Policija (01.07.25)
Lětadło přizemić dyrbjało
Nowe Poršicy. K nuzowej situaciji z ultralochkim lětadłom je njedźelu popołdnju w Nowych Poršicach wuchodnje Budyšina dóšło. Krótko do 16 hodź. dyrbješe tam mašina typa Icarus C 42 A na rěpikowym polu při statnej dróze S 111 přizemić. Kaž policija rozprawja, měješe lětadło po starće w Lětonju po wšěm zdaću techniske problemy z wodźidłom. 48lětny pilot so na zbožo zranił njeje. Lětadło pak bu sylnje wobškodźene. Škodu trochuja na něhdźe 70 000 eurow. Statnu dróhu dyrbjachu sčasami zaraćić.
Hašenske awto w konsumje stało
Zo bychu so ludźo před wohenjemi škitali, su před něhdźe połdra lětstotkom tež w Hornjej Łužicy wohnjowe wobory załožeć započeli. W našej lětnjej seriji chcemy někotre z nich předstajić a jich stawizny rozłožić. (1)
Rady dopomina so nětčiši nawoda dobrowólneje wohnjoweje wobory Bóšicy, 44lětny André Macala, na čas swojeho dźěćatstwa. Jako šuler zakładneje šule w Bóšicach je so z nanom, kiž bě aktiwny čłon wobory, wjacore razy z Łusča na zwučowanja wobory do Bóšic podał. Tehdyši nawoda Jurij Just zbudźi w hólčecu zajim za woborne dźěło. Tónle zajim André Macala spušćił njeje, jako do Njeswačidła do šule a pozdźišo na gymnazij do Budyšina chodźeše. Jako technikar za elektroniku dźěła dźensa w Budyskich wodowych zawodach.
Nakupowali a so rozmołwjeli
Na kromje folklorneho festiwala žiwe wuměłske rjemjesło prezentowali
Chrósćicy (JK/SN). Njeparujomny wobstatk folklorneho festiwala „Łužica – Łužyca – Lausitz“ su wiki wuměłskeho rjemjesła. Tomu tež minjeny kónc tydźenja na 15. festiwalu tak bě. Sobotu popołdnju, w času najwjetšeje horcoty, běchu prěni wuměłcy a rjemjeslnicy swoje stejnišća na Chróšćanskej nawsy njedaloko něhdyšeho gmejnskeho zarjada natwarili a swoje wudźěłki prezentowachu. Serbski konsum Hanušec mandźelskeju, škleńčane twory Birgit Patokoweje z Horow a keramika Marije Šołćic a Marlis Sperlingoweje kaž tež železne twory běchu tam zastupjene.
„Zahroda, to je mój swět. Tam mi pčołki noša měd.“ To je ...
Krótkopowěsće (01.07.25)
Online-galerija
Hladajo na wulke mnóstwo festiwalnych fotow w našim wčerawšim ćišćanym wudaću smy optimistiscy, zo was njedospołnje wotćišćaneho QR-coda dla njepřistupna online-galerija přejara tyšiła njeje. Na tutym městnje Wam jón hišće raz podamy.
Club z nowym předsydu
Budyšin. Lions Club w Budyšinje ma wot dźensnišeho noweho předsydu. Po tym zo bě so dotalny předsyda Rainer Welfins rozžohnował, nastupi 53lětny Stephan Kretschmar zastojnstwo prezidenta. Lions Club wostanje dale sylny partner za pomocne projekty w Budyskim regionje a angažowany dźěl organizacije Lions, kotraž je w 200 krajach po wšěm swěće aktiwna a ma wjace hač 1,4 milionow sobustawow.
Piwarnja w boju za wodu
Nošovice. Čěska piwarnja Radegast je kampanju „Bój wo wodu“ zahajiła, z kotrejž skedźbnja na woteběrace mnóstwo wody w regionje. Dobrowólnikam poskići jako myto 2 030 sudow za dešćowu wodu z wobjimom 200 litrow. Z tutymi sudobjemi móža hromadźe 8 milionow litrow wody lětnje zběrać. Cil piwarnje je, hač do lěta 2030 w krajinje wjace wody nahromadźić, hač při produkciji piwa přetrjeba.
