Iniciatiwna skupina ma postupowanje na dobro hrodu koordinować

Njeswačidło (JK/SN). Zo je Njeswačanska gmejna runja druhim w prekernej finančnej situaciji, njeje ničo noweho. Zo pak wobydlerjo rozmysluja, hdyž stejitej jich hród a park na hračkach, pokazuje na to, zo njeje tole jenož naležnosć zarjadnistwa. Gmejna so na jednej stronje wjeseli a je dźakowna, zo ma na swojim teritoriju wuznamnej objektaj, kaž stej to Njeswačanski hród a park. Na tamnej stronje pak ma komuna z tym tež njemało přidatnych wudawkow, wšako jedna so při inwesticijach do parka a hrodu wo dobrowólne nadawki. Pjenjezy za to hižo wjele lět njedosahaja a zarjadowanja w parku abo hrodźe kaž šlagrowa nóc, swjedźeń swětła abo wuměłske rjemjeslniske wiki telko do kasy njepřinjesu, zo bychu dochody wudawki kryli. Wobydlerjo přejachu sej tuž rozmołwu z gmejnskej radu a towarstwami gmejny. Před februarskim posedźenjom gmejnskeje rady je tójšto zajimcow a zastupjerjow towarstwow do sydarnje w radnicy přišło, zo bychu zhromadnje wo tym wuradźowali, kak dale.

Namakane pjenjezy wudałoj

Zhorjelc. Tobołu z wjacorymi tysac eurami je 55lětna žona njedźelu popołdnju w Zhorjelskim nakupowanišću zhubiła. Tole pytny porik, kotryž sej móšeń z pjenjezami přiswoji a so zminy. Dokelž bě 55lětna mjeztym policiju informowała, zastojnicy pad přepytowachu a hromadźe ze zwjazkowej policiju za pjenjezami pytachu. Bórze na to woni podhladny porik wuslědźichu. 36lětna žona a 43lětny muž běštaj mjeztym hižo tójšto pjenjez wudałoj. Wulki dźěl drje móžachu policisća zawěsćić, 1 500 eurow pak na kóncu přiwšěm pobrachowaše. Za to změjetaj so wobaj nětko zamołwić.

Njebjelčicy. Pod hesłom „Bjez pjenjez a z wjeselom do cyłeho swěta dźemy won“ přeprošujetaj princ Clemens II a jeho něžna princesna Andrea III kaž tež Serbskopazličanske karnewalowe towarstwo nory na lětuše póstniske zarjadowanja. Prěni kapičkowy wječor wotměje so sobotu, 22. februara, w 19.30 hodź. Nazajtra w 15 hodź. přizamknu so póstnicy za seniorow. Za tele zarjadowanje předawaja lisćiki za městna za blidami. Štóž chce sej městno zawěsćić, njech sej kartku w předpolu wobstara. 28. februara w 20 hodź. přeprošuja na žonjace póstnicy. 1. měrca budu w 14 hodź. póstnicy za dźěći a w 19.30 hodź. druhi kapičkowy wječor. Wšitke zarjadowanja wotměja so w Njebjelčanskej Bjesadźe. Zastupne­ lisćiki dóstanu zajimcy pola Hübenthalec pod telefonowym čisłom 03578/ 303 505.

W Budyskim Serbskim šulskim a zetkawanskim centrumje (SSBZ) su serbsko-němsku rěčnu animaciju přewjedli. Šulskemu zarjadowanju je so tež hort přidružił.

Budyšin (GI/SN). Pedagogiske dalekubłanje na temu serbsko-němska rěčna animacija bě za wšě šulske družiny wotewrjene. Zaměr zarjadowanja běše, zo zeznaja pedagogojo nowe metody sposrědkowanja serbskeje rěče a kak móža je dale wuwiwać, zo by so zhromadnosć mjez serbskimi a serbsce wuknjacymi šulerjemi skrućiła. Po puću rěčneje animacije hodźa so rěčne barjery z pomocu hrow we wólnej atmosferje přewinyć. Wona pomha, zadźěwki rěčenja wottwarjeć a zmóžnja komunikaciju tež ze snadnymi rěčnymi znajomosćemi. Hry a aktiwity rozšěrjeja słowoskład, při čimž so wšitke zmysły – słyšenje, widźenje, tasanje, čuchanje a słodźenje – zapřijeja. Wothłós wobdźělnikow na dalekubłanje běše přewšo pozitiwny. Wšako běše to wulkotna składnosć, nowe metody zeznać a direktnje wuspytać. Referentce Petra Sochova a Petra Zahradníčkova stej pedagogow ze swojej fachowej wědu a zahoritosću inspirěrowałoj.