodźe přesadźiła. Wot pjatka su wšěch kontrolowali, kiž chcychu na tři dny trajace zarjadowanje přijěć. Nimale 250 jězdźidłow su přepruwowali a 153 ludźi, kotřiž chcychu so na swjedźenju tak mjenowaneho „kralowstwa Němska“ wobdźělić, su wróćo pósłali. Někotři z nich su so pozdźišo na statok w srjedźnej Sakskej wuwinyli.
Bjez wukrajnikow žadyn přichod?
Tema připućowanje dźěłowych mocow je na njedawnej Łužiskej konferency DGB wažnu rólu hrała. Krótko na to je so komunalne zwjazkarstwo Łužiske koło tež z tym zaběrało.
Wojerecy/Běła Woda (SN/at). Přińć a wostać, jenož tak móže so změna strukturow we Łužicy radźić. To snadź je hłowne poselstwo lětušeho třećeho schadźowanja Łužiskeho koła minjeny štwórtk we Wojerecach. Brizancy temy připućowanja dla běše sakske hospodarske ministerstwo na zetkanju we Wojerecach derje zastupjene. Jeho statna sekretarka Ines Fröhlich zawodnje wuzběhny, zo je dalše wuske strategiske a krajej přesahowace zhromadne dźěło mjez komunami a krajnymaj knježerstwomaj trěbne. Fröhlich wuraznje chwaleše něšto dnjow po wopyće delegacije Łužiskeho koła pola zwjazkoweho ministra za hospodarstwo a klimu Roberta Habecka (Zeleni) w Berlinje iniciatiwu, tež ze zwjazkowej politiku so direktnje rozmołwjeć.