Přihladowarjow do kłobukoweje reje zapřijeli
Wječor na farskim dworje bě wulki wuspěch, kotryž hladajo na wysoke temperatury žane přidatne „zatepjenje“ njetrjebaše. Nalada bě hižo wjesoła a farski dwór hač na poslednje městno pjelnjeny – znamjo za horliwosć a žiwu atmosferu, kotruž XV. mjezynarodny folklorny festiwal ŁUŽICA postaješe. Wječor połny žiwych rejow, zahorjaceje hudźby a pisanych drastow je publikum putał. Wo šarmantnu moderaciju staraše so tam Clemens Handrik.
Nimo Serbskeho ludoweho ansambla a folklorneje skupiny HONT ze słowakskeje Krupiny, kotrejž publikum zahorištej, wobradźi tež Serbski folklorny ansambl Wudwor ze skupinu Přezpólni wopytowarjam jimace dožiwjenje bohateje tradicije serbskeje folklory na awtentiske wašnje.
Swojoraznu atmosferu sej lubić dali
Znajerjo Chróšćanskeho folklorneho festiwala wědźa sej Koklic dwór jako wosebitostku wažić: Wot wjesneho srjedźišća trochu zdaleny wabi historiski statok z tykowanym domskim ze swojoraznej atmosferu. Byrnjež skerje mjeńši był, su tam zamołwići jewišćo natwarili, kotrež skićeše tež wjetšim skupinam dobre wuměnjenja.
Wjele městna trjebaše předewšěm Smjerdźečanska rejwanska skupina, kotraž předstaji sobotu wječor šěroku paletu swojich wuměłskich zamóžnosćow. Tak překwapi dorostowa skupina z nowej reju. Po dobrej tradiciji pak prezentowachu so tež rejowarki a rejwarjo nic cyle tak młodeje generacije, kotřiž mjenuja so „Wotawa“ a „Rosa“. Po programje přewodźeštaj jich młodaj moderatoraj Jan Kliman a Claudius Buša. Jimaj poboku bě nazhonity Danko Handrik.
Mjezynarodnje prezentowachu so na Koklic dworje Grupo de Dancas de Cantares de Perre z Portulgalskeje a kulturni zastupnicy madźarskeje mjeńšiny w Rumunskej Pipacsok Néptáncegyüttes.
Słowjanska, južnoameriska a afriska žiwjenska radosć
Zwjetša kopaty połny Krawčikec-Kušec dwór bě z hosćićelom štyrjoch skupinow. Trójce předstajichu Grupo de Danzas Folclóricas Carmen López de la Universidad del Valle z Kolumbiskeje, Zespół Regionalny Mystkowianie z pólskich Beskidow a folklorny ansambl Písečan z južneje Čěskeje swój program. Finale wuhotowaše Ballet Saly Velingara ze Senegala ze spektakularnej demonstraciju polyrytmiki.
Pisany swět z hosćom na burskich statokach
Z pisanymi folklornymi poskitkami na pjeć burskich statokach w Chrósćicach dožiwi XV. mjezynarodny folklorny festiwal Łužica sobotu swój wjeršk. Miły lětni wječor zwabi tysacy wopytowarjow do wsy. Na wšitkich dworach kaž tež na puću před nimi běchu najwšelakoriše gastronomiske poskitki spřihotowane. Wone sahachu wot pječeneje truty přez plincy hač k praženemu swinjeću. Hač do nocy wopytowarjo wot dwora k dworej dundachu a wukrajnym kaž tež łužiskim skupinam přihladowachu. Zdźěla tež na pućach hudźba zaklinča a wopytowarjow do rejki pohnu.
Z bubonami a rejemi zapyrili
Jako sobotu dypkownje w 19 hodź. festiwalna fanfara zaklinča, bě Zahrodnikec-Grutkec statok hižo derje pjelnjeny. Wšako móžachu tam ludźo derje powječerjeć. Nimo praženeho swinjeća a buchtlow z waniljowej jušku woptachu mnozy langoś. Tón poskićowachu w hornjoserbskej, delnjoserbskej a originalnej warianće. Na njón dyrbjachu hosćo lědma dołho čakać, dokelž bě sej Zahrodnikec swójba dobru logistiku zarjadowała. Kaž na štryčku fungowaše zdobom posłužowanje z napojemi, wo čož so přewažnje Grutkec swójbni starachu.
