Fachowc: Dźeń a mjenje ptačkow
Z młodej mocu na dobro ludźi
Gmejnska wohnjowa wobora Ralbic-Róžanta z nowym nawodu
Šunow/Ralbicy (JK/SN). Wot minjeneje soboty ma gmejna Ralbicy-Róžant noweho nawodu gmejnskeje wohnjoweje wobory. Na hłownej zhromadźiznje wobornikow gmejny wuzwoli wulka wjetšina kameradow Šunowčana Michała Maywalda. Jeho naměstnik je Smjerdźečan Norbert Wróbl.
33lětny Michał Maywald je hižo lěta dołho dźěl wohnjoweje wobory a žadanja a winowatosće wobornikow kaž tež naroki jich dźěła derje znaje. Jeho zasada bě a je znate hesło wobornikow: Bohu k česći a ludźom k wužitkej. Tak je so stajnje tež za to zasadźował, zo maja wobory delanskeje gmejny dosć personala, dobre wuhotowanje a zo móža nadawki wohnjoškita a najwšelakorišeje techniskeje pomocy zwoprawdźeć. Cyłkownje su to štyri wobory – w Ralbicach, Konjecach-Šunowje, Smjerdźacej a Sernjanach. Tuchwilu ma gmejnska wohnjowa wobora 127 aktiwnych čłonow, 47 w starobnym wotrjedźe a 15 w młodźinskej wohnjowej woborje.
Móst budźe k jutram hotowy
Worklecy (SN/Žu.) Móst mjez Worklecami a Lejpoldom ma so hišće do jutrow sporjedźeć. To su radźićeljo Worklečanskeje gmejny wčera jednohłósnje wobzamknyli. Móst su loni za wobchad zawrěć dyrbjeli, dokelž hižo wěsty njeje. Trěbny pak wón je, a to nic jenož za šulski bus Róblec předewzaća, kotryž ma wokołopuća dla wjace wudawkow.
Za wuporjedźenje mosta liči gmejna z wudawkami hač do 15 000 eurow. Hač do přichodneje srjedy maja firmy we wobmjezowanym wupisanju swoje poskitki zapodać. Radźićeljo wjesnjanostu Clemensa Poldracka wčera społnomócnichu, zo smě nadawk za skowanske dźěła potom bjez dalšeho komdźenja wudać, zo by móst, kotryž tež někotři křižerjo wužiwaja, k jutram hotowy był.
Poprawom bychu nowy móst twarić dyrbjeli. Wudawki we wobjimje 100 000 eurow pak gmejna sama njesć njemóže. Tuž chcedźa so wo městno na prioritnej lisćinje Budyskeho wokrjesa prócować, štož by jim spěchowanje we wobjimje 75 procentow wunjesło. Šansu na to pak maja najzašo za dwě lěće.
Radźićeljo so wětrnikam spjećuja
Łaz (AK/SN). Planowane milinowe wětrniki mjez Běłym Chołmcom a Koblicami Łazowska gmejnska rada dale wotpokazuje. Z tym wuprajeja so radźićeljo přećiwo posudkej prawniskeho dohladowanja Budyskeho wokrjesa. Stara gmejnska rada bě před lětom planam inwestora přihłosowała. Nowa gmejnska rada wobhladuje tónle rozsud kritisce a je stary rozsud w nowembrje 2024 cofnyła. Přećiwo tutomu rozsudej je so wjesnjanosta Thomas Leberecht (CDU) wuprajił. Wutoru pak radźićeljo swoje měnjenje z nowembra wobkrućichu. Kaž wjesnjanosta připowědźi, zaběra so gmejnska rada z milinowymi wětrnikami w aprylu znowa.
Drje jedne z najwjetšich jutrownych jejkow scyła zhotowja tuchwilu w ...
Stat dyrbi zamołwitosć přewzać
Socialne wudawki w Budyskim wokrjesu dale stupaja. Tohodla su zamołwići wo rozmołwu ze sakskim knježerstwom prosyli. Hišće tónle tydźeń planuja zhromadne wuradźowanje. Samo skóržba přećiwo Swobodnemu statej je móžna.
