Policija (23.05.25)
Blešu na puć ćisnył
Rakecy. Z njewšědnym padom dyrbješe so policija srjedu popołdnju w Rakecach zaběrać. W tamnišej platowej bydlenskej štwórći wobydlerka wobkedźbowaše, kak něchtó z balkona swojeho bydlenja blešu na puć ćisny. Na zbožo w tym wokomiku ani z awtom ani z kolesom nichtó nimo jěł njeje. Policisća wuslědźichu pozdźišo 48lětneho muža jako podhladneho. Wón změje so nětko strašneho zasahnjenja do nadróžneho wobchada dla zamołwić. Zastojnicy Wojerowskeho policajskeho rewěra pad dale přepytuja.
Šulerjo publikum zakuzłali
Radwor (SN/ VaŽ). Cirkusowy stan sta so wčera při Radworskim sportnišću z manežu za młode talenty. Šulerjo zakładneje šule „Dr. Marja Grólmusec“ prezentowachu wuslědk tři dny trajaceho treninga. Tam su dopokazali kak su zhromadnje pilni a kreatiwni byli. We wobłuku cirkusoweho projekta „Cirkus Hein“ zbližichu sej dźěći pod profesionalnym nawodom prawych artistow zašłe dny wšelake róle a nadźěłachu swójske cirkusowe předstajenje. Dźěći běchu w rjadownje přesahowacych skupinach trenowali. Hač akrobatika, clownerija, reja na powjazu abo kuzłarske wuměłstwo – publikum bě zahorjeny. Tak njejsu jenož swoje motoriske kmanosće skrućili, ale tež socialne kompetency kaž zwjazanosć, wutrajnosć a disciplinu. W połnje wobsadźenej maneži prezentowachu talentowani wuměłcy srjedu a wčera popołdnju swoje kmanosće. „Jónu za štyri lěta tajki cirkusowy projekt w Radworju přewjedujemy“, rjekny nawodnica kubłanišća Angela Rynčowa na naprašowanje SN.
Na mejemjetanje
Njebjelčicy. Dołho su z mejemjetanjom w Njebjelčicach čakali, nětko tak daloko je. Wšitkich wobydlerjow a dalšich zajimcow přeprošuje młodźinski klub njedźelu, 25. meje, w 15 hodź. na wjesne swjedźenišćo. Mjez druhim poskićuja tam kofej a tykanc. Wot 15.30 hodź. wotewru tež zaso gmejnsku biblioteku.
Miłoćicy. Tež w Miłoćicach přeprošuja na mejemjetanje, a to srjedu, 28. meje, w 17 hodź. při wjesnym haće. W tym času tohorunja žurlu přihotuja, za čož kóždu pomocliwu ruku witaja. Wot 19 hodź. proša wjesnjanow na mejske reje.
Rěčna hodźina zapósłancow
Zo dźěći sčasom płuwać nawuknu
Wojerecy (AK/SN). Łužiska kupjel we Wojerecach, kotruž wot lěta 2023 z pjenjezami za strukturnu změnu modernizuja, ma nětko druhi 25 metrow dołhi płuwanski basenk. Wuhotowana je płuwanska hala z parcoursom, po kotrymž móžeš wisajo so pohibować. Dale je basenk hłuboki dosć za nurjenje. Nimo toho maja sportowu rumnosć za gymnastiku a dalše kursy. Nowy wobłuk hodźi so za šulske a towarstwowe płuwanje kaž tež za prewenciske kursy. „Zajim za to je jara wulki“, praji jednaćel kupjele Matthias Brauer wčera při přepodaću basenka, runje na cyłoněmskim dnju kupanskeho mištra. Wot 29. meje móže zjawnosć płuwarnju wužiwać. W awgusće chcedźa potom cyłkownje modernizowanu Łužisku kupjel přepodać.
Na Budyskej Bohatej hasy je wot wčerawšeho wulki zmij po serbskej ...
Krótkopowěsće (23.05.25)
Wjele městnow njewobsadźenych
Kamjenica. Wot dohromady 16 500 wukubłanskich městnow w Sakskej dotal 60 procentow – něhdźe 10 000 – hišće wobsadźenych njeje, to zdźěli regionalna direkcija dźěłoweje agentury w Kamjenicy. Jeje wicešef Steffen Leonhardi podšmórny: „Statistisce mamy za kóždeho požadarja přizjewjene wukubłanske městno“.
