Pokazuja film „Připołdnica“
Budyšin. Kino w Budyskim Kamjentnym domje pokazuje dźensa w 20 hodź. sfilmowany roman „Připołdnica“ po knize Julije Franck. Film je subjektiwna chronika němskich stawiznow wot Weimarskeje republiki a doby nacionalsocializma hač do powójnskeho časa.
Spomnjeće na kěrchowje
Budyšin. Na Starym židowskim kěrchowje w Budyšinje wotměje so jutře w 14 hodź. spominanje na pogromowu nóc před 85 lětami. Na to přeprošujetej Smochčanski kubłanski skutk zhromadnje ze zjednoćenstwom přesćěhanych nacirežima Zwjazk antifašistow Sakska z.t. W swojej narěči budźe so Budyski měšćanosta Robert Böhmer słowa jimać. Po tym modli so Smochčanski farar Michael Kleiner kadiš. Mužojo, kotřiž so na zarjadowanju wobdźěla, njech staja sej kłobuk abo čapku.
Policija (08.11.23)
Pytaja swědkow
Kamjenc. Njeznaći su minjeny kónc tydźenja na ležownosći pěstowarnje na Christiana Weißmantelowej zachadźeli. Skućićeljo su zaměrnje z kastanijemi mjetajo wokno wobškodźili a info-tafli skóncowali. Wěcna škoda wučinja 500 eurow. Po informacijach potrjechenych njeje to prěni króć. Policija pyta tuž za swědkami. Tući njech zazwonja na Kamjensku policiju pod telefonowym čisłom 03578 3520.
Wobnowja jězdnju přez Łaz
Łaz (AK/SN). Přez Łaz wjeduca statna dróha S 108 ma so wot přichodneho lěta wobnowić. Krajny zarjad za dróhotwar a wobchad (LASuV) chce tute předewzaće zhromadnje z Łazowskej gmejnu realizować. K tomu je so wutoru tydźenja gmejnska rada wuznała a je jednohłósnje za wotzamknjenje wotpowědneho twarskeho dojednanja mjez woběmaj partneromaj hłosowała. Prěni twarski wotrězk čary leži mjez Łazom a Běłym Chołmcom a wjedźe hač k zajězdej wikowanišća Penny, druhi pak leži we Łazu samym.
Wosebje hladajo na zalutowane kóšty a na wužwanje synergijowych efektow je realizacija tuteju projektow po měnjenju gmejnskich radźićelow přewšo zmysłapołna. LASuV je za ponowjenje jězdnje, gmejna Łaz pak za te chódnika kaž tež busoweju zastanišćow zamołwita a stara so zdobom wo natwar kanala za dešćikowu wodu. „Změjemy wobjězdku přez swjedźenišćo – to pak hakle po chodojtypalenju, najzašo w meji 2024“, rjekny wjesnjanosta Thomas Leberecht (CDU). Dalše twarske wotrězki sćěhuja potom po kóncu lěta 2024.
Wo projekće DZA w Slepom słyšeli
Slepo (SN/at). Slepjanam projekt Astrocentruma Łužica (DZA) zbližić chcyše wjesnjanosta Jörg Funda (CDU) z přeprošenjom prof. dr. Christiana Stegmanna do gmejny. Wčera běše tak daloko a nimale 200 připosłucharjow zhoni w dohromady štyrjoch zarjadowanjach z powołaneho erta astrofyzikarjow prof. Stegmanna a dr. Stefana Ohma wo naročnym wulkoprojekće w zwisku ze změnu strukturow we Łužicy. „Šulerjam 5., 7. a 8. kaž tež 9. lětnika Wyšeje šule Slepo njejsmoj Astrocentrum Łužica jenož rysowałoj, ale jim zdobom rozkładłoj, zo móže jich powołanska perspektiwa raz tam być“, rjekny profesor našemu wječornikej. Za kóždu skupinu wuknjacych měještaj wučbnu hodźinu k dispoziciji.
Přizamkny so do wčerawšeho posedźenja gmejnskeje rady zjawne zarjadowanje za zajimowanych wjesnjanow. Woni słyšachu tež wo grawitaciskich žołmach, kotrež chcedźa wědomostnicy w podzemskim laborje přepytować. „Mějachmy wuběrne rozmołwy. To bě wažne, zo smy so jako Astrocentrum Łužica nětko tež w Slepom předstajili“, je facit prof. Stegmanna.
Krótkopowěsće (08.11.23)
Žurnalizm w Němskej spěchować
Magdeburg. Z wobzamknjenjom je zjězd Zwjazka žurnalistow Němskeje (DJV) wčera w Magdeburgu zwjazkowe a krajne knježerstwa namołwił, zo bychu spěchowanje žurnalizma wutworili, kotrež je wot stata zdalene organizowane. Spěchowanje měło so na dodźerženje wuměnjenjow złožować, do kotrychž liča personalnu zestawu redakcijow, wjazanje na tarif a dodźerženje přiměrjenych honorarow.
