Policija (31.03.25)
„Dyrdomdej“ w měsće
Kamjenc. Wulka rozhorjenosć knježeše sobotu popołdnju w Kamjencu. Tam bě so třilětne dźěćo na Hraničnej hasy na dyrdomdejske pućowanje po měsće podało. Něhdźe połtřeća hodźiny bě holčka zhubjena. Kaž policija rozprawja, běštaj sej staršej připołdniši wotpočink popřałoj a sej mysleštaj, zo tež jeju dźěćo spi. Te pak z wočinjenymi durjemi z domu twochny. Třilětna bě jeničce w pjeluškach. To napadny kedźbliwej wobydlerce na Karla Marxowej. Žona dźěćo policiji přepoda. Na zbožo so ničo stało njeje, tak zo móžachu holčku spěšnje zaso maćeri a nanej dowjezć. Žonje, kotraž bě ju wuhladała, so policija wuraznje dźakuje.
Dźěćo tragisce znjezbožiło
Brěznja. Tragiske dźěłowe njezbožo je so sobotu popołdnju w Brězni pola Kamjenca stało. Při bagrowanju na priwatnej ležownosći je sydomlětny hólc ćežko znjezbožił a hišće na městnje zemrěł. 54lětneho wodźerja bagera a mać dźěsća lěkarsce zastarachu. Kriminalna policija pad přepytuje.
Wohnjowych wobornikow wołali
Přepruwuja potrjebu personala
Wojerecy (AK/SN). Na swojim posedźenju su Wojerowscy měšćanscy radźićeljo jednohłósnje nadawk na eksterne předewzaće schwalili, kotrež ma personal měšćanskeho zarjadnistwa analyzować a nowy wuwićowy koncept za personal zdźěłać. Wotpowědnu próstwu běchu frakciji CDU a SPD kaž tež frakcija Aktiwne Wojerecy/Zeleni zapodali. Fachowe předewzaće ma dokładnje pruwować, kelko dźěłowych městnow je w měšćanskim zarjadnistwje trěbnych, a wuslědk z personalnym wuhotowanjom podobnje wulkich komunow přirunować. Zdobom ma wone pruwować, hač je fachowy wobłuk za wuwiwanje a planowanje města trěbny a móžny. W decembru běše frakcija Aktiwne Wojerecy ideju za tajki fachowy wobłuk do diskusije dała.
Lěto a mjenje móžnosćow
Najebać chutnu financnu situaciju wjedu w Radworju wažne projekty dale
Radwor (UM/SN). Planowanje nowotwara za hort je tež lětsa – kaž hižo loni – wažne předewzaće w Radworskej gmejnje. „Lětsa chcemy projekt za přizwolenje přihotować“, rozłožuje wjesnjanostka Madeleine Rynčowa (njestronjanka). Wotpowědnje studiji, kotraž je móžnosće zwoprawdźenja pruwowała, by so hort najlěpje na šulskej ležownosći natwarić měł. „Nowy hort změje kapacitu sto městnow“, praji wjesnjanostka. Dotal su twarske kóšty we wysokosći cyłkownje štyrjoch milionow eurow zaplanowali. Bjez spěchowanskich srědkow wšak gmejna projekt zwoprawdźić njemóže. Hladajo na tuchwilne wuslědki planowanja pak je Madeleine Rynčowa optimistiska, zo spěchowanje dóstanu.
Natwarja molu při Šibojskim jězoru
Za łužiski region něhdyšeho brunicoweho hórnistwa je změna strukturow šansa z nowymi hospodarskimi a turistiskimi perspektiwami. Tak tež kołowokoło Šibojskeho jězora.
Wojerecy (KD/SN). Při Šibojskim jězorje su so čłonojo Wojerowskeho Kruha přećelow stawiznow hórnistwa minjenu wutoru z Jörnom Süßmilchom, jednaćelom eta AG zetkali. Tute łužiske předewzaće planuje a přewjedźe tu hižo wjacore lěta w nadawku města Wojerecy wuwiwanje zapadneho přibrjoha jězora.
