Kubłanišćo jubilej swjećiło
Dyrbja dale na rozsudy čakać
Worklecy (MDź/SN). Na zašłym posedźenju gmejnskeje rady we Worklecach su radźićeljo hospodarski plan za 2024 wobzamknyli. W šuli su mjez druhim předwidźane dźěła za wohnjoškit, ale tež Worklečanska kupa je dalše ćežišćo, štož inwesticije gmejny nastupa. Dalše wudawki planuje gmejna Worklecy za ponowjenje a zwuporjedźenje pućow. Tež kolesowanska šćežka mjez Worklecami a Nowej Wjesku ma so ponowić. Za Worklečansku pěstowarnju je něhdźe 10 000 eurow za twarske naprawy zaplanowanych a gmejna chce w přichodźe trjebane mustwowe awto za tamnišu wohnjowu woboru kupić. Dale ma so hašenski plan nastajić, zo bychu wohnjowi wobornicy w nuzowym padźe wědźeli, zwotkel maja wodu za hašenje brać.
Při wupisanju nowe puće šli
W Rodecach nastanje kulturne a zetkawanske srjedźišćo
Rodecy (SN/MWj). Wulki wokomik bě minjeny štwórtk w Rodecach (Rodewitz) w Bukečanskej gmejnje. Po pjeć lětach přihotow a planowanja bě tam symboliski prěni zaryw za nowe kulturne a zetkawanske srjedźišćo. Wone ma nastać na městnje dotalneho, kotrež bě dodźeržane. Za to inwestuje gmejna 2,9 milionow eurow. Tule sumu dóstanu z hornca za změnu strukturow z 90 procentami spěchowanu. W nowotwarje nastanu mjez druhim wubědźowanske kehelnišćo ze štyrjomi čarami, rumnosće za techniku a skład a předewšěm na wšelakore wašnje wužiwajomna towarstwowa a zhromadźenska rumnosć, kotruž budźe šěroka zjawnosć wužiwać móc, informuje Bukečanski wjesnjanosta Thomas Meltke (njestronjan). „Na te wašnje zawěsćimy gmejnske kulturne zarjadnišćo z regionalnym wuznamom, kotrež identitu wobydlerjow skrući“, praji wjesnjanosta.
Fortuna kartki rozdźěliła
Wot ćaha do busa nětko jednorišo
Slepo (AK/SN). Štóž chce w Slepom wot ćaha do busa abo nawopak přestupić, móže to nětko wěsćišo a njekomplikowanišo činić. Minjeny štwórtk přepodachu tam małe nowe busowe dwórnišćo při přichodnym lěkarskim domje. Krajny zarjad za dróhotwar a wobchad, ZVON a Slepjanska gmejna inwestowachu dohromady 620 000 eurow.
Nimo městnow za busy nasta 16 parkowanskich městnow za awta, dwě dalšej za awta zbrašenych, stejaki za kolesa kaž tež ławki. Z busoweho dwórnišća wotjědu tři busowe čary. Při nabiwanskej staciji móžetej dwě elektroawće naraz milinu tankować. „Z busowym dwórnišćom mamy nětko porjadne a přewidne wobchadne wjedźenje“, praji Slepjanski wjesnjanosta Jörg Funda (CDU). Bjez zadźěwkow móža tež ći do busa zalězć, kotřiž maja dźěćacy wozyčk abo kotřiž su na chorobny stoł pokazani. Šoferojo busow móža swoje jězdźidło wěsće parkować a nuzniki w přichodnym lěkarskim domje wužiwać. „Poradźiło so je, městno žiwe a přewidne wuhotować“, rjekny jednaćel ZVON Christoph Mehnert.
Wulki wokomik bě pjatk popołdnju we Łusču w Bóšičanskej ...
Krótkopowěsće (03.06.24)
Dalši zajimc so přizjewił
Wětošow. Za wobhospodarjenje Radušanskeho słowjanskeho hrodźišća staj nětko dwaj zajimcaj. Nimo Załožbje Slavonic Europe je to Choćebuske předewzaće JES tzwr, kotraž je znate pod mjenom „Die Bademeusel“, wobkrući nětko měšćanski zarjad we Wětošowje. Předewzaće z Łužicy chce so předewšěm poskitkam za dźěći wěnować.
Błysk na swjedźenju zadyrił
Liberec. 18 ludźi, mjez nimi dźewjeć dźěći, přebywaše na dźěćacym swjedźenju w parku, jako błysk zadyri. Wjetšina z nich běše nachwilnje bjez wědomja, nichtó pak njeměješe wopalenja – to zdźěli rěčnik chorownje w Liberecu. Jedne dźěćo wuleća helikopter do uniwersitneje kliniki w Praze.
Čěsku Šwicu spřistupnić
Wšitko kołowokoło Krabata
Wojerecy. Z wulkim swjedźenjom we Wojerowskim Łužiskim centeru zahaja tam jutře jubilejne tydźenje k 400. narodninam Janka Šajatovića alias Krabata. Po zahajenju w 11 hodź. Gabriela Linakowa jako připołdnica serbske baje powěda. W samsnym času započnje so dožiwjenska tura z Krabatom a jeho pisarjom. W 14 hodź. powjedu po historiskej rjadowniskej rumnosći, kotruž maja tam natwarjenu. Hač do 25. junija čakaja na wopytowarjow najwšelakoriše poskitki.
Pytaja hodowny štom
Budyšin. Hač do adwenta drje je hišće dołha noha, přiwšěm pyta Budyski krajnoradny zarjad hižo nětko hodowny štom, kiž ma w adwenće před krajnoradnym zarjadom na Dwórnišćowej stać a so swěćić. Štóž maksimalnje dźesać metrow wulki jehlinowc we wobkruhu 15 kilometrow wokoło Budyšina ma a chce jón darmotnje wotbyć, njech přizjewi so e-mailnje hač do kónca julija pod adresu .
Meju mjetali a zhromadnje swjećili
Policija (31.05.24)
Rentnarku do rozmołwy zapletli
Budyšin. Jako chcyše wuměnkarka srjedu w pjenježnym instituće na Weinertowej w Budyšinje z awtomata pjenjezy wotzběhnyć, zaplećechu ju njeznaći do rozmołwy. Při tym wuskušichu mužej a žona tajne čisło 86lětneje a samo jeje kartku z awtomata wzachu. Na to wotzběhny wobšudniska trójka wjace hač tysac eurow z konta staruški. Policija před tymle trikom warnuje a prosy, staršich swójbnych na to skedźbnić.