Změna strukturow wohrožena
Carny Gózd. Předewzaćelskej zwjazkaj Berlin-Braniborska (UVBB) a kraj Sakska maja hospodarske wuwiće a z tym tež wuspěch změny strukturow we Łužicy za wohroženej. „Spušćomnych politiskich rozsudow a jasnych konceptow dotal nimamy. Energijowa kriza, wójna, běrokratija a falowacy fachowcy su eksploziwna měšeńca“, praji prezident UVBB Burkhardt Greiff wutoru na Łužiskim forumje w Carnym Gózdźe.
Wustajeńca „pod kožu šła“
Čerwjeny buk za Krabatowu šulu
Delnjoserbske spěwy posrědkowachu dobru naladu
Ručež chór LIPA zaspěwa, je dobra nalada wěsta. Termin nazymskeho koncerta w delnjołužiskich Janšojcach běchu sej spěwarki a spěwarjo chóra LIPA z nawodnicu Jadwigu Kaulfürstowej hižo před dlěšim časom do protyki zapisali.
Z nowymi idejemi za město
Wojerecy: Chcedźa stare a nowe město zwjazać
Wojerecy (AK/SN). Wojerecy chcedźa z originelnymi, do přichoda pokazowacymi idejemi stare a nowe město sylnišo mjez sobu zwjazać. Z pomocu hač do lěta 2025 zapołoženeho projekta „Žiwe nutřkowne město“ chcedźa zamołwići tute předewzaće zwoprawdźić. Trěbna financna podpěra pochadźa z cyłozwjazkoweho programa za spěchowanje nutřkownych městow.
„Měli na stare a nowe město jako cyłk hladać a to tež wotpowědnje komunikować. Wšako žedźi so wjetšina wobydlerjow za wjetšej zhromadnosću“, wuzběhny referent towaršnosće za marketing a slědźenje wo wotbytku (GMA) dr. Eddy Donat, zašły štwórtk na informaciskim zarjadowanju na žurli Wojerowskeho hrodu. Tam su wobydlerjo kaž tež zastupjerjo wšelakich zarjadow, towarstwow a předewzaćow mjezystaw projekta předstajili. Zhromadnje z předewzaćom Wüstenrot dom a twar městow tzwr je GMA situaciju we Wojerecach přepytowała a analyzowała. Zaměr wšeho je strategiski wuwićowy koncept z konkretnymi naprawami, kotrež so w přichodźe tež přesadźa.
Policija (07.11.23)
Bobry njezbožo zawinowali
Mohorn/Běła Woda. Zhorjelski policiski zarjad zdźěli, zo su minjeny kónc tydźenja bobry wobchadne njezbožo zawinowali. Sobotu nawječor běše žona zdźěliła, zo leži mjez Mohornom a Porchowom zdónk štoma na awtodróze A 4 a zo saha hač na prawu jězdnju. Krótko po tym přizjewi so žona w Běłej Wodźe pola policije a zdźěli, zo je jej štom na awto padnył. Policisća zawěsćichu slědy. Po dopóznaćach zastojnikow su bobry winicy: woni su štomy takrjec podrězali a dalše štomy we wokolinje nahrymzali. We woběmaj padomaj njebu nichtó zranjeny. Wěcna škoda wučinja dohromady 2 400 eurow.
Dary do Pólskeje
Zejicy. W Zejicach su pomocnicy minjenu sobotu we wobłuku akcije Towarstwa Cyrila a Metoda „Łužica pomha“ dary za Zwjazk Carity w Ełku w sewjernej Pólskej nakładowali. Direktor Carity tamnišeje diecezy, prelat dr. Dariusz Kruczyński, kiž wudźeržuje hižo nimale lětdźesatk styki do Łužicy je dary wotewzał. Na podlěšenym transporteru njeběše dosć ruma za wšitke pakćiki. Tuž dyrbi dalši króć awto přijěć, zo by zbytne dary wotwjezł.
Nowe wotewrjenske časy
Budyšin. Smolerjec kniharnja je wot tutoho tydźenja zaso po zwučenych časach wotewrjena. Ludowe nakładnistwo Domowina zdźěli, zo wočakuja tamniši sobudźěłaćerjo kupcow kaž tež zajimcow wot póndźele do pjatka wot 10 do 17 hodź. we wobchodźe. Do bohateho poskitka knihow LND słušeja wjacore nowostki. Mjez nimi su prěnja basniska zběrka Sylwije Šěnoweje „Mosty přez morjo“, za najmłódšich čitarjow klasiske powědančko Theodora Stroma „Mały Huzolak“ w přełožku Andreje Chěžcyneje kaž tež młodźinska antologija „Prěni raz“ za čitarjow wot dwanaće lět. W 4. nakładźe předleži kniha Trudle Malinkoweje „Ufer der Hoffnung“.