Dohromady 30 milionow eurow zwjazkowych spěchowanskich srědkow po zwjazkowym zakonju za inwesticije do brunicowych regionow ma eta AG k dispoziciji. Tuchwilu zarjaduje wona na pobrjohu terasy z wjacorymi schodźenkami. Za to su tež štomy pušćeć dyrbjeli. Na tute wašnje móža wjetše płoniny za kupanje kaž tež bjezbarjerny přistup k wodźe z wobłoženjom a wobswětlenjom zarjadować.
44 młodostnym je Drježdźansko-Mišnjanski biskop Heinrich ...
Krótkopowěsće (31.03.25)
Přirodu sej wotkrywać
Drježdźany. Sakske ministerstwo za wobswět zarjaduje lětsa tak mjenowane wuchodźowanja po přirodźe. Wjace hač 300 turow po cyłym swobodnym staće skića zajimcam móžnosć, so bliže wo krajinje a přirodźe informować. 66 zarjadowanjow chcedźa w Hornjej Łužicy přewjesć. Dokładniše informacije nadeńdźeće w interneće pod: https://www.fruehlingsspaziergang.sachsen.de/
Znowa demonstraciju přewjedli
Budyšin. Něhdźe 180 ludźi je so zawčerawšim w Budyšinje na demonstraciji wobdźěliło, kotruž běchu prawicarscy ekstremisća přizjewili. Demonstracija je so na Žitnych wikach zahajiła, wottam ćehnjechu wobdźělnicy do Strowotneje studnje. Woni žadachu sej změnu azyloweje politiki kaž tež zawrjenje hranicow po cyłej Europje.
Tunlej zawru
Ekumeniski póstny seminar
Smochćicy. Rjad zarjadowanjow lětušeho ekumeniskeho póstneho seminara pod hesłom „Wobchad z wohnjowymi murjemi – wotmjezowanje a mjeza“ zakónča póndźelu, 31. měrca, w 19.30 hodź. z filmowym wječorkom w Smochčanskim kubłanišću swjateho Bena. Zarjadowarjo wšitkich zajimcow wutrobnje přeprošuja.
Casting za Krabatowu sagu
Čorny Chołmc. Kulturny centrum Krabatowy młyn tzwr přeprošuje wšitkich, kotřiž rady spěwaja, rejuja abo dźiwadło hraja, na wulki casting za lětušu Krabatowu sagu „Z wodychom nawróta“. Na dworje Krabatoweho młyna pyta jury, kotrejž přisłušeja mjez druhim režiser Michael Kuhn a projektny nawoda Anton Fuchs, 5. apryla wot 11 hodź. za statistami a komparsami. Zhromadnje chcedźa k tomu přinošować, zo tež lětuša inscenacija znowa publikum zahori.
Wóskowanje jejkow nawuknyć
Pisany a wotměnjawy wjeršk
Wo přihotach swjedźenja składnostnje 800. róčnicy Kamjenca informowali
Kamjenc (BG/SN). Swój wulki swjedźeń składnostnje 800lětneje róčnicy prěnjeho naspomnjenja swjeći město Kamjenc lětsa wot 16. do 18. meje. Hižo na silwesterskim zarjadowanju na Kamjenskim torhošću je měšćanske zarjadnistwo dohromady 3000 wobdźělnikow na to skedźbniło, zo budźe to pisany, wjesoły a wotměnjawy jubilejny wjeršk. Z nim chcedźa hosći z cyłeje Łužicy kaž tež zwonka njeje přiwabić.
Wčera dopołdnja je měšćanske zarjadnistwo na nowinarsku konferencu do słužbneje stwy wyšeho měšćanosty Rolanda Dantza (njestronjan) přeprosyło. Nimo mnohich nowinarskich zastupjerjow regiona běchu tež sponsorojo a zastupjerjo towarstwow přichwatali, zo bychu swoje přinoški za swjedźeń města předstajili. Kruhej sponsorow je so łužiski awtowy dom Winter přidružił. W zwisku z tym přepoda Roland Dantz jednaćelce předewzaća Elisy Winter historiske wopismo.
