Napjaty dźeń z překwapjenku
Serbskopazličanske karnewalowe towarstwo ma nowy princowski por
Serbske Pazlicy/Njebjelčicy (AKR/SN). Wobydlerjam Njebjelčanskeje gmejny bě lětuši 11.11. wosebje wužadowacy dźeń. Wšako mějachu tójšto terminow zmištrować. Započachu jón z Božej mšu na swjateho Měrćina, patrona wosadneje cyrkwje. Zdypkom w 11.11 hodź. zetkachu so čłonojo karnewaloweho towarstwa w „Bjesadźe“, zo bychu 5. sezonu lěta zahajili. Do toho přijimaštaj amtěrowacy princ Clemens I. a jeho princesna Celine I. z rukow wjesnjanosty Andreja Bulanka symboliski kluč a gmejnsku kasu. Na to podachu so do wosadneje žurle. Tam čakachu hižo princowe pory zašłych lět, kotrež běchu k wobjedu přeprošene. Po słódnym wobjedźe a wjesołych zhromadnych hodźinach bu žurla za wječorne wólby noweho princa přerumowana. Swójby dožiwichu na nyšporje w cyrkwi krótku scenu wo dźělenju. Před cyrkwju předstajichu stawiznu wo swjatym Měrćinje w hrě. Po tym poda so procesion z lampionami a hudźbnym přewodom akordeona po wsy. Na farje wudźělichu dźěćom Měrćinowu całtu, kotruž sej wšitcy dźělachu.
Z dźěćimi štomy a kerki sadźeli
We wobłuku cyłosakskeje akcije „1 000 štomow - Sakska zhromadnje sadźa“ je so Njebjelčanska skupinka wobydlerjow z mjenom „Njebjelčicy: My-začuće“ na wupisanju wobdźěliło a kerki kaž tež štomy přijała.
Njebjelčicy (SN/MiR). Mustwo wokoło Njebjelčan mandźelskeju Norberta a Maiju Šefrichec je po cyłej gmejnje po puću, zo by so „gratu přimała“, hdźežkuli je to trjeba. Tak je we wsach gmejny hižo na wšelakich městnosćach zelenišća připrawiło a tójšto wuporjedźało. Minjeny pjatk su njedaloko pěstowarnje „Jan Skala - Barbojte kamuški“, na hórce před zarjadnišćom tři štomy wosadźili. Pjeć kerkow janskich jahodkow su tam hižo před tydźenjom sadźili. Kaž Norbert Šefrich rjekny, maja tute rostliny wšitkim, kotřiž chcedźa sej něšto ze- abo našćipać, přistupne być. Wosebje pak su za dźěći myslene. Kerki a štomy steja tak, zo ma kóždy móžnosć sej tam dóńć. Hač k prěnim žnjam zańdu zawěsće dwě lěće. „Nam je wažne, zo dźěći přez cyłe lěto wuwiće rostlinow wobkedźbuja a při tym tójšto nawuknu.
Karnewalowe towarstwo w Serbskich Pazlicach je zašłu sobotu swoju ...
Wuspěchi bóle wuzběhnyć
Konferenca wo połoženje łužiskeje změny strukturow w Choćebuzu
Choćebuz (dpa/SN). Wobzamknjenja nastupajo skónčenje zmilinjenja brunicy je tři lěta stare. Što je so wot toho časa w změnje strukturow we łužiskich rewěrach činiło? Wědomostnicy su na konferency w Choćebuzu prěnju bilancu sćahnyli a maja jasne poselstwo politice.
Wjelk znowa zachadźał
Jawora (SN). Zašły kónc tydźenja zachadźachu wjelki na Klóšterskej w Jaworje. Wospjet nadpadnychu wowče stadło. „Wot cyłkownje sydom wowcow bu pjeć wot wjelkow zakusanych, jedna wowca je so zaso namakała a dalša je nadal zhubjena“, rozprawja Anja Leuschner wot Zhorjelskeje policajskeje direkcije.
Posudźowar je zakusanje přez wjelki wopodstatnił. Hižo wosrjedź oktobra žadaše sej krajny rada Udo Wićaz (CDU) po nadpadźe na wowcy, zo bychu so wjelki z Róžeńčan stadła zatřělili. Po jeho słowach njemóže so potrjechenym dlěše wahanje hladajo na rozsud logisce rozjasnić. Najebać wšě móžne škitne naprawy su wjelki hižo k wosmemu razej wowcy nadběhowali. Přiběraca prezenca wjelkow wubudźa hižo chwilu diskusije wo managemenće dźiwiny a škiće wužitnych zwěrjatow. Po wuprajenju dokumentaciskeho a poradźowanskeho městna Zwjazka (DBBW) běchu w lětomaj 2022/23 184 wjelčich črjódow, 47 wjelčich porow a 22 jednotliwje zasydlenych wjelkow w Němskej žiwych – najwjace w Sakskej, Braniborskej a Nižosakskej.
