Wjelelětnu wučerku rozžohnowali
Film wo wsy připóznaće žnjał
W Nowej Wjesce bě kónc tydźenja lóštny wjesny swjedźeń
Nowa Wjeska (EM/SN). Tři dny knježeše kónc tydźenja w Nowej Wjesce móhłrjec wuwzaćny staw. Kóždolětny wjesny swjedźeń přiwabi wjele wopytowarjow zbliska a zdaloka a skićeše wšitkim generacijam wotměnjawy program.
Pjatk wječor zahajichu swjedźeń z 2-euraj-party. Z tradicionalnym natočenjom piwa so kónc tydźenja oficialnje započa, hudźbny přewod přewza DJ „DehnSound“. Při najlěpšej naledźe hač do pózdnjeje nocy swjećachu.
Sobota steješe cyle w znamjenju zhromadnosće. Pjeć mustwow nastupi k prěnjej Nowowješćanskej klubowej olympiadźe. Mjez druhim dyrbjachu na synowu hromadu zalězć, traktorowu wobruč mjetać a so po wodowym suwadle suwać. Po dwěmaj hodźinomaj wopokaza so mustwo „High5“ z Worklec jako najlěpše. Za nim sćěhowaše mustwo z Noweje Wjeski. Runočasnje přewjedźechu pisany dźěćacy swjedźeń ze wšelakimi stacijemi a woblubowanej krosnowanskej žerdźu. Z tym wobradźichu małym wopytowarjam wulke wjeselo.
Spěwaja na pohrjebnišću
Dwórnišćo dlěje saněruja
Wojerecy (AK/SN). Ponowjenje Wojerowskeho dwórnišća traje po wšěm zdaću lěto dlěje hač spočatnje předwidźane. Hakle wot lěća 2027 budu pućowacy nastupnišći 3 a 4 kaž tež tři nowe lifty wužiwać móc. Na to skedźbnja rěčnik Němskeje železnicy Jörg Bönisch.
Třěšna konstrukcija nastupnišća je bóle zerzawa, hač bě do toho wotwidźeć. Tuž dyrbja nowe třěchi natwarić. „Nimo toho su ćežke geologiske poměry tomu wjedli, zo nowy tunl za pěškow sčasom njedotwarja.“ Tohodla trjebaja wjace časa, praji Jörg Bönisch. Němska železnica ponowja dwórnišćo hromadźe ze Swobodnym statom Sakskej, z wobchadnym zwjazkom VVO a dalšimi partnerami. Twarske dźěła wukonja Budyska firma Hentschke. Projekt płaći 21 milionow eurow.
Z třomi liftami budu předewšěm zbrašeni a pućowacy z ćežkimi kóframi abo z kolesami nastupnišća lěpje docpěć móc. Tam připrawja dospołnje nowe wobswětlenje. Z nowym tunlom nastanje direktny zwisk wot nastupnišćow na naměsto před dwórnišćom.
Lěćny čas wužiwaja za twar dróhow
Dróhotwarske projekty so poprawom cyle lěto zwoprawdźeja. W lětnich měsacach pak so wone kopja, kaž ze zdźělenkow Budyskeho wokrjesa a krajneho zarjada za dróhotwar a wobchad wuchadźa.
Chrósćicy (SN/MWj). Štóž je wšědnje z awtom abo kolesom po puću, wuhlada stajnje zaso twarnišća na dróhach. Byrnjež zwjetša nuznje trěbne byli, su wone za šoferow často mjerzace, dokelž dyrbja jich dla wokołopuć na so brać. Wokoło Chrósćic tuchwilu hnydom na dwěmaj městnomaj twarja. Hižo wot 23. junija ponowjeja dróhu do Wudworja. W tym zwisku busowej zastanišći při wotbóčce do Kozarc tak wutwarja, zo móža jej tež zbrašeni bjez zadźěwkow wužiwać. Za čas folklorneho festiwala drje bě wobchad tam dowoleny, tola nětko je dróha zaso zawrjena, a to hišće hač do 8. awgusta.
Z koncertom wustajeńcu zahajili
Krótkopowěsće (07.07.25)
Rěčne prózdninske lěhwo zahajili
Wodowe Hendrichecy. Z 78 dźěćimi a młodostnymi 4. do 8. lětnika je Serbske šulske towarstwo (SŠT) sobotu swoje rěčne prózdninske lěhwo we Wodowych Hendrichecach zahajiło. Hač do přichodneje póndźele stara so šěsć čłonow organizaciskeho a dohladowanskeho teama pod nawodom koordinatorki SŠT Marlis Młynkoweje wo wotměnjawy program, mjez druhim z dźěłarničkami na polu hudźby, sporta a techniki.
Katamaran so powróćił
Zhorjelc. Z katamaranom bě muž sobotu ze swojej žonu na Bartonjanskim jězoru pola Zhorjelca po puću. Tutón so z njewujasnjenych přičin powróći. Žona móžeše so sama wuchować, muža pak sobudźěłaćerjo Čerwjeneho křiža z wody wućahnychu, reaniměrowachu a, ručež bě stabilny, do chorownje dowjezechu.
Serbska kultura ludźom wažna
Sprjewine město zasłužbneho wobornika počesćiło
Budyšin (ES/SN). Z Čestnym woponom města Budyšin bu tele dny Heinz Ebersbach počesćeny. To je druhe najwyše wuznamjenjenje, kotrež sprjewine město zasłužbnym wobydlerjam spožča.
Heinz Ebersbach njeje w lětdźesatki trajacym njesprócniwym dźěle jenož stawizny Budyskeho wohnjoweho wobornistwa wuslědźił a we wobšěrnej knize předpołožił. Wón je so tež za to zasadźował, zo by so pomnik restawrował, kotryž na třoch wuznamnych wohnjowych wobornikow dopomina. Woni su 16. nowembra 1876 při wohenju w Budyšinje zahinyli. Mužojo woprowachu swoje žiwjenje, zo bychu hóršemu zadźěwali. Muschik, Pötschke a Nimschke su woni rěkali. Dźensa je wo nich lědma něšto znate. Kaž hodźeše so dotal wuslědźić, mějachu najskerje samo serbske korjenje.