Widźomnosć mjeńšinow zaručić
Berlin. Team mjeńšinoweho sekretariata – Roman Kühn, Nele Feuring a Carolin Renner – zetka wčera zapósłanču zwjazkoweho sejma Denise Loop (Zeleni). Njedawno bě so team hižo ze zapósłancom sejma Stefanom Seidlerom (SSW) zešoł. Tema rozmołwow bě róla parlamentariskeho kruha za mjeńšiny. Zaměr kruha je, zo so na mjeńšiny w nowej legislaturnej periodźe njepozabudźe.
„Leopardy“ a čěske mosty
Za mejemjetanje fotografowali
Šćežka sej wjace zajima zasłuža
Składnostnje mjezynarodneho dnja pčołkow je bywši Malešanski wjesnjanosta Günter Sodan wutoru na pućowanje po šćežce Hadama Bohuchwała Šěracha w Budyšinku přeprosył. Šćežku běchu 2023 na iniciatiwu Güntera Sodana w zwisku z 250. posmjertnymi narodninami Šěracha wotewrěli. Wona je 4,7 kilometrow dołha. Podłu njeje su informaciske tafle nastajene. Wone nimo ducych w serbskej a němskej rěči wo žiwjenju pčołkow informuja.
Za čas pućowanja wopokaza so Günter Sodan jako wuběrny fachowc na polu pčołarstwa. Předewšěm do skutkowanja a slědźenja Hadama Bohuchwała Šěracha je so wón hłuboko zanurił. Wosebje wutrobna naležnosć je jemu, zasłužby Šěracha jako horliweho Serba wuzběhnyć. Po měnjenju Sodana nimaja Serbja wjetšeho tak připóznateho wědomostnika kaž bě to Šěrach. Samo kralowna Habsburgskeho mócnarstwa Maria Theresia chcyše Šěracha na swojim kralowskim dworje měć.
Zhudźbnjene basnje zaklinča
Budyšin. Składnostnje 70. narodnin Jana Cyža a 60. narodnin Tima Meškanka wuhotuje Serbski ludowy ansambl w bašće swojeho domu hudźbno-literarny wječor „Zynki a linki“. W Sorabistiskim instituće w Lipsku skutkowacy filologa a historikar Timo Meškank je před lětami basnje spisał a wudał. Ze zběrkow „pój do rejki …“ a „rěč je hrajka ...“ je Jan Cyž loni někotre jeho teksty wubrał a je za spěwne solo a klawěr zhudźbnił. Kompozicije přednjesetaj spěwar Pětr Cyž a pianist Paul Bernewitz prapremjernje. Dalše literarne teksty čita Hanka Rjelcyna, mjez druhim dožiwjenje Jurja Winarja za čas studija w Drježdźanach ze swojim kuzenkom Maksom Rječku a dźědom Timom Meškankom. Hudźbny wječor budźe pjatk, 23. meje, w 19.30 hodź. w bašće Budyskeho Serbskeho ludoweho ansambla. Produkcija z tekstami Tima Meškanka a hudźbu Jana Cyža předstaja posledni raz.
Na filmowy wječor
Přihotuja jubilejny swjedźeń
Němcy (KD/SN). Hižo dołho je w Němcach z wašnjom, zo wjesny klub, młodźinski klub a dobrowólna wohnjowa wobora najwšelakoriše swjedźenje hač camprowanje abo adwentničku zhromadnje organizuja a so tež we wobydlerskim domje, na nawsy a wokoło wětrnika wo porjad staraja. Tuchwilu přihotuja so wšitcy zhromadnje na wjesny swjedźeń z mejemjetanjom. Tón swjeća wot 23. do 25. meje mjeztym hižo 50. raz, rozłoži Jens Scheibe. Jako čłon wjesneho kluba přeradźi, zo budu pjatk wječor reje z kapału za trochu zralše generacije, młodźina pak změje sobotu swoju wosebitu party. Tež wjesna dźiwadłowa skupina so na jubilej přihotuje. Pjatk planuja kruch za dorosćenych, sobotu pak pokazaja bajku za dźěći.
Tohorunja sobotu mjetaja tradicionalnje meju. Cyłkownje 15 porow rejuje potom wokoło meje, praji Christoph Kochta. Njedźelu organizuje wjes program, w kotrymž zhladuja mjez druhim na minjenych 50 lět. K tomu přeprosychu sej Wojerowskeho wyšeho měšćanostu Torstena Rubana-Zeha (SPD), zdźěli Bert Zillich. Wón přisłuša wjesnemu klubej runje tak kaž wohnjowej woborje.
