Tři mejske kralowske pory měli
Premjery w bróžni zahorili
Wjace hač 300 wopytowarjow na nalětnim koncerće Lipy
Pančicy-Kukow (SN/MWj). Pod trochu wušimi rumnostnymi wobstejnosćemi hač w klóšterskej zahrodźe, za to pak pod suchim dožiwi wčera wjace hač 300 wopytowarjow nalětni koncert chóra Lipa a jeho hosći. Hrožaceho dešća dla přepołožichu jón do klóšterskeje bróžnje, štož so jako prawy rozsud wopokaza. Mjeztym zo so wonka mócnje dešćowaše, knježeše nutřka mjez akterami na jewišću kaž tež mjez publikumom dobra nalada při lóštnym serbskim chórowym spěwje. Nimo Lipy wustupi jeho dorostowa skupina Lipki z něhdźe 50 dźěćimi a jako hosćo Ralbičanski cyrkwinski chór Lilija. Sobuzarjadowar koncerta bě Křesćansko-socialny kubłanski skutk. Jeho jednaćel Marko Kliman so dalšich terminow w Kamjencu dla hnydom na spočatku wšitkim sobuskutkowacym dźakowaše.
Wuhotuja prózdninske lěhwa
Mały Holešow. W lětnich prózdninach přewjedźe Njeswačanska přirodoškitna stacija tři prózdninske lěhwa na rybarskim dworje w Małym Holešowje. Dožiwjenski camp w přirodźe wotměje so wot 29. junija hač do 4. julija. Ze sakom, lupu a dalokowidom podadźa so wobdźělnicy w starobje wosom do dwanaće lět do přirody a ju wobkedźbuja. Wobdźělenje płaći na wosobu 180 eurow. W dalšim campje wot 16. do 18. julija steja insekty w srjedźišću. Přinošk za dźěći a młodostnych wot dźesać lět płaći 60 eurow. W slědźerskim campje dźěći wuslědźa, hač w hatach snano tola wódny muž njebydli. Termin je wot 20. do 25. julija a wobdźělenje płaći 180 eurow. Předwidźane je tute lěhwo za dźěći a młodostnych wot dźesać do 14 lět. Zajimcy njech přizjewja so pod abo pod telefonowym čisłom 035933 30077.
Radźićeljo wuradźuja
Worklecy. Přichodne posedźenje Worklečanskeje gmejnskeje rady wotměje so srjedu, 21. meje, w 19 hodź. w Smječkečanskim Domje swjateho Jana. Jedna z temow budźe móst nad Klóšterskej wodu mjez Worklecami a Lejpoldom. Zajimcy su wutrobnje přeprošeni.
Serbski hudźbny dorost je žiwy
Malešecy (LTh/SN). Syła wjesnjanow a Serbow zbliska a zdaloka zhromadźi so sobotu w Malešecach, zo bychu nalětni koncert 1. serbskeje kulturneje brigady dožiwili. Malešanska cyrkej bě šulerkam a šulerjam Serbskeho gymnazija Budyšin krasna kulisa. Bě to prěni wustup nimale bjez dwanatkarjow, wšako tča woni w maturitnych pruwowanjach. Šulerjo 9. do 11. lětnika program wulkotnje zmištrowachu. Spočatnje bě hišće tróšku napjatosće w jich mjezwočach, tola njewěstosć so bórze zhubi.
Krótkopowěsće (19.05.25)
Astrocentrum z partnerami
Praha. Designowany załoženski direktor Astrocentruma Łužica prof. Günther Hasinger je pjatk w čěskim zastupnistwje Sakskeje w Praze kooperaciske zrěčenje ze šěsć čěskimi zarjadnišćemi podpisał. Do kruha partnerow słušeja mjez druhim Čěska akademija wědomosćow, fakulta za matematiku a fyziku Karloweje uniwersity a fakulta za elektrotechniku Techniskeje uniwersity w Praze.
Powołanske kubłanišćo zawrjene
Wojerecy. Wojerowski powołanskošulski centrum „Konrad Zuse“ dyrbja hač do kónca šulskeho lěta zawrěć. Twarscy dźěłaćerjo běchu minjeny tydźeń strowotu wohrožowacy izolowanski material nadešli, kotryž maja fachowcy nětko we wšitkich rumnosćach twarjenja wotstronić. Hač do kónca tydźenja chcedźa zamołwići rumnosće namakać, hdźež móhli dohromady 800 šulerjow centruma hač do kónca šulskeho lěta wuwučować.
Swjedźeń mylili
Muzejowy swjedźeń z hermankom
Wojerecy. Wojerowski hród a měšćanski muzej přeměnitej so njedźelu, 18. meje, na historiski hermank. Muzejowy swjedźeń skići cyły dźeń luboznje wuhotowane atrakcije, kotrež drje dopomnjenki na dawne časy zbudźa. Na hermanku wočakuja wopytowarjow a wopytowarki wšelke zabawy. Tak móža losować, ryby łójić, pjenjezy bić abo tyzki mjetać. Mjeńši wopytowarjo změja radosć na karuselu abo při tłóčenju jabłukow za brěčku. Lubowarjo potajnych poselstwow njech pohladnu do kristaloweje kule wěšćerki Hariole Verum. Dale změja tam składnosć, so při paslenju zabawjeć a sej modelowu želenicu wobhladać. Klankodźiwadło na předstajenje přeprošuje. Na wodźenjach po hrodźe sposrědkuje Oliver Bettels jako Napoleon Bonaparte historisku wědu. Wo hudźbne wobrubjenje postara so Christian Völker-Kieschnick. Zastup je darmotny.
Započnu móst twarić
Policija (16.05.25)
Holca na balkonje zamknjena
Běła Woda. Po wšěm zdaću mylnje bě srjedu popołdnju dźesaćlětna holca w Běłej Wodźe na balkonje bydlenja zamknjena. Wobydlerka policiju informowaše, zo tam dźěćo płaka. Policisća so do bydlenja dóstachu a holcu wuswobodźichu.
Lipa, Lipki a Lilija koncertuja
Šćežki wosebitosće zwjazuja
Delanska gmejna wabi z nowymi móžnosćemi pućowanja
Róžant (SN/MWj). Po wjacorych lětach prócowanja je so nětko poradźiło wutworić wokoło Róžanta nowe pućowanske šćežki. Prěnju z nich je sej horstka zajimcow srjedu zhromadnje wotkryła. Lěpši termin za to namakać njemóžachu, přetož předwčerawšim bě cyłoněmski dźeń pućowanja. Něhdźe 20 zajimcow so při Róžeńčanskej hnadownej cyrkwi zetka a so wottam na puć nastaji.
Puć wjedźeše wobdźělnikow najprjedy do směra na Pěskecy ke kamjentnemu kruhej z bronzoweje doby. Při Kamjentnym haće posylnichu so při pikniku mjez druhim z całtu, kołbasku a twarožkom regionalnych producentow. Dalšej staciji běštej dom Jurja Brězana w Hornim Hajnku a Sernjanski rězak. Po něhdźe wosom kilometrach běchu wšitcy zaso w Róžeńće.
Sćežorej za baćony njepřihłosowali
Pančicy-Kukow (SN/MWj). Baćony skića impozantny napohlad. Wone pak móža so tež wo njeměr starać. Nic jenož wo akustiski, ale takrjec tež wo zarjadniski. Gmejnska rada Pančicy-Kukow dyrbješe so mjenujcy wčera ze sćežorom za baćonjace hnězdo we Wotrowje zaběrać.
