Radwor. Chór Meja přeproša na přednošk wo prěnjej pomocy z Frankom Wowčerjom wutoru, 17. oktobra, w 19.45 hodź. w Radworskim Słodeńku. Přednošk wopřijima wospjetowanje a skrućenje wědy wo prěnjej pomocy kaž tež praktiske zwučowanja.

Dźěłarnička Bjesadow

Hory. Serbske ewangelske towarstwo a Horjanska Bjesada přeprošatej na kóždolětnu dźěłarničku Bjesadow, w kotrejež wobłuku „so čłonojo a zajimcy zetkaja, zeznaja, wuměnja a dale kubłaja“. Lětsa přewjedu ju druhi raz na Horach, a to sobotu, 21. oktobra, na žurli gmejnskeho zarjada. Zetkanje zahaja w 14 hodź. z nutrnosću ze superintendentom Krystofom Rummelom. Na to předstaji Horjanska Bjesada nazymske nałožki dokoławokoło serbskeje kermuše we Wojerowskej kónčinje. W 16.30 hodź. předstaji dźiwadłowa skupina towarstwa Bratrowstwo komediju „Skónčnje něšto z niwowom“ ze simultanym přełožkom do němčiny w hosćencu „K lipje“.

Awto rozdrapali

Kamjenc. Tójšto škody načinili su nje­znaći minjene dny w Kamjencu. Tam bě wobsedźer Mercedesa swoje awto hižo 8. oktobra na bebelowej parkował. Sobotu rano dyrbješe zwěsćić, zo bě něchtó prawy bok noweho SUV rozdrapał. Škodu trochuje policija na něhdźe 3 000 eurow. Kriminalna słužba pad přepytuje.

Nowe wjesne towarstwo prěni wjetši objekt zwoprawdźa

Serbske Pazlicy (AKr/SN). W Serbskich Pazlicach załožichu loni wjesne towarstwo „Debrička“. Pomjenowali su je po wjesnej rěčce. Ideju za wjesne towarstwo zrodźichu při zhromadnej bjesadźe. Wosebje za čas korony je wjesne žiwjenje nimale wusnyło. Tule situaciju nochcychu wjesnjenjo akceptować. Nimo toho w Serbskich Pazlicach žanu rumnosć za zetkanja nimaja. Cil towarstwa „Debrička“ je porjeńšenje wjesneho napohlada a zhro­madne angažowanje za wjesne žiwjenje. Wulki són je wutworić wjesny zetkawanski centrum za wšitke generacije. Nastać móhł wón při sportnišću, kotrež hižo dawno jako městnosć za wjesny swjedźeń abo mejemjetanje wužiwaja. „Ale to je najprjedy raz són“, praji Claudija Liznarjowa, kotraž je pokładnica towarstwa a za zjawnostne dźěło zamołwita.

Tež lětsa přeprosy Domowinska skupina Šunow-Konjecy na wulět. Je z dobrej tradiciju, zo sej rjanosće a zajimawostki našeje domizny jako cil wupytamy. Startowachmy z busom na twjerdźiznu Königstein. Hižo w busu zhonichmy něšto wo stawiznach tohole taflowca a wězo tež wo wokolinje, po kotrejž běchmy po puću. Zajimawe wodźenje po sobu najwjetšej twjerdźiznje w Europje sćěhowaše. Tak pobychmy na městnosćach, kiž hewak jako wopytowar njewidźiš. Po wulkich chódbach labyrinta móže so čłowjek zabłudźić. Wobdźiwachmy, kak su twjerdźiznu něhdy twarili a kak su na njej žiwi byli. Dźensa přewjeduja tam cyłe lěto najwšelakoriše zarjadowanja. Wosebity tip drje su adwentne wiki.

Dale jědźechmy do Wehlena k wobjedu. Njedaloko hosćenca maja tam miniaturowy park. W nim su typiske městnosće regiona widźeć. Z wjeselom wuhladachmy tam něhdyšu starownju w Swinarni. Tute twarjenje běše jónu jara wažna póštowa stacija při sławnej dróze Via regia. Samo konje hodźachu so tam wuměnić.