Zelena swěcaza nowu dróhu
Hamor/Čorna Pumpa (AK/SN). Druhi wotrězk Sprjewineje dróhi K 9281 wot Hamora do Čorneje Pumpy smě so twarić. Za to je krajna direkcija nětko twarsku dowolnosć dała, zdźěli jeje nowinski rěčnik Ingolf Ullrich. Jedna so wo 5,2 kilometraj dołhi wotrězk wot Sprjejc do Noweho Města.
„Z tutej twarskej dowolnosću móže so nětko dołho wočakowany zwisk mjez industrijowymaj centrumomaj Hamor a Čorna Pumpa dotwarić“, praji prezident krajneje direkcije Béla Bélafi. „Nowotwar wolóža zdobom wobydlerjow w Nowym Měsće, Nowej Wsy a Sprjejcach wot poćeženjow ćežkich nakładnych awtow na dróhach.“ Prěni wotrězk Sprjewineje dróhi wjedźe wot Hamora do Mułkec.
Přednošuje wo Namibiji
Za podružnikow a přenajerjow
We Wojerecach předleži po wjele lětach zaso podružny špihel
Wojerecy (AK/SN). Za město Wojerecy předleži po wjele lětach zaso aktualny podružny špihel. „Tónle přehlad je wažny instrument, po kotrymž móža so podružnicy kaž tež přenajerjo orientować. Wón škita podružnikow před přewysokimi žadanjemi a posrědkuje přenajerjam zakład za posudźowanje, hač je wěsta podruž přiměrjena“, praji Florian Schweiger z hospodarskeje poradźowanskeje towaršnosće Domus na zašłym posedźenju měšćanskeje rady.
Defibrilator móže žiwjenje wuchować
Wulka Dubrawa (UM/SN). Hdyž někomu wutroba zapraji, je spěšnje pomoc trěbna. Prěnje minuty wo tym rozsudźa, hač a kak móže potrjecheny dale žiwy być. Z pomocu defibrilatora móže so tež lěkarski lajk wo to postarać, zo wutroba zaso w prawym takće bije. Tajkile, kóždy čas zjawnje přistupny techniski nastroj za wuchowanje žiwjenja maja wot njedawna we Wulkej Dubrawje.
Zmóžnił je to ze swojim darom předewzaćel Patrice Konetzky, kotryž ma we Wulkej Dubrawje awtowe předewzaće. „2024 smy naše dźesaćlětne wobstaće swjećili“, wón rozłoži. Při tutej składnosći sym so rozsudźił, gmejnje defibrilator darić. Sprěnja je to zmysłapołna a dobra wěc. A zdruha to našemu jubilejej lěpje wotpowěduje hač zarjadowanje z piwowym wozom a praženymi kołbaskami.“ Jako wjelelětny wohnjowy wobornik Patrice Konetzky wě, kak wuska je na přikład w padźe infarkta wutroby šćežka mjez žiwjenjom a smjerću.
Při dźeń a rjeńšim nalětnim wjedrje so zaso na wjacorych ...
Digitalnje po rěčnej krajinje dundać
Na digitalne wuchodźowanje po rěčnej krajinje je wčera nawječor zaso rěčna motiwatorka projekta ZARI, Juliana Kaulfürstowa, zajimcow do swojeho běrowa na farje w Slepom přeprosyła.
Slepo (SN/mb). Kaulfürstowa nawjaza z prezentaciju na swoju dźěławosć jako zamołwita za projekt Serbskeho instituta (SI) „rěčna krajina Slepo“. W nim su mjez druhim Marek Slodička, Syman Blum a Kito Kśižank, Gerald Schön, Hartmut Hantšo, Hync Rychtaŕ, Hanzo Mrosk a Fabian Kaulfürst sobu skutkowali. Wuslědki su na portalu wědy SI Sorabicon přistupne. Kaž Juliana Kaulfürstowa hromadźe z wopytowarjemi móža so tež čitarjo našeho wječornika na tute digitalne wuchodźowanje podać, započejo z přehladom pod .
Krótkopowěsće (13.05.25)
„Kralestwo Němska“ zakazane
Berlin/Drježdźany. Zwjazkowe ministerstwo nutřkowneho je towarstwo „Kralestwo Němska“ zakazało. Zdobom je zwjazkowe statne rěčnistwo štyrjoch wodźacych čłonow skupiny reichsbürgerow zajeć dało, mjez nimi Petera Fitzeka. Wón chcyše před lětomaj swjedźeń w Bjerwałdźe swjećić, kotryž je gmejna Hamor zakazała. Krajny kriminalny zarjad Sakskeje nětko zamóženstwo towarstwa sćazał.
Posledni wotrězk B178 dotwarili
Žitawa. Dźěła na třećim twarskim wotrězku zwjazkoweje dróhi 178 su dokónčene. Z tym je wobchadny zwisk wot awtodróhi A4 směr juh do třikrajoweho róžka mjez Němskej, Pólskej a Čěskej dospołny. Nimale šěsć kilometrow dołhi wotrězk mjez wjeskomaj Mittelherwigsdorf a Oberseifersdorf, kotryž jej jako wobjězdka zdobom wolóža, poswjeća njedźelu, 25. meje. Dźeń po tym dróhu za wobchad wotewru.
Suknja za muži w poskitku LABA
Škit klimy je zdobom škit strowoty
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (69).
Změna klimy njeje dawno wjac jenož ekologiska kriza. Přiběrajcy wona tež zjawnu strowotu wohroža. Runja globalnym temperaturam stupa ćišć na chorownje, hladarnje a cyły strowotniski system. Dawno hižo warnuja lěkarjo a lěkarki: Změna klimy škodźi nam wšěm, wosebje pak zranliwym skupinam towaršnosće. Kaž Roberta Kochowy institut zdźěli, zemrě w lěće 2024 něhdźe 3 000 wobydlerjow Němskeje na sćěhi ekstremnych temperaturow. Wosebje běchu to starši ludźo abo tajcy z chroniskimi chorosćemi.
Malešecy bórze w telewiziji
Wjace wěstoty na šulskim puću
Dźěwin (AK/SN). Mjez Dźěwinom a Slepom ma bórze kolesowanska šćežka podłu hłowneho puća nastać. Tole zdźěli twarski zamołwity Slepjanskeho zarjadniskeho zjednoćenstwa Steffen Seidlich na zašłym posedźenju Dźěwinskeje gmejnskeje rady. „Planowanske podłožki su k nam dóšli. Na tymle zakładźe móža nětko nošerjo zjawnych zajimow swoje stejišćo zapodać.“
Do toho pak dyrbi zarjadnistwo hišće wažnej nadawkaj spjelnić, Seidlich rozłoži. Tak dyrbja zapodać próstwu, zo smědźa lěs wužiwać a dalšu, zo smědźa nowy lěs wosadźeć. Z tym maja so narunać štomy, kotrež dyrbja za kolesowansku šćežku pušćić. Potom hodźi so projekt zwoprawdźić. Profitować maja z toho předewšěm dźěći, kotrychž wšědny puć do Slepjanskeje šule ma wěsćiši być.