Krótkopowěsće (14.11.23)
Dale w krótkodźěle
Kamjenjej. Sobudźěłaćerjo kaolinownje blisko Rakec maja hač do kónca lěta hišće w krótkodźěle zwostać. Wo tym informuje zawod. Přičina za to je dale snadne naprašowanje kaolina za papjerowu industriju. Nětko nadźijeja so na nowych partnerow, na přikład z cementoweje industrije.
Nowosći w syći
Budyšin/ Chrósćicy. Dwě nowosći předstajichu serbske cyłki poslednje dny w socialnych syćach: Medijowi skawća, dźěl studija LUCIJA, su swój prěni spěw wozjewili. Pod titulom „Nimamy (hišće) bok na šulu“ zaběraja so młodźi skawća na lóštne wašnje ze šulu. Widejo je na YouTube přistupny. Na Instagramje je kapała Holaski připowědźiła bórze prěnju kolekciju drastow wudać. Bliše informacije maja bórze slědować.
Najwyši eksorcist je Čech
Štož wo toksoplasmozy wědźeć měli
Nic jenož na wsach, ale tež w městach maja mnozy domjacy skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu přinošować chce naša serija z pokiwami z weterinarneje mediciny. (19)
Kaž so druhdy njelubozne postajenja w małym ćišćanym pismje zrěčenja chowaja, tak lesćiwje zamóža so tež najmjeńše parazity do hóstnych ćěłow dóstać a wulke škody zawinować. Rěču dźensa wo móličkim paraziće Toxoplasma gondii. Tež mnohim žonam, kotrež běchu hižo raz zańdźene, mjeno cuze njeje.
Parazit bydli najradšo w kóčkach, dokelž móže so jenož tam rozmnožić. Wotwisnje wot žiwjenskeho stila, hač je to domjaca kóčka abo wonka tež po puću, hač zežiwi so jenož z kupjenej picu abo hač tež sama honi atd., so něhdźe 60 procentow wšěch kóčkow w běhu žiwjenja z toksoplasmozu inficěruje.
Wjetšina kóčkow žane wulke problemy nima. Jeničce jara młode abo jednotliwe z imunowymi ćežemi, dóstanu židlawu, defekty wóčkow, njekoordinowanosć pohibow abo zymicu.
Dalekubłanje za młodych
Worklecy. Worklečanske dušepastyrstwo młodźiny přeprošuje serbskich młodych dorosćenych w starobje mjez 18 a 30 lět na zhromadny kubłanski dźeń. Tón wotměje so sobotu, 6. januara 2024 w Budyšinje. Přizjewjenja přijimuja jeničce online hač do wutory, 12. decembra, pod: .
Wědomostnik Leo na wopyće
Kamjenc. „Wot laboroweje kuriozity k inowatiwnemu displayjej“ – z tutej temu zaběra so srjedu, 15. nowembra, w Kamjenskej měšćanskej bibliotece profesor za optoelektriku na Drježdźanskej Techniskej uniwersiće Karl Leo. W zarjadowanju w rjedźe „Słowa a běłe wino“ poda so ze zajimcami wot 19 hodź. na ekskursiju do fascinowaceho swěta swojeho slědźenja. Wón rozłožuje načasne techniske slědźenje a staw wuwića fleksibelnych solarnych paneelow.
Přednošk w muzeju
Policija (13.11.23)
Bjez znamješka po puću był
Rakecy. 38lětny Němc běše sobotu ze swojim e-rolerom w Rakecach po puću na Nižu Wjes, jako jeho zastojnicy policije zadźeržachu. Tući spěšnje zwěsćichu, zo njeměješe na jězdźidle znamješko zawěsćenja. Nětko wočakuje jězdźerja ranjenja winowatostneho zawěsćenskeho zakonja dla pokutny pjenjez.
Zaso kermušne reje w „Meji“
Druhi raz po přetwarje Radworskeho hosćenca Meja za čas koronapandemije, přewjedźechu tam zašłu sobotu kermušne reje. Do toho wotmě so w kopaće połnej žurli nazymski koncert.
Radwor (pdź/SN). Wito Bejmak, zastupjer Radworskeje staršiskeje iniciatiwy, kotraž koncert zhromadnje z Budyskej Domowinskej župu „Jan Arnošt Smoler“ zarjadowaše, witaše třoch młodych wuměłcow na jewišćo. Hłós Weroniki Kalinučcyneje bě wjetšinje přihladowarjow hižo z mnohich hudźbnych produkcijow Serbskeho rozhłosa znaty. Tež Helenu Hejduškec předstaji wón jako znatu młodu spěwotwórču. Žonomaj hudźbnje po boku běše Jan Brězan při klawěrje. Bejmak wuzběhny wosebje mnohostronskosć studenta wučerstwa za hudźbu a jendźelšćinu a naliči skupiny Brankatschki, Jankahanka, Trio a kumple, Astronawt a Popsorben, w kotrychž je Jan Brězan z čłonom.
