Njebjelčanska gmejna wočakuje přichodne lěta wulki deficit

Njebjelčicy (JK/SN). Njebjelčanskej gmejnskej radźe bě w jeje klawsurnym wuradźowanju wědome, zo njebudźe ­nastajenje lětušeho hospodarskeho plana lochko. Wšitke lutowanske naprawy zličiwši wostanje přiwšěm wulki a bolostny minus pod smužku. Krajnoradny zarjad je tuž gmejnje namjetował, w ramiku konsolidacije dochody zwyšić, a to z wjetšej sadźbu za ležownostnej daw­kaj A a B kaž tež z wyšimi přinoškami staršich za pěstowarnju. Jelizo bychu ­radźićeljo tute bolostne naprawy wobzamknyli, njeby so to bytostnje na wuslědki hospodarskeho plana wuskutkowało. Nimo toho njesměli so sćěhi wulkeje politiki na wobydlerjow wuskut­kować. Wo tym su sej Njebjelčanscy radźi­ćeljo přezjedni a tak na swojim wčerawšim posedźenju namjety Budyskeho krajnoradneho zarjada jednohłósnje wotpokazachu. Namjet wobsahowaše zběhnjenje sadźby za ležownostny dawk A wot tuchwilu 320 na 340 procentow a za dawk B wot 450 na 490 procentow. Přemysłowy dawk by pola 400 procentow zwostał.

Njeswačidło. Přirodowa centrala Budyskeho wokrjesa pyta wot tohole tydźenja informacije wo tym, hdźe je bobr aktiwny a hdźe je swoje slědy zawostajił. Přičina je, zo chcedźa jednotliwe rewěry bobra we wokrjesu zwěsćić a dokumen­tować. Iniciator je spěchowanske towarstwo Njeswačanskeje ptakoškitneje stacije. Kónc 18. lětstotka je so bobr z Hornjeje Łužicy zhubił. Dźensa wón tu zaso je a so podłu rěkow w regionje hornjołužiskeje hole a hatow wupřestrěwa. Bobr je kruće škitany. Štóž je jeho slědy wuhladał, móže to na stronje abo e-mailnje pod zdźělić.

Twarja móst nad Čornicu

Chór Lipa přebywaše minjeny kónc tydźenja pod nawodom Jadwigi Kaulfürstoweje w Jawerniku-Nechowje (Jauernick-Buschbach) blisko Zhorjelca na swojim lětušim probowym lěhwje. Wjace hač 50 spěwarkow a spěwarjow nazwučowaše mjez druhim nowe spěwy za nalětni koncert, kotryž budźe 18. meje na klóšterskej zahrodźe w Pančicach-Kukowje. Na klawěrje přewodźał je spěwarki a spěwarjow Jan Brězan. Tež wjacori swójbni, mjez nimi nimale 20 dźěći, su chórowych čłonow přewodźeli. Z rjanej tradiciju je zhromadne pućowanje so­botu popołdnju – tónraz podachu so k schowanemu Libelowemu hatej.

Ale tež chórowy dorost je pilnje za swój wustup na nalětnim koncerće zwučował. Lipki přednjesu zaso někotre nowe dźěćace spěwy – směmy wćipni być. Proby z dorostom stej staršej Lipce Sarah a Milena samostatnje nawjedowałoj. „Je rjenje wobkedźbować, kak kóždy – hač w Lipje abo pola Lipkow – swój nadawk zamołwiće a z wjeselom přewza“, so dirigentka Jadwiga Kaulfürstowa wjeseli. Dźak słuša wosebje tež angažowanym staršim, kotřiž su za čas probow z dźěćimi jejka debili abo kukawče twarili.