Wulki poskitk na nalětnich wikach
Stróža (SN/MWj). Na mjeztym hižo 22. němsko-serbske nalětnje wiki přirody přeprošujetej zarjadnistwo biosferoweho rezerwata Hornjołužiska hola a haty kaž tež serbske domizniske towarstwo Radiška jutře, sobotu, wot 10 do 17 hodź. do Stróže pola Hućiny. Wiki přewjedu zaso na terenje zarjadnistwa biosferoweho rezerwata. Kaž w nowinskej zdźělence biosferoweho rezerwata rěka, prezentuje tam wjace hač 80 wikowarjow šěroku paletu regionalnych wudźěłkow. Dalši demonstruja wopytowarjam tradicionalne rjemjeslniske techniki. Dypkownje k zahajenju zahrodoweje sezony poskićuja zahrodnistwa najwšelakoriše symjo a rostlinki za sad, zeleninu a korjeniny.
Policija (25.04.25)
Pytaja swědkow njezboža
Chrósćicy. Wodźer mopeda je srjedu rano na dróze mjez Chrósćicami a Wudworjom bjez wobdźělenja dalšich wosobow znjezbožił. 38lětny poda so k lěkarskemu přepytowanju do chorownje. Při přepruwowanju městnosće policisća zwěsćichu, zo bě na dróze wolij. Dalše tajke zanjerodźenje zwěsćichu we Worklecach. Nětko pytaja swědkow njezboža a dalšich, kotřiž su snano wobkedźbowali, štó je pola Chrósćic a we Worklecach wolij zhubił. Pokiwy přijimuja na Kamjenskim policajskim rewěrje pod 03578/ 35 20.
Ćežke wobchadne njezbožo je so wčera popołdnju na statnej dróze ...
Što a kak chcemy wo sebi powědać?
Pod hesłom „Mjeńšiny, klišeje a zwobraznjenje awtochtonych ludow w towaršnosći wjetšiny“ je projekt ZARI - syć za serbsku rěč a regionalnu identitu wčera dopołdnja na diskusiju do Budyskeho Serbskeho muzeja přeprosył.
Budyšin (SN/MiP). Tema podijoweje diskusije steješe we wuskim zwisku z pućowanskej wustajeńcu mjeńšinoweho sekretariata „Što rěka tu mjeńšina? Danojo. Frizojo. Serbja. Němscy Sinti a Roma. Delnjoněmcy“, kotraž ma hač do spočatka junija w muzeju swoje městno. Zarjadowanje je wědomostny sobudźěłaćer w Serbskim instituće (SI) dr. Robert Lorenc moderěrował, kotryž je zdobom kurator wustajeńcy.
Krótkopowěsće (25.04.25)
Sudnistwo za škit přirody
Drježdźany. Zarjadniske sudnistwo w Drježdźanach je předewzaću zakazało, šćerkowu jamu „Łužnica I“ z materialom napjelnić, kiž nima ničo z hórnistwom činić. Sakski wyši hórnistwowy zarjad bě próstwje přizwolił, jamu z cyhelemi, kachlicami, keramiku a twarskimi wotpadkami zasypać. Přećiwo tomu je Zwjazk za škit přirody (NABU) Sakska skóržbu zapodał.
Čerwjeny dub štom lěta 2025
Drježdźany. Składnostnje dźensnišeho dnja štoma je sakski minister za wobswět a ratarstwo Georg-Ludwig von Breitenbuch (CDU) na wosebity wuznam štomow a lěsow za čłowjeka skedźbnił. Lětuši štom lěta, čerwjeny dub, słuša do družin, kiž při dołhodobnym přetworjenju wot jehlinowych k měšanym lěsam wulku rólu hraja, dokelž změnu klimy lěpje znjesu hač jehlinowcy.
Čěsko-bayerske partnerstwo
Trajne syće a mjezsobne styki we Łužicy stworili
W lěće 2026 kónči doba łužiskeho projekta UNESCO 5 – tuž je čas za mjezybilancu
Zamołwići projekta UNESCO 5 dźěłaja w dohromady wosom dźělnych projektach na tym, wšitkich pjeć partnerow dźeń a lěpje mjez sobu zwjazać a mjez nimi naslědne syće wutworić. Jich dźěłowa centrala je jedna ze štyrjoch łužiskich UNESCO-městnosćow, kotrež su do projekta zapřijate: biosferowy rezerwat Błóta. Tu planuja a koordinuja zhromadne dźěło z dalšimi třomi UNESCO-městnosćemi: z geoparkom Mužakowski zahork, z biosferowym rezerwatom Hornjołužiska hola a haty kaž tež z Mužakowskim parkom, kotryž ma status swětoweho herbstwa UNESCO. Pjaty wažny dźěl projekta je imaterielne kulturne herbstwo Serbow – potajkim serbske nałožki a tradicije.
Po dwěmaj lětomaj intensiwneho zhromadneho dźěła njeje UNESCO 5 jenož garant za dale a wobstajniše wuwiće we Łužicy, ale tež zakład za nowe synergije w přichodźe, hladajo na zachowanje herbstwa, wuměłstwo, kulturu, kubłanje a ciwilnu towaršnosć. Runje je projekt swój połčas docpěł. Hač do kónca lěta 2026 chcedźa zamołwići dalše ideje zwoprawdźić.
Premjera wo Dolinje smjerće
Z lońšej premjeru pokročowali
Oldtimery ze spara zbudźene
Kónc tydźenja pojědu štwórty raz motorske po Bóščanskim třiróžku
Bóšicy (UM/SN). Bóščanska gmejna budźe pjatk a sobotu, 26. a 27. apryla, Mekka za lubowarjow motorsporta zbliska a daloka. Štwórty raz organizuja tule Bóščanski třiróžk za oldtimerowe motorske a tajke z pobóčnym wozom. Poslednje mjenowane lětsa sylnišo wobkedźbuja hač w zašłosći. „Mamy tójšto wjace přizjewjenjow zapřahow hač w zašłych lětach. Po wšěm zdaću su ludźo šěrili, zo je naše zarjadowanje atraktiwne“, wjeseli so Bóščanski wjesnjanosta Stanisław Ryćer. Z tym móže tež wjace ludźi z tajkim zapřahom sobu jěć. Na te wašnje zběra Bóščanska gmejna jako zarjadowar pjenjezy za dobry skutk. „Loni bě to na dobro šule a pěstowarnje w Njeswačidle. Do njeju wšak tež dźěći z našeje gmejny chodźa“, Stanisław Ryćer rozłoži. 1 300 eurow su loni nazběrali. Organizatorojo sumu na 1 500 eurow skulojćichu. Tež lětsa chcedźa za dobry zaměr w Bóščanskej a Njeswačanskej gmejnje pjenjezy zběrać.
Policija (24.04.25)
Kolesowar ćeknyć chcył
Budyšin. Zastojnikam Budyskeho policajskeho rewěra je wutoru wječor krótko do 23 hodź. kolesowar na Mosće měra napadnył, dokelž tam trochu njewěsće jědźeše. Jako chcychu policisća muža kontrolować, tón nadobo mócnje do pedalow teptaše, zo by jim wućeknył. Najprjedy jědźeše po dróze Při pólnym hrodźiku. Na to pak muž znjezboži, nichtó druhi wobdźěleny njebě. Pola njeho naměrichu 1,74 promilow alkohola w kreji.