Budyšin (SN/BŠe). Změny zakonjow, inflacija a wójna w Ukrainje wyše wudawki Budyskeho wokrjesa zawinuja a so negatiwnje na etat wuskutkuja. Nimo kóštow za hladanje a posłužby zarjadow poćežuja tež reforma bydlenskeho pjenjeza Zwjazka a stupaca ličba přiražkow za prěnje wuhotowanje bydlenskeho ruma za potrjechenych financielne połoženje wokrjesa. Tole je wokrjesne zarjadnistwo minjenu wutoru tež wuběrkej za socialne, kubłanske, kulturne a serbske naležnosće zdźělił. Wokrjes ma přiběrajcy ćeže wurunany etat předpołožić. Hižo jutře so ze sakskim ministerskim prezidentom Michaelom Kretschmerom (CDU) wo tym rozmołwja.
Krótkopowěsće (13.03.25)
Kandidataj nastupitaj
Kamjenc. W Kamjencu dyrbja wobydlerjo lětsa 28. septembra noweho wyšeho měšćanostu wolić. Mjeztym staj so kandidataj přizjewiłoj, kotrajž k wólbam nastupitaj. Prěni je Kamjenski decernent za twarstwo Michael Preuß. Dalši kandidat je jurist Alex Theile. Tuchwilny wyši měšćanosta Roland Dantz (Swobodni wolerjo) hižo njenastupi.
Nowych lěkarjow witali
Budyšin. W Budyskim Hornjołužiskim klinikumje su zamołwići wčera noweho šeflěkarja prof. dr. med. habil. Steffena Schöna witali, kotryž je fachowc na polu mediciny wutroby. Wón je hnydom swój cyły team kardiologije sobu do Budyšina wzał. To su lěkarjo prof. dr. Carsten Wunderlich, dr. Andreas Preißner, dr. Stephan Wiedemann a dr. Alexander Francke kaž tež sobudźěłaćerka Nicole Fröhlich. Do toho su wšitcy w Pirnje hromadźe dźěłali.
Trump Čechow wubudźił
Wočerstwjenje za strowotu bytostne
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (65).
Spar je jedna z esencielnych, potajkim bytostnych, za žiwjenje trěbnych funkcijow našeho ćěła. Bjez spara njemóžemy so wočerstwić a so regenerować. Za našu ćělnu a dušinu strowotu je spar njeparujomny. Što pak so stanje, hdyž raz dlěši čas njespimy? Hižo někotre hodźiny po tym zo bychmy w normalnym padźe do łoža šli, so mučnota na naše kognitiwne zamóžnosće wuskutkuje. Koncentracija popušća, pomjatk špatnišo dźěła, reakciski čas bywa dlěši. To drje klinči skerje njestrašne, tola riziko njezbožow je nětko hižo wjetše. Wosebje, hdyž smy z awtom po puću, abo hinaše wozydła abo mašiny posłužujemy.
„Nocy w muzeju“ ze sta zajimcami
Zhromadnje sej zahrać
Pančicy-Kukow. Pod hesłom „Škot, rommé a co“ přeprošuje Domowinska skupina Pančicy-Kukow na swoje přichodne zarjadowanje jutře, štwórtk, we 18.30 hodź. do farskeje wikarije. Prěni raz wuhotuja tam hrajny wječor, na kotryž tež wšitkich dalšich zajimcow přeprošuja. Wšitcy njech swoju najlubšu hru sobu přinjesu, wšojedne hač karty za škot a rommé abo kóstki a figury za hry na desce. Poskićeć budu njealkoholiske a alkoholiske napoje za mały fenk. Předsydstwo Domowinskeje skupiny so na bohatu ličbu wobdźělnikow wjeseli.
Wotewru wustajeńcu
Budyšin. Wuměłstwowe towarstwo Budyšin spřistupnja wot pjatka, 14. měrca, wosebitu wustajeńcu „Praj mi, hdźe te kwětki su“ w Galeriji Budissin. Hač do 2. meje pokazuja tam přehladku twórby Almut-Sophije Zielonki. Wernisažu w 19 hodź. wobrubi hudźbnica Cathleen Donath na instrumenće handpan – je to warianta klinčacych bitnych nastrojow – a wustajowaca wuměłča recituje swójske basnje.
Přednošuje wo dyrdomdeju
