Dale a mjenje apotekow

Budyšin. Po cyłej Sakskej je dale a mjenje apotekow. W někotrych kónčinach mjez druhim w Budyskim a Zhorjelskim wokrjesu dyrbja ludźo dlěše puće na so brać, zo móhli do apoteki, zdźěli wčera prezident sakskeje komory apotekow Göran Donner. Předewšěm za staršich wobydlerjow a starši z mjeńšimi dźěćimi je situacija wobćežna.

Piwarz maturantow přewodźa

Budyšin. Abiturienća Budyskeho Serbskeho gymnazija zhonja dźensa wuslědki maturitnych pruwowanjow. Rano su při zachodźe přichadźacym šulerjam a wučerjam na swojim poslednim šulskim dnju z Abi 2024 čoło popisali. 10. a 11. lětnik kubłanišća přebywatej dźensa na planowej hrě POL&IS zwjazkoweje wobory. Tam jich sakski minister kubłanja Christian Piwarz (CDU) přewodźa.

Pytaja rjekow turizma

Budyšin. 1. serbska kulturna brigada přeprošuje wšěch nanajwutrobnišo na swój 75. załoženski jubilej, sobotu, 1. junija, wot 17.30 hodź., do Budyskeje „Króny“. Na wopytowarjow čaka wotměnjawy wječor ze swjedźenskim programom, kiž da přehlad wo bohatej dźěławosći brigady a kiž wobsahuje tójšto překwapjenkow. Zo bychu wšitcy mócnje sobu spěwać móhli, je za kóždeho spěwnik z hudźbnymi chłóšćenkami wšěch lětdźesatkow spřihotowany. Swjedźenskemu programej, kiž so we 18.30 hodź. za­počnje, přizamknje so zabawny wječor z rejemi, ze zhromadnym spěwom a z dalšimi informacijemi a hudźbnymi přinoškami. K rejam zahudźi skupina Holaski. A zo njeby nichtó hłódny abo lačny był, postara so do programa a po nim Wawrikec cateringowy servis wo ćělne derjeměće. Tuž wobstarajće sej tiket (digitalnje abo analognje w SLA abo při wječornej kasy) a swjećće sobu! Brigadnicy, kotřiž su so pilnje na program přihotowali, wšitkich wutrobnje witaja.

Gmejny zhromadnje nowe wohnjowoborne awta kupili

Bukecy (SN/MWj). W štyrjoch gmejnach Budyskeho wokrjesa – w Malešanskej, Kubšiskej, Rakečanskej a Bukečanskej – smědźa so wot njedawna nad nowym wohnjowobornym hašenskim awtom wjeselić. Ze zhromadnej skazanku su štyri komuny dohromady pjeć hašenskich jězdźidłow kupili. Organizaciju a wob­staranje měješe Bukečanska gmejna na starosći. Tohodla su tam minjeny pjatk nowe jězdźidła zjawnosći předstajili a wobornikam přepodali. Nimo wobstajneho spěchowanja za nakup nowych jězdźi­dłow podpěruje Swobodny stat Sakska tajku zhromadnu skazanku z dalšimi 20 procentami. Tak móžachu kónc lěta 2021 nowe jězdźidła wupisać. W měrcu 2022 dósta firma Magirus z Ulma nadawk, je twarić. Při planowanju su rozdźělne naroki wobdźělenych wohnjowych woborow wothłosowali. Kónc apryla móžachu wobornicy w Malešecach, Budyšinku, Kubšicach, Rakecach a Bukecach swoju nowu techniku přijimać. Cyłkownje inwestowachu za nju 1,8 milionow eurow. Z toho je 810 000 eurow spěchowanja. „Z tym přinošuja wšitcy wobdźěleni k wjetšej wěstoće wobydlerjow.

Žiwe płoty zapalili

Kamjenc. Zapalerjo běchu w nocy na póndźelu w Kamjencu po puću a su wjacore žiwe płoty zapalili. Stało je so to na Njeswačanskej dróze, blisko Marijneje cyrkwje a na Dittrichowej. Dwójce su wobydlerjo płomjenja hašeli, jónu wohnjowi wobornicy. Nětko pyta policija swědkow, kotřiž su něšto wobkedźbowali.